روت 4
4
روت و بوعِزِ عروسی
1بوعِز شهرِ دروازه سَر که مَردِم همیشه اونجه جمع بینه بورده و همونجه هِنیشته. بعد از وِه اون فامیلی که بوعِز وِنه حَرفِ بَزوئه، وِه هم بیَمو. بوعِز وِره وَنگ هَکِرده باته: «بِرار، بِرو اینجه هِنیش». بوعِزِ فامیل بیَمو و بوعِزِ پَلی هِنیشته. 2بعد بوعِز دَه تا ریش سفیدایِ شهرِ دعوِت هَکِرده تا وِنه شاهد باوِّن، وِشونِم بیَمونه و هِنیشتِنه. 3بوعِز شه فامیل ره باته: «تو بِشتوسی که نَعومی موآبِ جا بیَمو و شه زمینی که اَمه فامیل اِلیمِلِکِ بی‌یِه ره خوانه بَروشه، 4فکر هَکِردِمه که اوِّل تِره خَوِردار هَکِنِم و این جَمعِ دِله اگه تو خَریدار هَسّی و اون زمین ره خَرینی مِره باش، تا بَدونِم، چون بِجُز تو هیچ کَسی دیگه‌ای فامیلِ نزدیکِ اِلیمِلِک دَنی‌یه، و مِن بعد از تو هَسِّمه.» اون فامیل باته: «باشه، مِن وِشونِ زمین ره خَریمه، تا وِشون شه زمینِ دِله کِشت هَکِنِن و محصول ره شه بَیرِن.» 5بعد بوعِز باته: «اون موقعیکه زمین ره نَعومیِ جا بَخرینی، حتماً وِنه روتِ موآبیِ جا عروسی هَکِنی، تا وِنه مردی خِدا بیامِرزیِ نوم و ارث ره زنده هَکِنی.» 6امّا اون فامیل باته: «مِن نَتومّه همچین کاری هَکِنِم و شه میراث ره در خَطِر دِمَّدِم، چونکه مه وَچون دیگه اینتا ارثیه ره نَتونِنه صاحب باوِّن. این حق ره مه جا بَیر، چونکه مِن قدرِتِ این کار ره نِدارمه.» 7اون قَدیما اسرائیلِ دِله رسمِ خرید و معامله اینتی بی‌یِه که اگه کِسی خواسّه شه حَقِّ دیگِری ره هَده یا اَت کَسِ دیگه ره واگِذار هَکِنه شه لینگِ کَلوشِ در یارده و اونتا نَفِرِ داهه، و اینجِری اون معامله ره قبول کِردِنه و با اعتبار دونِسِّننه. 8بعد اون فامیل شه کَلوشِ در بیارده و بوعِز ره هِدائه و باته: «تو بَخرین.» 9بوعِز هم ریش سفیدایِ شهر و اون مردِمی که اونجه جمع بَی بینه، ره باته: «همه شاهِد باوّین که مِن اَمروز تِمومِ مِلکِ اِلیمِلِک و مَحلون و کِلیون ره نَعومیِ جا بَخریمه. 10و روتِ موآبی جا که مَحلونِ بیوه هَسّه ازدواج کِمه، تا وِه ریکا به دِنیا بیاره که وارِثِ اون مرحوم باوّه و وِنه اسم ایل و تِبارِ دِله از بین نَشوئه؛ اَمروز شِما مه شاهد باوّین.» 11بعد همۀ آدِمایی که شهرِ دَروازه سر جمع بَی بینه و ریش سفیدایِ شهر باتِنه: «اِما شاهد هَسِّمی که خِداوند این زن ره که تِه سِره اینه راحیل و لیِه‌یِ واری که یعقوبِ زِنا بینه دِتایی قومِ اسرائیل ره بِنا هکِردِنه باوّه، که تو اِفراته و بِیت‌لِحِمِ دِله معروف و پِرآوازه باوّی. 12و وَچونی که خِداوند این جِوونِ زِنایِ جه تِره دِنّه، تِه ایل و تِبار هم مثل فَرِص باوّه، که تامار یهودایِ وِسّه بِزاهِه.»
داوودِ پادشاه اَصل و نَسِب
13بوعِز و روت عروسی هَکِردِنه و به امر خِداوند روت حامله بَییه و وِشون صاحبِ اَتّا ریکا بَینه. 14بعد همۀ زَنایِ مَحَل نَعومی ره باتِنه: «شکرِ خِدا که خِداوند تِره بی‌سرپرِست نیِشته و تِره نَوه هِدا، خِدا هَکِنه که وِه اسرائیلِ دِله سرشناس باوّه. 15تِه پِسِر زن که تِره دوست دارنه و تِه وِسّه از هفت تا پِسِر هِم بِهتِره، تِه وِسّه پِسِر دِنیا بیارده که این ریکا تِه جان ره تازه کِنّه و پیریِ سَر تِه دستِ عَصا بونه.» 16نَعومی وَچه ره کَشه هَیته و وِنه دایه بَییه. 17هِمسایه زَنون وَچۀ نوم ره عوبَید بیِشتِنه، و همه مَردِم ره باتِنه، ریکا نَعومیِ وِسّه دِنیا بیَمو. عوبید یَسایِ پی‌یِر و داوودِ پادشاه گَت پی‌یِر هَسّه.
18بوعِزِ اَصل و نَسِب (یا رگ و ریشه) فَرِصِ جه شِروع بونه، و داوودِ پادشاه جا تِموم بونه. فَرِص حِصرونِ پی‌یِر بی‌یِه، 19و حِصرون رامِ پی‌یِر و رام عَمّینادابِ پی‌یِر 20و عَمّیناداب نَحشونِ پی‌یِر و نَحشون سَلمونِ پی‌یِر 21و سَلمون بوعِزِ پی‌یِر و بوعِز عوبیدِ پی‌یِر 22و عوبید یَسایِ پی‌یِر و یَسا داوودِ پادشاهِ پی‌یِر هَسّه.
Atualmente selecionado:
روت 4: Maz
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Mazanmedia