Matiu 25
25
U haharuei tara maloto a tahol a kukubei
1Be Iesu e ranga lelna turu katunun tsitsilo i tanen me poeiena, “Pöata te butu nama romana u lan tego la pouts ma a Tsunono, ba Nipepeito tere Sunahan te here namei romana a maloto a tahol a kukubei ti lui a man lam i taren bate la siler tegina tara menaien a tson tego hitöl. 2A tolima a tahol a tutu na tolima a tahol atei. 3A touhaliou u tutu i lui a man lam i taren, kaba nori ima lu hapare lei ta karasin. 4Kaba touhaliou u atei i luela a man lam i taren na man botolo karasin a man saputu. 5Kaba a tson tegomi hitöl ema la boroboro mei, ba nori hoboto e topi korur be sohor.
6“Ba tara gusuna bong ba töa katuun e kuna me poeiena, ‘A tson tega hitöl e la hamanasa nama. Alimiou go la muma batemi tare men.’ 7Ba touhaliou u kukubei hoboto e taker be pilits sei hobotoner a man lam i taren. 8Ba tolima tahol a tutu e poeier tara tolima tahol a atei, ‘Alimiou go hala ramumei lam ta tsi karasin i tamilimiou, taraha a man lam i tamulam e katsin osor.’ 9Kaba a tolima tahol a atei i ranga palis raien me poeier, ‘E möa. U karasin ema antunanei i tamilimiou na i tamulam has. Alimiou go la mula i stoa batena hol peise miou ta karasin i tamilimiou.’
10“Ba pal touhaliou u tutu ena hol karasinir. Ba pöata ti tia noa men, ba tson tegi hahitölini e tukuna. Ba pala ti hahaloso#25:10 A tolima a man lam taren ti kamei a karasin. e tasu gono mer a tson ti hahitöli tara kannouna tara hitöl, ba tamana e hapilie ier. 11Ba i murinen ba palair u touhaliou u kukubei e la pouts rima memi poeier, ‘O Tsunono, o Tsunono, kalatema a tamana ba lam te tasu mou.’ 12Kaba a tson ti hahitölin e ranga palis raien me poeiena, ‘Alia e hatei hamana koru ragou limiou, alia ema atei sil ragi limiou.’” 13Be Iesu e poeiena, “Alimiou go haneiam, taraha alimiou ema atei silemi u lan tsi a aua te butu nama romana a Tsunono i tamilimiou.”
U haharuei tara topisa katunun pepeito kap
(Luk 19:11-27)
14Be Iesu e poeiena, “A Nipepeito tere Sunahan e here hase nei romana a katuun te katsin laba nena a han i tanen bate lauana i lehana. Ba nonei te ngö gögono rena u tson pepeito kap i tanen bate hataratara kap raneien a mamanaka i tanen. 15Ba nonei e hala raneien a moni, e hala hapopo naien tara nikukui i taren a man tötöa. Nonei e halei a töa katuun a tolima talen moni e antunaia tara 5,000 kina. Ba nonei e hale nei a tai a huol a talen moni, e antunaia tara 2,000 kina, na tai i halei a töa talen moni e antunana tara 1,000 kina. Ba nonei e la uana tara tou lala i tanen.
16“Ba tson pepeito kap te lui a tolima a talen moni e lana mena hakui nena a moni teka ba nonei e luena a tana a tolima a talen moni. 17Na tara töa noahas a markato ba tson pepeito kap te lui a huol a talen moni ena luena a taina a huol a talen moni len. 18Ba tson pepeito kap te lui a töa a talen moni e lana, mena kaho hamous nena a moni tara katuun pan i tanen.
19“Ba i murina a pöata a ngahangaha koru, ba katuun pan turu tson pepeito kap teka e la pouts nama memi ase gono mera neien u moni ti lueien. 20Ba tson pepeito kap te lui a tolima a talen moni, e la nama memi hala nena a moni i tanen me hala gono meneien a tana a tolima a talen moni i tanen me poeiena, ‘O tsunono, alö u hale lei lia a tolima a talen moni i tamölö. Tara! A tana a tolima a talen moni has teka tu lui lia.’ 21Ba katuun pan i tanen e poeiena, ‘E niga nitöana, alö a tson pepeito kap hamana na lö u kato hanigan töani a toukui i tamölö. Alö u tara kap haniga koruni a matsi topisa koru a mats ka, na lia e ha taratara kap tala nagi lö a mamanaka a pannen. Tasu hongo tala uu tara nisasaala tara katuun pan i tamölö!’
22“Ba tana tson pepeito kap ti halei a huol a talen moni e la nama memi poeiena, ‘O tsunono, alö u halei lia a huol a talen moni i tamölö. Tara! Alia i kui habutu leli a tana huol a talen moni len.’ 23Ba katuun pan i tanen e poeiena, ‘E niga koruna, alö a tson pepeito kap hamana na lö u kato hanigan töani a toukui i tamölö. Alö u tara kap haniga koruni a matsi topisa koru a mats ka, na lia e hataratara kap tala nagi lö a mamanaka a pannen. Tasu hongo tala uu tara nisasaala tara katuun pan i tamölö.’
24“Ba tson pepeito kap te lui a töa a talen moni e la nama memi poeiena, ‘O tsunono, alia i atei sil alö a katunun hakhakui hatagala koru, kaba lö e roron lu noa hasem a hihol tara toukui tara tana katuun. 25Alia u matout ba lia ena hamouse gia a moni i tamölö turu tsiktsiki. Tara! A moni i tamölö teka.’ 26Ba katuun pan i tanen e poeiena, ‘Alö a tson pepeito kap a omi na karous! Alö e poeiem alia ema kui gi kaba lia e roron luegou a hihol tara toukui tara tana katuun? 27Ga lö go mala haka taleia a moni i tar tara beng, ba lia te tatei lu pouts gono megien ta taina ta moni tara pöata tego kopis pouts malia.’
28“Ba nonei e poeiena tara palair u katunun kui i tanen, ‘Luba nami a moni bate halemi a katuun te ka mena a maloto a talen moni. 29Taraha, a katuun te kamena a huhua tara toukui i tanen e hala hase roi a maroro tego kui menaien a huhua i tanen, ba nonei te kamenou a mamanaka a parpara. Kaba a katuun te möa ta huhua tara toukui i tanen e luba naroi a mats ka pinopino te ka menen. 30Bate lapo ba naroa ielesala turu kuhil. Tara makum tena tabe hohomi koru ria romana u katuun bate kutu hakarkarangaker a liho ren.’”
U kout tere Sunahan
31Be Iesu e ranga lenina me poeiena, “Alia tu butun Katunuma e la guma romana bate heregi a king, u angelo hoboto e la gono has meri mou lia romana. Na nonei a pöata teka, alia e gum goa turu gumgum u göagono i tar. 32U katuun hoboto e gono hoboto ria romana i matar. Ba lia te lu kaakata ragen romana te kato uana a katunun taratarakap te lu kaakata rena u sipsip na u meme. 33Ba lia te haka ragia romana u sipsip tara pal matou i tar na u meme tara pal keruka i tar.
34“Ba lia te ranga meragou u katuun tara pal matou i tar, ‘U katuun te kato hasasaaler e Tamar, lamuma batemi luemiou a Nipepeito ti kato taatago berai limiou i manasa noa te habuteia e Sunahan a mamanaka. 35Taraha, alia u bes ba limiou e hale milia a tsi kannou. Na lia u maka ba limiou e haue moulia. Na lia a katununa tara tana han ba limiou e lu mena milia i luma i tamilimiou. 36Alia u möa tu hasobö ba limiou e hale mi lia u hasobö. Na lia u kamei a siki ba limiou e taguhe moulia. Alia u kaia tara karabus ba limiou emi tare moulia.’
37“Ba u katuun u matskö te poeier romana i tar, ‘O Tsunono, i hangisa ti tareia lam ti bes uu lö ba lam e hale mi lö a kannou? Na i hangisa ti tareia lam ti maka u lö ba lam e haue mölö? 38Na tara saha pöata tu tareia lam alö a katununa tara tana han ba lam e lu mena milö i luma i tamulam? Na tara saha pöata tu tareia lam alö i möa tu hasobö ba lam e hale mi lö u hasobö? 39Na i hangisa ti tareia lam ti siki ialö tsi ti kaia lö tara karabus ba lam ena tare mölö?’
40“Ba lia te ranga palis ragouen bate peigou i taren, ‘Na lia e hatei hamana koru ragou limiou, tu katoe mia limiou a markato teka ta töa tara man hahatoulana i tar, alimiou u kato be mien lia.’
41“Ba lia te ranga meragou u katuun tara pal keruka i tar, ‘U katuun te hamalir e Sunahan, laba nemou lia ba limiou te la uamiou turu tula te ka nitöana, ti kato hahaloso bei e Satan na u angelo i tanen. 42Taraha, alia u bes ba limiou ema hale milia ta tsi kannou. Na lia u maka ba limiou ema haue milia ta tsi ramun. 43Na lia a katununa tara tana han, kaba limiou ema lu mena milia i luma i tamilimiou. Alia u möa tu hasobö ba limiou ema hale milia tu hasobö. Alia u siki ba limiou ema taguhe milia, na ti kaia lia tara karabus, alimiou ima tare milia.’
44“Ba nori te ranga palis meriou lia bate poeier i tar, ‘O Tsunono, i hangisa tu tareia lam tu bes uu lö na tu maka uu lö na tu katuun uu lö tara tana han ba lam ema taguhe mi lö? Tara saha pöata tu tareia lam ti möa ialö tu hasobö na ti siki ialö na ti kaia lö tara karabus ba lam ema taguhe mi lö?’ 45Ba lia te ranga palis meragouen bate peigou i taren, ‘Alia e hatei hamana koru ragou limiou, a pöata tu raman katoe mia limiou a markato teka ta töa tara man hahatoulana i tar, alimiou u raman kato be hase mien lia.’ 46Ti markato uaien teka ba u katuun teka tena lue riou u nihahuna te ka nitöana, ba u katuun u matskö tena lue riou a nitöatöa te ka nitöana.”
Atualmente selecionado:
Matiu 25: HLA 2020
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© (Active) Wycliffe Bible Translators, Inc. All rights reserved.