Génesis 23
23
Sarata pampananpaq chakrata Abraham rantishqan
1Pachak ishkay chunka qanchis (127) watayuq kashqanyaqmi Sara kawarqan. 2Quiriat-Arbacho kaykarmi Sara wanurqan. Quiriat-Arbapa jukaq jutinmi kaykan Hebrón. Say kaykan Canaánchömi. Sara wanuykuptinmi Abraham fiyupa waqashpan lüturqan. 3Warmin sutaraykaptinmi heteo runakunawan parlaq Abraham aywarqan. Chaykurmi nirqan: 4<<Musyayashqaykinöpis jäpa runami kä.#Heb. 11.9, 13. Juk sepultürata rantikaykayälämay sayman warmïta pampanäpaq>>.#Hech. 7.16.
5Sayno niptinmi heteo runakuna niyarqan: 6<<Taytay, qam kaycho kaykanki Tayta Dios akrashqan runami. Warmikitaqa mas alinnin sepultüraman pampay. Mayqäpa sepultüräman pampaptikipis noqakuna manami michäyäshaykisu>>.
7Sayno niyaptinmi heteo runakunapa nawpanman Abraham qonqurpakuykur 8nirqan: <<Warmïta pampanäpaq rasunpaypa awniyämashpaykiqa Zoharpa surin Efrónta ruwapaykayälämay 9Macpela chakran kuchuncho kaykaq machayta rantikamänanpaq. Aykata manamaptinpis pägaläshaqmi. Sayno rantiptïraqmi kikïpaqpis sepultürä kanqa>>.
10Marka mayinkuna y saypa päsaqkunapis wiyayänanpaqmi markaman yaykuna punkucho Abrahamta Efrón nirqan: 11<<Tayta, rantikunäpa trukanqa chakrantinta say machayta sepultüraykipaq qaraykushayki. Marka mayïkunapa nawpanchömi qaraykü. Say machayman warmikita pampay>>.
12Sayno niptinmi runakunapa nawpancho Abraham yapay qonqurpakuykurqan. 13Saypitanami lapanpis wiyayänanpaq Efrónta nirqan: <<Wiyaykalämay, taytay. Say machaypa chaninta chaskimaptikiran warmïta sayman pampashaq>>.
14Saymi Efrón nirqan Abrahamta: 15<<Wiyaykalämay, tayta. Say chakrapa chaninqa kaykan chusku pachak (400) siclo qellaymi.#23.15 Juk siclo qellayqa juk killa aruypa chaninmi karqan. Sayno kaptinpis saylapaqqa ¿imapaqtaq parlaykäshunpis? Sayman warmikita pampay, ari>>.
16Saymi Abrahamqa chakrapa chaninta manashqannöla heteo runakunapa nawpancho alinnin kaq qellayta pësaypa chusku pachak sicluta Efrónta pägarqan. 17Saynöpami Efrónpa chakran y saycho kaykaq machaypis y jachakunapis Abrahampana karqan. Say chakra kaykan Mamripa chakranpita inti jeqamunan kaqläpami. 18Abraham rantishqanta rikayarqan saycho kaykaq heteo runakuna y marka punkupa päsaq runakunapis.
19Sayno rantirkurnami Abraham pamparqan warmin Sarata Macpelacho machayman. Say chakra kaykan Mamripa chakranpita inti jeqamunanläpami. Say partipa jukaq jutinmi kaykan Hebrón. Say kaykan Canaánchömi. 20Saynöpami chakrapis machaynintin Abrahampana karqan. Say chakrata heteo runakuna rantikuykuyarqan Abrahampis y ayllunkunapis saycho pampakuyänanpaqmi.
Atualmente selecionado:
Génesis 23: qvhB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.