Matiyò 7
7
Hwèyòkòlelì hwe ama Yerzù
(Luk 6.37-38,41,42)
1“È rzi kàyìrzɛ̀ hwahvɛhvɛ hwatò, aŋga nanù Lohwɛ̀ à rza ò è kàyìrzɛ̀ inyɔ̀hvɛ. 2Nà òma è kàyìrzɛ̀ mòtò, nanù mɛnɛ hvɛ ndi Lohwɛ̀ à è kàyìrzɛ̀. Ndèŋgana, lìmɛni ema è gbeyànà ò lì kàyìrzɛ̀ hwahvɛhvɛ hwatò, lɔ̀hvɛ mɛnɛ ndi Lohwɛ̀ à gbeyànà lì è kàyìrzɛ̀. 3Mamɛ ndèŋgatɛ̀, ò ɛnɛ̀ è ŋmanà jùma lìmùki ema lì hwèlì ò lìrzɔ là ama ŋmànyɔ̀ŋgɔ̀ wà aŋgɔ̀, ema ò rza tànɛ̀yi lì ɛnɛ̀ ètumba ema è hwèlì ò lìrzɔ̀ là aŋgɔ̀ e? 4Nɛ ò tànɛyi lì òhweyà ŋmanyɔ̀ŋgɔ̀ wà aŋgɔ̀ nanù ema inyɛ̀ nà ò ulɛ̀ è ŋmanà jùma lìmòki ò lìrzɔ̀ là aŋgɔ̀, ema ò wà ò òhvi ètùmba ò lìrzɔ̀ là aŋgɔ̀ e? 5Ò wà mòtò wà mèhvìlì! Lòma lì ulɛ̀ ètùmba ema yò ò hwèlì ò lìrzɔ̀ là aŋgɔ̀, aŋgà nanù ò tànɛ̀yi lì ɛnɛ̀ gbamù, è ŋmanà jùma lìmòki ema à hwèlì ò lìrzɔ̀ la ama ŋmànyɔ̀ŋgɔ̀ wà aŋgɔ̀. 6O rzi wòwà hwèèmà hwe ama Lohwɛ̀ rzi ò ji ŋgbà iŋgba, èhwanja jò ò àyiŋgòwɛ̀lɛ̀lɛ̀ lì ò urzuweyà. O rzi hvimbeya hvɛ iŋgòwa ŋmɛ̀ɛ̀ŋgu mò aŋgɔ̀, èhwanja i jì làalà nà matàŋga mà awu.”
Akòhwana Lohwɛ̀ ò tɔ̀ mamɛ ema ò arza
(Luk 11.9-13)
7“Ijòwa Lohwɛ̀, à ò ŋgbà. Ò arze, Lohwɛ̀ à gbeyà ò è ɛnɛ, ò kumbe lìyòhva, Lohwɛ̀ ò è lìhvòweya è lɔ̀. 8Èhwanja tɔ̀ njɛnɛ ema à ijòwi Lohwɛ̀, à è lùwà, tɔ̀ njɛnɛ hvɛ ema à arza yòma à è ɛnɛ̀. È mɔ̀ hvɛ ema à kùmbi lìyòhva, Lohwɛ̀ à mò lìhvòweyà è lɔ̀. 9Ima rzàŋgò ema è ŋmanà à mò arzanì tɛ ehvòòtò, rzìi à mò ŋgbà ndi lìŋyàyi e? 10Tɔ̀ à mò arzanì tɛ nyàmà yà malìhwa, rzìi à mò ŋgbà ndi ŋgbààhwà e? 11Hwatò hwa wòhwe nàa inyɔ è ŋgbà tɛ hwàànà hwa anyu hwema hwe gbamù, ŋgèlì iti nà Tatɛ̀ wà ànyu ema à hwèlì ò ŋmanyu yà Lohwà. Nɛ à rzà ŋgbà màhwèyà mà gbamù ò hwatò ema hwa mò ijòwi e? 12O èŋgànɛ̀lɛ̀ rzɔ, ò gbèeyà hwahvɛhvɛ hwatò nà òma ò àrza nanù ema wɔ̀ hvɛ hwa ò gbèeyà. Nanù ndi è mbenda yà ama Lohwɛ̀ nà hwà-òhwèlì hwa hwèlìŋgɛ̀ yò òkòlɛ nà è jɔ̀kɛ̀.”
È njiya yà lòŋgɛ là gbìndèyà è ambi
(Luk 13.24)
13Yerzù rzìi à hwatɛ hvɛ lì òhwa nanù ema, “È kpèeyà ndi lì akeyà lìyòhva ema lì ihvi. Èhwanja lìyòhva ema lì teyami lì lìyɛnɛ ndì ò ehvɔ̀ndi yà mùnya, rzìi è njiya yà eni hvɛ è teyami. Ndèŋganɛlɛ hwatò hvɛ ema hwa akeeya aŋga, hwa kòki. 14Ndi lìyòhva là è njiya yà lòŋgɛ là gbìndèyà lì ihvi. Ndèŋgànɛ̀lɛ̀ è njiya hvɛ ema è lìyɛ̀lɛ̀nɛ̀ aŋga yà ambi lì akeeya. Ŋgurzu ja hwatò mɛnɛ ndi jà akeeya aŋga.
Hwà-òhwèlì hwa hwèlìŋgɛ̀ hwa mòlàŋgà
(Luk 6.43,44)
15“È aŋgòhweya hwà-òhwèlì hwa hwèlìŋgɛ̀ hwa mòlàŋgà. Wɔ̀ hwa ɛnɛ ndi ŋmɛɛ nàa mɛ̀lɛ̀ŋgù, ndi ò tenì yà mèèmà mè awu hwa hwèlì wòhwe nàa njuwɛ. 16È hwa hwiiyà ndi ò hwègbèèlì hwe awu. È rza tanɛ lì hvata lìlanjò ò tenì yà waŋga yà njenje. Tɔ̀ ehvùma yà nyɔ̀hvinyà ò waŋga yà njenje. 17Gbèe ema wò lukùmèlì wò ŋya hwehvùma hwe gbamù. Ndi gbee ema wò ùùhwì wò ŋya ndi hwehvùma hwe wòhwe. 18Gbèe ema wò lukùmèlì wò rza tànɛyi lì ŋya ehvùma yà wòhwe. Ndèŋgana hvɛ gbee ema wò ùùhwì wò rza tànɛyi lì ŋya ehvùma yà gbamù. 19Tɔ̀ ima gbee è mà wò rza ŋyaayi ehvùma yà gbamù, è mòhwɛnɛ wà hvaya à hwɛnì ndi lì wò kɛɛ rzìi à wò aŋgba ò mùnya. 20O èŋgànɛ̀lɛ̀ ò hwiye hwà-òhwèlì hwa hwèlìŋgɛ̀ hwa mòlàŋgà ò hweyà ema hwa gbeyà.”
Hwàtò ema hwa nɔ̀ŋgɔ Yerzù nà mèèmà mehwàkɛ
(Luk 13.25-27)
21“Rzekɛtɛ tɔ̀ ima mɔ̀ ema à ò nò hwɛlɛ nanù ema, ‘Ìi Rzàŋgò, Rzàŋgò’ ndi à kpèeyà ò lìkànèyà là ŋmanyu. Ndi è mòtò mɛnɛ ema à gbèyi lì emeyà là ama Tatɛ̀ wà ami ema à hwèlì ò ŋmanyu yà lohwà, mɔ̀ ndi à ò kpèeyà ò Likànèyà là ama Lohwɛ̀. 22O wòŋgò wùnyà wò hwèkàyìrzèlì rzayì-rzayì ja hwatò hwa ò nò jèeyà lì òhwà nanù ema, ‘Rzàŋgò, Rzàŋgò rzeke irzɔ i mà hwɛ lì òhweyà hwatò hweyà ema Lohwɛ̀ à mà jò òmane ema i hwa òhweyà nanù ema hwe ò gbèyɛ̀nɛ̀. Rzeke i mà gbeyàna lìinà la aŋgɔ̀ ò lì hvaya hwèlìŋgɛ̀ hwe wòhwe ò hwatò, na lì gbeyà hvɛ rzayi-rzayi ja hweyà hwe mànyakà e?’ 23Rzìi nà hwa òhweyà nanù ema, ‘Imba nà rza è hwi. È nò anjiya anù, inyɔ ema è gbeyà wòhwe!’”
È mòòŋgèlì wà gbamù nà è mɔ̀ wà èèti
(Luk 6.47-49)
24“O èŋgànɛ̀lɛ̀ tɔ̀ ima mòtò ema à hweyi hwene hwèyòhwèlì hwe ami, rzìi à gbeyà mamɛ ema hwe òhwa, à hwèlì ndi nàa è mòtò wà gbaŋgò ema à òŋgi è ndawò yà eni ò ŋmanyu yà èwòmà yà lìŋyàyi. 25O mburza hvònda è mbuwà ndɛnɛ è mà yɔɔ, meyòrzò mè mà hvùhva, è mbɛ̀hvɛ̀nì hvɛ è mà akeyà èŋge èki ema è ndawò è mà tɛmeya, ndi èŋge ndawò è rzi rzuuwe, èhwanja, è mà òŋgahwa ò ŋmanyu yà ewòmà yà lìŋyàyi. 26Ndi tɔ̀ ima mòtò ema à hweyi hwène hweyòhwèlì hwe ami, rzìi à rzi gbèye mamɛ ema hwe òhwa, à hwèlì ndi nàa èèti yà mòtò ema à òŋgi è ndawò yà eni ò ŋmanyu yà nyàŋga. 27O mburza hvònda è mbuwà ndɛnɛ è mà yɔɔ, meyòrzò mè mà hvuhva, è mbɛ̀hvɛ̀nì hvɛ è mà akeyà eŋge èki ema è ndawò è mà tɛmeya. Èŋge ndawò è mà rzùùwa è wuhweyà.”
Lìkànèyà ema Yerzù à òhvi ò lì òkòlɛ
28Nà òma Yerzù à mà kulɛ ò lì òhwa hwenè hweyà è ŋgìndì ema è mà mò òkànèyà è mà tàmeyà hwèyòkòlèlì hwe eni, 29èhwanja à mà òkòlɛ̀nɛ̀ nà lìkànèyà. A rzi hwɛ lì òkòlɛ̀ nàa Hwà-òkòlèlì hwa mbenda.
Atualmente selecionado:
Matiyò 7: bri
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2022, CABTAL