Lukas 5
5
Mompomaid ni Yisus togna
(Mat 4:18-22; Mrk 1:16-20)
1Ido runat, minundii si Yisus so imbing nu Liu' Ginisarit.#5:1 Ginisarit: Siowan Kamus Kitab. Osuang lobuw muimpit-impit so obi' Niyo ri mokirorongou nu tinongaran nu Kinoringan. 2Nokosiou sono si Yisus duo alud mudul-dudul so imbing-i. Ongo moomukot-i monguugas nu pukot nosiro ri.#5:2: Pukot nu gulu ri okon ko soko pukot kosiono tu. Maayo om suat-a so raat. Siowan gambar. 3Sumokoyo yo si Yisus so alud ni Simun, om potulaki yo Niyo potonga' sabat. Mogomo yo Iyo om montuduko yo nu lobuw suang so imbing nu liu' ri.#Mat 13:1-2; Mrk 3:9-10; 4:1
4Nopupus Iyo montuduk, tongaro yo Niyo si Simun nu, “Gauo yo potonga' so olalom-o, om potaano yo pukot muyu no su' kipait,” koo.
5Sumombuto yo si Simun nu, “Oo Tuan, nosuaban kai siawi mupori, nga insan songkayu d'ado ya. Nga pagka monuu' Ko, itaan ku po koimbagu,” koo.#Yns 21:3
6Taani yo sono nosiro, om nokosuat nu kawan nu pait om ogon-ogon nopisi' pukot nosiro ri.#Yns 21:6 7Pagka soko iri, minokitabang-a nosiro nu kouna'an so ido alud-i. Osuwi yo sono nosiro kiduo alud-i nu pait, sampai mokilololok-o nu koo'ogob.
8Nosiou iri ni Simun, sumurukudo yo iyo so tiningkuangon ni Yisus om mutongaro yo nu, “Oo Tuhan, laiwi aku yo, so' aku yo po kikoraayan,” koo.
9Nopula-pulaan si Simun om kouna'an niyo ri nu koosuang nu pait naalap nosiro ri. 10Soko iri ya pudi una' ni Simun, si Yakubus om si Yuanis inonakan ni Jibidius so ido alud-i. Nga, mutongaro yo si Yisus so si Simun nu, “Ikod kilaa'! Kiat kosiono ourug ko sono nu moongingol nu lobuw poimaid so Aku, soko inimporian iya nu momukot ko,” koo.
11Aako yo nosiro alud-i potindal, om ogoli yo nosiro kiawi'-awi' ri, om maido yo so si Yisus.
Minomali' si Yisus nu lobuw binolangon
(Mat 8:1-4; Mrk 1:40-45)
12Ido runat, minian si Yisus so ido bandar. Dii kuwai ido koyuwan noruyut nu balang. Nosiou niyo si Yisus, sumurukudo yo iyo so tiningkuangon ni Yisus mindamo nu, “Oo Tuan, bang moingin Ko, opoli'an Mu ya aku,”#5:12: Mongowaid nu oturan nu ugama Yaudi, lobuw kiosakit nu ono dai otoop mongusaa' so Kinoringan so waloi sosombooyangan. koo.
13Topopo yo ni Yisus ulu nu lobuw iiri inuyud mutangar nu, “Moingin Aku ya! Kaatu' ko yo sono,” koo. Soko iri po, nopoli'an-o sono lobuw-i.
14Kodawi yo iyo ni Yisus nu dai nipogalak-galak iri so isai-isai ya om mutongaro po Iyo nu, “Panou-o osikap mian so imam mokiudio pongilaan nu nopoli'an ko yo. Oopod ono pongusaa' yo suat so kinopoli'an mu soko nisuu' ni Musa, pongilaan nu lobuw suang nu nopoli'an ko yo sono,” koo.#Ot 14:1-32
15Nga, nokolongkop-a dii tuturan suat so si Yisus. Osuang sono lobuw linumoga' mongkinongou so Iyo om mokipali' nu boroginis nu rorooton, om kiawi' nosiro nopoli'an. 16Pagka soko iri, dadan sono si Yisus mian so tontong oyiyingo mogdu'a.
Minomali' si Yisus nu lobuw kakung
(Mat 9:1-8; Mrk 2:1-12)
17Ido runat, laid ni Yisus montuduk, osuang lobuw Parisi om moomontuduk nu Ukum ni Musa linumoga' kiat so Galilia, Yudia, om Yirusalim. Kiawi' nosiro minogom mongkinongou so Iyo. Kikuasa Iyo kiat so Kinoringan momali' nu lobuw morosakit. 18Iya iiri lumogaa yo tinu-tinu koyuwan minonganggung#5:18 minonganggung; intawa: monongoranggung nu lobuw kakung. Pokioowitan nosiro so rinuang nu waloi-i padu nipolak so otingkuangan ni Yisus, 19nga pagka nodasok waloi-i nu lobuw, dai nokaasuw nosiro. Indadi, owito yo nosiro lobuw kakung iiri so dilanggau nu waloi-i, om uangi yo nosiro taap-i pinouluwan nu lobuw iiri so otingkuangan-o ni Yisus om lobuw suang-i.
20Noilaan-o po ni Yisus nu opiot koimaidan nosiro so Iyo, mutongaro yo Iyo so lobuw iiri nu, “Oo lakitu, noompunan-o koraayan mu ri,” koo.
21Moomontuduk nu Ukum ni Musa om lobuw wokon nu Parisi ri, tumimpuuno sono rumoraayan so si Yisus om mongiro-kiro so inawo nu, “Isai gaam lobuw iitu no? Opogi Iyo mubaag nu Kinoringan. D'ado boto kopongampun nu koraayan sondiang ko Kinoringan!” koo.
22Noilaan-a ni Yisus inawo nosiro, mutongaro yo sono Iyo nu, “Nokuro ka su mongiro-kiro kou nu soko ono? 23Ombo ka su otoop tongaron, ‘Noompunan Ku yo koraayan mu ri,’ intawa, ‘Tungag-o om panou-o,’ koo? 24Nga kosiono pointolang Aku so kou nu, Aku yo su Anak nu Riniba om kikopogboya'an Aku so riniba tu mongampun nu koraayan,” koo. Tongaro yo Niyo lobuw kakung iiri nu, “Undii yo, kokato yo poomoturuwan mu no om uli' yo!” koo.
25Mundiio yo sono lobuw iiri, kokato yo poomoturuwan niyo ri, om mulio yo maid nu mongorayou nu Kinoringan. 26Noiranan nosiro kiawi', om minongorayou nu Kinoringan, om mutongaro yo maid nu lumaa' nu, “Sobana ko koiran-iran nosiou toko nu runat iitu,” koo.
Pinaau ni Yisus si Liwi
(Mat 9:9-13; Mrk 2:13-17)
27Nopupus-o po iri, lumobuso yo si Yisus. Nokosiou sono Iyo nu moomumpung nu sukai, ingoranan so si Liwi,#5:27: Ngaran koduo ni Liwi, si Matius. mogom-ogom so poonorima'an nu sukai. Paawo yo iyo ni Yisus nu, “Waid-o so Aku,” koo. 28Mundiio yo si Liwi, om ogoli yo niyo kiawi' songapan niyo ri, om maido yo so si Yisus.
29Muromi-romio yo sono si Liwi so waloi niyo ri pinongorumat so si Yisus. Osuang moomumpung nu sukai om lobuw wokon songogoman so nosiro mongokan. 30Rinumoraayan sono lobuw Parisi om moomontuduk nu Ukum ni Musa. Mutongaro yo nosiro so mompomaid ni Yisus nu, “Monguro kou ka murung mongokan so moomumpung nu sukai om wokon lobuw kikoraayan?” koo.#Luk 15:1-2
31Sumombuto yo si Yisus nu, “Lobuw kaatu' no ya, dai muru' nu duktur, ono-ono ya lobuw dai kaatu' no. 32Linumoga' Aku okon-a ko lobuw d'ado koraayan-i su diumon Ku, nga modium Aku nu lobuw kikoraayan-i, su' rumorogo nosiro,” koo.
Duduat suat nu mupuasa
(Mat 9:14-17; Mrk 2:18-22)
33Mutongaro yo lobuw Parisi ri so si Yisus nu, “Mompomaid ni Yuanis om kai, obulit-a mupuasa om mogdu'a, nga mompomaid Mu no, mongokan om monginum-a,” koo.
34Sumombuto yo si Yisus nu, “Odapat muyu ka popupuasa kolobuwan mususuung so rami-rami nu muontun ong mido-ido po pongantin kusoi so nosiro? Tantu dai! 35Nga bang kolaiw-o yo pongantin kusoi-o nai so nosiro, mupuasa nai' nosiro,” koo.
36Monolig-soligo yo sono si Yisus so nosiro suat nu gogoma'on owagu om olaid dai otoop popugowulon nu, “D'ado ya lobuw moingin mongogunting nu pokakas niyo owagu no po, om ipipil so pokakas niyo olaid-o yo, so' bang waalon niyo soko ono, oraag pokakas niyo owagu no po, om kumut owagu no dai mutoop nu kumut otalup-o yo. 37Soko ono ya, d'ado lobuw pogalin nu sungoi nu anggur owagu so poianan olaid-o so' tumodak poianan-o. Sungoi nu anggur-o nga ouyaban, poianan-o nga ousiba'. 38Sungoi nu anggur owagu, subai nigalin so poianan owagu! 39Lobuw noopot monginum nu sungoi nu anggur olaid-o, dai moingin monginum nu sungoi nu anggur owagu so' ponontaman nosiro ong ono olaid-o yo su owarong,” koo si Yisus.
Atualmente selecionado:
Lukas 5: TomPWPgLgPn
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 (Active), Wycliffe Bible Translators, Inc. All rights reserved.