यूहन्ना 3
3
यीशु अदिक नीकुदेमुस
1फरीसीगोळ दा नीकुदेमुस हेसुर ईनव ऊंद मंळसा ईरोन, जो यहूदी लॉकुरव सरदार ईरोन. 2आव ईळ्लक इक यीशु उन हात्ती बंदकु आऊन से अंदुन, “हे गुरु, नाव जान्सतेव कि नी परमेश्वर दी टु गुरु आगकु बंद्या, यतिकी ई चिन्हगोळी जो नी तोर्सत्या, अगर परमेश्वर नीन सांगुळ ईला ईरायदुन रा नी ई चिन्हगोळी ईला तोर्स सकाईद.”
3यीशु आऊक उत्तर कोट्टुन, “ना नीन से खरा खरा अनतीन, अगर यावारा व्हाशोद रीति देल पैदा आगालुन रा आव परमेश्वर उन राज्य नोळ सकालुन.”
4नीकुदेमुस यीशु उक अंदुन, “मंळसा याग हाळाबाट आगेदुन, रा ह्यांग पैदा आग सकतान? येन आव तान मोय इन गर्भ दा दुसरा घन प्रवेश माळकु पैदा आग सकतान?”
5यीशु उत्तर कोट्टुन, “ना नीन से खरा खरा अनतीन, यागासताका यावारा मंळसा नीर अदिक आत्मा देल पैदा आगालुन आगासताका आव परमेश्वर उन राज्य दा प्रवेश माळ सकालुन. 6यतिकी जो मय देल पैदा आग्याद, अद मय हुन; अदिक जो आत्मा देल पैदा आग्याद, अद आत्मा हुन. 7अचम्भा माळबाळ कि ना नीन से अंदीन, ‘नीनी व्हाशोद रीति देल पैदा आगोद जरूरी आद.’ 8हवा यात चाहासतद आत नळुतद अदिक नी अदुर्द शब्द केळत्या, लेकीन अरू सकाल कि अद यातु टु बरतद अदिक यात होगतद? जो यावारा आत्मा देल पैदा आग्यान आव हिंग अच आन.”
9नीकुदेमुस आऊक उत्तर कोट्टुन, “ईव मातगोळ ह्यांग आग सकताव?”
10ईद केळकु यीशु आऊन से अंदुन, “नी इस्त्राएलीगोळ्द गुरु ईतकु भी येन ई मातगोळी समसाल? 11ना नीन से खरा खरा अनतीन कि नाव जो अरूतेव अद माताळतेव, अदिक यदरी नाव नोळेव अदुर्द गवाही कोळतेव, अदिक नीव नाम गवाही ग्रहण माळालीर. 12याग ना नीम से पृथ्वी इन मातगोळ माळदीन अदिक नीव विश्वास माळीदिल, रा अगर ना नीम से स्वर्ग इन मातगोळ माळाईन रा बाक ह्यांग विश्वास माळीर? 13याऊ स्वर्ग मा येरीदिल, सिर्फ आवा जो स्वर्ग टु ईळदान, मतलब मंळसा अन पार जो स्वर्ग दा आन.”
14अदिक याता रीति देल मूसा आळी दा हाव इक ऊँचाई मा येर्सदुन, अदा रीति देल जरूरी आद कि मंळसा अन पार भी ऊँचाई मा येर्सकु आगुल; 15ताकी जो यावारा आऊन मा विश्वास माळ्यान आऊक अनन्त जीवन सिकुल. 16“यतिकी परमेश्वर दुनिया से हिंग प्यार ईटदुन कि आव तान ऊंद ठैसा पार कोट बुट्टुन, ताकी जो यावारा आऊन मा विश्वास माळ्यान आऊन नाश आगबाळुल, लेकीन आऊक अनन्त जीवन सिकुल. 17परमेश्वर तान पार उक दुनिया दा इदुरसाटी कळीदिल कि दुनिया मा दण्ड इन आग्या कोळुल, लेकीन इदुरसाटी कळ्यान कि दुनिया अक आऊन द्वारा उद्धार सिकुल.
18“जो आऊन मा विश्वास माळतान, आऊन मा दण्ड इन आग्या आगाल, लेकीन जो आऊन मा विश्वास माळालुन, आव दोषी ठहरूसतान; इदुरसाटी कि आव परमेश्वर उन ऊंद ठैसा पार उन हेसुर मा विश्वास माळीदिल. 19अदिक दण्ड इन आग्या अन्द कारण ईद आद कि ज्योति दुनिया दा बंदाद, अदिक मंळसागोळ अंधार इक ज्योति से यक्कुल प्रिय सम्सदुर यतिकी आंदुर क्याल्सा बुरा ईरव. 20यतिकी जो यावारा बुराई माळतान, आव ज्योति से दुश्मनी ईटतान, अदिक ज्योति इन हात्ती बरालुन, हिंग आगबाळुल कि आऊन क्याल्सागोळ मा दोष हचकु आगुल. 21लेकीन आव जो सच्चाई मा नळुतान, अदिक ज्योति इन हात्ती बरतान, यदुर देल ईद प्रगट आगेगुल कि आऊन क्याल्सा परमेश्वर उन दी टु माळकु आग्याव.”
यीशु अदिक यूहन्ना
22इदुर बाद्दा यीशु अदिक आऊन चेलागोळ यहूदिया द्याश दा बंदुर; अदिक यीशु अल आंदुर सांगुळ ईतकु बपतिस्मा कोळली कुरतुन. 23यूहन्ना भी शालेम नगर इन हात्ती ऐनोन दा बपतिस्मा कोळतोगोन, यतिकी अल हापाळ नीर ईरोद, अदिक लॉकुर बंदकु बपतिस्मा ताकोम तोगोर. 24#मत्ती १४:३; मरकुस ६:१७; लूका ३:१९,२०यूहन्ना आ समय ताका बंदीगृह दा हाक्कु आगली ईरोन.
25अल यूहन्ना अन्द चेलागोळ्द यावारा यहूदी इन सांगुळ शुद्धीकरण इन बारा दा वाद-विवाद आत. 26अदिक आंदुर यूहन्ना अन्द हात्ती बंदकु आऊन से अंदुर, “हे गुरु, जो मंळसा यरदन इन आप्पाटी नीन सांगुळ ईरोन, अदिक यार्द नी गवाही कोट्या; नोळ, आव बपतिस्मा कोळतान, अदिक सप्पा मुंदुर आऊन हात्ती बरतार.”
27यूहन्ना उत्तर कोट्टुन, “यागासताका मंळसा अक स्वर्ग इन दी टु कोटकु आगाल, आगासताका आव येनु हासिल माळ सकालुन. 28#यूहन्ना १:२०नीव रा खुद अच नान गवाह हुईर कि ना अंदीन, ‘ना मसीह आलच, लेकीन आऊन मुंद कळुकु आगीन.’ 29यार्द मंळगीत आर, आवा मंळगार हुन; लेकीन मंळगार उन संगी जो निदुरकु आऊन केळतान, मंळगार उन शब्द केळकु हापाळ खुश आगतान: ईग नान ईद खुशी पुरा आग्याद. 30जरूरी आद कि आव धोड्डेव आगुल अदिक ना स्याणेव.
स्वर्ग टु बरावाळा आव याव हुन
31“जो म्याकुच टु बरतान आव सब से वळ्लेव आन; जो पृथ्वी टु बरतान आव पृथ्वी नव हुन, अदिक पृथ्वी इन मातगोळी हेळतान: जो स्वर्ग टु बरतान, आव सप्पा मुंदुर्द म्याकुच आन. 32जो येनारा आव नोळ्यान अदिक केळ्यान, अदुर्दा गवाही कोळतान; अदिक याऊ आऊन गवाही ग्रहण माळालुन. 33याव आऊन गवाही ग्रहण माळ कोंडुन आव ई मात मा छाप हच बुट्टुन कि परमेश्वर खरा आन. 34यतिकी यारी परमेश्वर कळ्यान, आव परमेश्वर उन मातगोळ अनतान; यतिकी आव आत्मा आळु आळुकु कोळालुन. 35#मत्ती ११:२७; लूका १०:२२आप्प पार से प्यार ईटतान, अदिक आव सप्पा वस्तुगोळ आऊन कय दा ईट बुटान. 36जो पार मा विश्वास माळतान, अनन्त जीवन आऊन हुन; लेकीन जो पार उन मातगोळी मान्सालुन, आव जीवन इक नोळतीदिल, लेकीन परमेश्वर उन सिट्ट आऊन मा ईरतद.”
Atualmente selecionado:
यूहन्ना 3: NTHaa20
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020