Yauhaas 6
6
Yexus Pub Mov Rua 5,000 Leej Noj
(Mathais 14:13-21; Malakaus 6:30-44; Lukas 9:1-17)
1Tomqaab ntawd, Yexus caij nkoj hlaa Havtxwv Kalilais moog rua saab tim u (lossis muaj dlua ib lub npe hu ua Tinpelias). 2Muaj tuabneeg coob-coob lawv Yexus qaab moog, vim puab pum tej txujci tseemceeb kws Nwg khu tau tej tuabneeg muaj mob zoo. 3Yexus moog rua sau roob hab nrug Nwg cov thwjtim nyob uake. 4Thaus ntawd, ze lub caij kws cov Yudais ua kevcai Hlaa Dlhau. 5Yexus tsaa qhovmuag saib hab pum tuabneeg coob-coob taabtom tuaj cuag Nwg, Nwg txhaj nug Filiv has tas, “Peb yuav moog yuav mov qhovtwg txhajle txaus cov tuabneeg nuav noj?” ( 6Yexus has le nuav, yog Nwg sim Filiv sab; tseeb tag, Nwg tub paub lawm has tas, Nwg yuav ua lecaag.)
7Filiv teb tas, “Txawm yog muab 200 tawm lub npib nyaj#6:7: lub npib nyaj: ib tug tuabneeg ua num, ib nub tsuas tau ib npib nyaj xwb (saib Math 20:2). Phoo Kilis sau has tas 200 tawm denalis. moog yuav mov los ntshe ib leeg tsuas tau miv-miv xwb.”
8Yexus cov thwjtim muaj ib tug kws yog Aanrus, nwg yog Ximoos Petus tug kwv, nwg has tas, 9“Muaj ib tug mivnyuas tub nuav, nwg muaj tsib lub ncuav hab ob tug ntseg. Tabsis yeej yuav tsi txaus cov tuabneeg nuav noj.”
10Yexus has tas, “Mej has kuas suavdlawg nyob quastsawg.” (Thaaj chaw ntawd muaj-muaj nyom.) Yogle ntawd, suavdlawg txawm nyob quastsawg; cov txivneej kws nyob ntawd muaj kwvlaam le 5,000 leej. 11Yexus muab cov ncuav ntawd lug ua Vaajtswv tsaug, hab muab coj moog faib rua cov tuabneeg kws nyob quastsawg ntawd. Nwg muab ob tug ntseg lug ua ib yaam nkaus le ntawd hab, puab txhua tug tau noj tsau npaum le tsau tau. 12Thaus puab noj tsau lawm, Yexus has rua Nwg cov thwjtim has tas, “Mej moog sau tej kws suavdlawg noj tsi taag, tsi xob ca ib qho xuam le.” 13Yogle ntawd, puab txhaj moog sau taagnrho tej kws suavdlawg noj tsi taag ntawm tsib lub ncuav ntawd tau kaum-ob tawb puvnkaus.
14Thaus suavdlawg pum Yexus ua zaaj txujci tseemceeb nuav, puab has tas, “Tug nuav lau, yog tug xwbfwb cev Vaajtswv lug#6:14: tug xwbfwb cev Vaajtswv lug: saib 1:21. kws nqeg lug rua huv nplajteb nuav tag!” 15Yexus paub tas puab taabtom yuav tuaj muab Nwg yuam tsaa ua vaajntxwv; yogle ntawd, Nwg tuableeg txhaj moog rua sau roob lawm.
Yexus Moog Sau Nplaimdlej
(Mathais 14:22-33; Malakaus 6:45-52)
16Thaus yuav tsausntuj, Yexus cov thwjtim nqeg moog rua nraag havtxwv, 17puab nce rua huv nkoj, hab hlaa havtxwv rov moog rua tim lub nroog Kapena-us. Tub tsausntuj lawm tabsis Yexus tseem tsi tau lug rua ntawm puab. 18Thaus ntawd txawm muaj cuadlaaj cuadlub ntsawj ua rua dlej ndlaas heev kawg le. 19Cov thwjtim tub nkuam lub nkoj moog dleb kwvlaam le 5 lossis 6 kilumev lawm, puab txawm pum Yexus moog kutaw sau nplaimdlej lug ze zujzug rua ntawm puab lub nkoj, puab ntshai kawg le. 20Yexus has rua puab tas, “Tsi xob ntshai, yog Kuv xwb!” 21Puab txhaj zoosab hlo ca Yexus lug rua huv lub nkoj, taamsim ntawd lub nkoj txawm moog txug ncua ntawm ntug, qhov chaw kws puab yuav moog.
Tuabneeg Nrhav Yexus
22Nub tomqaab cov tuabneeg coob-coob kws nyob saab ntug havtxwv qub qaab tim u pum tas tsuas muaj tuablub nkoj nyob ntawd xwb. Puab pum tas Yexus yeej tsi tau nrug Nwg cov thwjtim caij lub nkoj ntawd moog, tsuas yog cov thwjtim txhaj caij nkoj moog lawm xwb. 23Muaj dlua ib cov nkoj tuaj tim lub nroog Tinpelias tuaj nreg ze rua ntawm qhov chaw kws Yexus muab ncuav lug ua Vaajtswv tsaug hab muab ndlais faib rua suavdlawg noj. 24Thaus cov tuabneeg coob-coob ntawd pum tas Yexus hab Nwg cov thwjtim tsi nyob ntawd lawm, puab txawm nce rua huv cov nkoj ntawd hab caij moog nrhav Yexus rua tim lub nroog Kapena-us.
Yexus Yog Cov Mov Kws Cawm Txujsa
25Thaus cov tuabneeg ntawd moog nrhav tau Yexus saab havtxwv tim u lawm, puab has rua Nwg has tas, “Xwbfwb, thaus twg Koj tub tuaj txug ntawm nuav lawm?”
26Yexus teb tas, “Kuv qha tseeb rua mej has tas, mej tuaj nrhav Kuv, tsi yog vim mej totaub txug tej txujci tseemceeb kws Kuv ua, tabsis vim mej tau noj mov tsau xwb. 27Mej tsi xob nrhav tej mov kws txawj lwj; tabsis mej yuavtsum nrhav tej mov kws yuav kaav mej txujsa moog ibtxhis. Nuav yog cov mov kws Tuabneeg Leejtub yuav muab rua mej, ruaqhov Vaajtswv tug kws yog Leejtxiv tub nas homthawj tsocai rua Nwg lawm.”
28Puab nug Yexus has tas, “Peb yuav ua lecaag txhaj ua tau tej dlejnum kws Vaajtswv xaav kuas peb ua?”
29Yexus teb tas, “Vaajtswv tej dlejnum yogle nuav: Nwg xaav kuas mej ntseeg tug kws Nwg khaiv lug.”
30Puab teb tas, “Koj yuav ua yaam txujci tseemceeb twg rua peb pum es hab txhaj yuav ntseeg Koj? Koj yuav ua dlaabtsi? 31Peb cov yawmkoob noj manas tom taj suabpuam lawvle Vaajtswv Txujlug has tas, ‘Nwg muab mov sau ntuj lug rua puab noj.’ ” #Tsiv 16:4, 15; Nnkauj 78:24
32Yexus has tas, “Kuv qha tseeb rua mej has tas, Mauxes tsi yog tug kws muab cov mov kws lug sau ntuj lug rua mej; tabsis Kuv Txiv yog tug kws muab cov tseem mov kws lug sau ntuj lug rua mej. 33Ruaqhov cov mov kws Vaajtswv muab yog tug kws lug sau ntuj lug hab muab tau txujsa rua tuabneeg nplajteb.”
34Puab thov Yexus has tas, “Tug Tswv, thov Koj muab cov mov ntawd rua peb noj moog le.”
35Yexus qha rua puab has tas, “Kuv yog cov mov kws cawm txujsa. Tug kws lug cuag Kuv, tug ntawd yuav tsi tshaib plaab ib zag le; tug kws ntseeg Kuv, tug ntawd yuav tsi nqhes dlej ib zag le. 36Kuv has rua mej tas, nwgnuav mej tub pum Kuv lawm, tabsis mej tsi ntseeg Kuv. 37Txhua tug kws Kuv Txiv muab rua Kuv, yeej yuav lug cuag Kuv. Txhua tug kws lug cuag Kuv, Kuv yeej yuav tsi muab puab ntab tawm, 38ruaqhov Kuv lug sau ntuj lug tsi yog lug ua lawvle Kuv lub sab nyam, tabsis yog lug ua lawvle tug kws khaiv Kuv lug lub sab nyam. 39Tug kws khaiv Kuv lug lub sab nyam yog kuas Kuv saib cov tuabneeg kws Nwg muab rua Kuv lawm, tsi xob ca ib tug twg pluj le, tabsis kuas thaus txug nub kawg Kuv yuavtsum tsaa puab txhua tug sawv lug tau txujsa. 40Qhov kws Kuv Txiv xaav tau yog kuas txhua tug kws pum Leejtub hab ntseeg Nwg tau txujsa ntev dlhawv moog ibtxhis. Hab kuas thaus txug nub kawg Kuv yuav tsaa puab sawv lug tau txujsa.”
41Tes cov Yudais txawm ywg Yexus, ruaqhov Nwg has tas, “Kuv yog cov mov kws lug sau ntuj lug.” 42Yogle ntawd, puab txhaj has tas, “Tug txivneej nuav tsi yog Yauxej tug tub Yexus lov? Peb yeej paub Nwg nam Nwg txiv huv tuabsi. Ua lecaag taamsim nuav Nwg ho yuav has tas Nwg lug sau ntuj lug?”
43Yexus teb rua puab tas, “Mej tsi xob ywg-ywg lawm. 44Tuabneeg yeej tsi muaj peevxwm lug cuag tau Kuv, tsuas yog Leejtxiv tug kws khaiv Kuv lug, txhaj coj tau puab lug cuag Kuv xwb; hab thaus txug nub kawg Kuv yuav tsaa puab sawv lug tau txujsa. 45Cov xwbfwb cev Vaajtswv lug sau tseg has tas, ‘Vaajtswv yuav qha txhua tug huv tuabsi.’ Txhua tug kws nov Leejtxiv tej lug hab kawm ntawm Nwg yeej lug cuag Kuv. #Yaxaya 54:13 46Qhov nuav tsi txhais has tas txhua tug tub pum Leejtxiv lawm; tsuas yog tug kws Vaajtswv khaiv lug, Nwg tuableeg xwb txhajle pum Leejtxiv lawm.
47“Kuv qha tseeb rua mej has tas tug kws ntseeg Kuv, tug ntawd tub tau txujsa ntev dlhawv moog ibtxhis lawm. 48Kuv yog cov mov kws cawm txujsa. 49Txawm yog mej cov yawmkoob tau noj manas tom taj suabpuam los puab tub tuag taag lawm. 50Tabsis nuav yog cov mov kws lug sau ntuj lug, tug kws tau noj cov mov nuav yuav tsi tuag. 51Kuv yog cov mov cawm txujsa kws lug sau ntuj lug. Tug kws noj cov mov nuav yuav tau txujsa ntev dlhawv moog ibtxhis. Cov mov kws Kuv muab nuav yog Kuv cev nqaj, kws yuav muab cawm tuabneeg txujsa ntaag.”
52Tes cov Yudais txawm siscaav npautawg vog has tas, “Tug txivneej nuav yuav ua lecaag muab tau Nwg cev nqaj rua peb noj?”
53Yexus has rua puab tas, “Kuv qha tseeb rua mej has tas, yog mej tsi noj Tuabneeg Leejtub cev nqaj hab tsi haus Nwg cov ntshaav, tes mej yuav tsi muaj txujsa nyob rua huv mej tugkheej. 54Tug kws noj Kuv cev nqaj hab haus Kuv cov ntshaav, tug ntawd tau txujsa ntev dlhawv moog ibtxhis, hab thaus txug nub kawg Kuv yuav tsaa nwg sawv lug tau txujsa. 55Kuv cev nqaj txhaj yog tseem mov; hab Kuv cov ntshaav yog tseem dlej. 56Tug kws noj Kuv cev nqaj hab haus Kuv cov ntshaav, tug ntawd nrug Kuv koom ib txujsa, hab Kuv nrug nwg koom ib txujsa. 57Leejtxiv tug kws muaj txujsa ua tug khaiv Kuv lug, Kuv muaj txujsa tub yog vim muaj Nwg. Ib yaam nkaus le ntawd, tug kws noj Kuv cev nqaj tug ntawd yuav muaj txujsa, vim Kuv yog tug muaj txujsa. 58Cov mov nuav lau, yog cov mov kws lug sau ntuj lug; cov mov nuav tsi zoole cov mov kws mej cov yawmkoob noj, tabsis tomqaab ntawd puab tuag taag lawm. Tug kws noj cov mov nuav yuav tau txujsa ntev dlhawv moog ibtxhis.”
59Yexus has cov lug nuav yog thaus Nwg qha huv lub tsev saablaaj kws nyob huv lub nroog Kapena-us.
Tej Lug Kws Muaj Txujsa Moog Ibtxhis
60Thaus Yexus cov thwjtim coob leej nov tej lug kws Nwg qha ntawd, puab has tas, “Cov lug qha nuav nyuaj kawg le. Leejtwg txhaj yuav totaub?”
61Txawm tsi muaj leejtwg qha, los Yexus paub tas puab ywg txug tej lug kws Nwg has, Nwg txhaj has rua puab tas, “Tej lug kws Kuv has nuav ua rua mej xaav tso txuj kev ntseeg tseg lov? 62Pevxaam has tas mej pum Tuabneeg Leejtub rovqaab moog nyob sau qhov chaw kws Nwg ibtxwm nyob lug lawm, mej ho yuav xaav lecaag? 63Vaajtswv tug Ntsujplig ua tau rua tuabneeg muaj sa; tabsis tuabneeg nqajtawv ua tsi tau le ntawd. Tej lug kws Kuv qha rua mej ntawd yog Ntsujplig hab yog txujsa. 64Tabsis mej cov muaj qeeleej tsi ntseeg Kuv tej lug.” (Yexus has le ntawd, ruaqhov thaus chivthawj Nwg tub xub paub lawm has tas, tug twg yog tug tsi ntseeg hab tug twg yog tug kws yuav ntxeevsab rua Nwg.) 65Hab Yexus has ntxiv tas “Tub yog vimle nuav Kuv txhaj has rua mej has tas, yeej tsi muaj leejtwg lug cuag tau Kuv, tsuas yog tug kws Leejtxiv tsocai xwb.”
66Vimle ntawd, cov tuabneeg kws caum Yexus qaab muaj coob leej txhaj tso Yexus tseg, hab tsi nrug Nwg moog lawm. 67Yogle, Yexus txhaj nug Nwg kaum-ob tug thwjtim has tas, “Mej ne, mej xaav tso Kuv tseg hab lov?”
68Ximoos Petus teb Yexus has tas, “Tug Tswv, peb yuav moog nrhav leejtwg? Tsuas yog Koj tej lug xwb txhaj pub tau txujsa ibtxhis. #Math 16:16; Malak 8:29; Lukas 9:20 69Nwgnuav peb ntseeg hab paub tseeb has tas Koj yog tug Dlawbhuv kws lug ntawm Vaajtswv lug.”
70Yexus teb puab has tas, “Puas yog Kuv xaiv mej kaum-ob leeg nuav? Txawm le ntawd los mej cov ko muaj ib tug yog dlaab ntxwgnyoog!” 71Yexus has le ntawd, yog Nwg has txug Yudas kws yog Ximoos Ixakali-us tug tub. Txawm yog Yudas yog ib tug ntawm kaum-ob tug thwjtim los nwg tseem ntxeevsab rua Yexus hab.
Atualmente selecionado:
Yauhaas 6: HNJ2022
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2022 United Bible Societies. All rights reserved.