Mak 3
3
A katuun a lima mate
(Matiu 12:9-14, Luk 6:6-11)
1Be Iesu e tasu pouts uana i luman lotu me tarena a töa katuun a lima mate. 2A palair u katuun i ngilin koutin e Iesu ba nori e tarakap naren tega kato haniga menaien nonei a katuun turu Lan u Göagono. 3Be Iesu e poeiena tara katuun a limamate, “La uama i mam teka.” 4Ba nonei e rangata rena u katuun, “A Lo i tarara e ranga nena aha tegi kati ra turu Lan u Göagono? Aragi kato a markato a niga tsi aragi kato a markato a omi? Aragi taguhi a katuun te katsin matena tsi aragi atung hamateien?”
Kaba nori ima ranga paliseien. 5Be Iesu e hula tara uana i taren ba nonei e raharaha koruna, taraha a torir u katuun teka e roto koru batema hahan ranga palis ri. Ba nonei e poeiena tara katuun a lima mate, “Hasoa nema a limamölö.” Ba nonei e hasoa nena a limanen ba limanen e niga poutsuna. 6Ba u Parasi e lakasa ba ner a luman lotu mena hagum boroboro gono meraier a pal katuun tere Herot a King. Ba nori e korupaköner tegi atung hamate menaien e Iesu.
U katuun u parpara koru i gonoia i rehina a ramun
7E Iesu na u katunun tsitsilo i tanen i la uu tara Ramun i Galili ba u katuun u parpara koru e kukute raren. 8Nori i lama i Galili na i Judia na i Jerusalem na i Idumia na i hapalana ramun i Jodan na tara man han tara taun i Taia na i Saidon. U katuun u para teka i la uu tere Iesu, taraha nori i hengoein a manka te katoeien. 9U katuun i parpara koru be Iesu e poeiena turu katunun tsitsilo i tanen, “Alimiou go na lue muma tu bout. Ba lia te osa gia turu bout ba u katuun tema antunan songe roi lia.” 10Nonei e kato haniga hakapa poutsir u katuun u parpara, ba u katuun hoboto ti ka mei a siki e hiasösongo siler tegi sebele menaien e Iesu. 11Tara man pöata ti tara reia u katuun ti kamei u liliahanei e Iesu, ba nori te hatukun ria i matanen. Ba nori te ku hapanir bate poeier, “Alö a Pien Tson tere Sunahan!”
12Be Iesu e ranga hatagala koru meranen, nori egima hatei rai u katuun nonei esi koru.
E Iesu e hopö kapir a maloto na huol a katuun
(Matiu 10:1-4, Luk 6:12-16)
13Be Iesu e la sei uana turu pokus ba nonei e ngö rena u katuun te ngil raien ba nori e la uaier i tanen. 14-15Ba nonei e hopö kap rena a maloto na huol a katuun me poeiena, “Alia e hopö kap meragi limiou tego ka gono menami limiou alia. Na lia e hala has ragou limiou, tegona habulungana mena milimiou u raranga tere Sunahan, bate hala has ragi limiou a nitagala tego tsuga ba mera milimiou u liliahanei u omi.”
16Nonei e hopö kapir a maloto na huol a katuun: e Saimon (te hala hasien a tana solo, e Pita). 17Na e Jemis a pien tere Sebedi ne Jon e toulanen (te hala haseien a solo, e Boanetsis, te poeiena a galapien turu gururu). 18-19E Endru na e Pilip ne Batolomio na e Matiu ne Tomas na e Jemis a pien tere Alpius, ne Tadius mere Saimon a toun Kenan#3:18-19 E Saimon a Selot., na e Judas Iskariot, a katuun tena hala nanoua e Iesu turu katuun ti korupakö naien.
E Iesu ne Belsebul
(Matiu 12:22-32, Luk 11:14-23, Luk 12:10)
20Be Iesu ena tasuna tara töa luma. Bu katuun e gono lel rima be Iesu na u katunun tsitsilo i tanen e moar ta pöatan nou i taren. 21Ba pöata ti hengo naia a hun katuun i tanen a ka teka, ba nori ena katsin lu poutse ren, taraha nori i pei, “Nonei e tutu hakapa.”
22Ba u palair u katunun hihatuts tara Lo ti lama i Jerusalem e poeier, “E Belsebul e seie nen. A tsunono turu liliahanei te hale neien a nitagala tega tsuga ba meraien u liliahanei u omi.”
23Be Iesu e ngö rena u katuun egi la uama i tanen, ba nonei e ranga nena u haharuei i taren me poeiena, “Ime temar tsuga ba mena noi e Satan e Satan? 24Te hiatatung pouts ria u katuun iahana töa han pan, ba han teka tema antunan tuol hatagala noi. 25Na te hiatatung pouts ria u katuun tara töa hun haposa ba u katuun teka tema antunan ka haniga lel has roi. 26Na tegi hiatatung pouts ia e Satan mere Satan, ime temar tuol hatagala uanoien, nonei e kapa nitöa nou.
27“E möa ta katuun tega antunan seia tara luma tara katuun a tagala bate na kopena a manka i tanen. E möa. Nonei ega kits kap mamin a katuun a tagala teka ba nonei tena töan luena a manka te kana i luma tara katuun teka.
28“Alia e hatei hamana koru ragou limiou, e Sunahan e tatei luba nanou a man markato a man omi hoboto te katoeier u katuun, na man ranga man omi has te katoe ren. 29Kaba esi te ranga homi nanou u Namnamei u Göagono tere Sunahan, e Sunahan ema antunan luba koru nanoi a markato a omi i tanen. Nonei e ka nitöa menou a markato a omi teka.” Nonei temar ranga uu e Iesu, 30taraha nori i ranga mam me poeier, “Nonei e ka mena a liliahanei a omi te seie nen.”
E tsinana e Iesu na u toulanen
(Matiu 12:46-50, Luk 8:19-21)
31U toulana e Iesu na e tsinanen i tuku me tuol ria ielesala tara luma be hala menari u ranga tere Iesu. 32Ba u katuun u parpara ti gum hahisi e Iesu e poeier i tanen, “E tsinamölö na u toulamölö na u hahinamölö e ka ria ielesala, nori e ngöe riou lö.”
33Be Iesu e ranga palis ranen me poeiena, “Esi nonei e tsinar na u toular?” 34Ba nonei e hula tara uana turu katuun ti gum hahiseien me poeiena, “U katuun teka, nori u tsinar na u toular. 35Eresi te markato uaier turu ngil tere Sunahan, nori u toular na u hahinar na u tsinar.”
Atualmente selecionado:
Mak 3: HLA 2020
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© (Active) Wycliffe Bible Translators, Inc. All rights reserved.