Panagnaan 34
34
Si Dayna njamaan
1Na disu llaw, kuwan si Dayna, anak si Yaꞌkub ka si Liya, lay lumān ngandaꞌ-ngandaꞌ siga pagkahi na budjang ni kawum na. 2Ndooy siꞌ luu du si Sekem. Iya ilay siꞌ disu subul bangsa Hīb, maka mmaꞌ na yana si Hamol, panghuluꞌ ni lahat looy. Pag lay takita si Sekem si Dayna, lay longkop na sampay lay na ga jamaan na. 3Na sabap tud kamahapan si Sekem ni si Dayna sampay tud doman na ga ya, lay na bitsalahan na paayad balangkali kinaromanan na ya. 4Sampay lay na ga ya nohoꞌ pinahandān ni mmaꞌ na.
5Pag taaka si Yaꞌkub anak na bay njamaan, yaꞌ na doꞌ bay hinibuk meꞌ na. Njawom atay na, agad na doꞌ katakka siga anak na ma lalla man jawom tawun bay ngahalin ga kahayop-hayopan da.
6Pag-anu siꞌ, lay na pilay si Hamol ka anak na si Sekem pa mman si Yaꞌkub handa. 7Pag takka da, magsabtan du ka katakka siga anak si Yaꞌkub man jawom tawun. Pag lay jaꞌ ga anak si Yaꞌkub kabaan ni hāl danganakan da bay njamaan, biddaꞌ na susa da sampay sinalaputan na ga tabbuk da. Para ninsila, si Sekem bay buwat kadiyusan mehe ni mimon kakampungan mmaꞌ da si Israil. Boꞌ tud tagga pabuwatan meꞌ looy, yaꞌ dari pinabiya.
8Sugaꞌ yuk si Hamol ni si Yaꞌkub, “Anak ku itu si Sekem, tud kamahapan ni anak nu. Bong siꞌ kadarihan ningkau, pahandān ku na ya. 9Maka bong dari ningkau, padari ta na sitampu-tampu siga anak-mpu nu ka ga anak-mpu ku, 10supaya njawom kasannangan jaꞌ kam maglahat ka kami ntuu ni lahat kami. Meneꞌ jaꞌ kam nnoy-nnoy katanaman bi maglahat. Pag-anu, boꞌ bi ngusaha na ntuu sampay malli tanaꞌ.”
11Lay gi halling si Sekem ni si Yaꞌkub ka ga danganakan si Dayna, “Bong siꞌ ku timaꞌ bi jaꞌ, atas ku jaꞌ dangoy-dangoy paku bi. 12Pooy-pooy jaꞌ langkaw buwan anak nu, mastiꞌ gaos ku jaꞌ du. Maka oy-oy jaꞌ tinaat meꞌ bi niyaku, gaos ku jaꞌ du labbasakayi bong pin takawin jaꞌ kami ka si Dayna.”
13Na ga anak si Yaꞌkub siꞌ tu, lay jaꞌ magbawuꞌ-bawuꞌ kuhi, batan yaꞌ na pin kuhi lakka njawom atay da kadiyusan bay pabuwat si Sekem ni danganakan da. Dari pag tampung da ni si Sekem ka mmaꞌ na si Hamol, 14“Yaꞌ kami la kapahallān danganakan kami bong jama yaꞌ bay pingkaꞌ inislam, batan inaa kadiyusan mehe ningkami. 15Kuhi du kami bong kam ngikut arat kami ngislam kalallahan bi labbasakayi. 16Bong meꞌ looy, kuhi na kami sitampu-tampu ka bangsa bi. Maka maglahat na kami ntuu mman bi mari disu bangsa sa kitabi. 17Sugaꞌ bong baw kam yaꞌ kuhi inislam, malaingkan kaddoꞌ kami na balik danganakan kami, boꞌ kami lakka na mantuu.”
18Na ga si Hamol siꞌ tu ka si Sekem, gāk na batan bistahan da takaya da bong sat meꞌ looy. 19Dari yaꞌ na bay llantan meꞌ si Sekem ngulihal ma bay tinaat ninsila batan tud kamahapan ya ni anak si Yaꞌkub. Boꞌ si Sekem ilay siꞌ, pinagmaltabatan labi man mimon jama ni paglūng na.
20Dari lay du si Hamol ka si Sekem pilay pa behe lawang kutaꞌ daira da mman man siga pa-mmean lahat looy kumpo-kumpo. 21Takka ndooy, bbuwatan da mantug ga si Yaꞌkub, yuk da, “Ga jama looy ilay, tud mahap meꞌ da ka kitabi. Bong anu, padari tabi na sila maglahat ntuu maka pabiya tabi na sila ngusaha ntuu. Ndang-ndang luha du lahat tabi. Sarī gi, kapahanda na kitabi ninsila. Sila pun dari na du handa ni bangsa tabi. 22Sugaꞌ kuhi du konoꞌ sila maglahat ntuu bilang disu bangsa ka kitabi bong kitabi kuhi meꞌ sila du inislam sagannap kalallahan. 23Bong itu bean tabi na ilooy ma bay taat da siꞌ ningkitabi, dari na kitabi sitampu-tampu ka sila. Dari altaꞌ da ka kahayop-hayopan da, song hallom kapakitabi na.”
24Dari mimon pa-mmean ndooy lay na du nganduwan paku si Hamol ka si Sekem, sampay lay na sila inislam sikamimon sagannap kalallahan ni daira looy.
25Na luu jaꞌ siꞌ tallu ngallaw halloman da bay inislam, masi gi paddi bakat da. Dari kuwan anak si Yaꞌkub ma duwa, yana si Simiyun ka si Libay, ga danganakan si Dayna langgung, lay pilay moo kataliꞌ da pa jawom daira looy. Boꞌ yaꞌ san bay taingat jama ga luu maksud da maat. Pag-anu, lay na pinapatoy meꞌ da labbasakayi kalallahan ni daira looy. 26Sampay si Hamol ka si Sekem, lay na du papatoy da. Maka lay na kaddoꞌ da si Dayna man lumaꞌ si Sekem, boꞌ da palakka. 27Paddus da bay mapatoy, kuwan anak si Yaꞌkub baw siꞌ tu ilooy kasohean, lay na baw pasīng ngaddoꞌ oy-oy karomanan da ni daira looy. Kon da buwat meꞌ looy sabap danganakan da bay pinaglamaꞌ-lamaan. 28Lay kaddoꞌ da mimon baanan bili-bili ndooy, ga sapiꞌ, ga kuraꞌ sampay mimon altaꞌ ni daira looy pariyoꞌ-pajataꞌ. 29Dari lay na katis boo da altaꞌ ni kalumaan daira looy sampay lay gi sungkuban da karandahan sampay ga anak-anak.
30Pag tasayu jaꞌ meꞌ si Yaꞌkub, tud lingog kōk na, maka yuk na man si Simiyun ka si Libay, “Binasa na situ ku meꞌ bi. Sabapan bi, labba man batnaa, dugahan na niyaku bangsa Kanan ka bangsa Peris sampay soysoy na pin maglahat ni lahat tuu. Boꞌ yaꞌ san ga meka jama ku. Bong mintu kitabi bay pinagtabang-tabangan binonoꞌ meꞌ da, hansu na situ kitabi dampalūng.”
31Sugaꞌ tampung ga anak na baw siꞌ tu, “Yaꞌ baw bilay sikatuwaꞌ pabiya kami danganakan kami bay pabuwat na subay ga puta.”
Atualmente selecionado:
Panagnaan 34: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.