Mata 12
12
Gay lakəl aŋa vuɗ maduw ləv
(Mark 2.23-28; Luka 6.1-5)
1Mok uwana uwaga adadà à lig kà, Yesu la azlaməna matapla la slaka aŋha tagùw à uda la guf nalkama la abà, (uwana bokuba hi), la vuɗ maduw ləv. Azlaməna matapla la slaka aŋha uwaga kà may akəs atà, tadzəka makalay kà mazuway. 2Uwana azla Farisəya tanəŋà uwaga kà, tagòɗ à Yesu: “Nerə̀z, azlaməna matapla la slaka aŋak taɗàh tatak uwana mapəhay gami avərà gay kà maɗehəŋ la vuɗ maduw ləv tsi!” 3Yesu awùlla atà ala: “Kadzèŋàw à tatak uwana David aɗahàŋ vərdi anik la mok uwana may akə̀s la azlaməna aŋha aw uwà? 4Ahàd à gày Zəzagəla à agu, kà mazəɓ tatak may tsikaslaga uwana maf à ahəŋ gà. Tekeɗika tetəvi la ahəŋ kà mazuway aŋha aw, baməraka azlamanalay aŋha babay aw, say à azlaməna mav tatak à Zəzagəla pəra, la uwana tetəvi la ahəŋ.#1 Samuyel 21.7 5Awma kadzèŋàw la mapəhay aŋa Musa la abà kà, azlaməna mav tatak à Zəzagəla taɗàh sləray la gày Zəzagəla la aku amiyaka la vuɗ maduw ləv, ŋgaha tatugw mawisiga lakəl aŋatà aw kà, kasəlaw aw takay?#4Musa 28.9-10 6La dziriga gəpəh à akul kà, dza uwana aɗuwa məŋ gày Zəzagəla uwaga kà aga la abanay. 7Agayŋa kasəlaw, uwana matsetseray uwanay asal magoɗay kà:
ˈVok mahamay la uwana asa à agi, awkà tatak makaɗay gà awˈ,#Hosəya 6.6
naka kadùkwàw seriya à azladza uwana à gəl, atà kokuɗa tsakana aw. 8Kà uwana Kona aŋa dza kà masla la uwana məŋga aŋa vuɗ maduw ləv.”
Dza la ahàl mamətsay gà
(Mark 3.1-6; Luka 6.6-11)
9Yesu atsìzlla ala la abatà, azà à vok, ahàd à gày madəv kuɗa aŋatà à agu. 10Dza anik la ahəŋ la abatà, uwana agà la ahàl mamətsayga. Azladza uwana la gày uwatà la aku tanàvà à Yesu: “Mapəhay gami ma avà tetəvi kà mawur dza ala, la vuɗ maduw ləv takay?”, kà atà aŋa maɓəzal à tsəh kà mapuwal gudzi à gəl. 11Ama Yesu awùlla atà ala: “Baŋa dza la ahəŋ la tataka aŋkul la abà la tuwaŋ tekula pəra, ŋgaha tuwaŋ uwaga atəɗ à suwa à abà la vuɗ maduw ləv, ma aday kà mazəɓ à uda la abà aw takay? 12Ŋgaha dza ndzer, ma aɗuwa tuwaŋ aw takay? Kà uwaga à uwana mapəhay gami avà tetəvi à dza kà maɗàh delga la vuɗ maduw ləv.” 13Kiya uwaga Yesu agòɗ à dza uwatà: “Biyà ahàl ala!” Abiyà ahàl ala, ŋgaha ahàl aŋha adawurla bokuba anik uwahà. 14Azla Farisəya tadà aŋatà, takə̀s sawaray kà maɓəz tetəvi kà makəɗla Yesu.
Masla sləray uwana Zəzagəla akəsani
15Mok uwana Yesu atsənà uwaga kà, asà à uda la slaka uwatà la abà, ŋgaha maham à ahəŋ dza aŋuvaw tanəfà. Awarà azlaməna ɗuvats ala gesina. 16Ama afàh à atà akur à lig la ndzəɗa kà atà aŋa mapəh uwana apakà vok aw. 17Aɗahàŋ kiya uwanay kà, kà gay aŋa masla mapəhal gay à ahàl Yesayya aŋa magəɗ à afik. 18Zəzagəla agòɗ:
ˈA aganay masla sləray gulo uwana gəkə̀sànì,
Uwana gəwoyàŋ ŋgaha marabay gulo lakəl aŋha.
Gədàsləl Masasəɗok gulo à gəl aŋha,
Ŋgaha adàz gay seriya gulo à azlatsəhay gudəŋ à vok gesina.
19Masla adàgazlay la dza aw, adàwiyay aw,
Ŋgaha dza adàtsən mawiyay aŋha la azlatetəvi la ama aw.
20Adàdavla à gay à mazuwa manəlfahayga à vok aw,
Ŋgaha akàl fənəs uwana atəm à ahəŋ ŋuliza bay kà, adàdəvla à gay à vok aw.
Masla adàdz à ahəŋ kiya uwanay tsəràh à maɗàh dziriga à gudəŋ à vok gesina.
21Azlatsəhay gudəŋ à vok gesina tadàf manəwəŋ aŋatà à masla à afikˈ,#Yesayya 42.1-4
agòɗ aya.
Mapəh mawisiga lakəl aŋa Masasəɗok tsikaslaga
(Mark 3.22-30; Luka 11.14-23)
22Kiya uwaga la abatà tasəlà dza à Yesu à waŋ, guləf badaga, la masasəɗok mawisiga lakəl. Yesu awurà dza uwatà ala tsəràh à uwana dza aslala vok aŋa maɓaɗma, ŋgaha la manəŋla. 23Ləv avàlàh à maham à ahəŋ dza à gay gesina, ŋgaha tagòɗ: “Masla kà Kona aŋa David təga aw ay?” 24Ama uwana azla Farisəya tatsənà uwaga kà, tagòɗ: “Kona uwaga akuɗəkahay azlamasasəɗok mawisiga kà, kà uwana Belzəbul, sufəl aŋa seteni avàl ndzəɗa kà makuɗəkàhla.” 25Ama Yesu asə̀l madzugway aŋatà ŋgaha agòɗ à atà: “Baŋa azladza gudəŋ tekula tatsàkla, ŋgaha guvəl la tataka aŋatà la abà, makoray aŋa gudəŋ uwatà kà azila. Huɗ gudəŋ, baŋaw huɗ gày, uwana tap guvəl la tataka aŋatà la abà, aslala vok aŋa madz à ahəŋ aw. 26Baŋa seteni akuɗək seteni, masla la gəl aŋha adatsakla, ma kakay à makoray aŋha adàdza à ahəŋ ma? 27Iyay, akul kadzugwaw kà Belzəbul la uwana avà à gi ndzəɗa kà makuɗəkàh azlamasasəɗok mawisiga uwaga, kagoɗaw. Kità ma, uwa adav ndzəɗa à azlabəza aŋkul kà makuɗəkahay uwa? Kà uwaga à uwana tadàgah azlaməna seriya aŋkul. 28Ama tsa baŋa la Masasəɗok Zəzagəla la uwana gəkuɗə̀kàh azlamasasəɗok mawisiga uwanay kà, tsa kətà kà, gòɗàw kà makoray aŋa Zəzagəla kà adaɓəz akul à vok lakana, gòɗàw zla.”
29“Dza la ahəŋ ad à gày la mtəga aŋa dza ndzəɗa-ndzəɗaga kà mad à gəl aw, say atsà à vok à abà, akə̀s dza uwaga, awaɗəŋ dàŋ, ŋgaha la lig la ahəŋ aslala vok aŋa mazuw gày aŋha à gay.”
30“Dza uwana anu səla aw kà, masla məzam gulo. Ŋgaha babay kà dza uwana azlak gi kà maham ala gay à vok aw kà, masla kà masla madàdasiŋ ala. 31Kà uwaga gəgoɗ à akul haɗay kà: Maham à ahəŋ tsakana la azlagay mawisiga aŋa azladza gesina kà agay mamatsila gà, ama kəla kà, dza uwana apəh mawisiga la matsək magoɗahay à Masasəɗok Zəzagəla à gəl kà, masla kà, aɓəz mamatsila aŋa tsakana aw. 32Kəla dza uwana apəh mawisiga lakəl aŋa Kona aŋa dza adàmatsalaŋ ala, ama kəla dza uwana agoɗàh à Masasəɗok Zəzagəla kà, masla adàɓəzal mamatsila tsakana aŋha la zamana uwanay, ŋgaha la məlo uwana adàsa à waŋ babay aw.”
Ahàf la mayyay aŋha
(Luka 6.43-45)
33“Baŋa ahàf delga kà, mayyay aŋha bay kà delga. Ahàf mawisiga bay kà, mayyay aŋha kà mawisiga. Kà uwana tasəl ahàf kà la mayyay aŋha uwana la vok ayyay. 34Akul azlabəza aŋa matsapa, kakay kapəhaw azlatatak delga, tsa akul azlamawisiga ma? Uwana gay apəhay kà uwana adahən ləv ala. 35Dza delga atsalla tatak delga à uda la ləmana delga aŋha la abà; dza mawisiga bay atsalla tatak mawisiga à uda la ləmana aŋha mawisiga la abà babay. 36Iyay, gəgoɗ à akul kà: La vuɗ seriya kà, azladza tadàwulla à uda la gəl aŋatà lakəl aŋa azlagay deyday gà uwana tapàh gesina. 37Kà uwana la afaɗ gay aŋak la uwana seriya adàpəh à vok, ŋgaha adàpəhla ala kà kak dziriga baŋaw azlayla ka aw.”
Masəlay aŋa masla mapəhal gay à ahàl Yonas
(Mark 8.11-12; Luka 11.29-32)
38Kiya uwaga azlaanik la tataka aŋa azlaməna mapàhla mapəhay ala la azla Farisəya tagòɗ à Yesu: “Məŋga, asa à anu kà kaɗehəŋ nadzipo tekula mənəŋəŋ.” 39Kiya uwaga Yesu awùlla atà ala, agòɗ: “Azladza aŋa zamana uwanay azlamaksafər, taɗàh mabila, tanàv nadzipo, ama nadzipo la ahəŋ tanəŋəŋ aw, say aŋa masla mapəhal gay à ahàl Yonas uwatà pəra. 40Bokuba uwana Yonas aɗahà mavakay makər la mahənay makər la huɗ aŋa kilfi babay kà, kiya uwaga adàpaka vok la Kona aŋa dza uwana adàɗah mahənay makər la mavakay makər la zəvay la aku babay. 41La vuɗ seriya kà, azladza aŋa gudəŋ Niniv tadàgola afaɗ à azladza aŋa zamana uwanay à gəl, ŋgaha tadàpuwa à atà gudzi à gəl, à kà uwana azlaməna madz à ahəŋ la Niniv tapə̀h gay la ləv ala, à mok uwana tatsə̀n sayda aŋa Yonas. Uwana aɗuwa Yonas aganay la abanay. 42La vuɗ seriya kà, sufəl mis gà uwana la gəl la aku adàgola afaɗ à azladza aŋa zamana uwanay à gəl, ŋgaha adàpuwa à atà gudzi à gəl, kà uwana asà à afik la tsəh la ahəŋ la makəɗ gəl à ahəŋ gudəŋ à vok, kà matsəɓ sləm à haŋkəli aŋa Salomon. Uwana aɗuwa Salomon kà aganay la abanay.”
Mawul à waŋ aŋa masasəɗok mawisiga
(Luka 11.24-26)
43“La mok uwana masasəɗok mawisiga adasa à uda la dza la abà kà, aday auguzahay la azlaslaka deydayga gesina, ayàh slaka maduw ləv. Ama baŋa aɓəzal aw kà, 44agoɗay la gəl aŋha kà: ‘Lagwa kà, gəday, gədàwul à slaka gulo uwana à abà gəsà à uda la abà. Ŋgaha awulay aɓəzal à gəl kà maslaɗayga lela, maɗehəŋ à ahəŋ gà dzəɓa aŋha səla aw.’ 45La abatà kà aday, ayahay azlamasasəɗok mawisiga anik à tsəh məɗəf, azlauwana taɗuwa masla la dzaŋdzaŋ, tatsa à waŋ atà nna, tadza à ahəŋ la abatà. Kiya uwaga kà, madz à ahəŋ aŋa dza uwaga agay mawisiga ɗaɗuwa uwana uwarà. Kiya uwaga adàgay la azladza mawisiga aŋa zamana uwanay.”
Iyà la azladeda aŋa Yesu
(Mark 3.31-35; Luka 8.19-21)
46La mok uwana iyà la azladeda aŋa Yesu tasà à waŋ kà, Yesu aɓaɗmà à maham à ahəŋ dza. Tatsàzl à uda, asà à atà maɓaɗalma. (( 47Dza anik agòɗ à Yesu: “Iyà la azladeda aŋak la uda, asà à atà maɓaɗakama!”)) 48Yesu awùlla à dza uwatà: “Uwa à iyà gulo la azladeda gulo uwa?” 49Ŋgaha apə̀hla azlaməna matapla la slaka aŋha ala la magoɗay: “Atà nnay azlaiyà la azladeda gulo. 50Kəla dza uwana aɗàh uwana asa à Baba gulo uwana la zagəla la afik kà, masla kà deda gulo, baŋaw iyà gulo.”
Atualmente selecionado:
Mata 12: mfh
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
©2019, Wycliffe Bible Translators Inc. All rights reserve.