Mateo 13
13
VII. UTSI CHIACBIMBUEN 7TEDI CHUIBANAID
(13.1-52)
Utsi chiacbimbuen pete ëshë secaid chiaid
(Madc. 4.1-9; Duc. 8.4-8)
1Aton tita choaid uëshëmbi Esus shubu yacnouësh puduenanec nidec chian cuëman budash tabadtuidpondash. 2Tabadtuidsho isash matses dadpenquio chochoash tsucus tsucustsëcquio yec Esus datsidadpondash. Adsho istanec cano dapa antsadtopondash, chochoquido chian cuëman tabadnubi.
3Adec tabadshobi naden utsi chiacbimbuen dadpen chuibampondash: Tied icbo pete ëshë secaic aton tied yacno nidposh. 4Adec nidshun pete ëshë secac maisec utsi utsiec podqued nantan paëdacsho istanec choshon uicchunën cheposh. 5Pete ëshë utsibic nidaid aniactsëc iquec cuënote dadpen samëdacno paëdash badedquio dëyucuidtsashi 6tapunenquio yec uëshë chënquequidën badedi shoedash uënësposh. 7Pete ëshë utsibic nisanquid dadpen yacno paëdash dëyucash canidotsëcshobi nisanquidën bëtinac canitiapimbo yec uënësposh. 8Pete ëshë utsibic nidaid bëdambo yacno secac dëyucash caniash bacuëtanec dadpenquio ëshëcquid icposh. Utsi utsiec 100ted icnubi utsi utsiec 60ted icnuc utsi utsiec 30ted ëshëcquid icposh, quepondash Esus.
9Aden chiashic: Umbi chuibambued pabiate shëcuë choquidën bëdambuen tantiata, quepondash Esus.
Naden tantiaquin utsi chiacbimbuen chiec nebi, quiaid
(Madc. 4.10-12; Duc. 8.9-10)
10Adsho tantiashun abëd icquidon Esus naden chuipondash: ¿Atotsi queshun utsi chiacbimbuen mimbi matses dadpen tantiamequin chuibampe? caquien 11Esus nadpondash: Utsibo tantiamenquio icnëdaidi: Nëbi Nuquin Papan namiacno tabadte iquec, quequin mibitedictsëqui tantiamembi utsibo padenquio icquin. 12Nuquin Papa tantiate bunquidën ubi tantiabensho bëdambuen tantiamendambi. Nuquin Papa tantiauidtsëcquidën umbi utsi chiacbimbuen chiac tantienquio icsho tantiamenquio iquendambi. 13Utsi chiacbimbuen aido chuibanembi. Aden chiac:
Ëshë bëdambocquid icquimbi ma isenquiocpanuna.
Adembidi tantiate bëdambocquid icquimbi ma abimbo chiaid tantienquio icuapanuna, capondash. 14Nuquin Papan ambi oncamiaid Isayas naden chuiquin dada uamepampic:
Chiac tantiaboshombi tantienquio iquendac.
Ismiac isboshombi: Ai, aidi nec, cainquio iquendac.
15Umbi chiac tantiatiapimbo iquec.
Min matses pamumëdacbimbuen tantiate bunenquio iquec.
Bëchicqueshun isenquio yacbimbuembidi isquin tantiatiapimbo iquec.
Umbi chiaid tantiaquin umbi nabansho issun padpiden ubi tantiabenuanushe.
Aden tantiabenshun ambi icsambuen naid ënsho issun bëdambuen ismane, quiash Nuquin Papa chushquiaid Isayasën dada uapampic, quepondash Esus.#13.14-15 Isa. 6.9-10 tantiaquin nëid dada uapanëdash.
16Aden tantienquio icquido icnubi mibitedishun ëbëd icquidon ubi isquin tantiec tabadec. Adembidi umbi chuibansho tantiash: Abimbo caic, quequin tantiaquido icsho Nuquin Papan mibitedi bëdambo icmendac. 17Mibi abimbo caimbique. Tantia. Nuquin Papan oncamiaidobëtan Nuquin Papa tantiec bëdambuec tabadquido dadpenshun mibitedishun ubi isacpadombuen ubi iste bunequi ubi chosho isambobi uënësbudnepampic. Mibitedishun umbi chuibansho tantiacpadombuen tantiate bunequi tantiambobi uënësbudnepampic, quepondash Esus.#Duc. 10.23-24; Ebed. 11.13; Pet.1. 1.10-12.
Pete ëshë secaid cuembo chiaid
(Madc. 4.13-20; Duc. 8.11-15)
18Adashic abi onquec: Tantia. Umbi pete ëshë secaquid utsi chiacbimbuen chuibued cuembo mibitedi chuinu. 19Nuquin Papan namiacno tabadte iquec, quequin chiaqui tantienquio icsho Mayan Icsa Satanasën nac badedi bëshunendac. Adquid podquied nantan pete ëshë secac paëdacsho uicchunën badedi chiacbimbuecquid nendac. 20Pete ëshë utsi cuënote dadpen samëdacno paëdaidbimbuecquid nad iquec. Nuquin Papan Chiaid chuibansho tantiash: Bëdambo iquebi, quec cuishonquendac. 21Adsho: Nuquin Papa tantiaquid nec, queshun utsibon chieshënac pete ëshë dëyuquec tapunuidtsashi uënësacbimbuen badedi chieshtoshon Nuquin Papan Chiaid tantienquio yanendac. Adembidi chieshtomiantequid utsi utsiec icnuc Nuquin Papa tantienquio yanuaindac. 22Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi dadpen tantiaiduidi tantiec chieshtoendac. Utsibic ambi bedteuidi tantiaquin nabanec abibi mua uadec chieshtoshon tantienquio yanuaindac. Adquido Nuquin Papan Chiaid tantiesabo yanshun bëdambuec tabadaid utsibo tantiamenquiocquid yanendac. Adquid nisanquidën bëtinac bacuëtiapimbo yacbimbuecquido nec. 23Padnuen pete ëshë utsi nidaid bëdambo yacno secac paëdaidbimbuecquid nad iquec: Nuquin Papan Chiaid chuibansho tantiaquioshon ambi tantiabued bëshunenquio icquin tantiec bëdambuec tabadquid nendac. Adquidën chuibanac ubi tantiaquid 100ted yanendac. Utsin chuibanaquic 60ted yanendac. Utsin chuibanaquic 30ted yanendac, quequin abi tantiabente Esusën chuipondash.
Utsi chiacbimbuen uasin icsa seuanaid chiaid
24Adshumbic Nuquin Papan namete utsi tantiamenuen Esusën utsi chiacbimbuen padpiden chuibanuapondash. Tantia. Chuinu. Tiedën caniquid pete adosbiecquid icbon seposh. 25Adanec ushec nidambic inchëshën choshon chieshëmënquidon uasin ëshë icsambocquid daëd uain ansecauamposh. 26Adoac adosbiecquid tidico canidotsëcnubi abëdi tancandaëdpambuec uasin icsambocquid canidoposh. 27Adsho istanquin iuabon aton icbo chuituidposh. ¿Pete ëshëbida sio? cac: Ai, quesho tantiash: Ma icsambo icquidbëd tancandaëdpambuec canidopacboc. ¿Mitsi paden siac? quequin iuabon icbo chuiposh. 28Adoaquien: Chieshëmënquidombien ansecauanchitash, cac: ¿Chicshunnetanquindambi icpe? aton iuan cac: 29Padi. Petebëdi chiquidtsiash. 30Ma aidbëdi caniec ëshëpanuna. Ëshëacsho issun abitedi bednun nanuna. Adoshombic icsambo icquidba tsindobanshun nëdëncanun nanuna. Adotanquimbic petembo bedshun sandoshon pete dayun uate shubun sannun nanuna, caposh tied icbon, quequin Esusën chuipondash.#13.30 Nuquin Papan cuidte uëshën icsambocquido cuidquin abi yacno bëdambocquido (abi tantiaquido) abëd tabadmendac.
Mostasa ëshëmpi chiaid
(Madc. 4.30-32; Duc. 13.18-19)
31Adshumbic Nuquin Papan namiacno tabadte tantiamenuen Esusën utsi chiacbimbuen naden chuipondash: Tied icbo mostasa caid ëshëmpi aton tiedën sec nidposh. 32Aden siaid ëshë pistsëcquiocbuedi caniec nuamboshë yanec cuidi cuidipamboshë icposh. Aid cuidin uicchun dadpen chochoec tabadtonequin shubu uashun aton bacuë tishposh, quepondash Esus.#13.32 Nëid chiacbimbuen ënden chuipampic. Aid iste bunquin Dan. 4.12 ista.
Nami uaid bidiscamete cabiunaid chiaid
(Duc. 13.20-21)
33Adembidi Esusën utsi chiacbimbuen naden chuiuapondash: Nuquin Papan namiacno tabadte nadquio iquec. Chidon nami uashun cabiunac nua bidisquedoec. Adquiecbidi Umbi Chiaid tantiaquidën chuibanac ubi tantiaquido dadpen yanendac, quequin Esusën chuipondash.
Nuquin Papan chiampicpadombuen naid
(Madc. 4.33-34)
34Cuembo chienquio icquin utsi chiacbimbuenuidi Esusën matses dadpen chuibampondash. 35Aden Esusën chuite chuiquin ambi oncamiaido Nuquin Papan dada uamiampicpadombuen nanuen adopondash. Nuquin Papan dada uamiampid nad iquec:
Cuembo chienquio icquin utsi chiacbimbuenuidi chuibanendambi.
Ëndenquimboshë nidaid uashun aidën icquido uashumbi Nuquin Papan ambi tantiaidi ambi uaido chiambo iquec. Adembidi aidon tsiuecquidotedi chiambobidi iquec,
quequin Esusën chuite chuipampic.#13.35 Cuëd. 78.2 nëid dada uapanëdash. Aid iste bunquin chotaquën onqueten dada uaid Cuëd. 78.2 ista.
Uasin ëshë icsambo icquid ansecauanaid cuembo chiaid
36Adshumbic matses dadpen tabadsho isash: Nidec nid, cac nidsho isanec nidec Esus shubun puduedpondash. Puduedsho isash aidbëd abëd icquido puduedacsho naden chuipondash: Chieshëmënquidon uasin ëshë icsambo icquid ansecauanaid, quequin mimbi chuibued en cuembo chui. Tantianu, Icbo. ¿Atotsi tantiamenuen mimbi aden chuipo? 37caquien Esusën naden chuipondashi: Pete ëshë bëdambocquid sequidbimbuecquid Matsesën Tishaid nebi. 38Padnuen tied tapan icquidbimbuecquid nidaidën tabadquidotedi nec. Pete ëshëbimbuecquid Nuquin Papan namiaido nec. Padnuen ubi chieshënquido Mayan Icsa Satanasën namiaido icquin uasin icsambocquid ansecaquidbimbuecquido nec. 39Adquid icnuc uasin ëshë icsambo icquid sequidbimbuecquid Mayan Icsa Satanas nec. Aidën namiac matses icsambo icquidon ubi tantiaquidobëd tabadquin icsambuen nametiadquio iquendac. Adsho badedi cuidenquio icquin Nuquin Papan cuidte uëshë choabi icnuc matses icsambo icquidobëd bëdambocquido abi tabadmendambi. Adec tabadsho ambi tantiacpadën Nuquin Papan namiac abëd icquidon ubi tantiaquido beduanendac. 40Icsambo icquid caniacsho tacuesquin tsindoshon nëdëncacbimbuen Nuquin Papan cuidte uëshëmbi icsambo icquido cuidendac. 41Matsesën Tishaid icquin Cun Pabëd icquido chomendambi. Icsamianquidobëta icsambuen naquidotedi bedshun chian annëdënquiacno nëseca, quequin umbi chiac 42bedshun chian annëdënquiacno nësecaindac. Adoac: Ubi, quec natiec mëyadbudec shëta shëchëdëshquequiec sidquebudnendac. 43Padnuen ubi tantiec bëdambuec tabadquido Nuquin Papan namiacno nidash bëdamboshë yec uëshë chënquiacbimbuec bëchamauanquiec iquendac. Umbi aden chuibambued tantiashun pabiate shëcuë choquidën bëdambuen tantiata, quepondash Esus.#13.43 Dan. 12.3 tantiaquin aidbimbuen Esusën chuipanëdash.
Nuquin Papabëd tabadte bunquiota, quiaid
44Adshumbic padpiden Esusën Nuquin Papan namete naden chuipondash: Tantia. Utsibon ompoampid bëdamboshëcquid istuidaid bedte cumapenec bunquiaid mibi chuinu. Utsin tied nantan nidshun dadan utsibon ëndenquimbo ompoampid piucquid dadpenquio sandoaid istuidposh. Aden Istuidshun aid bedte bunquin padpiden ompouaposh. Adshumbic atona abitedimbo menequin piucquid dadpen bedshun tied icbo aid piucquid meneposh. Adshumbic: Nëbi cun tied nec, queshun piucquid ompoampid bedposh.#13.44 Adombuembidi matsesën Nuquin Papabëd tabadte bunquin atonauidi nainquio icquin Nuquin Papan chiacpadombuenuidi nac bëdambo ictsiash.
Utsi chiacbimbuen casëdo ushumbo yec bëdamboshë isadquid bedte chiaid
45Tantia. Nuquin Papan nametequid chuiquin mibitedi chuiuanu. Acte dapan icquid chiun bedshun nacnenaid casëdo ushumbo yec bëdamboshë usadquid bunquin bednuen nibëmbenneposh. 46Aden nibënquin bëdaidquio icsho istuidash: Nadquid utsi nibëdec, quiash cumapenec bedte bunquioposh. Adshun atona abitedimbo menequin piucquid bedshun casëdo icbo aid piucquid menequin casëdo bedposh.#13.46 Adombuembidi Nuquin Papabëd tabadte bunquin matsesën ubi tantiaquiac bëdambo ictsiash, quepanëdash Esus.
Utsi chiacbimbuen nëshaid tapa chiaid
47Adshumbic Esusën Nuquin Papan namete padpiden chuiuaquin utsi chiacbimbuen chuiuapondash. Tantia. Mibi chuinu. Nuëcquid bedshun nibedacbimbuen naindambi. Matsesën nuëcquid bednuen aton nëshaid tapa acte dapa mad caid nëneshun nuëcquid utsi utsien bedquid. 48Aden nëshaid cubu cubuctsëcquio icnuc nuëcquid bedshun acte cuëman sambudash tabadquin nuëcquid nibedquid. Nuacquid tsitsanën sandobanquimbi aniactsëcquid acte nësecaquid. 49Adombuembidi Nuquin Papan abitedi cuidte uëshë chonoc Nuquin Papabëd icquido nidaidën chomendac. Adoac choshon nuëcquid nibedacbimbuen matses bëdambocquido Nuquin Papa yacno tabadmequimbi 50icsambo icquido chian annëdënquiacno nësecaindac. Adoac: Ubi cuidec, quiash shëta chëquëdëshquec natiaquiec shubiquiendac, quequin Esusën Nuquin Papan cuidte chuipondash.
Ëndenquimbo chiampidbëta nëbi chuca chiaid
51Adshumbic Esusën: ¿Ada umbi chuibuedtedi tantie? caquini: Ai, tantiembi, quecuededpondac. 52Adsho tantiashun Esusën ubitedi naden chuipondash: Nuquin Papan Chiampid tantiamequid utsibo chuiquin: Nuquin Papan namiacno tabadtequid iquec, quequin tantiaquid yanshun naden chiendac: Matsesën atona ëndenquimbo ambi dayun uanëdaidbëta nëbi chuca icquid ismequin utsi utsien chicacbimbuen chiendac. Nuquin Papan Chiaid ëndenquimbo dada uampidbëtabi Nuquin Papan Chiaid chuca umbi chuibambuedquio mibitedishun chuibanendac, quepondash Esus.
VIII. ESUSËN DADPEN NABANAID
(13.53—17.27)
Nasaded yacno Esus nidaid
(Madc. 6.1-6; Duc. 4.16-30; Uan 4.44)
53Aden utsi chiacbimbuen dadpen chuibanquin nainanec Esus auëshquiobi puduanec nidec 54abi caninëdacno shubu dadpen icquid Nasaded yacno Esus nidpondash. Ambo nidshumbic Nuquin Papan Chiaid chuibante shubun puduedshun Esusën chuibampondash. Aden chuibansho tantiashien tantiadempambo yec tabadec: ¿Mitsishunquio adombuen cumapenen tantiabempash nepeba? ¿Mitsipadquiec nadatiambocquin nabanquid yampash? 55quenubien utsibo: ¿Nuqui isacmaidta nedic? Ma aton papa cute chëshshun nacnenquid nepaboc. Aton tita Madia nec. Aton utsibo nëidtedi iquec. Nëidic Santiaco. Nëidic Ose. Nëidic Simon. Nëidic Udas. 56Aido nëmbobi icquido nec. Adecbidi aton chibi chedotsen nëmbobidi icquido neuaic. ¿Adquid icnuc cumapenen tantiaquidta nedic? Ma adquidpenquio neyoc, quequin 57Esus chieshënquin aidën chuibansho tantiate bunenquio icpondash.
Adsho tantiashumbien Esusën naden chuipondash: Utsibo yacno nidshun Nuquin Papan oncamiaidën chuibansho tantiaquid dadpen icnubi abi caninëdacnobidi chouashun chuibansho chieshënquid aton matses iquendac. Adecbidi aton shubun icquido iquendac, quequin chuidednec, quepondash Esus. 58Aden abi tantiate bunenquio icsho issun nadatiambocquin bëdamequin daëdpactsëc ismepondash.
Atualmente selecionado:
Mateo 13: mcfNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023, Wycliffe Bible Translators, Inc. All rights reserved.