uYoohani 14
14
UYeesu lidala ilya kusogola kwa Taata
1Pe uYeesu ahajendeelela kuvhavhuuzya avhasundikwa vhaakwe kuuti, “Mutaswimililwaje mu mooyo giinyu. Mumumwitihaje uMulungu, munitihaje niine. 2Mu nyumba iya Taata waane muli uvhuzilo uvhupiti. Zitavhanje vhwevhulo, nkandi mbavhuziizye. Ishi nasogola kuvhasenganizyanya uvhuzilo. Zitavhanje vhwevhulo, nkandi mbavhuziizye. Ishi nasogola kuvhasenganizyanya uvhuzilo.#14:2 Zitavhanje vhwevhulo, nkandi mbavhuziizye. Ishi nasogola kuvhasenganizyanya uvhuzilo. IBiibiliya intanzi zye zisimviilwe mu njango iya Shiyunaani nyinji. Muli izyo, amazwi iga zimo zikuti, Zitavhanje vhwevhulo, vhuli, nkandi mbavhuziizye kuuti nasogola kuvhasenganizyanya uvhuzilo? 3Lwe nasogola nu kuvhasenganizanya uvhuzilo, ndigaluha havhili kuvhanyatula, inga pe navha, niimwe muvhe pooka niine. 4Imwe mulimanyile idala lye likufiha kwe nkusogola.”
5Pe uToomasi ahamuvhuziilizya uYeesu ahati, “We Mwene, iswe tutamanyile kwe ukusogola. Pe tungalimanya idala inza vhuli?” 6UYeesu ahamwamula ahati, “Ine ne ne lidala nu vhwanalyoli, havhili ne vhulanzi. Ataliipo umuntu we anginza kwa Taata, inga atatuushila ku kwane. 7Inga mwaamanyile ine, nkandi mumumanyile nu Taata waane. Kwandila ishi, mumumanyile uTaata, havhili mumuvhwenyi.#14:7 Uvhulondovhozi uvhwamwavho kwe kuuti, Mwe pe mumanyile ine, mumumanyile nu Taata waane. Nalyoli mumumanyile, havhili mumuvhwenyi.”
8Pe uFiilipo ahamuvhuuzya uYeesu ahati, “We Mwene, tukukulaavha utulanje uTaata. Inga watulanga, lwe waamala zyonti.” 9UYeesu ahamwamula ahati, “We Fiilipo, natendama niimwe ahavhaliilizyo ahatali honti iha, niishi ushiili utamanyile? Umuntu wonti we ambwenyi ine, amuvhwenyi nu Taata. Ishi pe shooni she ukuti, ‘Utulanje uTaata’? 10Vhuli, utakwitiha kuuti ine indi muhati ya Taata, woope uTaata ali muhati yaane? Amazwi iga ge nkuvhavhuuzya ntakuyanga ku maha gaane neene, uTaata we ali mu mwane we akuvhomba imbombo zyonti izi. 11Mwitishe zye nkuyanga kuuti, indi muhati ya Taata waane, nu kuuti woope ali muhati yaane. Ileelo inga mutakwitiha zye nkuyanga, pe mwitishe ku mbombo zye nkuzivhomba. 12Nalyoli nkuvhavhuuzya kuuti, umuntu wonti we akuniitiha, kuuti avhombaje imbombo zye niine nkuvhomba. Havhili kwe avhombaje ni mpiti kuluusya zye nkuvhomba, mwe pe nkusogola kwa Taata. 13Inga mukulaavha ishintu shonti kwi izina lyane, niine kwe mbombaje inza vwe mukulaavha. Kwi idala ilyo, nkulolesya uvhushindamu uvhwa Taata vwe vhuli. 14Inga mukundaavha ishintu shonti kwi izina lyane, kwe mbombaje inza vwe mukundaavha.”
UYeesu akuyanga izya kwinza ukwa Mupepo uMufinjile
15UYeesu ahati, “Inga munkunzite, kwe muzilandataje indajizyo zyane. 16Pe niine kwe imulaavhe uTaata kuuti aavhape uMutuuli uwamwavho, havhili uyo, kuuti avhe pooka niimwe shiima. 17UMutuuli uyo we Mupepo we alivhalolesya avhantu uvhwanalyoli. Avhantu vhe vhakumuhaana uMulungu vhatangamuposheela uMupepo uyo, mwe pe vhatakumulola, havhili vhatamumanyile. Ileelo imwe mumumanyile, mwe pe akuvha pooka niimwe, woope alitendama muhati zyinyu. 18Te mbaleshe mweka ngati mwe vhantaagwa, kwe ninze havhili kuli imwe. 19Hasyala ahavhaliilizyo hansi te nkaloleshe mu nsi umu. Ileelo imwe mulindola, mwe pe ine ndiivha ne mulanzi, niimwe muliivha mwe vhalanzi. 20Isiku ilyo, muliimanya kuuti ine indi muhati iya Taata waane, niimwe muli muhati yaane, niine indi muhati yiinyu. 21Umuntu wonti we azimanyile nu kuzivhombela imbombo zye nkulajizya, uyo we ankunzite. Woope umuntu wonti we ankunzite ine, uTaata akumukunda. Niine nkumukunda havhili ndiyilolesya apazelu ku kwakwe.”
22Pe umusundikwa wumo we izina lyakwe vhahatinji uYuuda we te wa ku Kaalyoti, ahamuvhuziilizya uYeesu ahati, “We Mwene, yingavha inza vhuli kuyilolesya kuli iswe, ileelo utahayilolesye ku vhantu avhanji vhonti?” 23UYeesu ahamwamula ahati, “Umuntu wonti we ankunzite ine, kwe azivhombelaje imbombo zye nkumulajizya. Woope uTaata waane kwe amukundaje umuntu uyo, havhili ine nu Taata waane tuliyinza ku kwakwe nu kutendama pooka nawo. 24Ileelo umuntu wonti we atankunzite ine, atakuzivhombela imbombo zye nkumulajizya. Amazwi ge nkuvhalajizya te gaane, gakufuma kwa Taata we ansonteleziizye kuli imwe.
25“Navhavhuuzya zyonti izyo lwe indi she nkutendama niimwe. 26Ileelo uMutuuli uyo, kwe kuuti uMupepo uMufinjile, we uTaata kwe amutume kuli imwe kwi izina lyane, we alivhasambiilizya nu kuvhakumbusya zyonti zye nkavhavhuzyaga. 27Lwe nkwepa, nkuvhaleshela uvhutehamu vhwane. Nkuvhaleshela uvhutehamu vhwe vhutali inza vhwe vhukufuma ku vhantu vhe vhakumuhaana uMulungu. Mutaswimililwaje mu mooyo giinyu, havhili mutogopaje. 28Mwivuuye vwe nkuvhavhuuzya kuuti, ‘Nasogola, ileelo kwe ninze kuli imwe.’ Inga nalyoli munkunzite, nkandi mukuseshela lwe mukwivwa kuuti nkusogola kwa Taata, mwe pe uTaata mupiti kunduusya ine. 29Navhavhuuzya zyonti izyo ahavhaliilizyo iha lwe zishiili kufumila, inga lwe zyinza zyafumila, muhanitihaje. 30Te njanje niimwe ahavhaliilizyo ahatali, mwe pe umupiti uwa nsi, kwe kuuti uSeetano akwinza, ileelo atali na maha kuli ine. 31Zye nkuzivhomba zye uTaata ándajiziizye kuzivhomba, inga avhantu vhonti avha mu nsi umu vhamanye kuuti imukunzite. Ishi yimiliili, twepe ipa.”
Atualmente selecionado:
uYoohani 14: nih
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021 Wycliffe Bible Translators, Inc.