Panagnaan 36
36
Siga panubuꞌ si Esaw
1Na si Esaw ilay, pinag-awnan du ya si Edom. Maka ilooy na poonan siga panubuꞌ na bay inawnan bangsa Edom. Dari ituu batnaa yana usuwan siga panubuꞌ na. 2Si Esaw ilay bay ndahan tallu. Disu yana si Ada, anak si Elon, bangsa Hīt. Ni kaduwa na yana si Oholibama, anak si Ana. Awon mmaꞌ si Ana baw, si Zibiyon, disu bangsa Hīb. 3Nda si Esaw ni katallu na, yana si Basemat, anak si Ismail. Si Basemat ilay yana danganakan si Nebayot.
4Anak si Esaw ka nda na si Ada yana si Elipas. Anak na ka nda na si Basemat yana si Ruwel. 5Ga anak na ka nda na si Oholibama yana ga si Jeyus, si Jalam ka si Kora. Mimon anak si Esaw ma sinabbut ntuu siꞌ bay pinamaddihan ndooy ni Kanan, boꞌ lalla jaꞌ sila labbasakayi.
6-8Na si Esaw ilay ka si Yaꞌkub saliꞌ-saliꞌ meka baanan hayop da. Salla na, yaꞌ sukup kuhun ni lahat da man makan hayop da mimon. Dari song hallom, buwatan si Esaw, lay ngumpo ga anak-nda na ka mimon jama lumaꞌ na, boꞌ da bay maglayin pa kapunu-punuhan ndooy ni Seyil, tā-tā na man ga si Yaꞌkub. Sila siꞌ bay pilay ddas ka mimon baanan hayop da ka mimon pangaltaꞌ da ma bay tausaha da ni Kanan.
9Na ndooy siꞌ ni Seyil, paeka na pin panubuꞌ si Esaw. Dari iya na bay poonan bangsa Edom ndooy.
Batnaa ituu na listahan siga awon ga nda si Esaw ka ga anak-mpu da. 10-13Siga nda si Esaw yana si Ada, si Basemat ka si Oholibama. Anak na ka si Ada, disu du lalla, yana si Elipas.
Kuwan si Elipas siꞌ tu, anakan lima lalla, yana ga si Teman, si Omal, si Jepo, si Gatam ka si Kenas. Maka luu gi si Amalek, anak si Elipas ka nda na ni kaduwa, yana si Timna. Ilooy ilay siꞌ labbasakayi yana siga anak-mpu si Esaw ka si Ada.
Na kuwan anak si Esaw ka si Basemat, disu du lalla, yana si Ruwel. Kuwan si Ruwel siꞌ tu, anakan mpat lalla, yana ga si Nahat, si Jera, si Sama ka si Missa.
14Na kuwan anak si Esaw ka si Oholibama, tallu lalla, yana ga si Jeyus, si Jalam ka si Kora. Mmaꞌ si Oholibama siꞌ tu yana si Ana. Maka mmaꞌ si Ana yana si Zibiyon.
15-16Na panubuꞌ si Esaw siꞌ tu ka nda na si Ada, meka bay dari datuꞌ ni bangsa Edom ndooy ni Seyil. Kuwan siga kadatuan pōꞌ man anak si Esaw ma siyaka, yana si Elipas, yana ga Datuꞌ Teman, Datuꞌ Omal, Datuꞌ Jepo, Datuꞌ Kenas, Datuꞌ Kora, Datuꞌ Gatam ka Datuꞌ Amalek. Na awon lahat da ilay siꞌ, song hallom Edom na, saꞌ na Seyil.
17Na kuwan anak si Esaw ka si Basemat, yana si Ruwel, luu du anak na bay dari datuꞌ ndooy ni Edom, yana Datuꞌ Nahat, Datuꞌ Jera, Datuꞌ Sama ka Datuꞌ Missa.
18Na siga anak si Esaw ka si Oholibama ma bay dari datuꞌ, yana Datuꞌ Jeyus, Datuꞌ Jalam ka Datuꞌ Kora.
19Dari ilooy na silay siꞌ siga kadatuan panubuꞌ si Esaw, yana si Edom.
Siga panubuꞌ si Seyil
20-21Na yaꞌ gi siꞌ ga si Esaw bay maglayin pilay pa Edom, ndang luu na ndooy bangsa Hōl maglahat. Sila ilay siꞌ bay ngawnan paglahat da Seyil, lakka man awon pa-mmean da yana si Seyil. Iya siꞌ tu luu du panubuꞌ na bay dari datuꞌ ndooy yana ga Datuꞌ Lotan, Datuꞌ Sobal, Datuꞌ Zibiyon, Datuꞌ Ana, Datuꞌ Disyon, Datuꞌ Esel ka Datuꞌ Disyan.
22Kuwan siga anak Datuꞌ Lotan ma lalla, yana ga si Hori ka si Homan. Danganakan Datuꞌ Lotan ma danda yana si Timna.
23Kuwan siga anak Datuꞌ Sobal ma lalla, yana ga si Alban, si Manahat, si Ibal, si Siyepo ka si Onam.
24Kuwan siga anak Datuꞌ Zibiyon ma lalla, yana ga si Aya ka si Ana. Ana looy ilay, iya na bay nammu boheꞌ pasuꞌ numpit man jawom tanaꞌ ndooy ni lahat lau-lau sasang na bay ngahalin ga kuraꞌ mmaꞌ na.
25Kuwan siga anak Datuꞌ Ana, disu lalla, yana si Disyon, ka disu danda, yana si Oholibama.
26Kuwan siga anak Datuꞌ Disyon ma lalla, yana ga si Hemdan, si Hesban, si Itran ka si Keran.
27Kuwan siga anak Datuꞌ Esel ma lalla, yana ga si Bilhan, si Saaban ka si Akan.
28Kuwan siga anak Datuꞌ Disyan ma lalla, yana ga si Uz ka si Aran.
29-30Dari ilooy na silay siꞌ siga datuꞌ bangsa Hōl ndooy ni Seyil. Na ga kadatuan looy ilay siꞌ, yana Datuꞌ Lotan, Datuꞌ Sobal, Datuꞌ Zibiyon, Datuꞌ Ana, Datuꞌ Disyon, Datuꞌ Esel ka Datuꞌ Disyan, kaniya-kaniya ka lūng-kampung da ndooy ni Seyil.
Siga sultan ndooy ni Edom
31Na halloman siꞌ yaꞌ lagi luu panubuꞌ si Israil bay dari sultan, ndang meka na bangsa sarī bay pingkaꞌ magsultan ndooy ni Edom.
32Duhuꞌ-duhuꞌ, Sultan Bela, anak si Beol, magsultan ndooy ni Edom. Daira Sultan Bela yana Dinhaba.
33Pag patoy Sultan Bela, lay na baw pagantiꞌ magsultan si Jobab, anak si Sera, lalla man Bosra.
34Pag patoy Sultan Jobab, lay na baw pagantiꞌ magsultan si Husyam, lalla man Teman.
35Pag patoy Sultan Husyam, lay na baw pagantiꞌ magsultan si Hadad, anak si Bedad. Sultan Hadad siꞌ tu bay maā bangsa Midiyan ndooy ni Moab jaman da bay sibonoꞌ. Daira na yana Abit.
36Pag patoy Sultan Hadad, lay na baw pagantiꞌ magsultan si Samla, lalla man daira inawnan Masreka.
37Pag patoy Sultan Samla, lay na baw pagantiꞌ magsultan si Sol, lalla man disu daira inawnan Rehobot tapit pa Sōng Yupretes.
38Pag patoy Sultan Sol, pagantiꞌ na baw magsultan si Baal-Hanan, anak si Akbol.
39Pag patoy Sultan Baal-Hanan, lay na baw pagantiꞌ magsultan si Hadal. Daira na yana Pau. Nda na si Mehetabel. Si Mehetabel ilay, mmaꞌ na si Matred. Si Matred yana anak si Mezahab.
40Na siga lūng-kampung ma lakka man panubuꞌ si Esaw sampay na ga kakawum-kawman da bay kinaddoꞌ awon da lakka man awon ga pa-mmean da. Awon ga pa-mmean da yana ga si Timna, si Alba, si Jetet, 41si Oholibama, si Ela, si Pinon, 42si Kenas, si Teman, si Mibsal, 43si Magdiel ka si Iram. Na siga pa-mmean looy ilay siꞌ labbasakayi yana panubuꞌ si Esaw, poonan bangsa Edom kaniya-kaniya ka paglahat da.
Atualmente selecionado:
Panagnaan 36: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.