Marcos 10
10
Ẽg tỹ ẽg prũ fi fón ke tũ
(Mt 19.1-12; Lc 16.18)
1Kỹ tóg tá kutẽ kỹ ga tỹ Judéia ra tĩ mũ sir, goj tỹ Jordão mã ra. Kỹ vẽnh e ag tóg ti pénĩn vẽnhmãn mũ sir, kỹ tóg ag kanhrãn mãn mũ gé. Ti tỹ nén han tĩ ẽn han mãn tóg mũ. 2Kỹ Fariseu ag tóg ti tá junjun mũ gé sir. Ag tỹ ón kỹ ti ki vẽnh prũ fón ke jẽmẽ sór vẽ. Kỹ ag tóg ti mỹ: “ẽg tỹ ẽg prũ fi mỹ: ha tĩg, he tag mỹ kórég nỹ'?“ he mũ. 3Kỹ tóg: “Moisés vỹ ãjag mỹ hẽ ri ké?“ he mũ. 4Kỹ ag tóg: “ã tỹ ã prũ fi fón sór kỹ fi mỹ vẽnh rán kỹ nĩm nĩ, fi tỹ kar kỹ tĩg jé, he ja tóg nĩ,” he mũ.
5Hã ra tóg ag mỹ: “ãjag jykre kórég nỹtĩn kỹ, hã kỹ tóg ãjag mỹ tag tó ja nĩ,” he mũ. 6“Topẽ tỹ nén kar han ve ki tóg ti mré fi han,” he tóg. 7“Hã kỹ ũn gré tóg ti prũ fi to ti panh ré kỹ tĩ mũ, ti mỹnh fi ré kỹ tóg tĩ mũ gé, ti prũ fi mré. 8Fi mré tóg tỹ ũn pir nĩ sir, he ja tóg nĩ, Topẽ ti. Hã kỹ fag tóg tỹ ũn pir nỹtĩ. Fag pijé tỹ ũn régre nỹtĩ'. 9Hã kỹ fag tỹ vẽnh kãpãm tũg nĩ. Ũ mỹ: “ha ã prũ fi fón,” he tũg nĩ. Topẽ tỹ fag tỹ ũn pir há vẽ mỹr,” he tóg.
10Ag tỹ ĩn kã tánỹtĩn kỹ ti mré mũ tĩ ag tóg ti ki jẽmẽ mãn mũ, vẽnh prũ fón ke to. 11Kỹ tóg ag mỹ: “ãjag tỹ ãjag prũ fi fón kar kỹ ũ fi tỹ prũg mãn kỹ ãjag prũ tũ fi vẽ, ha mẽ,” he mũ. 12“Kỹ fi tỹ fi mén fón kar ũ tỹ mén mãn kỹ fi mén tũ vẽ gé,” he tóg.
Jesus tỹ gĩr mỹ vĩ há han
(Mt 19.13-15; Lc 18.15-17)
13Jo fag tóg gĩr tatĩ kãmũ mũ, Jesus tỹ ti nĩgé tỹ ag mẽ jé. Hã ra ti mré mũ tĩ ag tóg fag to jũ mũ.
14Kỹ tóg vég mũ, kỹ tóg ti mré mũ tĩ ag to jũ mũ. “Vĩ tũg nĩ, gĩr ag mỹ. Gĩr fag tỹ iso kãmũ kamẽg tũg nĩ. Ũ tỹ ge hã vỹ Topẽ krẽm nỹtĩ nĩ, ti tũ vỹ tỹ fag nỹtĩ',” he tóg. 15“Sỹ ke há vẽ. Gĩr ag vỹ iso hapẽ nỹtĩ. Ũn kãsir tag fag ri ke nỹtĩm nĩ. Ke tũ nĩ mũ ra ãjag tóg fag jãvo venh ke tũ pẽ nĩ,” he tóg.
16Kỹ tóg gĩr nunh jagma ti pẽ fón mũ sir. Ti nĩgé tỹ tóg ag mẽ kãn mũ sir. Fag to tóg Topẽ mré vĩ mũ sir.
Ũn riko kãme
(Mt 19.16-30; Lc 18.18-30)
17Kỹ Jesus tóg tĩg mãn mũ gé sir. Hã ra kyrũ ũ tóg ti to vẽnhvãg kãtĩ mũ, kỹ tóg ti jakrĩ tỹ jẽ mũ, kỹ tóg ti mỹ: “Senhor, hapẽ ã tóg jẽ,” he mũ. “Sỹ inh rĩr krỹg ja tũ venh há tóg tĩ. Kỹ inh hỹn vẽjykre há tỹ ne han mũ?“ he tóg.
18Kỹ Jesus tóg ti mỹ: “ã tỹ ne jé inh mỹ: há ã tóg jẽ, he nẽ?“ he mũ. “Ẽg pijé há nỹtĩ'. Topẽ hã ne ti pir mỹ há nĩ',” he tóg. 19“Topẽ tỹ nén to ẽg jyvẽn mũ ki kanhró ã tóg nĩ, hã vỹ: ũ tén tũg nĩ, ã prũ tũ fi mré nỹ tũg nĩ, nén ũ péju tũg nĩ, ũ to ón tũg nĩ, ũ tũ to én tũg nĩ, ã nỹ mré ã jóg kamẽg nĩ, he mũ,” he tóg ti mỹ.
20Hã ra tóg ti mỹ: “tag kar ki sóg króm kãn, isĩn kã,” he mũ.
21Kỹ tóg ti ki ẽvãnh mũ, ti to há nĩn kỹ. “Nén ũ pir vỹ tũ nĩ ver,” he tóg mũ. “Ã tũ kar vãm tĩg, ã tỹ ũn jagtar ag mỹ vin jé, jãnkamy ti. Kỹ ã tóg kanhkã tá tũ mág nĩ sir. Kar kãtĩg nĩ, ã tỹ inh mré tĩg jé,” he tóg. 22Kỹ Jesus vĩ tag tóg ti mỹ vẽnh mỹ tĩ. Fe kaj tĩ tóg mũ sir, ti tũ e nĩn kỹ.
23Kỹ tóg vẽnh pénĩn ẽvãnh kỹ ti mré mũ tĩ ag mỹ: “jagy ti nĩ, ũn riko tỹ Topẽ tỹ tỹ ẽg pã'i nĩ venh ke ti,” he mũ. 24Kỹ ti vĩ tóg ti mré mũ tĩ ag mỹ e tĩ. Hã ra tóg ag mỹ ke mãn mũ. “Inh krẽ',” he tóg. “Jagy tãvĩ ti nĩ, mỹr, ẽg tỹ Topẽ tỹ tỹ ẽg pã'i nĩ venh ke ti,” he tóg. 25“Kỹ tóg ũn riko ag mỹ jagy han tĩ. Kãvãru pãnĩ sór vỹ préj nor fĩn kutẽ tũ nĩgtĩ mỹr,” he tóg. “Ti tỹ fĩn kutẽ há nĩ ra tóg há tĩ vẽ, ũn riko ag tỹ Topẽ tỹ tỹ ẽg pã'i nĩ venh ke ti,” he tóg.
26Kỹ tóg ag mỹ e pẽ tãvĩ tĩ. “Kỹ ũ hỹn kren ke tũ pẽ nĩ,” he ag tóg, jagnẽ mỹ.
27Kỹ tóg ag mỹ: “ẽprã ke ag vỹ vẽnh kren han ki kagtĩg nỹtĩ,” he mũ. “Ag jãvo Topẽ tóg ẽg krenkren han ki kanhró nĩ. Topẽ hã tóg nén kar han ke ki kanhró nĩ inhhã,” he tóg.
28Kỹ Pedro tóg ti mỹ: “ha vé, ẽg tỹ nén ũ kar ré kỹ ẽg tóg ã mré mũ mũ,” he mũ.
29Kỹ tóg:“sỹ ke há vẽ. Ãjag kã mĩ ũ tóg kejẽn isugrĩn ti jamã ré kỹ tĩ mũ, ti jãvy ag, ti kãke ag, ti ve fag, ti mỹnh fi, ti panh ti, ti krẽ ti, ti japỹ ré kỹ ke gé, vẽnh vĩ sér tugrĩn,” he tóg. 30“Ẽn vỹ tóg sir vẽnh kato ũ tỹ 100 (ke) venh ke mũ, ũri hã ra, hã vỹ: ẽmã kar, jãvy kar, kãke kar, ve kar, mỹnh kar, ẽpỹ kar ve jé tóg ke mũ. Hã ra ag tóg ti vóg kónãn ke mũ gé. Kar kỹ tóg vãhã sir rĩr krỹg ja tũ venh ke mũ gé,” he tóg. 31“Jãvo tag ki ũn mág ũ tỹ tá térenh ke vẽ, kỹ tag ki ũn kãsir ũ tỹ tá jãprynh ke vẽ,” he tóg.
Jesus tỹ ti jagtar ke tó mãn
(Mt 20.17-19; Lc 18.31-34)
32Kar kỹ Jesus tóg ti mré mũ tĩ ag mré tĩ nĩ sir, Jerusalém ra. Ag jãmĩ tóg tĩ nĩ. Hã ra tóg ag mỹ e tĩ. Mũmẽg ag tóg mũ sir. Kỹ tóg ũ tỹ 12 (ke) ag mỹ ti tỹ nén venh ke mũ ẽn kãmén mãn mũ, vyr mỹ. 33“Ha vé, Jerusalém ra ẽg tóg mũ mũ,” he tóg. “Ẽprã ke fi kósin ẽn vỹ jagtar ke mũ. Inh hã vẽ. Ón kỹ Topẽ tũ to pã'i ag tóg ag tỹ isỹ nén han sór mũ ẽn han ke mũ,” he tóg. “Ag tỹ iso: “ter jé tóg ke mũ,” henh ke vẽ, kỹ ag tóg fóg ag mỹ inh fẽg ke mũ. 34Kỹ fóg ag tỹ iso é henh ke vẽ. Ag tỹ iso sug ke vẽ. Ag tỹ inh mrãnmrãn ke vẽ. Isén ke ag tóg ke mũ. Hã ra isóg kurã tãgtũ ki rĩr mãn mũ sir,” he tóg.
Tiago mré João ag tỹ tỹ pã'i jẽ sór
(Mt 20.20-28)
35Kỹ Tiago mré João ag tóg ti kukãm mũ mũ, Zebedeu krẽ ag. “Senhor, ẽg mỹ ẽg tỹ nén to vĩ mũ tag ti han,” he ag tóg. 36Kỹ tóg ag mỹ: “ne nẽ,” he mũ. 37Kỹ ag tóg ti mỹ: “kejẽn ã tóg tỹ pã'i nĩnh mũ,” he mũ. “Kỹ tóg sỹ ã pẽgja tá nĩnh há tĩ vẽ,” he tóg, jo ũ tóg: “sỹ ã jakãnh tá nĩnh há tóg tĩ vẽ,” he mũ gé. “Ẽg tỹ ã rã hã nỹtĩnh há tóg tĩ vẽ, ã tỹ tỹ pã'i nĩn kỹ,” he ag tóg.
38Hã ra tóg ag mỹ: “ãjag tỹ nén to vĩ mũ ki kagtĩg ãjag tóg nỹtĩ,” he mũ. “Ãjag mỹ inh ri kén jagtar sór mũ'? Ãjag mỹ ãjag jagtar jagy han kỹ to krónh kenh ke tũ nĩ vỹ?“ he tóg.
39Kỹ ag tóg: “hỹ, ke jé ẽg tóg ke mũ,” he mũ. Hã ra Jesus tóg ag mỹ: “hỹ, jagtar jé ãjag tóg ke mũ, inh ri kén,” he mũ. “Vẽsỹrénh jé ãjag tóg ke mũ, inh ri kén. 40Hã ra isũ tũ vẽ, sỹ ãjag mỹ: ha inh pẽgja tá nĩ, ha inh jakãnh tá nĩ, he jé. Ũ tỹ inh rã nỹtĩnh ke mũ ẽn ag hã tỹ inh rã nỹtĩnh ke vẽ,” he tóg.
41Hã ra ũ tỹ 10 (ke) ag tóg mẽg mũ, kỹ ag tóg ag to jũ mũ sir. 42Kỹ tóg ag jé prẽr kãn kỹ ag mỹ: “fóg tỹ pã'i ag jykre ki kanhró ãjag tóg nỹtĩ,” he mũ. “Vẽnh kar jẽgnẽg ag tóg tĩ, kỹ ag mág ag tóg vẽnh kar mỹ: gem nĩ, ge tũg nĩ, he tĩ, vĩ tar han kỹ. 43Ag ri ke han tũg nĩ. Ãjag mỹ tỹ ũn mág nỹtĩ sór mũ'? Kỹ tỹ jagnẽ mỹ rãnhrãj tĩ ri ke nỹtĩm nĩ. 44Ãjag mỹ tỹ pã'i nỹtĩ sór mũ'? Kỹ tỹ jagnẽ krẽm ke nỹtĩm nĩ, tỹ ũn kãsir ri ke nỹtĩm nĩ. 45Hã kỹ sóg ũ mỹ rãnhrãj tĩ tũ nĩ gé. Sỹ tỹ ãjag mỹ rãnhrãj tĩ nĩ jé sóg kãtĩg. Tỹ sóg ẽprã ke fi kósin nĩ. Hã kỹ sóg vẽnh kar jagfy ter ke mũ, sỹ ag krenkren han jé,” he tóg.
Ũn kyvó tỹ há' he
(Mt 20.29-34; Lc 18.35-43)
46Kejẽn tóg ti mré mũ tĩ ag mré ẽmã tỹ Jericó tá jun mũ. Ag tỹ Jerusalém ra mũ vẽ. Kỹ ag tóg Jericó ki pa mũ gé. Vẽnh e tãvĩ tóg ag mré mũ mũ. Hã ra ag tóg ũn kyvó vég mũ. Bartimeu vẽ, Timeu kósin vẽ. Ẽpry kri nĩ kỹ tóg vẽnh kar mỹ: “inh mỹ nén ũ nĩm,” he nĩgtĩ. 47Ẽn tóg Jesus tỹ ẽmĩn jagma tĩg mẽg mũ sir. Kỹ tóg prẽr mũ sir. “!..Jesus'..!“ he tóg. “!..Davi krẽ'krẽ'..! !..Ijagãgtãn ra..!“ he tóg. 48Hã ra ag tóg ti to jũgjũ kỹ “mẽ kã nĩ nĩ,” he mũ. Hã ra tóg prẽr mãn', prẽr mãn', he mũ. “!..Davi krẽ'krẽ'..!“ he tóg. “!..Ijagãgtãn ra..!“ he tóg.
49Kỹ tóg ti to krỹg he mũ. Kỹ tóg ti jé prẽr mũ sir. Kỹ ag tóg ti mỹ: “ã fe tỹ há' hé, jẽg ra, ã jé tóg prẽr mũ,” he mũ. 50Kỹ tóg ti pãritó fón kỹ jẽgnẽ mũ sir. Jesus to tóg tĩ mũ sir.
51Kỹ tóg ti mỹ: “inh ã tỹ hẽ ri kenh mũ?“ he mũ. Kỹ tóg: “Senhor, sỹ venh há tóg tĩ,” he mũ. 52Kỹ tóg: “hej, ã tỹ há' henh ke nẽ ha, ã tỹ inh ki rã tugrĩn“ he mũ. Kỹ tóg vẽsỹmér ẽvãnh há' he mũ sir, kỹ tóg ti nón tĩ mũ sir, ẽpry jagma.
Atualmente selecionado:
Marcos 10: kgp
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido