Pulim 9
9
Wɛ de Noah ni-gwonim dem
1Wɛ déem swɛ Noah de o bu-baara bam swolim mo ye o we, “Ja-na dwi, se á daare á puli á jage tega baŋa maama ne. 2Amo kwei vara dwi maama, de zuna dwi maama, de tega-veila dedaane wo-korro maama, ko ta woli de ywona dwi maama mo a ke abam jeŋa ne. Te maama wó taa tiini te kɔre foone de abam. 3Amo laam pɛ abam chwoŋa se á di woŋo kolo dwi maama na ŋwe to, nenɛɛne abam nabiina na maŋe á jege chwoŋa se á di wodiiru telo maama na ke tega kam baŋa ne to. 4Abam nam ba jege se á di varem de o yera jana, kokuri to, ŋwea wo jana bam wone mo. 5Nabiinu naa varem ná go nɔɔno, amo wó seene yia mo a bwei‑o. 6Amo Baŋa Wɛ naane nabiina se ba taa nye de amo mo. Konto ŋwaane, wolo maama ná go o dwoŋi nabiinu, ko jege se ba go kotu de mo.
7Abam nam ta‑á lore-na bia á puli dedɛ, se á daare á jage tega baŋa maama ne.”
8Wɛ ta ma ta Noah de o bia bam o we, 9“Leile konto amo lage a gwoni ni mo de abam. De nam wó taa wora de pae abam bia balo na wó saŋe á kwaga ne to de. 10Ni-gwonim dem ta wó toŋe de pa woŋo kolo dwi maama na ŋwe to, ne ko ná ye zuna de vara dwi maama na tɔge de nmo ba nwoŋi nabworo kom wone to. 11A ni-gwonim dem ŋwaane amo nam lage a du duuri de nmo we, na-fɔrɔ daa bá ba se ko chɔge logo kom maama dedaane balo maama na ŋwe tega kam baŋa ne to.”
12Wɛ laam maa we, “Ni-gwonim dem amo na ke de abam de woŋo kolo maama na ŋwe to mo wó taa wora se ko taa vei wuu. Tento mo wó taa ye maana we a gwoni ni dem konto:
13Amo wó gare manlaataŋa mo kunkwonnu tem ne. Kanto mo wó taa ye gula we amo gwoni ni dedaane woŋo kolo maama na wo tega kam baŋa ne to. 14Amo ná yeini a pa doa tene, ye manlaataŋa kam ná gare wɛɛne, 15ko wó pa se amo guli ni-gwonim delo a na ke de abam de woŋo kolo maama na ŋwe to, se na-fɔrɔ daa yé fɔge ko chɔge abam maama. 16Amo ná nɛ manlaataŋa kam kunkwonnu tem wone, ko wó pa se a guli we amo Baŋa Wɛ dedaane woŋo kolo dwi maama na ŋwe to gwoni ni daane. Ni-gwonim dem nam wó taa wora se ko taa vei wuu.”
17Wɛ laam ma ta Noah o we, “Manlaataŋa kam mo wó bere we amo de tega baŋa woŋo maama na ŋwe to jege ni-gwonim daane.”
Noah bia bam taane
18Noah bia banto déem mo dɛ ba nwoŋi nabworo kom ne: Sɛm, de Ham, dedaane Jafete. Ham déem ye Kanaan kwo mo. 19Tega baŋa nabiina maama déem zege Noah bia batɔ banto yera ne mo ba laam jage ba yi tega kam baŋa jei maama ne.
20Noah déem ye valo mo. Wonto mo bobo se o jeiri Vini teeni delo bia na wae sana ba ke to. 21Dɛ dedwe o ma nyɔ ba sana bam o bugi. O na bugi to, o ma tigi o vwei dem ne bwori, kolokolo tere o yera ne. 22Kanaan kwo Ham ma zo vwei dem wone o na o kwo wom na tigi da bwori to. O ma nwoŋi pwooni o ta o na nɛ kolo to o bere o chorro telei tem. 23Sɛm dedaane Jafete ma kwei gare-dedɔrɔ ba daŋe ba bakale baŋa ne. Ba laam ma pipiri ba yibia ba yage kwaga ne, ba vo ba zo vwei dem wone. Ba ma kwoli ba kwo wom chaveera ye ba wo sɛ se ba nii o seeni.
24Sana bam ma lwoori Noah yia ne, ye o lɔre kolo o bu-balaŋa Ham na ke o yera ne to. 25O ma ta o we,
“Amo sɔɔle lwarem a yage Kanaan baŋa ne!
Wonto mo wó tiini o muri kabɛ maama wone
se o taa toŋa o pae o chorro tem.”
26O ta ma ta we,
“Baŋa Wɛ wom na ye Sɛm Wɛ to maŋe de tia mo!
Kanaan maa wó taa ye Sɛm kabaa.
27Wɛ nam wó pa se Jafete laŋa kam tiini ka yale,
se o dwi tiina dedaane Sɛm dwi tiina taa zoore daane.
Kanaan wó taa ye o kabaa.”
28Na-fɔrɔ kom na chɔge tega baŋa ko kɛ to, Noah déem ta ŋwe mo bena bia yatɔ de finnu (350). 29Noah bena yam maama déem na ke daane, o déem yi bena bia nogo de finnu (950) mo, ye o laam te.
Atualmente selecionado:
Pulim 9: KBG
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2020, Ghana Institute of Linguistics, Literacy and Bible Translation (GILLBT)