San Mateo 9
9
Sandaꞌa Jesús iin ra küvi kaka
1Saa nandaa Jesús ini barca, ra nandiko ra chi inka xiyo yuꞌu tiakuii kan, ra ndaxaa ra ñuu ra. 2Ra saa kuu, ra ndixaa va sava na xiꞌin iin ra kueꞌe küvi kaka, ra kanduꞌu ra nuu ixto ndixaa ra xiꞌin na nuu Jesús. Ra te xini Jesús ña ndinuni ni ndiaa ini na ra, ña kuchuun ra sanduvaꞌa ra ra nduchiꞌña kan, ra saa ndikaꞌan ra xiꞌin ra nduchiꞌña kan kachi ra saa:
―Kusüchi ini kun seꞌe, chi xa xa kaꞌnu va ini yu xaꞌa kuachi kun ―kachi ra xiꞌin ra.
3Ra ikan ndee sava na maestro sañaꞌa ndiayu Ndioxi ixtoꞌni na, ra saa ndakani ini na kaꞌan na saa: “Chee ni kuachi ke xa ra yoꞌo chi ndaa yuꞌu ra Ndioxi ña kachi ra saa”, kaꞌan na. 4Ndi su kundaa va ini Jesús ña ndakani ini na, ra saa ndikaꞌan ra xiꞌin na kachi ra saa:
―¿Nichuun kiꞌvi ni ndakani ini ndo? 5¿Ni ke vaꞌa kachi yu xiꞌin ra nduchiꞌña yoꞌo tuvi ndo, a vaꞌa tu na kaꞌan yu xiꞌin ra kachi yu saa: “Xa xa kaꞌnu va ini yu xaꞌa kuachi kun”, kachi yu, ra a vaꞌa ka tu na kaꞌan yu xiꞌin ra: “Ndakundichi ra kaka kun kuꞌun kun”, na kachi yu? 6Ra nuu ndo saa na sandaꞌa yu ra, ra saa ke kundaa ini ndo chi yuꞌu, ra xaa yoꞌo, ra kuu mii yu ndiayu ña sakaꞌnu ini yu xaꞌa kuachi yuvi na ndee nuu ñuꞌu yoꞌo ―kachi Jesús xiꞌin na.
Ra saa ndikaꞌan ra xiꞌin ra nduchiꞌña küvi kaka kan kachi ra saa:
―Ndakoo, ra ndakiꞌin kun ixto kun ra kunuꞌu kun veꞌe kun ―kachi ra xiꞌin ra.
7Saa ra ndikun ndakoo ra nduchiꞌña küvi kaka kan ra ndakiꞌin ra kuanuꞌu ra veꞌe va ra. 8Ra te xini takundiꞌi yuvi kan ña kuu, saa ra ndakanda ka vi ini na, ra ndasakaꞌnu ka vi na Ndioxi, xaꞌa ña taxi ra ndiee ra ndaꞌa na yuuvi yoꞌo.
Kána Jesús ra Mateo ña kundikun ra ra
9Ra te ndiꞌi saa ndakiꞌin Jesús kuaꞌan ra, ra xini ra iin ra nani Mateo, ra ndiso chiñu kaya xuꞌun ndaꞌa na ñuu ña kuaꞌan ndaꞌa gobierno ñuu Roma. Ña nduꞌu ra nuu mesa nuu ndakiꞌin ra xuꞌun ndaꞌa yuvi, ra saa ndikaꞌan Jesús xiꞌin ra kachi ra saa:
―Naꞌa, na koꞌo xiꞌin yu ―kachi ra xiꞌin ra.
Saa ra ndikun ndakundichi ra Mateo, ra ndakundikun ra sata Jesús kuaꞌan ra xiꞌin va ra. 10Ra saa kuu iin kii nduꞌu Jesús nuu mesa xixi ra veꞌe ra Mateo xiꞌin ndia ndikun sata ra, ra saa ndixaa kuaꞌa ni ka tu na kaya xuꞌun ña kuaꞌan ndaꞌa gobierno ñuu Roma va, ra ndixaa tu na nduꞌu tuꞌun kiꞌvi xaꞌa va, ra ndakundee na nuu mesa nuu nduꞌu Jesús xixi na xiꞌin ra. 11Ra te xini na fariseo ña nduꞌu Jesús xixi ra xiꞌin yuvi kuachi kan, ra saa ndikaꞌan na xiꞌin ndia ndikun sata ra kachi na saa:
―¿Nichuun nduꞌu ra Tata Maestro ndo xixi ra xiꞌin na kaya xuꞌun, xiꞌin yuvi kuachi kaa? ―kachi na xiꞌin ndia. 12Ra ta xini soꞌo Jesús ña ndikaꞌan na, ra saa ndikaꞌan ra xiꞌin na kachi ra saa:
―Yuvi na iyoo vaꞌa ini ra xiniñüꞌu vi na kan na xa tatan, chi na xiꞌi va kuvi na xiniñuꞌu na xa tatan ―kachi ra xiꞌin na.
13Saa ndikaꞌan ka Jesús xiꞌin na kachi ra saa:
―Kuaꞌan ndo ra ndakiꞌin xini ndo ni ke kuni kachi tuꞌun yoꞌo: “Chi ña kuni yu ke na kuꞌvi ni ini ndo kuni ndo na taꞌan va ndo, ra küni yu ña na soko ndo ñaꞌa nuu yu”, chi na xa vaꞌa ni ndee tuvi na, ra växi yu xaꞌa na kan, chi na iyoo kuachi va kuvi na vaxi yu xaꞌa, ña na nandiko ini na xaꞌa kuachi na, ra ndakiꞌin na ichi Ndioxi ra kaku na ―kachi Jesús xiꞌin na.
Ndatuꞌun Jesús nichuun ke kuë iyoo suꞌun ndia itaꞌan xiꞌin ra
14Saa kuu ra ndixaa ndia itaꞌan xiꞌin ra Juan ra sakuchi yuvi nuu íin Jesús, ra nindakatuꞌun ndia ra kachi ndia saa:
―Tata, ¿nichuun kuëe iyoo suꞌun ndia itaꞌan xiꞌin kun, ra nduꞌu xiꞌin na fariseo, ra kuaꞌa ni va ichi iyoo suꞌun ndi, ña xïxi ndi? ―kachi ndia xiꞌin ra.
15Ra saa ndakuiin Jesús kachi ra saa xiꞌin ndia:
―¿A vaꞌa tu na kundee suchi ini na kuaꞌan nuu iyoo viko tandaꞌa, tuvi ndo? ¿Su väꞌa kita ña, chi tan íin ka va ra tandaꞌa kan xiꞌin na? Ndi su te na xaa kii ña ndakiꞌin na ra tandaꞌa kan kuꞌun ra, ra ndia saa vi ke ndoo na itaꞌan xiꞌin ra, ña koo suꞌun na, küxi na. 16Ra ndia nii yuvi ra ndakäꞌma na tikoto yata xiꞌin tikoto xaa, chi tu saa na sa na, saa ra nandii va tikoto xaa, ra nandata vaꞌa ka va ña tikoto yata kan. 17Ra ndia nii tu na täân vino xaa ini ñii yata, chi tu saa na sa na, saa ra ndata va ñii yata sa ra, ra kuitia ndiꞌi va ra, ra ndiꞌi tu xaꞌa mii va ñii kan, ña kan ke vino xaa, ra ini ñii xaa ke xiniñuꞌu kundoꞌni ra, ra saa ke na kuïtia ra, ra nii ñii kan ndïꞌi xaꞌa ―kachi Jesús xiꞌin na.
Sandaꞌa Jesús ña loꞌo seꞌe ra Jairo, xiꞌin ñaꞌá ña nditiandiaa ndaꞌa tikoto ra
18Ra sakan saa kuu Jesús ndatuꞌun ra xiꞌin na ndichi ra, ra tuꞌva ndixaa va iin ra kuchee nuu na Judío, ra nani Jairo, ra xikusiti ra nuu Jesús ra ndikaꞌan ra xiꞌin ra, kachi ra saa:
―Tata, ña sakan ndixiꞌi va kuvi ña loꞌo seꞌe yu, ndi su tu na kuꞌun kun xiꞌin yu, ra chinduꞌu kun ndaꞌa kun sata ña, saa ra ndatiaku va ña ―kachi ra xiꞌin Jesús.
19Ra saa ndakiꞌin Jesús kuaꞌan ra xiꞌin ra Jairo, ra kuaꞌan tu ndia itaꞌan xiꞌin Jesús va. 20Ra te saa kuu na ndoꞌni na ichi kan kuaꞌan na, saa ra tuꞌva kanata va iin ñaꞌá, ña xatia ni ña nii, ra xa uxi uvi kuiya ke ndoꞌo ña saa, ra saa kuyachin ña chi sata Jesús ra nditiandiaa ndaꞌa ña yuꞌu tikoto ña ndixi ra. 21Chi ndakani ini ña káꞌan ña saa: “Tu na tiandiaa loꞌo ndaꞌa va yo yuꞌu tikoto ña ndixi ra, saa ra ndikun nduvaꞌa va yo”, kaꞌan ña. 22Ra saa ndikokuiin Jesús, ra ndakotoꞌni ra nuu ña, ra ndikaꞌan ra xiꞌin ña kachi ra saa:
―Kuayüꞌvi kun seꞌe, chi xa nduvaꞌa va kun, xaꞌa ña ndiaa ini kun yuꞌu ―kachi ra xiꞌin ña.
Saa ra ndikun mii hora kan ke nduvaꞌa va ña.
23Ra te ndixaa Jesús ndikiꞌvi ra veꞌe ra Jairo, ra kuchee nuu na Judío kan, ra xini ra ndee na miska tivi na, ña xa xandúvi na, ña nduxin na ña loꞌo kan, ra na kuaꞌa kan ra iin kaña kaña xaku na xaꞌa ña. 24Ra saa ndikaꞌan ra xiꞌin na, kachi ra saa:
―Kee ndo chi keꞌe, chi süvi ña ndixiꞌi kuvi ña loꞌo yoꞌo, chi ña kixi va kuvi ña ―kachi ra xiꞌin na.
Saa ra ndixaku ndiaa va na ra. 25Ra te kee ndiꞌi na chi keꞌe xa ra, saa ra ndikiꞌvi ra veꞌe nuu kanduꞌu ña loꞌo kan, ra te tiin ra ndaꞌa ña, saa ra ndakoo va ña, chi ndatiaku ndixa va ña xa ra. 26Saa ra ndikun kundaa ini takundiꞌi va yuvi, na ndee ñuu ña ndoꞌni kan xaꞌa ña xa Jesús, ña sandatiaku ra ña loꞌo kan.
Sandaꞌa Jesús uvi ndia kuaa
27Ra te kanata Jesús veꞌe kan, ra ndakiꞌin ra kuaꞌan ra, ra saa taxi ndikun uvi ndia kuaa sata ra, ra iin ko koꞌo kana ndia kachi ndia saa:
―Jesús, seꞌe ra David, kundaꞌvi ini kuni nduꞌu ―kachi ndia xiꞌin ra.
28Ra te ndixaa Jesús ndikiꞌvi ra iin veꞌe, ra saa kuyachin ndia kuaa kan nuu ra, ra nindakatuꞌun ra ndia kachi ra saa:
―¿A kandixa ndo ña kuchuun yu sandaꞌa yu ndoꞌo tuvi ndo? ―kachi ra xiꞌin ndia.
Saa ndakuiin ndia kachi ndia saa:
―Kuchuun va kun, Tata ―kachi ndia xiꞌin ra.
29Saa chinduꞌu Jesús ndaꞌa ra nuu ndia, ra ndikaꞌan ra xiꞌin ndia kachi ra saa:
―Xaꞌa ña kandixa ndo yuꞌu, ña kuchuun yu sanduvaꞌa yu ndoꞌo ke, na nduvaꞌa va ndo ―kachi ra xiꞌin ndia.
30Saa ra ndikun ndanuña ndixa va nuu ndia, ra vaꞌa ka vi ndakotoꞌni ndia, ra saa ndikaꞌan Jesús xiꞌin ndia kachi ra saa:
―Ndia nii yuvi ndatüꞌun ndo xiꞌin xaꞌa ña sandaꞌa yu ndoꞌo ―kachi ra.
31Ndi su te ndakoyo ndia kuaꞌan ndia, saa ra ndikun xaꞌa va ndia ndatuꞌun ndia xiꞌin yuvi na ndee, iin nii kuvi ñuu xaꞌa ña xa Jesús xiꞌin ndia, ña sandaꞌa ra nuu ndia.
Sandaꞌa Jesús iin ra miꞌmi
32Ra te sakan kee ndia kuaa ndia nduvaꞌa nuu kan kuaꞌan ndia, saa ra ndixaa ka tuku va yuvi nuu Jesús xiꞌin iin ra miꞌmi ra ndikaa tachi ndivaꞌa ini. 33Ra te tava Jesús tachi ndivaꞌa ini tiaa ra miꞌmi kan, saa ra ndikun vaꞌa ndakaꞌan va ra. Saa ra ndakanda ni ini yuvi kan ra kachi na saa:
―Ndia nii ñuu ña ndikun ndiaa Israel yoꞌo, ra täan kuni yo ña ^kuu yoꞌo vichin ―kachi na.
34Ndi su ndia fariseo, ra suꞌva va, kachi ndia xaꞌa Jesús:
―Ndiee kiti ndivaꞌa, mii ri kuchee vaꞌa nuu takundiꞌi ña ndivaꞌa va ke iyoo xiꞌin ra; ña kan ke vaꞌa tava ra tachi ndivaꞌa ―kachi ndia.
Kundaꞌvi ni ini Jesús xini ra yuvi
35Ra iinii kuvi ñuu naꞌnu, xiꞌin ñuu vali ke ^xinuꞌni Jesús kuaꞌan ra, ña sañaꞌa ra yuvi xaꞌa ichi nuu xaꞌndia Ndioxi chiñu, ra kaꞌan ndoso ra tuꞌun Ndioxi nuu na, ra ta veꞌe ñuꞌu ta veꞌe ñuꞌu ke yaꞌa ra kuaꞌan ra; ra sandaꞌa ra takundiꞌi na xiꞌi ndia ndia ka kueꞌe, xiꞌin na ndiee ndoꞌo. 36Ra te xini ra takundiꞌi yuvi na ndikun kuaꞌan sata ra, saa ra kundaꞌvi ka vi ini ra xini ra na, saa chi ndaꞌvi ka vi íin na ndee na, chi kuenda ke kuu na yuvi xika va na, ra köo mii na kiꞌin kuenda xiꞌin vi na, ra ta íin ndikachi vali ri köo ixtoꞌo va, saa íin na. 37Saa ndikaꞌan ra xiꞌin ndia itaꞌan xiꞌin ra kachi ra saa:
―Ña ndixa ke, chi itu ña xiniñuꞌu sakee yo, ra kuaꞌa ni va kuvi ña, ndi su na sakee, ra loꞌo ni va kuvi na. 38Ña kan ke xiniñuꞌu ni na kaꞌan ndo xiꞌin ra kuu xitoꞌo ña, ra na tiꞌvi ka ra na sakee kixi na, ña sakee na ña ―kachi Jesús xiꞌin ndia.
Atualmente selecionado:
San Mateo 9: mxvNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2017, Wycliffe Bible Translators, Inc. All rights reserved