創世記 16
16
夏甲㧯以實瑪利
1 亞伯蘭个𡜵娘莎萊無𫱔子女給佢。莎萊有一個使女安到夏甲，係埃及人。 2莎萊對亞伯蘭講：「上主使𠊎毋會𫱔。請你㧯𠊎个使女同房，無定著姖會代𠊎𫱔一個孻仔。」亞伯蘭就聽莎萊个話。 3所以，亞伯蘭个𡜵娘莎萊就將使女埃及人夏甲交給厥老公做細姐。 (這件事係亞伯蘭在迦南住十年以後正發生个。) 4亞伯蘭㧯夏甲同房，姖就有身項。姖一知自家有身，就驕傲起來，看毋起頭家娘。
5 莎萊對亞伯蘭埋怨講：「𠊎被人欺負，係你毋著 #16:5 「𠊎…毋著」抑係譯做「因為𠊎受羞辱，你會無面子」。。𠊎將𠊎个使女放在你个懷中；姖一知自家有身項，就看毋起𠊎。願上主在你㧯𠊎中間主持公道。」
6 亞伯蘭應佢講：「姖係你个使女，係你管个，你做得隨意對待姖！」莎萊就苦毒夏甲；夏甲忍毋住就偷走。
7上主个天使在曠野，愛去書珥路上个泉水滣堵到夏甲， 8對姖講：「莎萊个使女夏甲啊，你對㖠位來？愛去㖠位？」姖應講：「𠊎對頭家娘莎萊該位偷走出來。」
9上主个天使講：「你愛轉去頭家娘該位，完全順從姖。」 10上主个天使又講：「𠊎愛使你个子孫極多，多到無人算得出來。」 11上主个天使又講：「你已經有身項，會𫱔一個孻仔；你愛㧯佢安到以實瑪利#16:11 「以實瑪利」意思係「上帝垂聽」。，因為上主聽到你个苦情。 12你个孻仔將來會像一隻野驢；佢愛攻打人，人也愛攻打佢。佢愛㧯親族結冤仇，單獨生活。」
13 夏甲就講：「𠊎正經在這位看到該看顧𠊎个上帝嗎？𠊎樣般還有命！」所以姖將該㧯姖講話个上主喊做「你係看顧人个上帝」。 14因為恁樣，人喊該口井做庇珥‧拉海‧萊#16:14 「庇珥‧拉海‧萊」意思係「看顧𠊎个永生者个井」。。這口井係在加低斯㧯巴列中間。
15 夏甲為亞伯蘭𫱔一個孻仔；亞伯蘭㧯佢安名喊做以實瑪利。 16夏甲為亞伯蘭𫱔以實瑪利个時，亞伯蘭八十六歲。
Atualmente selecionado:
創世記 16: THV12Hdb
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© The Bible Society in Taiwan, 2012
All rights reserved
© 台灣聖經公會版權所有 2012