मत्ती 6
6
कतुकारला ख्येलुपतिवाला तेरुपकी कोर्ला
1“च्याङ्से देता। कोन्छ्योककी ख्यिराङला किशी सिनी नो क्यावु लाका ल्यामुतिवा कितुप पेला ख्यिराङ मीतिवी मिङ्गाला छ्या देन्दुपला माकी। मिसियाङ देवाच्येनला ज्यु वोतुप ख्योरो पपा कोन्छ्योक नेमा ख्युरुङला काङ साङ छ्यक्तक मोथोपिवी।
2ती तप्की ख्यिराङ कतुकारला ख्येलुपतिवाला काङ रे च्यिक रे तेरुप पेला खोनक्पुतिवी मी नेमा ताङ्देन ङ्येतुपला यहूदी छ्योखाङ ताङ लामला कितुप दोके मी मिङ्गाला छ्या मादेन। वुतुङ के ङ ख्यिराङला सिरिन, तिवाला थोप गोवु छ्यक्तक ति गोमाला राङ तेरी थोम सिन्नी वे। 3तुक क्यानी ख्युरुङ कतुकारला ख्येलुपतिवाला काङ रे च्यिक रे तेरुप पेला ख्योरो लाक्पा यावी क्यावु ति लाक्पा येन्बी हाक्को माच्यिनी 4ख्योरो कतुकारला तेरुप ति छ्याकला ज्योक। तमा छ्याकला ख्योरे क्यावु लाका थोङ्गुप ख्योरो पपा कोन्छ्योककी ख्युरुङला छ्यक्तक नङ्गिवी।”
मोपोरकी कोर्ला
(लूका ११:२-४)
5“ख्यिराङ मोपोर कितुप पेला खोनक्पुतिवी दोके माकी, तिवा मीतिवी थोङ्शी नोनी यहूदी छ्योखाङला ताङ मीतिवा बङी युकुप लामकी गारीला लानी मोपोर कितुप गा किवी। तुक क्यानी तिवाला थोप गोवु छ्यक्तक ति गोमाला राङ थोम सिन्नी वे। 6ख्युरुङ मोपोर कितुप पेला खाङ्बी नाङ्ला गल्नी गो च्येनी छ्याकला ज्यु वोतुप ख्योरे पपा कोन्छ्योकला मोपोर की। तुक क्यासिन छ्याकला ख्योरो क्यावु लाका थोङ्गुप ख्योरो पपा कोन्छ्योककी ख्युरुङला छ्यक्तक नङ्गिवी। 7तमा मोपोर कितुप पेला यहूदी मिन्दुप मिरिक यम्बातिवी दोके पेतेक पेतेक सिनी मोपोर माकी, च्यिलासिसिन तिवी मोपोर बङी ताङ रिङ्बु क्यासिन खोप्रे क्यावु मोपोर ति कोन्छ्योककी सेन्गिवी सिनी नासाम तोङ्गिनोक। 8ती तप्की ख्यिराङ तिवी दोके माकी, च्यिलासिसिन ख्यिरा कोन्छ्योकला लोङ्गुप सिनाङ गोमाला के ख्यिराङला काङ गोकिवी सिनी ख्यिरा पपा कोन्छ्योकला छ्या वे। 9तुक क्यानी ख्यिराङ दुक सिनी मोपोर की,
‘ओ, देवाच्येनला ज्यु वोतुप ङ्यिरा पपा कोन्छ्योक,
कोन्छ्योककी मिङ ति चाङ्मा वुङ च्यी।
10कोन्छ्योककी ग्येल्खाप वुङ्शी।
कोन्छ्योककी नोवा देवाच्येनला छेवु दोके दी जम्बुलिङला साङ छेशी।
11हारिङ ङ्यिराङला ङ्यिमी टेङ साप समा नङ्डे की।
12ङ्यिराङला मेलोक्पा कितुपतिवाला ङ्यिरा माफ बिन्दुप दोके
ङ्यिरा क्यावु लाका मेलोक्पातिवाला माफ नङ्डे की।
13ङ्यिराङला शैतानकी खोक्पा ल्हापला ख्येल माज्यी,
यिने दुक्टा नेसुर र्होक्टे की।
ग्येल्खाप ताङ ङार ताङ मोवा ति नरी पपा कोन्छ्योककी ति यिन। आमिन।’
14दोजो ख्यिराङला मेलोवा कितुपतिवाला ख्यिरा माफ बिन्सुङ सिसिन देवाच्येनला ज्यु वोतुप ख्यिरा पपा कोन्छ्योककी साङ ख्यिराङला माफ नङ्गिवी। 15यिने ख्यिराङला मेलोवा कितुपतिवाला ख्यिरा माफ माबिन्सुङ सिसिन ख्यिरा पपा कोन्छ्योककी साङ ख्यिरा क्यावु मेलोवाला माफ मनङ्गिवी।”
ङ्युङ्नेकी कोर्ला
16“ख्यिराङ ङ्युङ्ने र्हुङ्गुप पेला खोनक्पुतिवा दोके ङो नक्पु जोनी मादे। तिवा मीतिवाला ङ्युङ्ने र्हुङ्गुप छ्या देन्दुपला ङो नक्पु जोनी देकिवी। ङ ख्यिराङला सिरिन, तिवी थोप गोवु छ्यक्तक ति गोमाला के थोम सिन्नी वे। 17यिने ख्यिराङ ति ङ्युङ्ने र्हुङ्गुप पेला खलक शल्नी गोला नुम कुनी दे। 18तुक क्यानी ख्योरो ङ्युङ्ने र्हुङ्गुप ति मीतिवाला थोङ माच्यिनी छ्याकला ज्यु वोतुप ख्यिरा पपा कोन्छ्योकला थोङ च्यी। तमा ती छ्याकला ज्यु वोतुप ख्यिरा पपा कोन्छ्योककी ख्यिराङला छ्यक्तक नङ्गिवी।”
देवाच्येनकी टोङ्बाकी कोर्ला
(लूका १२:३३-३४)
19“ख्यिरा थोक्ला जम्बुलिङला टोङ्बा माशोम। जम्बुलिङला याङ मुक्पा ग्यकिवी, च छ्यानी ना डिवी, कुर्मेनकी कुनी डिवी। 20बोरु ख्यिरा टोङ्बा ति ख्यिरा थोक्ला देवाच्येनला शोम। ते मुक्पा साङ मग्यकिवी, च छ्यानी ना साङ मोडोवी, कुर्मेनकी साङ कुनी मोडोवी। 21कनी ख्योरो टोङ्बा नोके, ते ख्योरो सेम साङ गिवी।”
जुकी दिप्लीकी कोर्ला
(लूका १२:३४-३६)
22“मिक ति जुकी दिप्ली यिन। दोजो ख्योरो मिक ल्यामु थोङ्सुङ सिसिन ख्योरो तेरी जु ठछ्येली डिवी। 23यिने ख्योरो मिक ल्यामु माथोङ्सुङ सिसिन ख्योरो तेरी जु नक्तोमी डिवी। तुक क्यानी ख्योरो सेमला वोतुप ठछ्येली ति नक्तोमी गाल्सुङ सिसिन ती नक्तोमी ति चो नक्तोमी डि ताङ?”
कोन्छ्योक ताङ टोङ्बा
(लूका १६:१३)
24“सी साङ ज्यिन्दाक ङ्यीला शब्ज्यी कि मुथुपी। च्यिलासिसिन तीकी ज्यिन्दाक च्यिकला ति ङ्यिङ्मर किवी, च्यिकला ति ङ्यिङ्ज्ये किवी। याङ्ना च्यिकला ति ताङ्देन किवी, च्यिकला ति मो बेप्किवी। ती दोके ख्यिराङ कोन्छ्योक ताङ टोङ्बा ङ्यिकरला शब्ज्यी कि मुथुपी।”
पप मिकिवुकी कोर्ला
(लूका १२:२२-३४)
25“ती तप्की ङ ख्यिराङला सिरिन, ख्यिरा मिजीकी थोक्ला काङ साप ताङ काङ थुङ्गुप ताङ जुकी थोक्ला काङ कोन्दुप सिनी पप माकी। मिजी ति साप समा सिनाङ खक्छ्येवु मिन रो? तमा जु ति कोन्दुप मज्या सिनाङ खक्छ्येवु मिन रो? 26नामगी च्यच्युमतिवाला ल्हो। तिवी सेन साङ मेदेपी, सप्ले साङ मुदुवी, तमा पङाङ नाङ्ला दुम्बुप साङ मुदुम्बिवी। यिने देवाच्येनला ज्यु वोतुप ख्यिरा पपा कोन्छ्योककी राङ तिवाला ल्हेवी। काङ ख्यिराङ याङ ती च्यच्युमतिवा सिनाङ मङ खक्छ्येवु मिन रो? 27ख्यिरा पर ने सी पप क्यानी रङगी छे चेयी साङ रिङ्बु जो थुप्किवी रो?
28ख्यिराङ च्यिला कोन्दुप मज्यी थोक्ला पप किवी? सकी पाके मेन्दोकतिवा चुक क्यानी ग्याकिवे ल्हो। तीकी हुर्ताक साङ मिकिवी, क्येलुप साङ मेक्येल्वी। 29यिने ङ ख्यिराङला सिरिन, छासे ल्यामु ल्यामु मज्या कोन्दुप ग्येल्वु सोलोमनकी साङ ती मेन्दोकतिवी नाङ ने च्यिक दोके साङ ल्यामु कोन मुथुप्नोक। 30हारिङ वोतुप ताङ सला मेला र्हेकुप सकी चला साङ कोन्छ्योककी तुक क्यानी छ्या नाङ्सुङ सिसिन, ओ तेपा अला मेतुपतिवा, ख्यिराङला याङ खोकी मङ छ्यानी मनङ्गिवी रो? 31तुक क्यानी ख्यिराङ काङ साप ताङ काङ थुङ्गुप ताङ काङ कोन्दुप सिनी पप माकी। 32दिवा तेरी ति कोन्छ्योकला ङो माशेवु मिरिक यम्बातिवी छोल्गिवी। यिने देवाच्येनला ज्यु वोतुप पपा कोन्छ्योककी ख्यिराङला ती तेरी गोकिवी सिनी छ्या वे। 33गोमाला ख्यिराङ कोन्छ्योककी ग्येल्खाप ताङ खोकी टेङ्बुला छोल, तुक क्यासिन खोकी ती तेरी ख्यिराङला ग्यप्नी नङ्गिवी। 34तुक क्यानी सली थोक्ला पप माकी। सली पप ति सला राङ क्योङ्गिवी। हारिङ खुर गोवु दुक्पा हारिङ राङ लङ्गिवी।”
Atualmente Selecionado:
मत्ती 6: xsrNT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2014, Wycliffe Bible Translators, Inc. All rights reserved.
