Matyu 4
4
SETEN JISAS KAT KAVLE VAT AY WANDƗ
1Godna waagan wandɨ maa Jisas ndinyangu lapman kavat yindɨ. Seten ndɨ kat kavle vat ay mɨla wavat yindɨ. 2Ngan ndumi vɨli nandinya ndumi vɨli kɨgɨnda lapman kwo lɨndɨ. Ngi kat gɨga wundɨ kat tɨndɨ. 3Tɨndɨ, Seten ndɨ kat vɨlaa yalaa wandɨ. Mɨn Godna nyanat tɨmeyan wamɨn maa vɨga lɨma kambak bretnat tɨgiyandɨ, waa wandɨ. 4Wandɨ maa wutaa Jisas wandɨ. God waa nyaangɨt tamba pɨlɨwutndi. Kupma pɨlɨwutndi.
Kɨta nyan bret-nao kɨvak mɨna yelavɨk lɨndeyan ana nglaatndɨ aywaa wupmak yelavɨk kɨndeyan wan apma vala. God waa nyaangɨt kan nɨma nda.
waa tamba pɨlɨwutndi waa wandɨ Jisas.
5-6Seten Jisas kat kwutaa Judana angwa ngepma Jerusalemat kalindɨ. Kaliga yiga God kat kwunatɨnja ngayna sambangemba taagandɨ, lɨndɨ. Taagalaa Seten ndɨ kat wandɨ. Godna nyanat tɨmeyan laataa kɨpmat vasaseli. God waa nyaangɨt tamba pɨlɨwutndi
God ndɨ ensel kat wandɨ maa mɨn kat vɨga
lɨgiyandi. Ana kavble yigiyamɨn. Mɨn kat
pwegwukiyandi. Ngi kat tɨga mɨna mbangɨ ana
kavle yigiyandɨ. Kwo lɨgiyamɨn
waa tamba pɨlɨwutndi waa wandɨi Seten. 7Jisas ndɨ kat wandɨ. God wandɨ, tamba pɨlɨwutnja nat nyaangɨt ngi lɨga.
God mɨna njambwi nyana ndɨ kat kavle vat ay waa ke waa
waa tamba pɨlɨwutndi waa wandɨ Jisas.
8Seten Jisas kat kwutaa woke lɨmbwilaa lan nambu nduwiat kalindɨ. Kalilaa kɨpmamba la nda kɨpmana nɨmba aywaa ndɨ kat sɨmogwindɨ. 9Sɨmogwilaa wandɨ. Kwali mamba sɨlaa nambu sɨlandalaa wuna sɨ kwutaa katsomeyan wan kɨpmamba lɨndɨ, vɨlɨma nda aywaa mɨna lak kwigiyowun wandɨ Seten. 10Wandɨ maa Jisas wandɨ. Mɨn Seten wun kat kwagalalaa ay mɨla. God waa nyaangɨt tamba kupma pɨlɨwutndi.
Njambwi nyan Godna sɨ mɨna kwutaa katso ngwula.
Nat nyan kai. God kɨta lɨgandɨ
waa tamba pɨlɨwutndi waa wandɨ Jisas.
11Wandɨ maa Seten tɨnda kava kwagalalaa yindɨ. Yindɨ maa Godna ensel yalaa Jisas kat kwunatndi.
JISAS GALILI YIGA LƗGA TAT NJƗVWA KWUTNDƗ
12Ngu yagu la Jon kat kwutaa kalabusmba laaganja vak kat Jisas wutaa Galili kwagalalaa Kapaneamat yindɨ. 13Ndɨna angwa ngepma Nasaretmba ana lɨndɨ. Yinda ngepma Kapaneam Galili walɨnja sak ngwaymba lɨndɨ. Wan kɨpma Sebyulan waa Naftalai walɨnja kwpma. 14Kan kava kwo ana yindɨ. Tamba la profet Aisaia pɨlɨwuta vak vla yindɨ. Tamba kupma pɨlɨwutndɨ.
15Sebyulan walɨnja kɨpma, Naftalai walɨnja kɨpma,
Galili walɨnja sak waymba lɨga kɨpma. Jodan
walɨnja ndandangɨ nat naangɨmba lɨga kɨpma. Juda
ana ndi Judagwi ndina wava lɨga kayana kɨpma.
16Wan kɨpmamba la nɨmba tat tɨngjan kulun wala la
kavamba lindi. Mbambala nya vla sɨndɨ, kembandɨ,
vɨndi. Kulun waa kavle kavamba lɨgiya nɨmba
ndino nya vla sɨndɨ, kembandɨ, vɨgiyandi
waa tamba pɨlɨwutndɨ. Jisas yalaa ndi kat apma vat kwindeya vak kat tamba la nayan Aisaia pɨlɨwutndɨ.
17Tɨga lɨga laataa Jisas ndi kat nyaangɨt mbutɨndɨ. Kavle maawut yelavɨka lɨngwa vak kwagala ngwula. God ngwuk kat vɨga lɨndeya njɨmbla tamba ngway tolagandɨ waa mbutndɨ Jisas.
KAMI KWUTA NDI AYNAT NƗMBA KAT JISAS WUNA KWUPMBA YAGWA WANDƗ
18Galili walɨnja sakna tɨvagawimba Jisas yiga lɨga kami njulamba kwuta mbɨk nyamwun sambu kat vwndɨ. Mbɨtna sɨ Saimon waa Pita walɨnja nyano Endruo. 19Jisas mbɨk kat wandɨ. Laataa wuna kwupmba yagwa mbɨla. Kami kwutɨmba vak kwagalalaa ndinyangu kwutɨmbeya vak kat mbɨk kat ngɨni sɨmogwigiyowun waa wandɨ maa 20laataa njula kwagalalaa ndɨna kwupmba yimbɨt.
21Yiga lɨga nat vɨlɨ palɨ nyamwun samb kat nyaekno njaambɨpmba lɨga njula kwunatɨmbɨk, vɨndɨ. Mbɨtna sɨ Jemsogwi Jono. Mbɨtna nyaekna sɨ Sebedi. Jisas mbɨk kat laataa yagwa wuna kwupmba wandɨ, 22laataa nyaeknogwi njaambɨk kat kwagalalaa ndɨna kwupmba yimbɨt.
JISAS NƗMA SAKWAT NDU LAGWA KAT NJƗVWA KWUTNDƗ
23Jisas Galilina ngepma ngepmamba yiga njɨvwa kwutɨndɨ. Juda nyaangɨt ngambulɨnja ngay wuleilaa God ndi kat kwunakiya apma nyaangɨt mbutɨndɨ. Mandɨp mandɨp yelogwen kat ta nɨmba kat kwunatɨndɨ. 24Yilɨnda vak kat vɨlaa wan kavana nɨmba kat mbuki mbukimba mbutɨndi. Ngi kat tɨga Siria walɨnja nɨma kɨpmamba la nɨmba aywaa wan nyaangɨt wutndi. Wutaa ndina mbangɨ mandɨp mandɨp yelogwen vɨta nɨmba kat kwutaa Jisas ta kavat kalindi. Kavle waagan tavila la nɨmbagwi kwutaa kalindi. Ava plaga kɨpmamba nda la nɨmbagwi kwutaa kalindi. Man taamba kɨvɨ wata la nɨmbagwi kwutaa kalindi. Jisas ndi kat vɨlaa aywaa kwunatndɨ. 25Galilimba lɨga yaa nɨmba, ngepma tamba vɨlimba lɨga yaa nɨmba, Jerusalemba lɨga yaa nɨmba, Judiamba lɨga yaa nɨmba, Jotana nat naangɨmba lɨga yaa nɨmba nɨma sakwat yalaa Jisasna kwupmba yisolaa yindi.
Atualmente selecionado:
Matyu 4: ian
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2013, Wycliffe Bible Translators, Inc. All rights reserved.