Matìo 8
8
Yɛso bǎaŋ ghùw ù tə̀tsùghò
(Mâk 1:40-45; Lûk 5:12-16)
1A m bùghò Yɛso sə tsughu wo aŋ ukwàʼ, saʼ kə aghì kə̀ n tə̂əŋ wò enyə a bàâ wə̄n. 2A mo e koʼò ko ghùw ù tə̀tsùghò ù lì ù ndùw sə̀ kɔ̀ʼ wò a vʉ̀a Yɛso, tə̀m ndùw tuw wə anyʉ a vʉ̀a wə̄n, dzɛ̀ tsùghù enyəa, “Mughubè, abugho ghù tsə̀m tsughu, ghù lò nû alebaaŋ mùghò.” 3Yɛso n daŋso dàan ndùw kə̀ghu, mɔ̀m tsùghu wə̄n, dzɛ̀ tsùghù enyəa, “Mùghò n tsə̀m, tughu kɔ̀ʼɔ̀.” Tsùghò ti tə n daŋso zə̀ghàa tsùghù tûwbʉ̀ghà vʉ̀ an nə̀gha zə̀ èzə̀. 4#Lɛv 14:1-32 Yɛso n dzɛ̀ â tûwbʉ̀ghà vʉ enyəa, “Ghəəŋ tsughu enyəa e kwo ko ghùw ù li lò zuūw dzə, kuuwn nùghu tsughùu, ghù nduw de nduw ghue wo â tuw kə təfɔ̀e kò, ghù fughu nduw fəgha kəla lâŋ kə Musî kə̀ deē enyəa abugho ghe baāŋ kɔʼ ghùw wəla ù mò dzaŋa tsùghò tò u m fùghù ndùw tǒ tsə̌a aledèe wô â ghì ghò enyəa ù êzəŋ e zɔlɔ nù.”
Yɛso bǎàŋ kɔ̀ɔ fə komndzūghū ù tə̀sùghugòʼ
(Lûk 7:1-10)
5Ghəa Yɛso nyəā nduw aŋ Kàpɛnòm, komndzūghū ù tə̀sùghugòʼ ù lì m bùghò kòʼ wò wə̄n, buʼ kəghu â wən enyəa, 6“Mughùbè, kɔ̂ɔ faŋa fə nyəŋ an ndughu fə dzaŋa mo bâ kə ughùe kə wə̄n kə kpuw dòʼò nù, fia fə ŋgeē zuūw fɔɔn zo.” 7Yɛso n daŋso dzɛ̀ â wən enyəa, “M̀ bughò bǎaŋ nǔ wə̄n.” 8Komndzūghū vʉ ŋ kòom nùghù dzɛ̀ tsùghù enyəa, “Mughubè, Ŋ̀ kâ kɔ̀ʼ kpè tò ghù enyə am pfʉ̌a kaŋā, kuuwn saʼ tsughuu ko an dzə̂, kɔ̂ɔ faŋa fə sô tughuu kɔʼ. 9N aŋghə Ǹ lô fɛ, M̀ fwâʼà a tsəlà ghì à li gho, sùghugòʼ tia tə kuūwn fwaʼa a tsəlà mùghò. Abugho Ǹ dzɛ̂ nduw â sughugòʼ è zə̂ enyəa, ‘Ndùw a fî!’ Zə̀ mò è nduw. Mò n dzɛ̂ ndùw e zə enyəa, ‘Bùghò fɛ!’ Zə̀ mò è bugho. Mò Ǹ dzɛ̂ ndùw sùghò â kɔ̀ɔ faŋa fo enyəa, ‘Ghəəŋ ndùw ènyə!’ Ù m bɔɔm ghəəŋ ndùw sùghò êzə̀.” 10Dzughu zə n zum Yɛso aŋghəa ù zuw tsughu shwaʼ u tûwbʉ̀ghà vʉ wo, ù n dzɛ̀ â ghì yìa ghe mò lo a bàâ wən enyəa, “Kùmkùm, M̀ fɛ dzàa wò nù â ghɛ̀, Ŋ̀ kaām bûʼ kô kôʼ ghùw an naʼ zə Ezə̀lɛ̂ ù ŋgəmso kûum boō fughu â Zə̀ kò tǒ ghùw wən. 11#Lûk 13:29 M̀ fɛ dzàa wò nù â ghɛ̀ enyəa, ndə̀mà tə aghì tə̀ kè nùghùun wò am bàa tə mbī tən tə̀ dzə̀m, ghe e ke zəa dzəəŋ ghèe ghê Abə̀làhâm, Aezìk àsùghò ghê Yàkɔ̂b an naʼ e kəwālā. 12#Mat 22:13; 25:30; Lûk 13:28 Ghe kê kuūwn dzûu naŋa səā wô wɛ a kətsə̄ a beē a tsəla kələ̄m; ghe səa wô ghe e diī a fughu, ghe e pfʉa sɔŋ gho.” 13Yɛso n dzɛ̀ â komndzūghū vʉ enyəa, “Ndùw, ghəa ghù boō fughu tsughu dzə, e sô bɔ̌ɔm lò ko êzə̀.” Kɔ̂ɔ fi n daŋso tùghù kɔ̀ʼ sùghò an nə̀gha zə̀ èzə̀.
Yɛso bǎaŋ ndə̀m è àghì
(Mâk 1:29-34; Lûk 4:38-41)
14A m bùghò Yɛso ndùw an ndughu alô Pità, ù ŋ kòʼ ndùw nə̀ghàwì ù Pità mò vʉ̀a ù nyə̀ŋ â ghue wo. 15Ù m mɔ̀m tsùghù ghu kə wə̄n, ghue u te u mo è tsom. Nughò vʉ n nùghù è kɔʼ ghàʼn nì nàŋa wò wə̄n â fʉ̀ghàzəa wo. 16A m bùghò an nə̀gha è gûŋsò zò, ghe n nì wò ghì a uzʉ̀ a vʉ̀a wə̄n, ù n shʉàa sə̀so tsughu zʉ̀ u te wo mò ù tsə̀ghàsò tsughu ko kəlàŋ enyəa u səā nughù. Ù m baaŋ kɔʼ ghî ghə̀n à dzə̀m ghe mò dzaŋā. 17#Èzy 53:4 Zən mò fɛ lo alelueso tsughu lâŋ kə̀là ghùwshʉ̀ghà Èzayà fə̀ dzɛ̂ naŋā enyəa, “Ù m baaŋ dzaŋà tə sɛ̀ tò tə dzə̀m.”
Ghî ghəla ghe kê lo tsə̀təndə̄ghā tə Yɛso tò
18A m bùghò Yɛso kòʼ tsughu enyəa ghî ghə̀ ŋ ŋgè tsùŋ wò, ù n dzɛ̀ tsùghù enyəa ghèe ghê tsə̀təndə̄ghā tə wə̄n tə daŋà səā ndûw a gùŋ è lì èzə̂ a fughu alo enyʉ̀. 19Dèekə̀làŋ ù lǐ fi daŋso ndùw sə̀ kɔ̀ʼ wò nù, dzɛ̀ â wən enyəa, “Mughùbè, abugho ghù ndùw ko a ghɛ, M̀ bughòo sùghò a fughu.” 20Yɛso n daŋso dzɛ̀ â wən enyəa, “Kəŋo ŋ ki ubwûʼ, nwə̀n mìa ŋ ki ndughu to, Wɛ ù Ghùw bùʼ ki yo luʼū kəla ù lò alegaʼā tsughu kô kə̀tuw a te.”
21Tsə̀ndə̄ghā è lì n dzɛ̀ â wən enyəa, “Mughùbè, na Ǹ ndûw tsəlā wô dzə̂ bə̀ghà, Ǹ daŋso bughò.” 22Yɛso m fwə̀n dzɛ̀ ndùw â wən enyəa, “Bùghò a nughù. Zə̀ghaa ndùw ghî ghəla ghe lo tò ghî à kpuuwn gho a tsəlā ndûw ghì à kpuwnlo a ghee gho.”
Yɛso bu nyəm tùŋutùŋu kə dzughù
(Mâk 4:35-41; Lûk 8:22-25)
23Yɛso n daŋso nyə kɔʼ alo kəkwə̀n ghèe ghê tsə̀təndə̄ghā tə wə̄n to, ghe n nùghùu ndùw enyəa ghe daŋasə̌a ndùw aŋ ŋgùŋ è lì ezə̂. 24A mo e koʼò, ghuuw zə m gbən aletsughu, kwɛ̌ɛ kə ushʉ̀ghà kə li kə ŋ kaʼ tsughu aletsə̀ghà a fughu alo enyʉ̀, kwɛ̌ɛ kə te kə n tûuŋ kǎaŋ tsəghà kwə̀n kə ghee, a bən lò ko tò kwə̀n kə e məla; à n lo mo Yɛso kǔuwn bwii nù. 25Ghe n ndùw zòm kɔʼ wə̄n, dzɛ̀ â wə̄n enyəa, “Bəghasə̄ ghaʼ a Mughùbè, a mîan ko nù.” 26Ù n dzɛ̀ â ghee enyəa, “Ghɛ̀ tsəŋo kə̀ kwò, ghɛ̀ ghəla ghɛ̀ taʼkè boo fughu â Zə̀ kò a?” Ù n nùghù è kɔʼ, ke naŋa ndùw kwɛ̌ɛ kə te ko àsùghò tùŋutùŋu kəla kə mò tûuŋ kaāŋ kwə̀n ko; tùŋutùŋu kə te kə ŋ kòom tsùghù bvʉ̀ è tsughu. 27Tuw kə m kpuw ghî yì, ghe m bvʉ enyəa, “Wən biso lǒ ŋgòʼ è ghùw ù ghɛ̌ wò, kwɛ̌ɛ kə sô zuūw nduw â wə̄n à, àsùghò dzùghù a?”
Yɛso ndzùm sə uzʉ̀ a zəŋò ghì ghò
(Mâk 5:1-20; Lûk 8:26-39)
28A m bùghò Yɛso dàŋsə nduw an naʼ e Dzɛ̀làsîn aŋ ŋgùŋ zə̀ enyʉ̀ è lì è zə̂, ù m kpeen kɔʼ ghèe ghê fɛ̀ɛn tə aghì tə̀ li to tə bə̀ghà mo ghe nughù sə wò aŋ gə̀maghùw. Ghî a tə ghə n biso zəgha tsughuu zʉ̀ ù biigh wo. Ghî ghən mò waʼso ŋgɛlɛ nû, ghî ghə̀ n tsəŋo ghaʼa aletsə̀ghà dzì a fughu êzə̀. 29A mo e zuw bɔ̂ŋ kə edì ghî a zəgha yi maʼà sə wô enyəa, “Ghù ghàʼ kəŋo aŋ kwò à, mo a wɛ̀ ù Kə̀zə̀? Ghù sò yia fɛ bùghò alebùghò ndzaŋso tsughuu dzə̂ ghàʼ sěe nəgha e lo biso kpeē wo ŋkāa?” 30À n lo êzə̀ mo saʼ kə kwə̀lebʉ̄ghā kə̀ li kə ŋ kuʼù zə̌a kaŋlo a fughu kùʼŋkùʼnlo. 31Zʉ̀ vʉ wə m buʼ tsughu kəghu â Yɛso enyəa, “Abugho ghù so e dzûu sə ghaʼ, ghù dzum naŋa nyə nduw ghaʼ an saʼ kə ukwə̀lebʉ̄ghā kə chî.” 32Ù n daŋso dzɛ̀ â zʉ̀ vʉ wo enyəa, “Nùghu sə nlò!” Zʉ̀ u te u fi nughù sə̀ wò nù, nyə̀ ndùw a zəŋò kwə̀lebʉ̄ghā vʉ̀ wo. Nɔ̂e kə ukwə̀lebʉ̄ghā kə te kə n daŋso tə̀ŋò nyə̀ŋ nyə̀ tsùghù ndùw aŋ gwoo kə chì aŋ ŋgàŋlo e ukwàʼ zə̀, bvʉ̀ mə̀la nyə̀ tsùghù ndùw fughu alo enyʉ̀. 33Ghî ghəla ghe fə̀ chiīn kwə̀lebʉ̄ghā u te wo n nùghù tɛ̀ɛn tì è tsughu. Ghəa ghe tiī kwəlā nduw enaʼ, ghe n nàʼà kwən tsughu kô ghəa yia a sə a zə̄ŋò ghì a zʉ̀ yi enyə dzîi dziī. 34Naʼ zə n zòo sə̀ mɛ̀ʼɛ̀ wò è dzə̀m alendùw kôʼ Yɛso. A m bùghò ghe ndûw kôʼ nduw wə̄n, ghe m buʼ ndùw kəghu â wə̄n enyəa ù zə̀ghàa tsughu mbùʼ è ghee.
Atualmente selecionado:
Matìo 8: agq
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão