Mateo 12

Soua lapaxaguenataqa so Jesús napo'c ana ala na nanguishic so na'a'q mataxaqui

(Marcos 2.23-28; Lucas 6.1-5)

1Huo'o so na'a'q mayi mataxaqui, nachi so Jesús i'axasoxootelec so nanaxanqa'. Qaq soua lapaxaguenataqa ÿataqta huo'o na lqouaqa', nachi napoctrashigue'm na ala na trigo, nachi chictrac ana ala. 2Nachi nam ÿalectaigui na fariseopi co'ollaq ÿauaachigui de'eda, nachi qoÿinapega so Jesús, qoÿiita':

–Ña 'aula'a nam 'adapaxaguenatacpi i'ottac dam n'onataxanaxac mayi sa ishit da qaichitapec yi na'a'q mataxaqui.

3Nachi somayi 'enapeco':

–¿Sa ishito' peta'a da qautaxaÿaxañiÿapec da 'eetec so David co'ollaq huo'o so na'a'q somayi qataq soua lÿata'pe ÿataqta huo'o na lqouaqa'? 4Nachi somayi huenoxonoigui so lma' ñi Dios, nachi chic aso panpi mayi qoÿanot ñi Dios, asom sa ishit da huo'o ca qaÿashinem da chic, da huo'otaq 'eeta'am somayi, huo'otaq soua lÿa't, chaqnata nam ltaxaÿaxanaxanecpi na shiÿaxauapi da qaitaxaÿapegue' ñi Dios. 5Qataq qami' ¿sa ishit peta'a da qautaxaÿaxañiÿa'pe naua lqataxaco so Moisés da na ltaxaÿaxanaxanecpi na shiÿaxauapi da qaitaxaÿapegue' ñi Dios mayi do'onataxaatapoigui aso n'onaxanaxaqui da namayipi sa ishit da nmateec yi na'a'q mataxaqui, qalaq ñaqyita sa ishit da huo'o ca lasouaxashit? 6Qaq aÿim qami' shinapegalo da huo'o na hueta'a ne'ena mayi ÿataqta napacalec da l'amaqchic acam chochi n'onaxanaxaqui. 7Qaq qami' sa ishit ÿoqta da qauaÿachiñi cam naiguilo naua ñiyigui'shi l'aqtaqa ñi Dios, mayi 'eeta': “Aÿim ñishitaique da qami' qauchoxonnataxañi, qaq sa ishit da nachida da qai'añiiuo da qaÿavigaxat ca shiguiÿac da qadachitaqtaxanaqchi.” Cha'ayi da qami' qauaÿajñiita de'eda, qaq sa ishíttaxa da qauauo'oi ca lasouaxashit cam qaica ca ÿasouaxat. 8Cha'ayi na shiÿaxaua llalec, namayi nataq'en huo'o naq 'enec da huo'o ca damaxasoxoolec da qai'ot yi na'a'q mataxaqui.

Som shiÿaxaua mayi daqaqta na lhuaq

(Marcos 3.1-6; Lucas 6.6-11)

9Nachi so Jesús jec, nachi tau'a aso laponaxaqui na judiopi. 10Qaq hueta'a se'eso naponqa' so shiÿaxaua mayi daqaqta na lhuaq. Qaq cha'ayi qanshitaique da qaÿanata ca l'a' da qaÿauo'o ca lasouaxashit so Jesús, nachi qainat, qoÿiita':

–¿Peta'a ishit da qaÿashiita da qanataden ca dalolaxaic yi na'a'q mataxaqui?

11Nachi so Jesús 'enapeco':

–¿Négue't ca 'oonolec da qoñiita da huo'otaq huetoigui ca na'a'q mataxaqui da aca lalo qagueta da tangui aca nshide da huo'otaq saq jec da nqatshiguem? 12Cha'ayi ¡ca shiÿaxaua ÿataqta napacalec da lashiichiÿaxac acam chochi qagueta! Qaq ÿoqo'oyi ishit da qai'ot ca ÿaÿamaqchiguiñi naua na'axa'te mayi mataxaqui'.

13Nachi so Jesús 'enapega so shiÿaxaua 'eeta':

–Ña 'ai'aneec da 'adhuaq.

Qaq co'ollaq chochi ÿaneec na lhuaq, nachi no'oita, 'eeta'am na lÿa lhuaq. 14Nachi so fariseopi huenoxoneec da detaxaÿapigui ca lataxac da qaÿalauat so Jesús.

Da n'aqtaguec co'ollaxa so Jesús

15Qaq so Jesús co'ollaq ÿaÿaten de'eda, nachi ca'ai yi'iyi hueta'a. Nachi ÿataqta qalota som shiÿaxauapi mayi ca'ategue somayi. Nachi somayi nataden 'enauac nam sa no'onpi. 16Nachi ÿanem da l'aqtac, da yaqto' sa ishit da qai'axat da chaq negue'tso somayi. 17Qaq 'eetec de'eda, yaqto' ishit da ipacchigui co'olloxochiyi dam l'aqtaxanaxac so l'aqtaxanaxanec ñi Dios mayi l'enaxat Isaías co'ollaq 'eeta':

18Que'eca nachica ca maichi ilatac, camayi maichi llica'aguishic,

qataq ÿataqta ÿauotaxat camayi,

ÿataqta ñitootapeguec.

Qaq camayi aÿim sananguit qome ñi ñi'Espíritu

da yaqto' i'axatem nam ÿotta'a't shiÿaxauapi dam shiitapeguec da i'ot.

19Camayi sa ishit da ncotatac, qataq sa ishit da i'alaqtai',

qataq sa ishit da qai'aqtega ca l'aqtac da huangui ca nqa'aicpi.

20Qataq sa ishit da chochi ÿacagaxat aca coqta mayi namaxagui,

qataq sa ishit da ÿalamat cam ncoÿadaxanaxat mayi chochi nchitapiguishiguem,

chochi ivitta'a da ime da lapaxañi cam l'onataxanaxac mayi ÿataqta ÿaÿamaqchiguiñi.

21Nachi 'enauac nam ÿotta'a't shiÿaxauapi ÿataqta huo'o da lpe'e somayi.

So Jesús qoÿiitega huo'o ca l'ec leguemaxaic

(Marcos 3.19-30; Lucas 11.14-23; 12.10)

22Huaña, nachi qaÿauegueu'a so Jesús so shiÿaxaua mayi qanamaic qataq qaicaua naua l'aqtaqa. Somayi huo'o so l'ec leguemaxaic. Nachi so Jesús no'oita naq'en somayi, nachi se'eso shiÿaxaua ishit da nauaachiguiñi, qataq huo'oi naua l'aqtaqa. 23Nachi 'enauac na shiÿaxauapi ÿataqta huo'o da l'aalaxa, nachi 'eeta':

–¿Nachida peta'a dam llalec so David de'eda?

24Qalaxayi nam ÿalectaigui na fariseopi co'ollaq hua'aqchigui de'eda, nachi 'eeta':

–De'eda shiÿaxaua mayi i'ottapeguec na n'ec leguemaxaicpi, qalaxayi do'otaxaatega da l'añaxac so Beelzebú mayi lataxala' ne'ena n'ecpi.

25Qaq so Jesús ÿaÿateetac da lhuennataxac somayipi, nachi 'enapega, 'eeta':

–Camachicague't nta'alpi da huo'otaq nÿodacachi, nachi maichi deloguiÿa't, nachi camayipi taÿa'a da nlaguiñi. Qataq ca pueblo, huo'otaq ca nhuo' l'ecpi, da huo'otaq nÿodacachi, nachi camayipi sa ishit da 'eetai'. 26Qaq nachi 'eetec nataq'en so Satanás, da huo'otaq maichi 'ico' n'ottapeguela't, nachi somayi 'eeta'am da maichi npa'agueetapeguela't. Qaq ¿huá'ago' da ishit da 'eetai' dam l'añaxac? 27Qami' qoñiitega da aÿim so'otaxaatega da l'añaxac so Beelzebú, da so'odauec na n'ecpi leguemaxaicpi. Qaq da nachi 'eetec de'eda, nachi ¿négue'to' qone' ca ÿanem da n'añaxac nam qami' quetagueto, da yaqto' i'odauec na n'ecpi? Qaq ÿoqo'oyi namayipi nachina na ichoxot da qami' qauesomiÿapec. 28Qalaxayi aÿim chigoqchigui da l'añaxac so n'Espíritu ñi Dios da so'odauec na n'ec leguemaxaicpi. Qaq damayi naigui da mashi qami' nvitalo da l'onataxanaxac ñi Dios da ilo'ogue 'enauacna.

29Cha'ayi qaica ca ishit da inoxonoigui ca lma' ca shiÿaxaua 'añaxaic da deuotaxanec na logoxotpi, da huo'otaq saxanaxa da icoñidai' camayi. Qaq chaqdata da mashi icoñidai', nachi ishit da deuotaxanec na logoxotpi.

30Qaq ca aÿim iÿottapeuga, qaq nachica ca aÿim npa'agueetega. Qataq cam sa ishit da llaponaxanaxaua, qaq nachica ca ilagaxattac cam so'ottac.

31Qaq ÿoqo'oyi aÿim qami' shinapegalo da na shiÿaxauapi 'enauac ishit da qaÿapalaxat nam lasouaxashitpi qataq nam qauem l'aqtacpi mayi nasaxauec, qalaxayi da nasaxadeec naua l'aqtaqa mayi npa'agueneto so Espíritu Santo, qaq nachinaua na i'o't da sa ishit da huo'o ca nchoxonnataguec. 32Qataq camachaqca shiÿaxaua, da huo'otaq ishiuen na shiÿaxaua llalec, qalaq camayi ishit da qaichoxoden. Qalaxayi ca nasaxauec ca l'aqtac, da huo'otaq npa'aguene' naq'en so Espíritu Santo, nachi camayi sa ishit da huo'o ca nchoxonnataguec qanqoÿin, da huo'otaq ñaq huetalec ana 'alhua qataq cam ñaq natauo.

Aca qo'ipaq maichi qaÿauatton da alaÿaxac

(Lucas 6.43-45)

33Aca qo'ipaq da huo'otaq no'on, nachi ÿataqta no'on da alaÿaxac. Qataq aca qo'ipaq da huo'otaq qauem, qaq nataq'en qauem ana ala. Qaq ÿoqo'oyi aca qo'ipaq maichi qaÿauatton da alaÿaxac. 34¡Qaq qami' n'adaxanaq llalaqpi! ¿Táloxochi ishito' da no'on ca qad'aqtaqui, yi qami' qauemaiqa? Cha'ayi nam qodap, namayi nasaxauec cam ÿataqta nlaqchigui añi qadquiyaqte. 35Cam no'on shiÿaxaua da detaqa, qalaq no'o'n naua l'aqtaqa, cha'ayi dam ÿaÿamaqchiguiñi huetagui añi lquiyaqte. Qataq cam qauem shiÿaxaua da detaqa, qalaq qauema naua l'aqtaqa, cha'ayi dam qauem huetagui añi lquiyaqte. 36Qaq aÿim qami' shinapegalo da que'eca na'a'q qom qanmit 'enauacna, nachi 'enauac qome na shiÿaxauapi maichi iuennachigui nam l'aqtacpi mayi qaica ca naigui mayi nasaxauec co'ollaxa. 37Cha'ayi qaÿachigoxotchiguilo naua 'ad'aqtaqa, qom 'am qanmit, da qaÿauo'o ca 'adasouaxashit, huo'otaq qaica.

Na qauemaicpi shiÿaxauapi iÿaxaataique da qai'ot ca n'añaxac mayi sa qaÿauanapigui

(Marcos 8.12; Lucas 11.29-32)

38Nachi nam fariseopi qataq nam dapaxaguenataxaatapeguec na nqataxacpi 'enapego' so Jesús, 'eeta':

–'Am mayi 'auapaxaguenataxaatac, sauoqtaique da 'am sauanaqchigui da 'au'ot cam n'anec mayi sa qaÿauanapega.

39Nachi so Jesús 'enapeco':

–Na shiÿaxauapi mayi qauemaicpi qataq ca'ai ñi Dios, namayipi nagui iÿaxaataique da qai'ot ca n'anec mayi sa qaÿauanapega. Qalaxayi sa ishit qome da qoÿami' camayi, cha'ayi chaqsota som n'anec mayi huaigui co'ollaxa so l'aqtaxanaxanec ñi Dios, l'enaxat Jonás. 40Cha'ayi de'eda 'eetec so Jonás co'ollaq ivi' naua tres na'axa'te qataq tres pe' da huetaigui na lauel aso late'e na nÿaq, qaq nachida qome da 'eetec nataq'en na shiÿaxaua llalec da ivi' caua tres na'axa'te qataq tres pe' da huetaigui ana 'alhua. 41Qaq ÿoqo'oyi som shiÿaxauapi mayi lma' co'ollaxa yi la ciudad Nínive, somayipi qome nachajñi que'eca na'a'q qom qanmit 'enauac ne'ena shiÿaxauapi, nachi ÿauo'o ca lasouaxashit namayipi. Cha'ayi som lma' yi Nínive ÿaxaadeec co'ollaxa naua n'onataxaco, co'ollaq i'axatem da l'aqtac ñi Dios som l'aqtaxanaxanec l'enaxat Jonás. Qaq nagui mashi qami' huetaiguilo nam ÿataqta napacalec som Jonás. 42Nataq'en asom nate'e mayi neta'ague da taguiñi, asomayi qome nachajñi que'eca na'a'q qom qanmit 'enauac na shiÿaxauapi, nachi ÿauo'o ca lasouaxashit namayipi. Cha'ayi asomayi chigoqta'a co'ollaxa yim ÿataqta qaÿoqta 'alhua da n'axaÿaxana dam laÿajnec so Salomón. Qaq nagui mashi qami' huetaiguilo nam ÿataqta napacalec som Salomón.

Som n'ec leguemaxaic mayi ñi'iguelaxa ca lma'

(Lucas 11.24-26)

43Ca n'ec leguemaxaic da ivita da ca'ai ca shiÿaxaua, nachi jec, huetalec ca tojlec 'alhua, nmittaique ca nmataqa'. Qaq da sa ishit da ÿanata, nachi deuennataxan, 'eeta': 44“Aÿim no'on da shi'iguelaxa ñi ima' mayi sachigoqtoigui caillayi.” Qaq da ivita da ñi'iguelaxa se'eso shiÿaxaua, nachi ilalec da 'eeta'am ca noÿic mayi qaica ca netaigui, qaiquelocta qataq qaÿaÿamaxatta. 45Ime, nachi ÿi'iguelaqteec da ÿi'iguena'alo soua lÿa't siete mayi ÿataqta napacalguete somayi. Huaña, nachi 'enauaque soomayi tadoigui se'eso shiÿaxaua. Huaña, nachi se'eso shiÿaxaua ÿataqta ÿacteec da aloic, saq 'en'am so hua'auchiguiñi. Qaq 'eda qome nataq'en da 'eetec ne'ena shiÿaxauapi mayi qauemaicpi.

Aso late'e qataq soua lqaÿa't so Jesús

(Marcos 3.31-35; Lucas 8.19-21)

46Qaq so Jesús ña detaqtapoigui se'eso shiÿaxauapi, co'ollaq nvideuo aso late'e qataq soua lqaÿa't. Qaq soomayi pa'atrauec, qaq nshitraique da detaxaidapegue' somayi. 47Nachi huo'o so icoyiguen so Jesús, 'eeta':

–Ada 'adate'e qataq daua 'adqaÿa't huo'oi, daamayi pa'atrauec. Qaq nshitraique da 'am detaxaidapegue'.

48Qalaxayi somayi 'enapega som ndotauo so n'aqtaxanaxac, 'eeta':

–¿Négue't acam ÿate'e? qataq ¿négue't cam ÿaqaÿañicpi?

49Nachi ÿictoiguilo soua lapaxaguenataqa, nachi 'eeta':

–'Ena nam 'eeta'am aca ÿate'e qataq cam ÿaqaÿañicpi. 50Cha'ayi camachaqcague't shiÿaxaua, da huo'otaq i'ot cam 'eetapeguec ñi ita'a mayi neta'ague da piguem, qaq nachica cam ÿaqaÿa, qataq aca ÿaqaÿa, qataq aca ÿate'e.

Atualmente Selecionado:

Mateo 12: TBSNT

Destaque

Copiar