लूका 21
21
गरीब विदवा लुगई को दान
(मरकुस 12:41–44)
1जद्याँ ईसू मन्दर में हा, तो वणा रिप्या-कोड़ी वाळा मनकाँ ने आपणो आपणो दान दान-पेटी में नाकता तका देक्या। 2अन वणा एक गरीब विदवा लुगई ने भी वणी में दो फोरा ताँबा का सिक्का नाकती तकी देकी। 3तद्याँ ईसू क्यो, “मूँ थाँकाऊँ हाचेई केवूँ हूँ के, सबाका का दानऊँ वाँ लुगई जिंको धणी सान्त वेग्यो, वींको दान हेलो हे, 4काँके हारई आपणाँ रिप्या की बड़ोतरीऊँ नाक्या। पण, अणी लुगई आपणी घटतीऊँ हारी पूँजी दान दे दिदी हे।”
मन्दर का नास का बारा में केणो
(मत्ती 24:1–2; मरकुस 13:1–2)
5कुई लोग-बाग मन्दर का वाते केरिया हा के, वो कस्या रूपाळा भाटा अन परमेसर के दान किदी तकी चिजाँऊँ सजायो ग्यो हे, 6तो ईसू क्यो, “वीं दन आई जद्याँ ज्यो कई थाँ देको हो। वींकामूँ अटे कस्याई भाटा पे भाटो भी ने मली। यो हारोई हल्डा दिदो जाई।”
7वणा ईसुऊँ पूँछ्यो, “ओ गरुजी, ओ हारोई कदी वेई? ईं बाताँ जद्याँ पुरी वेबा लागी, तो वणी टेम को कई हेन्याण वेई?”
8ईसू क्यो, “हेंचेत रिज्यो, ताँके थाँ भरमाया ने जावो काँके, घणा मारा नामऊँ आई अन केई के, ‘मूँ वोईस हूँ’ अन ‘ओ अन्त टेम आग्यो हे।’ थाँ वाँका पाच्छे परा मत जाज्यो। 9अन जद्याँ थाँ युद अन लड़ई की बाताँ हुणो, तो दरपज्यो मती। काँके ईं बाताँ को पेल्या वेणी जरूरी हे। पण, वणी टेम तरत अन्त ने वेई।”
10तद्याँ ईसू वाँने ओरी क्यो के, “एक देस दूजाँ देस पे अन एक राज का दूजाँ राज पे चड़ई केरी। 11अन मोटा-मोटा भूकम आई अन जगाँ जगाँ काळ अन तरे-तरे की बीमारियाँ वेई अन बादळाऊँ गजब-गजब की बाताँ वेई अन मोटा-मोटा दरप का हेन्याण दिकी। 12पण, अणा हारी बाताँऊँ पेल्याँ वीं मारा नाम का पाच्छे चालबा की वजेऊँ थाँने पकड़ी अन हताई अन यहूदियाँ का परातना घर में हूँपी अन जेल में नाक देई अन राजपाल अन अदिकारियाँ का हामें ऊबा करी। 13पण, ओ थाँके मारा बारा में गवई देबा की टेम वेई। 14#लूका 12:11,12ईं वाते ईं बाताँ वेबा के पेल्याई आपणाँ-आपणाँ मन ने त्यार करलो। थाँने थाँका बचाव में कई केणो हे, ईंकी थाँ चन्ता मत करज्यो। 15मूँ थाँने अस्या बोल अन अकल देवूँ के, थाँका हाराई दसमण थाँको सामनो ने कर सकी अन थाँने रोक ने पाई। 16अन थाँका बई-बापू, भई-बन्द अन परवार का हण्डाळ्याँ भी थाँने धोकाऊँ पकड़वाई। अटा तईं के थाँकामूँ नरई ने मरवा नाकी। 17अन मारा नाम का पाच्छे चालबा की वजेऊँ घणा लोग-बाग थाँकाऊँ दसमणी राकी। 18पण, थाँका माता को एक बाल भी वाँको ने वेई। 19विस्वास में गाटा रेवा की वजेऊँ थाँ अनंत जीवन पाँ लेवो।
20“जद्याँ थाँ यरूसलेम ने सपायाऊँ भरियो तको देको। तो हमज लिज्यो के, वींके उजाड़ वेबा की टेम आगी हे। 21जद्याँ जी यहूदियाँ देस में वेई। वाँने मंगरा ऊपरे चढ़ जाणो छावे अन जी यरूसलेम नगर में हे वाँने नगर छोड़ देणो छावे अन जीं बारणे गामाँ में वेई, वाँने नगर में ने जाणो छावे। 22#होसे 9:7ईं दन अस्या वेगा ज्यामें दण्ड की वीं बाताँ जीं पेल्याऊँ पुवितर सास्तर में लिकी गी वीं पुरी वेई। 23वणा दनाँ वे लुगायाँ जी गरबवती वेई अन ज्याँके दूद पीता बाळक वेई, वाँके वाते घणो अबको टेम वेई, काँके अणीऊँ बचन दोड़ ने सकी। काँके वीं टेम में धरती पे मोटा-मोटा कळेस अन अणा लोग-बागाँ का ऊपरे परमेसर को कोप वेई। 24मनक तरवाराऊँ काट्या जाई अन दूजाँ ने बंदी बणान दूजाँ देस में पूगा दिदा जाई अन यरूसलेम जी यहूदी ने हे वाँका पगाँ का रेटे गुद्या जाई तद्याँ तईं वाँको टेम पूरो ने वे जावे।
दरपज्यो मती
(मत्ती 24:29–31; मरकुस 13:24–27)
25 #
यसा 13:10; परका 6:12,13 “चाँद-सूरज अन तारा में हेन्याण दिकई दिदा जाई अन धरती में हाराई देसा का लोग-बागाँ पे कळेस आई। काँके वीं समन्द की गाजबाऊँ अन लेराऊँ घबरा जाई। 26दरपणीऊँ अन दनियाँ ऊपरे आबावाळा टेम की बाट देकता देकता लोग-बागाँ का जीव में जीव ने रेई। आकास की हारी सगत्याँ हाल जाई। 27#परका 1:7ईंका केड़े लोग मूँ मनक का पूत ने आपणी तागत का हाते अन मोटी मेमा का हाते वादळा पे आता तका देकी। 28जद्याँ ईं बाताँ वेती देकी, तो थाँ हूँदा ऊबा वेन आपणाँ माता ने ऊपरे करज्यो, काँके वीं टेम थाँको छुटकारो नकेईस वेई।”
ईसू की वाणी अमर हे।
(मत्ती 24:32–35; मरकुस 13:28–31)
29ईसू वाँने एक केणी भी क्यो के, “अंजीर का रूँकड़ा ने अन हाराई रूँकड़ा ने देको। 30जस्यानी वाँकी कूँपळा फूटे, तो थाँ देकन खुदई जाण लो के, उनाळो आबावाळो हे। 31अस्यानीस थें वे हारी बाताँ वेती देको, तो जाण जाज्यो के, परमेसर को राज को दन नके हे। 32मूँ थाँने हाँची केरियो हूँ के, ईं पिड़ीयाँ का मनकाँ के मरबा के पेल्याँई हारी बाताँ वे जाई। 33धरती अन आकास टळ जाई, पण मारो बचन कदी ने टळी।
हरदाण त्यार रेवो
34“ईं वाते थाँ हेंचेत रो, अस्यो ने वे के, थाँ खाबा-पिबा में अन दनियाँ की चन्ता-फिकर में ने पड़ जावे अन वी दन फंदा का जस्यान थाँका ऊपरे अणाचेत आ जावे। 35काँके वीं दन धरती का हाराई रेबावाळा लोग-बाग का ऊपरे ईं तरियाऊँ आई। 36ईं वाते जागता रो अन हरेक टेम परातना करता रेवो, ताँके थाँ अणा हारी आबावाळी आपतीऊँ बचन अन मूँ मनक का पूत का हामें ऊबा रेवा के जोगा बण सको।”
37 #
लूका 19:47
ईसू वणा दनाँ में मन्दर में उपदेस करतो हो अन रात ने बारणे जान जेतुन नाम का मंगरा ऊपरे रिया करतो हो। 38अन रोज हवेर पेल्याँ वेगा नरई लोग-बाग वींका उपदेस हूँणबा का वाते मन्दर में वींका नके आया करता हा।
Atualmente selecionado:
लूका 21: एम टी आर
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) 2010-2017, New Life Computer Institute. All rights reserved