Panagnaan 22
22
Tuhan nohoꞌ si Ibrahim numbaliꞌ si Isahak
1Na luu jaꞌ siꞌ daka dangon taun bay pingkaꞌ, lay na baw sinuwayan meꞌ Tuhan pangando si Ibrahim niiya. Meꞌ tuu silay salsila na: Luu disu llaw, lay ya linganan Tuhan, yuk na, “Ū Ibrahim.” Tampung si Ibrahim, “Oy lay siꞌ Papuꞌ?”
2Yuk Tuhan, “Boonun kakasi nu, yana si Isahak, anak tungga bi ka si Sara, pilay pa Moraya. Pakitahan ta sa ko punu ndooy man bi sohoꞌ ku pilay. Takka ndooy, sumbaliun na ya bilang kulban sinongan niyaku, boꞌ tunuhun taꞌ pangulbanan.”
3Na pag meꞌ sumawung, sayu alab lagi, lay na si Ibrahim mong-mōng kayu halliꞌ man nunu kulban boꞌ inuwan taꞌ kuraꞌ. Dari lay na sila lakka ka anak na si Isahak song pilay pa lahat ma bay sohoꞌ Tuhan niiya. Maka luu gi duwa tindog na bay boo na. 4Pag ni katallu ngallaw na, takita na meꞌ si Ibrahim man katāhan punu man da bay sohoꞌ Tuhan pilay. 5Dari yuk si Ibrahim ni ga tindog na, “Ntuu jaꞌ doꞌ kam tamban ka kuraꞌ tabi. Kami jaꞌ ka anak ku palanja pilay numba Tuhan. Pag lupus, boꞌ sa kami pabeleng.”
6Pag-anu, kinaddoꞌ na meꞌ si Ibrahim kayu looy halliꞌ man nunu kulban, boꞌ lay sohoꞌ na pinanangkit ni si Isahak. Kuwan iya, lay moo koray ka kalangkapan man malakkot api. Pag-anu siꞌ, lay na sila pawus. 7Sasang da ni tangngaꞌ lān, yuk si Isahak, “Maꞌ?”
Tampung mmaꞌ na, “Oy siꞌ Toꞌ?”
Yuk si Isahak, “Ndaꞌ ku, luu la kayu ta ka kalangkapan man malakkot api, sugaꞌ ninggai baw tu bili-bili ta kinulban?”
8Tampung si Ibrahim, “Tuhan sa ba Toꞌ mangatas muwan.” Dari ilooy ma lumān na pin siꞌ sila.
9Pag takka da pa lugar man na bay sohoꞌ Tuhan, lay na si Ibrahim nambak batu binuwat pangulbanan, boꞌ lay na susun-susun na ga kayu looy njataꞌ na. Pag-anu siꞌ, lay na ingkotan na si Isahak boꞌ na pinatannaꞌ taꞌ ga kayu looy. 10Pag lupus, lay na ya ngaddoꞌ koray na man na numbaliꞌ anak na. 11Sugaꞌ sarunduun du luu pōꞌ man sulgaꞌ suwara malaikat Tuhan ngalingan, yuk na, “Ibrahim! Ū Ibrahim!”
Yuk si Ibrahim, “Oy lay siꞌ?”
12Yuk malaikat looy, “Daa na papatoyun anak-anak naa. Batnaa tumatandaꞌ na niyaku tawu du ko pa Tuhan, batan sampay anak tungga nu atas bay pinaglillaꞌ meꞌ nu bong pin taasip nu jaꞌ panohoan Tuhan.”
13Mindangoy ko, pag teleꞌ si Ibrahim, ngita na ya bili-bili lalla lay sumiit tanduk na ni siga engas kayu-kayu. Dari lay du kaddoꞌ na boꞌ na sinumbaliꞌ gantiꞌ anak na man ngulban sinongan pa Tuhan, boꞌ tinunu. 14Pus meꞌ looy, lay na awnan si Ibrahim lahat looy “Tuhan Sa Mangatas Muwan.” Maka labba mandooy na du luu na sambatan, ilooy ma yuk jama, “Taꞌ punu Papuꞌ, oy-oy kulang, mastiꞌ pinaluu jaꞌ.”
15Pag-anu siꞌ, lay na baw balik si Ibrahim llinganan meꞌ malaikat Tuhan man sulgaꞌ, 16yuk na, “Ituu tu palman Tuhan pasampay ku ningkau, yuk na, ‘Pagka lay na bean nu panohoan ku sampay lay na atas nu nongan umu anak tungga nu niyaku, sapahan ku na 17basta supaatan ta na ko. Buwanan ta lagi sina ko panubuꞌ lipat man lipat. Eka da ina mintu subay ga eka potean taꞌ langit atawa pun meꞌ eka ungus ni tapiyan. Siga panubuꞌ nu ina mintu, ā jaꞌ meꞌ da mimon banta da sampay agaw da lagi siga daira da. 18Maka bbos-bbos ina mimon kabangsa-bangsahan sinupaatan man sabapan panubuꞌ nu#(22.18) Ndaun Galatiya 3.16-17. sabap meꞌ nu bay ngasip niyaku.’ ”
19Pus meꞌ looy, lay na ga si Ibrahim ka si Isahak pabeleng pa mman ga tindog na boꞌ da lay na moleꞌ sikamimon pa Beel-Siba. Dari siꞌ, masi na pin sila ndooy maglahat.
Siga panubuꞌ si Nahol
20Song hallom, luu na baw takka habal man bay paglahat si Ibrahim maruhuꞌ pasal danganakan na si Nahol. Iya siꞌ tu anakan na konoꞌ ka nda na si Milka wawuꞌ lalla. 21Ma siyaka, yana si Us, boꞌ pasunuꞌ si Bus, boꞌ si Kemuwel, yana mmaꞌ si Aram, 22boꞌ si Kesed, boꞌ si Haso, boꞌ si Pildas, boꞌ si Jidlap, boꞌ si Betuwel na kabungsuhan. 23Kuwan si Betuwel yana mmaꞌ si Ribeka. 24Na si Nahol siꞌ tu, luu gi nda na disu, yana si Riyuma. Sila siꞌ tu anakan mpat lalla, yana ga si Teba, si Gaham, si Tahas ka si Maaka.
Atualmente selecionado:
Panagnaan 22: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.