Génesis 28
28
1Usakian aín xanun kakëxun ka Isaacnën aín bëchikë Jacob, kuënxun upíokin sinánxunkin ësokin kakëxa: Min kamina uisaxunbi, Canaán me ënua uinu ꞌikë xanubi bitima ꞌain. 2Kamina Padán-aram, anua min xuta Betuel ꞌia me anu kuanti ꞌain, anu kuantankëxun kamina anua min kuku Labánnën bëchikë xanukama achúshi biti ꞌain. 3Usa ꞌain ka Nukën ꞌIbu Dios kamabi kushiñu an mi upíokin sinánxunkin min rëbúnkinëxa ꞌaisamaira ꞌia timënun ꞌimiti ꞌikën, ꞌimianan ka min rëbúnki kamanuax ꞌaisamaira ëma ꞌai uni ꞌuakamë ꞌëoti ꞌikën. 4ꞌImianan ka mi ꞌinánan, min rëbúnkikamaribi upíokin sinánxunkin Abraham kásabiokin, ënë me ꞌibuanun anu nu bërí bëtsi menu ꞌikë uni ꞌikësai tsókë ënë mi ꞌinánti ꞌikën, Nukën ꞌIbu Diosan Abraham ꞌinánuxun kásabiokin.
5Ësokin katankëxun ka Isaacnën aín bëchikë Jacob a Padán-aram anu xuakëxa. Xukëx kuanx ka Jacob Labánnën xubunu bëbakëxa, ax ka Betuel arameo uni aín bëchikë ꞌianan Rebeca Jacob ꞌimainun Esaú aín titan rarëbakë ꞌiakëxa.
Esaúnën xanu bia ñuikë bana
6Usa ꞌain ka Esaúnën aín papa Isaacnëan aín, xukë́n ꞌanáka Jacob a upíokin sinánxunkin mëníotankëxun Padán-aram anua aín xanu baritanun kixun xukë a ꞌunánkë ꞌiakëxa. ꞌImainun ka aín papan anu ꞌikë xanu bixuma ꞌanun kakë aribi sinánkëxa, upíokin sinánxunkian ënë Canaán menua kamina achúshira xanubi bitima ꞌain kixuan kakë aribi sinánkëxa, 7ꞌimainun ka Jacob Padán-aram anu aín papa ꞌimainun aín titan kakësabi oi kuankë aribi sinánkëxa. 8Usa ꞌain ka Esaúnën aín papan Canaán kakë me anua xanukama bikë a kuëëniama ꞌunánkëxa; 9usa ꞌain ka Esaú Ismael kakë uni, Abrahamnën bëchikë abë banai kuankëxa, kuantankëxun ka ñukáxun aín xanu ꞌiti uni aín bëchikë Mahalat kakë a biakëxa, ax ka Nebaiot aín chirabakë ꞌanáka ꞌiakëxa ꞌimainun ka bëráma Canaán menua bikë xanu rabë́ axribi aín xanu ꞌiakëxa.
Betel kakë me anuax Dios Jacobmi mërá ñuikë bana
10Usa ꞌain ka Jacob ax Beerseba kakë anuax kuani Aramnu kuanti bai a bibiani anun kuankëxa. 11Usai kuanbaiti ka bari kuabuti ñantabukëbë anua ñantan ꞌuxtinu bëbakëxa. Anu bërúxun ka amia katamëti achúshi maxax bitankëx aín maxkámi ami tëkëpimëti nantankëx ꞌuxakëxa. 12Anuxun namákin, iskëxbi ka achúshi tapitinëx menuaxbi kuarutankëxa naínu sënën ꞌikë isakëxa, iskin ka anua Diosan ángelkama kuarumainun raírinëxribi ubuti nitsia isakëxa. 13Usakin namákin isanan ka Nukën ꞌIbu a rapasu nixun ësokin kakëxun kuakëxa: ꞌËx kana min ꞌIbu ꞌain, ꞌianan kana min xuta Abraham aín Dios ꞌianan min papa Isaac ainanribi ꞌain. Usa ꞌixun kana mi ꞌimainun min rëbúnkikama anumi ꞌuxi rakákë me ënë ꞌinánti ꞌain. 14Usa ꞌain ka atux ꞌaisamaira ꞌuakamë ꞌëoi me putu iskësaira ꞌi aín tsipumiki ꞌimainun aín rëbumiki kuanan amiaxa bari urukë au ꞌimainun amia bari kuabúkë amiki amami amami kuankanti ꞌikën, usa ꞌain ka kamabi menu ꞌikë unikama upíokin sinánxunkë ꞌiti ꞌikën mi ꞌimainun min rëbúnkikama kupí. 15ꞌËx kana mibë ꞌain; usa ꞌixun kana uinu kaina kuani anuabi ꞌën mi bërúanti ꞌain, usa ꞌixun kana amiribishi ënë menubi mi bëtëkënti ꞌain. Mi kana usai ꞌia ꞌën kakësabiokin ꞌaxuntankëxuma ëntima ꞌain.
16Usakian kakëx aín ꞌuxkënuaxbi bësukin ka Jacobnën sinánkëxa: “Asérabi ka ënë menu Nukën ꞌIbu ꞌëbë ꞌikën kixun kana ꞌën ꞌunánkëma ꞌain.” 17Usa ꞌain kana ꞌitsaira rakuëan, ꞌimainun kana sinan: Ënë mex ka upíira ꞌikën. “¡Ënëx ka anua Nukën ꞌIbu Dios ꞌikë aín xubu ꞌikën; ꞌimainun ka naíkamë ꞌëo manámi ꞌikë aín xëputi ꞌikën!”
18Usai ꞌiónx pëkarakëma ꞌaínshi nirukin ka Jacobnën, anu tëkëpimëti noonkë maxáx bikin ꞌunánti okin nitsíankëxa, usakin ꞌatankëxun ka ënëx ka Nukën ꞌIbu Diosnan ꞌiti ꞌikë kixun sinánkin xëni bitankëxun ami anpënkakëxa. 19A menu ka bëráma achúshi ëma Luz kakin anëkë ꞌiakëxa, usa ꞌikëbi ka Jacobnën aín anë bëtsiokin anëkin Betel kakin anëakëxa. Betel kikë bana ax ka Diosan xubu ki kikë bana ꞌikën. 20Anuax ka Jacob ësai kiakëxa: Nukën ꞌIbu Diosan ka ꞌë kuania bërúanan, ꞌën piti ñu ꞌinánan ꞌën pañuti chuparibi ꞌë ꞌinánti ꞌikën, 21usa ꞌain ka ꞌëx ꞌën papan xubunu uisaibi ꞌikëma kuankëbë ax ꞌën ꞌIbu Dios ꞌiti ꞌikën. 22ꞌËn kana uinu karana ënë maxax nankë anubi Nukën ꞌIbu Dios anuxun rabiti ꞌati ꞌain; ꞌimainun kana mi asérabi manukima uisa ñukama kaina ꞌë ꞌinani a mësú mi ꞌinánti ꞌain.
Atualmente selecionado:
Génesis 28: cbrPB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 1978, 1995, 2008, 2022 Wycliffe Bible Translators, Inc. All rights reserved.