Matta 4
4
Nzə-tɨmbɨrha a kana Yesu
(Markus 1.12-13; Luka 4.1-13)
1Beetɨ angɨn Pitɨ Ɗəmɗəmtə a koɗə ka Yesu a zəkan a vor kaake gə Shetan Nzə-tɨmbɨrha a kanarən. 2Beetɨ gone bətə bəwtə fwat, tukotə ka fəre, myatə gən. 3Də Nzə-tɨmbɨrha a san, “Anda hyenə Nze da Həmɨnpwa, byeli ka faree maa təna gəə buroditi.”
4Yesu a luwa a san atɨ, “Mye doro vor Malɨmtɨ Ɗəmɗəmtə atɨ, ‘Aa ka buroditə ɓəmbə ɓwaara ɓa nza ka myentə, shezə ka nagi ndo ləməgi 'ye dɨ dɨma dɨ kwaamɨ Həmɨnpwa.’#4.4 Naasə: Gɨraha 8.3. ”
5Beetɨ angɨn Nzə-tɨmbɨrha a zə ka Yesu a vor Urshelima a vɨra ɗəmɗəmtə, nda kangdən a nə fintɨ Shafe. 6Nda san, “Anda hyenə Nze da Həmɨnpwa, zə saragə haa hye kangədə. Gə mye doro vor Malɨmtɨ Ɗəmɗəmtə atɨ,
“ ‘Ndi ɓa ɗɨkdə malyenye dan
təna mbalta a pwa,
gə ɓe fukə njiya,
mbwayinga a lyeb fara.’#4.6 Naasə: Dyemshe 91.11,12. ”
7Yesu a luwa a san atɨ, “Sə mgban mye doro vor Malɨmtɨ Ɗəmɗəmtə atɨ, ‘Ɓe kana Həmɨmiye a Həmɨnpwatɨ dəw.’#4.7 Naasə: Gɨraha 6.16. ”
8Nzə-tɨmbɨrha a mɨna zə ka Yesu a nə motɨ gbyalatə, a bɨlən zərgi həmnə vɨratə ka fukasə. 9Nda shea san atɨ, “Shingɨn kat hɨn ɓa vutɨrən təna gəə hɨnggunə, hye kana kupo a kale-gbəətə.”
10Yesu a san, “Təkəsə ke kwe Shetan! Giɓə mye doro vor Malɨmtɨ Ɗəmɗəmtə atɨ, ‘Ndi Həmɨmiye a Həmɨnpwatɨ dəw nə ɓəmbə hye ɓa kalan-gbəətə, sɨnə ɓəmbə hye ɓa koddən.’#4.10 Naasə: Gɨraha 6.13. ”
11Də a hangɨn Nzə-tɨmbɨrha a təkəsə ka Yesu, malyenye a shi hakan a gwadən.
Yesu a tiya hiwatə ka ləməgye dan
(Markus 1.14-15; Luka 4.14-15)
12Ite Yesu a kɨlə atɨ mye ɗɨkdə Yohana a gbərəwe, nda virwo a muɗə vor njiya Galili. 13Nda ɗaka vor vɨra Nazarat a muɗə a dɨ nza vor vɨra Kafanawum, gbyel ka kwaka gəra a vor njiya Zebulun ka njiya Naftali. 14Gə mya naadə la kpale Ishaya a boyo atɨ,
15“Njiya Zebulun ka njiya Naftali,
a tɨfə zətə a gərə Galili,
a ɓayatɨ gbɨnuwo Urdun,
a vor njiya Galili ta myee aa Yawude –
16a myee nza vor kulitə,
tən naa kaɓa ɓɨrtə.
Mingɨn a nza
vor vɨraa fyemi we,
ɓɨrtɨngɨn janga a nəngrən.”#4.16 Naasə: Ishaya 9.1,2.
17Tiyatə dɨ fərəngɨn muɗi, Yesu a tiya hiwatə ka le da Həmɨnpwa atɨ, “Porom-njiya, gəkɨlə həmnə pwa sɨka.”
Yesu a waga lagbe hwodan i kwamətə
(Markus 1.16-20; Luka 5.1-11)
18Ite Yesu nee dɨ woyo basa kwaka gərə Galili, nda naa ɓwaare kpe, jibiye ka mufe a tən yə Siman a mya wa atɨ Bitrus ka mufəngɨn Andrawus, təne dɨ vyet ndwambe darən, gə tən ji-kəɗə. 19Yesu a sarən atɨ, “Wam, kwaɗe mi, hɨn ɓa gəədəwnə ji-kəɗə 'ye ɓawa kasa ɓwaare.” 20Gbyel a hangɨn təna ɗaka ndwambye darən a koɗən.
21Ite nda woyo a gɨsə humwa, nda mɨna peyə ka i ɓwaare kpe, jibiye ka mufe, ndi Yakubu nze da Zabadi ka mufəngɨn Yohana. Təne a vor koombotə ka baagərən Zabadi dɨ ɗadə ndwambye darən. Də Yesu a watɨrən, 22gbyel a hangɨn təna dɨmgə vor koombotə, a ɗaka baagərən a koɗən.
Yesu a gwadə ji-ootə hananang
(Markus 1.40-45; Luka 6.17-19)
23Yesu a pɨrə humwa a vor njiya Galili, ta kəndəshe a vor vəni kəndəshe, ndi ta hiwa ka ləmə feme a nə həmnə pwa, ndi ta gwadə ɓwaare ta dɨmərən də ootə som-som. 24Kwakɨngɨn a ngguro a mbəgə vor njiya Siriya kat, mya payandə myee ka zərgi ootə som-som a sɨsərən, ka myee ka pɨle ji-dwatə, ka myee ka ootɨ mbərhe, ka myee ka ootɨ ndongtə nda dɨmərən də zərgi ootɨngɨn kat. 25Kaɓe təkə-təkətɨ ɓwaare dɨ vor njiya Galili, ka Dikapolis#4.25 Dikapolis: Ji-vɨre bəw., ka vɨra Urshelima, ka njiya Yawudiya, kat ka myee a ɓayatɨ gbɨnuwo Urdun ta koɗən.
Atualmente selecionado:
Matta 4: bcy
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.