Génesis 24
24
Isaacpaq warmita ashishqan
1Abraham awkinnami karqan. Saynöpis lapan rurashqankunachömi Tayta Dios payta yanaparqan. 2Abrahampami yärakushqan ashmaynin karqan lapan ashmayninpitapis mas awkin. Say ashmaynin lapan imaykantapis rikaq kaptinmi qayaykasir Abraham nirqan: <<Lilïta yataykur#24.2 Say wisan lilinta yataykur imatapis promitirqa imanöpapis cumplinanpaq kashqantami niyaq. 3kay pasatapis jana pasatapis kamaq Tayta Diospa jutincho lapan nishqäta cumplinaykipaq promitimay. Kay tashqä Canaán markakunapitaqa surïpaq warmita ama ashinkisu. 4Saypa trukanqa ayllükuna taykäyashqan Harán markaman aywar juk jipashta apamunki surïpa warminpaq>>.
5Sayno niptinmi ashmaynin nirqan: <<Pushamunäta mana munaptinqa ¿imatataq rurashaq, taytay? ¿Surikitasuraq warmipa markanman pushashaq?>>
6Niptinmi Abraham nirqan: <<Surïta ama pushankisu. 7Jana pasacho kaykaq Tayta Diosmi nimash kay taykashqansi pasata surïkunata, wilkäkunata y paykunapita miraqkunatapis qoykunanpaq kashqanta. Paymi taytäpa wayinpita y markäpita jorqarkamar kayman chäsimash.#Gén. 12.1-3, 7; 13.14-17; 15.18-21. Saymi qamwan aywananpaq angilninta kachamunqa. Saynöpami surïpa warminpaq juk jipashta pushamunki. 8Jipash shamuyta mana munaptinqa kay parlashqansi saylachönami usharanqa. Imano kaptinpis warmipa markanmanqa surïta ama pushankisu>>.
9Sayno niptinmi ashmayninqa Abrahampa lilinta yataykur Tayta Diospa jutincho promitirqan patronnin lapan nishqanta cumplinanpaq. 10Saypitanami alinnin kaq qaraykunata apananpaq kamarikurqan. Say qaraykunata chunka camëllukunawan chaqnakurkurmi#24.10 Wakin runakunaqa cargakurkurmi niyanmi. Abrahampa wawqin Nacor tashqan markaman aywarqan. Say karqan Mesopotamiachömi. 11Inti jeqaykaptinnami marka yaykunaman Abrahampa ashmaynin chaykur camëllukunata pözu nawpanman qonqurpakasirqan. Say hörami jipashkuna pözuman yakukuq aywayaq.
12Saychömi Tayta Diosta manakur nirqan: <<Patronnï Abraham yärakushqan Tayta Dios, patronnïta kuyapashpayki kanan yanapaykalämay lapanpis ali kamakänanpaq. 13Kay pözu nawpalancho yakukuq shamuq jipashkunata shuyakuykäshaq. 14Mayqantapis chämuq kaqtami nishaq: <Uylluykipita yakuta manakuläshayki, mamïta>. Sayno nir manakuptï nimäsun: <Upurkulay. Camëlluykikunatapis yakuta upurasishaq>. Sayno nimaq kaq kasun Isaacpa warminpaq akrashqayki jipash. Saynöpami musyashaq patronnïta kuyapar yanapashqaykita>>.
15Tayta Diosta manakuyta manaraq ushaptinmi uyllun umrush jipash pözuman yakukuq charqan. Say jipashqa karqan Betuelpa surin Rebecami. Betuelnami karqan Milcacho Nacorpa surin. Nacornami karqan Abrahampa wawqin. 16Rebeca karqan kuyaylapaq doncëlla jipashmi. Paymi pözu kaqman chaykur uylluman yakuta wishikurkur wayinpa kutikuykarqanna. 17Saymi Abrahampa ashmaynin taripaykur nirqan: <<Yakulayki, mamïta>>.
18Niptinmi jipash nirqan: <<Upurkuy ari, tayta>>.
Sayno nirmi uyllunta sarapararqan yakuta upuptin. 19Sayno upurkuptinnami Rebeca nirqan: <<Camëlluykikunatapis yakurkasishaq, taytay>>.
20Sayno nirmi uywakuna yaku upukunanman warakayla yakuta ashtaparqan camëllukuna upuyänanpaq. 21Saymi Abrahampa ashmayninqa admirakur Tayta Diosta manakushqanno say jipash kashqanta o mana kashqantapis musyayta munar upälala rikapaykarqan. 22Camëllunkuna yakuta upuskiyaptinnami jipashpa senqanman qori sortïjata churaparqan. Say sortïja lasarqan soqta grämunömi. Saynölami qoripita rurash ishkay brasilëtata makinmanpis jatiparqan. Saykuna pachak (100) grämupita masmi lasarqan.
23Nirkurnami nirqan: <<¿Pipa surintaq kaykanki? ¿Papänikipa wayincho posädakuykuyämansuraq?>>
24Saymi Rebeca nirqan: <<Noqa Betuelpa surinmi kaykä. Awilümi Nacor y awilänami Milca. 25Posädakunaykipaq wayï jäkuykanmi. Punshapis qewapis camëlluykikuna mikunanpaq kaykanmi>>.
26Sayno niptinmi Abrahampa ashmaynin qonqurpakuykur Tayta Diosta adorar nirqan: 27<<Patronnï Abraham yärakushqan Tayta Dios, alabash kaykulay. Patronnïta kuyar imaypis yanapashpaykimi ayllunmanpis chäsimashkanki>>.
28Saypitanami maman wilaq Rebeca cörrila aywarqan. 29-30Rebecapa turin Labánnami rikarqan qoripita rurash sortïjata y brasilëtata makincho panin jatiraykaqta. Runa imata nishqantapis mamanta Rebeca wilapaykashqanta wiyarmi cörrila aywarqan pözu kaqman say runawan tinkunanpaq. Aywarmi pözu nawpancho camëllunkunawan kaykaqta tarirqan. 31Saymi Labán nirqan: <<¡Wayïman aywakushun, taytay! Tayta Dios yanapashqan ali runami qam kaykanki. Kaychöqa maychöraqchi pununkiman. Posädakunaykipaq wayi kamarishnami kaykan. Camëlluykikunata wichqanaykipaqpis corral kaykanmi>>.
32Sayno niptinmi Abrahampa ashmaynin Labánpa wayinman aywarqan. Saychönami camëllukunata paskarir Labán qarapakurqan. Saynöpis yakuta kamariparqan Abrahampa ashmayninwan aywaq runakuna chakinkunata maylakuyänanpaq.
33Saypita mikunanpaq mësaman jamasiptinmi Abrahampa ashmaynin nirqan: <<Mikunäpaqpis imaq shamushqätapis wilashaykiraq>>.
Sayno niptinmi Labán nirqan: <<¡Jukla wilaykalämay!>>
34Saymi say ashmay nirqan: <<Noqa kaykä Abrahampa ashmayninmi. 35Tayta Diospa bendicionninwanmi patronnï Abraham seqaypa rïcuyash. Saymi uyshankuna, cabrankuna, wäkankuna, camëllunkuna y ashnunkunapis ali mirayash. Paypa askami olqupis warmipis ashmayninkuna kayä. Saynöpis aska qoriyuq y aska qellayyuqmi pay kaykan. 36Patronnïpa warmin Sarapis chakwanna kaykarmi olqu wawata tarish. Paypa wawanpaqmi lapan herencianpis kaykan. 37Tayta Diospa jutinchömi patronnï kayno jurasimash: <Kay tashqä Canaán markakunapitaqa surïpaq warmita ama ashinkisu. 38Saypa trukanqa aywanki papänïpa ayllunkuna kaqman. Paykunapita ashimunki juk jipashta surï Isaacpa warminpaq>.
39<<Sayno nimaptinmi nirqä: <Say jipash shamuyta mana munaptinqa ¿imataraq rurashaq?>
40<<Saymi nimarqan: <Yärakushqä Tayta Diosmi angilninta kachamunqa yanapäshunaykipaq. Saynöpami ayllükunapita juk jipashta apamunki surïpa warminpaq. 41Ayllükunaman charqa jipash surinta mana kachapäyäshuptikipis promitimashqaykita cumplinkimi>.
42<<Sayno nimaptin shamurmi pözu nawpanman kanan junaq chämushkä. Saychömi Tayta Diosta manakushkä: <Patronnï Abraham yärakushqan Tayta Dios, yanapaykalämay Isaacpa warmin kananpaq kaq jipashwan tinkunäpaq. 43Kay pözu nawpalancho shuyaraykäshaq jipashkuna yakukuq shamuqta. Kamakaykasilay ari, Taytay, patronnïpa surinpaq warmita tarinäpaq. Say jipashtami uyllunpita yakuta manakushaq. 44Sayno ruwakuptï pay nimäsun: <<Upukurkuy ari. Camëlluykikunatapis yakuta upurkasishaq>>. Sayno nimaq kaqmi patronnïpa lumsuyninpaq akrashqayki jipash kanqa>.
45<<Tayta Diosta manakuyta manaraq usharmi rikashkä uyllun umrush Rebeca yakukuq shamuykaqta. Pözupita yakuta jorquptinnami yakuta manakurqä. 46Saymi uyllunta marqarkur nimarqan: <Upukurkuy, taytay. Camëlluykikunatapis yakurasimushaq>. Sayno nir yakuta makyamaptinmi upushkä. Saynölami camëllükunatapis yakusimush. 47Nirkurnami tapurqä <¿Pipa surintaq kaykanki?> nir. Saymi nimarqan: <Noqa kaykä Betuelpa surinmi. Awilümi kaykan Nacor y awilämi kaykan Milca>. Sayno nimaptinmi juk sortïjata senqanman jatipashkä. Saynöpis ishkan makinman brasilëtakunata jatipashkä.
48<<Nirkurnami qonqurpakuykur Tayta Diosta adorar nishkä: <Patronnï Abrahampa Diosnin, qam ali nänipami pushaykalämashkanki patronnïpa ayllunpita jipashta tarinäpaq>. 49Sayno nirmi Tayta Diosta manakushkä. Kananqa niyämay patronnïpa lumsuyninpaq surikita awnimashqaykita o mana awnimashqaykitapis. Mana awnimaptikiqa imanäshaqtaq>>.
50Saymi Labánpis Betuelpis niyarqan: <<Tayta Dios rasunpaypami yanapäshushkanki kayman chämunaykipaq. Sayno kaykaptinqa ¿imanirtaq awnïmansu? 51Tayta Dios sayno kananpaq destinash kaykaptinqa patronnikipa surinpaq Rebecata apankichir>>.
52Sayno niptinmi Tayta Diosta agradëcikushpan Abrahampa ashmaynin urkuntapis pasaman töpasiypa qonqurpakurqan. 53Nirkurnami Rebecata qararqan qoripita qellaypita rurash alhäjakunata y fïnu mödanakunatapis. Saynölami turintapis mamantapis qararqan. 54Saypitanami Abrahampa ashmayninqa walkiqninkunawan mikurkur upurkur saycho punuyarqan. Pasa wararkuptinnami sharkurkur nirqan: <<Kananqa patronnï kaqman kutikuyäshaqna, taytay>>.
55Sayno niptinmi Rebecapa turinwan maman niyarqan: <<Chunka junaqlapis Rebeca qoyäpämäsunraq. Saypita isanqa apakunkipaq>>.
56Sayno niptinmi Abrahampa ashmaynin nirqan: <<Kayman shamuptï lapantapis Tayta Dios kamakaykäsiptinqa patronnïpa wayinman kutikuyänäpaq jukla despachaykalämay>>.
57Saymi paykuna niyarqan: <<Jipashtaraq tapushun. Mä, ¿ima nimäshunshi?>>
58Sayno nirmi Rebecata qayaykur tapuyarqan: <<¿Kay runawan aywayta munankiku?>> nir.
Sayno tapuyaptinmi nirqan: <<Aw, aywashaqmi>>.
59Sayno niptinmi despachayarqan itilanpita ashmaqnin warmitawan. Saymi aywakuyarqan Abrahampa ashmayninwan y paywan shamuq runakunawanpis. 60Yarquyashqan hörami bendicionta qoyashpan ayllunkuna niyarqan: <<Wawaykikuna, wilkaykikuna y paykunapita miraqkunapis askaman mirar waranqanpa waranqanpa kaykuläsun. Saynöpis qampita miraqkuna lapan contrankunata vincir munayninman churayäsun>>.
61Saypitami ashmaynin warmikunawan camëllunkuna loqakurkur#24.61 Wakin runakunaqa muntakurkur niyan. Abrahampa ashmaynin pushashqanpa Rebeca aywakurqan. Saynömi Abrahampa ashmaynin Rebecata pushakurkur kutikurqan.
62Paykuna chäyänanpaqqa Isaac kutish kaykänaq Beer Lahai-Roí nishqan pözu kaqpitami. Pay taykarqan Neguevchömi. 63Inti tardiyaykaptinnami Isaac rikachakuq yarqurqan. Rikachakuykashqanchömi camëllukuna shamuykaqta rikarqan. 64Saynölami Rebecapis Isaacta rikaskir loqarashqan camëllupita yarpurqan. 65Nirkurmi Abrahampa ashmayninta tapurqan: <<¿Pitaq taqay shamuykaq runa?>> nir.
Saymi nirqan: <<Paymi patronnï>>.
Sayno niptinmi vëlunwan qaqlanta Rebeca sapakurkurqan.
66Isaacwan tinkuskirnami ashmaynin wilarqan lapan imano kashqantapis. 67Saypitanami Rebecata Isaac pusharqan maman manaraq wanur tashqan toldu wayiman. Saychönami Rebecawan majasakashpan täyarqan. Rebecata seqaypami Isaac kuyarqan. Paywan tarnami maman wanushqanpitapis lakikurqannasu.
Atualmente selecionado:
Génesis 24: qvhB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.