Génesis 25
25
Warmin Ceturacho Abrahampa surinkuna yuriyashqan
1 Crónicas 1.32-33
1Abrahampa juk warminpa jutinmi karqan Cetura#25.1 Ceturaqa Abrahampa concubïnanmi karqan (1Crón. 1.32).. 2Say warmichöpis Abrahampa surinkuna kayarqan Zimram, Jocsán, Medán, Madián, Isbac y Súa. 3Jocsánpa surinkunami kayarqan Sebawan Dedán. Dedánpita miraq runakunapitami kayarqan Asur, Letus y Leum runakuna. 4Madiánpa surinkunanami kayarqan Efa, Efer, Hanoc, Abida y Elda. Paykunami Ceturapita miraqkuna kayarqan.
5Abrahampa lapan imaykanpis surin Isaaclapaqmi karqan. 6Concubïna warminkunacho#25.6 Abrahampa concubïnankunaqa Agar y Ceturami kayarqan. kaq surinkunataqa walka walkalami imaykantapis aypurqan. Aypurkurmi paykunata nirqan inti jeqamunanläman aywakuyänanpaq. Saynöpami Isaacpita karuchöna täyarqan.
Abraham wanushqan
7Abraham kawarqan pachak qanchis chunka pisqa (175) watayuq kashqanyaqmi. 8Pay awkinyarna wanukushpanmi unay ayllunkuna kaqman aywakurqan. 9Wanuykuptinmi surinkuna Isaacwan Ismael Macpela machayman pampayarqan. Say kaykan Mamripita inti jeqamunanlächo y Zoarpa surin Efrónpa chakranchömi. Efrón ayllu runakunaqa heteo runakunami kayarqan. 10Say chakraqa karqan heteo runakunapita Abraham rantishqanmi.#Gén. 23.3-18. Saymanmi Abrahamta pampayarqan warmin Sara pamparaykashqan nawpanman. 11Abraham wanuptin surin Isaactanami Tayta Dios bendicionninta qorqan. Pay tarqan Beer Lahai-Roí nishqan pözu nawpanchömi.#Gén. 16.1-14.
Ismaelpita miraqkuna
1 Crónicas 1.28-31
12Kaychömi qelqaraykan Abrahampa surin Ismaelpa surinkunapita y paykunapita miraqkunapitapis.
Ismaelpa mamanmi karqan Agar. Pay karqan Sarapa ashmaynin Egipto warmimi. 13Ismaelpa surinkunaqa qechpapita nunushyaq kayarqan Nebaiot, Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis y Cedema. 16Ismaelpa surinkuna chunka ishkaymi kayarqan. Paykunami saysikaman mirar chunka ishkay trïbu rikakuyarqan. Say surinkunapa jutinkuna kayashqannölami trïbunkunapapis markankunapapis jutinkuna kayarqan. Paykunami cada ünun trïbunkunacho mandaq kayarqan.
17Ismael kawarqan pachak kimsa chunka qanchis (137) watami. Wanukurnami unay ayllunkuna kaqman aywakurqan. 18Ismaelpita miraqkuna mashtakash täyarqan Havilapita Shuryaqmi. Say kaykan Egipto nacionläpami. Saypami Asurman aywaq näni päsaykan. Kikinpura chikinakuykarpis saychömi paykuna täyarqan.#Gén. 16.12.
Jacobwan Esaú yuriyashqan
19Kaychömi qelqaraykan Isaacpa surinkunapita y paykunapita miraqkunapitapis. Isaacqa Abrahampa surinmi karqan.
20Chusku chunka (40) watayuq kaykarmi Rebecawan Isaac majasakarqan. Rebecaqa karqan Betuelpa surinmi y Labánpa paninmi. Paykuna Padan-aramcho taq arameo runakunami kayarqan. 21Warmin Rebeca qoluq kaptinmi qeshyaq rikakunanpaq Tayta Diosta Isaac manakurqan. Manakushqanta Tayta Dios wiyaptinmi Rebeca qeshyaq rikakurqan. 22Milish kayashpan pelyarmi mamanpa pachanta fiyupa nanäsiyarqan. Saymi Rebeca yarpachakur nirqan: <<Sayno kaptinqa wanukümanpis>>.
Saymi imanir pachanwan nakashqantapis musyananpaq Tayta Diosta manakurqan. 23Sayno manakuptinmi Tayta Dios nirqan:
<<Pacharaykashqayki wawaykikuna askaman mirarmi ishkay nacionkuna kayanqa.
Pachalaykichönami chikinakur pelyaykäyan.
Punta yuriq kaqmi qepa yuriq kaqpa munaynincho kanqa>>.#Rom. 9.11-12.
24Killan chämuptinnami Rebeca milishta qeshyakurqan. 25Punta yuriq kaq puka aqsayuqmi karqan. Intëru cuerpunpis shaprami karqan. Paytami jutisiyarqan Esaú#25.25 Esaú ninanqa shaprasapa ninanmi. jutin kananpaq. 26Esaúpa ankunta aptashqami qepanta wawqin yurirqan. Sayno yurishqanpitami jutisiyarqan Jacob#25.26 Jacob ninanqa ankuta aptan ninan y engañakuq ninanmi. jutin kananpaq. Rebeca qeshyakunan wisan Isaac kaykarqan soqta chunka (60) watayuqnami.
Qechpa kay derëchunta Esaú rantikushqan
27Saypitanami Esaúwan Jacob maqtayäyarqanna. Saymi Esaú jirkapa purir jirka uywakunata wanusiyta yachakurqan. Jacobmi isanqa maypapis mana yarquypa täkuq. 28Esaú sarimushqan uywakunapa aysanta mikurmi Isaac mas payta kuyarqan. Rebecami isanqa Jacobta mas kuyarqan.
29Juk junaq Jacob yanukuykaptinmi jirkapa aywashqanpita pasaypa utikash Esaú charqan. 30Sayno charmi wawqinta nirqan: <<Say yanukushqayki pukay pukay mikuyta manakushayki. Pasaypa wanunayparaqmi mikanaykä>>.
(Pukay pukay kaq mikuyta munapashqanpitami Esaúta reqiyarqan Edom#25.30 Edom ninanqa puka ninanmi. jutiwan.)
31Niptinmi Jacob nirqan: <<Qaranäpaqqa qechpa kay derëchuykita kanan höra qoykamay>>.
32Jacob sayno niptinmi Esaú nirqan: <<Mikanaywan wanunaykaptïnaqa ¿imapaqtaq väliman qechpa kay derëchüpis?>>
33Esaú sayno niptinmi Jacob nirqan: <<Kanan höra Diospa jutincho jurar promitimay qechpa kay derëchuykita trukanansipaq>>.
Sayno niptinmi Esaú jurashpan qechpa kay derëchunta say mikuywan trukarqan.#Heb. 12.16-17. 34Saymi Jacob qararqan tantatawan pushku picantita. Mikuyta ushaskirnami pacha junta aywakurqan. Manami imapis qokurqansu qechpa kay derëchunta qoykushpanpis.
Atualmente selecionado:
Génesis 25: qvhB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.