Sealm 6
6
Sealm VI
Dauid sang þysne syxtan sealm be his mettrumnesse and be his earfoðum, and eac be þam ege þæs domes on Domesdæge; and swa deð ælc þæra þe hine singð; and swa dyde Crist, þa he on eorðan wæs, he hine sang be his earfoðum; and eac Ezechias be his untrumnesse.
1Drihten, ne þrea þu me on þinum yrre,
ne on þinre hatheortnesse ne swenc me.
2Ac miltsa me, Dryhten, for þam ic eom unhal;
and gehæl me for þam eall min mægn
and eal min ban synt gebrytt and gedrefed,
3and min sawl and min mod ys swyðe gedrefed.
Eala, Drihten, hu lange wylt þu þæt hit on ðam sy?
4Gehwyrf la, Drihten, to me and alys mine sawle,
and gedo me halne for ðinre mildheornesse.
5For ðam þa deadan þe on helle beoð, þin ne gemunan,
ne ðe andetað ne ne heriað, swa swa we doð.
6Ic swince on minre granunge,
and ælce niht on minum bedde ic sice and wepe,
and hwilum min bedd wæte mid tearum.
7Mine eagan synt gedrefede for yrre
and ic eom forealdod betweoh eallum minum feondum.
8Gewitað fram me ealle þa þe unriht wyrcað,
for ðam þe Drihten hyrde mine wependan stefne,
9and God gehyrde mine healsunge,
and Drihten onfeng min gebed.
10Sceamian heora for ði and syn gedrefede ealle mine fynd,
and gan hy on earsling, and sceamien heora swiðe hrædlice.
Atualmente selecionado:
Sealm 6: ASPsa
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.