Marcos 8
8
Jesus tỹ ũ tỹ 4 mil (ke) ag jẽn
(Mt 15.32-39)
1Kejẽn ũn e ag tóg vẽnhmãn kỹ nỹtĩ mãn mũ, hã ra ag tỹ nén ũ konh ke tóg tũ tĩ. Kỹ tóg ti mré mũ tĩ ag mỹ: 2“inh mỹ ag tóg jagtar nỹtĩ,” he mũ. “Kurã tãgtũ han ag tóg huri, ẽg mré, hã ra ag tóg vẽjẽn ve ja tũ nĩgtĩ. 3Sỹ ag kókĩnkĩr ra ag mỹ: ha mũjẽg, hen kỹ tóg inh mỹ ũ ag kãgter ha mẽ tĩ, ẽmĩn kri. Kuvar gy tóg nĩ, ũ ag jamã ti,” he tóg.
4Kỹ ag tóg ti mỹ: “ẽg hẽ ri ken kỹ ẽmĩ venh mũ, ẽmã tũ ja tag ti ki, ẽg tỹ ag jẽn jé?“ he mũ.
5Hã ra tóg: “ẽmĩ tỹ hẽ ri ke nỹ ki nỹtĩ ge?“ he mũ. Kỹ ag tóg: “ũ tỹ 7 (ke) vỹ ki nỹtĩ,” he mũ.
6Kỹ tóg vẽnh kar mỹ: “nĩgnĩ ra, ga kri,” he mũ. Kỹ tóg ẽmĩ tỹ 7 (ke) ẽn mãn kỹ Topẽ mré vĩ mũ. “Inh mỹ tóg há tĩ,” he tóg. Kỹ tóg kupãg' mũ sir. Ti mré mũ tĩ ag mỹ tóg vin mũ sir, ag tỹ vẽnh kar mỹ kãnhkrén jé sir. 7Kãkufár pipir vỹ ki nỹtĩ gé. Kỹ tóg to Topẽ mré vĩ mũ gé, kỹ tóg ag mỹ: “ha kãnhkré,” he mũ gé. 8Kỹ ag tóg ko kãn mũ sir. Funfór ag tóg mũ. Hã ra tóg kén mũ sir. Kre tỹ 7 (ke) fãn tóg mũ, ti ke ẽn ti, ag tỹ génh kỹ. 9Ũ tỹ 4 mil (ke) ag vẽ, hẽn ri ke mũn, ẽmĩ ko mũ ag.
Kar kỹ tóg ag mỹ: “mũ nỹ,” he mũ. 10Kỹ tóg vẽsỹmér ag mré canoa kã ki rã mũ, kỹ ag tóg ga tỹ Dalmanuta ra mũ mũ.
Fariseu ag tỹ milagre ve sór
(Mt 16.1-4)
11Kỹ Fariseu ag tóg ti tá junjun mũ, ón kỹ ti ki jẽmẽ jé. Kỹ ag tóg ti mỹ nén han vãnh to vĩ mũ, ti tỹ ag mỹ han jé. Ag tỹ ti jykre to: “Topẽ jykre mỹ vỹ?“ he sór vẽ.
12Kỹ tóg ti fe tỹ jẽnger jagy han mũ. Kỹ tóg ag mỹ: “ãjag ne tóg ẽg tỹ nén han vãnh hã ve sór mũ',” he mũ. “Sỹ ke há vẽ, hã kỹ sóg ke mũ: venh ke tũ ãjag nĩ. Ũri ke ag vỹ ẽg tỹ nén han vãnh venh ke tũ pẽ nĩ,” he tóg, ag mỹ. 13Kỹ tóg ag ré kỹ tĩ mũ sir. Canoa kã ki tóg rã mãn mũ, kỹ tóg kafã ũ ra tĩ mũ sir.
Vẽjykre kórég kãme
(Mt 16.5-12)
14Hã ra ti mré mũ tĩ ag tóg ẽmĩ ki ẽkrén ja tũ nĩ. Ẽmĩ pir hã vỹ canoa kã kã nĩ.
15Hã ra tóg ag mỹ: “ha mẽ, Fariseu tỹ fermento há kamẽg nĩ. Herodes tỹ fermento há kamẽg nĩ gé,” he mũ. 16Kỹ ag tóg jagnẽ mỹ: “ẽmĩ kã ẽg jatun, hã kỹ tóg tag tó mũ,” he mũ.
17Hã ra Jesus tóg ki kanhró nĩn kỹ ag mỹ: “ẽmĩ tũ ti tĩ, he tũg nĩ,” he mũ. “Inh vĩ ki kagtĩg nỹtĩ ve ãjag tóg nỹtĩ. Sỹ nén han mũ to jykrén tũ nỹtĩ ve ãjag tóg nỹtĩ. Krĩ tũ nỹtĩ ve ãjag tóg nỹtĩ. 18Ãjag kanẽ ra ãjag kyvó nỹtĩ ve nĩ. Ãjag nĩgrẽg ra ãjag tóg kutu nỹtĩ ve nĩ. Mĩ ẽkrén nĩ, 19sỹ ẽmĩ tỹ 5 (ke) tỹ ũn e jẽn ja ẽn mĩ. Ũ tỹ 5 mil (ke) ag vỹ kó, mỹr, hã ra tóg kén. Ãjag kẽj tỹ hẽ ri ke fãn, ẽmĩ ke tỹ?“ he tóg. Kỹ ag tóg: “kẽj tỹ 12 (ke),” he mũ.
20Kỹ tóg: “kỹ ẽmĩ tỹ 7 (ke) to jykrén nĩ gé. Ũ tỹ 4 mil (ke) ag vỹ kó, hã ra kre tỹ hẽ ri ke vỹ fór, ti ke tỹ?“ he mũ. Kỹ ag tóg: “kre tỹ 7 (ke),” he mũ.
21Kỹ tóg ag mỹ: “ge ra ãjag tóg ki kagtĩg nỹtĩ,” he mũ. Ti tỹ ag mỹ Fariseu ag jykre tó jan hã vẽ, Herodes jykre ti. Ag jykre hã to tóg: ag tỹ fermento há, he ja nĩ.
Jesus tỹ ũn kyvó tỹ há' he
22Kỹ ag tóg kafã ũ tá junjun mũ sir, ẽmã tỹ Betsaida tá. Kỹ tá ke ag tóg ũn kyvó pére kãmũ mũ, ti tỹ ti nĩgé tỹ ti mẽ kỹ ti tỹ há' he jé. 23Kỹ tóg ti nĩgé kãgmĩ kỹ ti pére kutẽ mũ. Kỹ tóg ti nĩgé to sug kỹ ti kanẽ mĩ tĩn mũ. Kỹ tóg ti mỹ: “ã mỹ nén ũ vég mũ?“ he mũ.
24Kỹ tóg ẽvãnh kỹ ti mỹ: “ag ve inh, hã ra ag tóg inh mỹ tỹ ka mũ ẽn ve nỹtĩ,” he mũ.
25Kỹ tóg ti nĩgé tỹ ti kanẽ mẽ mãn mũ, kỹ tóg ẽvãnh há han mũ sir. Há' he tóg mũ. Tã mĩ tóg ve há han kãn mũ, ũn kyvó ja ti. 26Kỹ tóg ti mỹ: “ha vẽsỹmér ã jamã ra tĩg. Ẽmã tag ra vỹn ke tũg nĩ,” he mũ. Kỹ tóg tĩ mũ sir.
Pedro tỹ Jesus tó
(Mt 16.13-20; Lc 9.18-21)
27Kỹ Jesus tóg ti mré mũ tĩ ag mré tĩg mãn mũ gé sir, ẽmã tỹ Cesaréia Filipe tá ga ra. Ẽpry jagma tĩg kỹ tóg ag mỹ:“ag iso hẽ ri ke tĩ?“ he mũ.
28Kỹ ag tóg ti mỹ: “João Batista vẽ, he ag tóg tĩ, ã to. Jãvo ũ ag tóg: Elias vẽ, he tĩ. Jãvo ũ ag tóg: Topẽ vĩ tó tĩ ũ vẽ, he tĩ gé, “ he mũ.
29Kỹ tóg: “ag jãvo ãjag iso hẽ ri ke tĩ?“ he mũ. Kỹ Pedro tóg ti mỹ: “tỹ ã Cristo nĩ,” he mũ. 30Kỹ tóg ag mỹ: “hỹ,” he kar kỹ ag jyvẽn mũ, ag tỹ ũ mỹ ti kãmén tũ nĩ jé.
Jesus tỹ ti jagtar ke tó
(Mt 16.21-28; Lc 9.22-27)
31Kỹ tóg: “tỹ sóg ẽprã ke fi kósin nĩ,” he mũ. “Ijagtar jagy han ke vẽ. Kófa ag tỹ iso: “kórég ti nĩ,” henh ke vẽ, Topẽ tũ ki rĩr tĩ ag ke gé, Topẽ vĩ to ẽg kanhrãn tĩ ag ke gé. Ag tỹ isén ke vẽ, kurã tãgtũ tũg kỹ sóg rĩr mãn mũ hã ra,” he tóg. 32Ag mỹ tóg jamã há ra tó mũ.
Hã ra Pedro tóg ti pin kỹ ti mỹ: “vĩ tỹ ge han tũg nĩ,” he mũ. 33Hã ra Jesus tóg vẽsỹjãm ti mré mũ tĩ ag ki ẽvãnh kỹ Pedro to jũ mũ. “Kutĩg, Satanás'! Ã pijé Topẽ jykre tó mũ',” he tóg. “Ẽprã ke jykre vẽ, ã tỹ inh mỹ nén tó mũ tag ti,” he tóg.
34Kỹ tóg ti mré mũ tĩ ag mré vẽnh kar jé prẽr mũ, kỹ tóg ag mỹ: “ãjag tỹ inh mré kãmũ kỹ tóg há tĩnh mũ. Kỹ ãjag jykre tovãnh nĩ, ãjag tỹ isũ tãvĩ han jé. Ha vé, ag tỹ krunh tỹ inh kri fi kỹ sóg tĩg ke mũ, ag tỹ to isa kỹ isén jé, ha vem nĩ. Vẽnh nenh ke tũ sóg nĩ. Isỹ tag han ri ke han nĩ, kurã kar ki, ãjag tỹ inh mré mũ sór nỹtĩn kỹ. Isũ hã han to tar nỹtĩm nĩ,” he tóg. 35“Ãjag tỹ ãjag jykre hã han sór kỹ ãjag tóg nũgme ki vár ke mũ. Jãvo ãjag tỹ isugrĩn ãjag jykre tovãnh kỹ ãjag krenkren ke mũ,” he tóg. 36“Hẽn ri ke mũn ãjag hỹn ga kri nén ũ kar gỹjỹ henh ke mũ, hã ra ãjag kuprĩg tóg vãfor ke mũ. Kỹ tóg kórég nỹ. 37Ẽg tỹ ne tỹ ẽg kuprĩg kajãm ke tóg tũ tĩ, ẽg tỹ ti ve mãn jé. 38Ũri ke ag tóg vyr mỹ topẽ ũ hynhan tĩ, kỹ ag tóg Topẽ vĩ mranh tĩ gé. Ag kã mĩ iso mỹ'ãg tũg nĩ. Ãjag tỹ ũri inh vĩ to mỹ'ãg kỹ sóg, inh kãtĩg mãn kỹ ãjag to mỹ'ãg ke mũ gé, isỹ Topẽ tỹ jẽgnẽ jafã mág ag mré kãtĩg kỹ. Ijóg vỹ tóg isỹ ũn mág han ke mũ. Tỹ sóg ẽprã ke fi kósin nĩ,” he tóg.
Atualmente selecionado:
Marcos 8: kgp
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido