Lükɛ̀n 21
21
Ɛmiàn-grɔn-hi tɔ̀n cice
(Nyɛ́n nyan Markɛ̀n 12:41-44 wrú lɔ mɛ̀n)
1Zhezü kɛ crɛ nyan ezì mán ɛmɛẅi kɩ kán ɛnnɛ̀ncüì hɔ̀n léyi ke dí ɔkùa ɛtɛ̀-woroko léyi yɛ hán yɛ hɛ́n Ɔwɔ-cice-wɔn lɔ mɛ̀n nɔn mɛ̀n. 2Nɛ̀n vru nɛ̀n kán ɛmìan-grɔn-hi tɔ̀n bɩ́ kɔprɛ̀-ẅì anhyrɛ̀ di ɛtɛ̀-woroko lɔ mɛ̀n. 3Zɛtɛn nɛ dɔ̀ le: “Mɛ dɔ́ nyɛ̀n annànwɔrɛ mɛ̀n le: ɛmian-grɔn-hi ndɔ lɔ ce eci vrán anwrɔn lɔ fɛn. 4Ɔmuhi, yɔ ndɔ hɔ̀n lɔ fɛn yɔ tán y'ɔkùa léyi fɛ ɛwú nɔn. Nɛ tɛn, nɛ̀n tán n'ɛmian-kùa lɔ fɛn, hɩ léyi wɔrɔ nɔn, hɩ ne le bɩ nɛ̀n zî ɛci nɔn.”
Zhezü kɛ dɔ́ Ɔwɔ-cice-wɔn lɔ n'ɛgbɔ̀ngbɔ̀ ankà
(Nyɛ́n nyan Matie 24:1-2; mán Markɛ̀n 13:1-2 wrú lɔ mɛ̀n)
5Anwrɔn ndɔ hɔ̀n kɛ dɔ́ Ɔwɔ-cice-wɔn lɔ n'ankà kɩ yɔ dɔ̀ le, yí zrɔ anvrɛnvrɛn, nɛ́n mán n'ɛbù ankrànkràn mán n'ɛcice-ci hɔ̀n lɔ fɛn léyi dú Ɔwɔ tɛn nɔn. Tɛ́n Zhezü kɛ dɔ̀ le: 6“Ɛnbi hɔ̀n kɛ lɛ và, kɩ obùẅì zriɛmɛ́n ke sɩ̀ hɛ́n nɛ́n nyrán obùẅì wúɛ, dú eci léyi nyɛ kàn nɔn; fɛn lɔ kɛ lɛ gbɔ̀ngbɔ̀.”
Muzhie mán ejüezì-gbàn-kàn
(Nyɛ́n nyan Matie 24:3-14; mán Markɛ̀n 13:3-13 wrú lɔ mɛ̀n)
7Zɛtɛn yɔ yrɛ nɛ̀n le: “Ankà-yé-wrɔn, ɛnvra tán de eci lɔ kɛ lɛ wɔɛ̀n nɛ́n? Eci-woroan-ci tán de ke le yé bɔ̀ ɛnvra léyi ɛci hɔ̀n lɔ kɛ lɛ wɔ̀ɛn nɛ́n?” 8Zhezü mrɛ́n ɔmùan le: “Nyɛ́n wá esùva, nyɛ́n bɩ́ teze yɛ frɛ́n nyɛ̀n. Ɔmuhi anwrɔn bobrebe kɛ lɛ và, ke le bɩ́ m'ebɩ́, kɩ kɛ lɛ dɔ̀ le ‘Mɛ̀n dú Ebɩ̀die-wrɔn!’ kɩ ‘Ɛnvra cɔ̀a!’ Tɛ́n nyɛ́n bɩ́ kɛ́n yɔ ɛsɛ̀n. 9Ɛnvra léyi nyɛ lɛ yá anhà-kɔ́n ankà, mán edomɛ̀n-ɛwú-sɩ́ ankà, ɛnjansù ke bɩ́ ẅɛn nyɛ̀n; ke ji le eci lɔ kɛ̀ và yakɛ; tɛ́n ke sɩ̀ dù zɛtɛ̀ lɔ de kè dù ɛnvra trɔ mùan mɛ̀n nɔn.” 10Zɛtɛn nɛ́n dɔ̀ le: “Fɛcüè tɔ̀n kɛ lɛ kɔ́n nɛ́n nyran fɛcüè tɔ̀n anhà, kɩ ɛnhi wú nɛ̀ncüì anmàn tɔ̀n, kɛ lɛ kɛ́n nɛ́n nyrán ɛnhi wú nɛ̀ncüì anmàn tɔ̀n ezì. 11Ɛnhibù kɛ lɛ jɔ̀kɔ̀ kɛ lɛ sevri kɩ, ɛyri bobrebe, ebrè mán ɛnlɔẅiɛ hɔ̀n ke le dù; ɛnjansu-ci mán ɛci-woroan-ci ɛvrivri hɔ̀n ke le dú anhobɩ́ kɛ lɛ và. 12Tɛ́n eci ndɔ lɔ n'ɛmɛẅi lɔ, yɛ lɛ gɔ̀ ẅɛn nyɛ̀n, yɛ hán nyɛ̀n ɛgbàn, ye le sɩ́ nyɛ̀n ɛcüìcüì-bɔ̀ zìwú, ô ye ci nyɛ̀n ɛmrɛ̀n Ɔwɔ-sɛ́n-wɔn hɔ̀n lɔ mɛ̀n, kɩ yɛ lɛ wá nyɛ̀n anwɔn-mɛ̀n-wá-wɔn mɛ̀n; yɛ lɛ hán nyɛ̀n nyɛ́n srɔ ɛnnɛ̀ncüì hɔ̀n mán anmàn cüìcüì-bɔ̀ ziwú m'ɛkruhú. 13Hɩ vra lɔ de ke ji le nyɛ́n di mɛ̀n dalɛfuɛ nɔn. 14Ɛnjansù ke bɩ́ ẅɛn nyɛ̀n, ɔmu le nyɛ lɛ hán ô nyɛ̀n dɔ́ ankà nɔn. 15Mɛ̀n dùku mɛ lɛ tán nyɛ̀n ankà-dɔ̀ mán ankà-nyrì léyi ny'egbri-wrɔn zriɛmɛ́n ke sɩ̀ ẅɛ̀n kè bɩ kɛ̀ kɛ́n nyɛ̀n ezì rɔ́ nɔn. 16Nyɛ́n zi hɔ̀n mán nyɛ́n muan hɔ̀n, nyɛ̀n muan-ẅì hɔ̀n, ny'ɛmɛ̀n-bɔ̀ mán nyɛ́n nyrán hɔ̀n de ke le di nyɛ̀n gɔngɔ̀sa ô yɛ ẅɛ̀n nyɛ̀n; ny'ɛmɛ̀n lɔ ye le wrì nyɛ̀n bobrebe: 17Anwrɔn lɔ fɛn ke le gbrí nyɛ̀n m'ɛkruhú. 18Tɛ́n ny'ɛnkruẅie zriɛmɛ́n ke sɩ̀ zrɛ́n. 19Nyɛ́n ẅɛn nɛ̀n nyɛ́n hɛ́n ɛshishiemɛ̀n: ɔmu lɔ de nye le bɩ́ ny'ɛwúvà hɔ̀n lɔ nyɛ́n die nɔn.”
Zhezü kɛ dɔ́ Zherüzalɛmɛ̀n gbɔ̀ngbɔ́-ankà
(Nyɛ́n nyan Matie 24:15-21; mán Markɛ̀n 13:14-19 wrú lɔ mɛ̀n)
20“Ɛnvra léyi nyɛ́n lɛ kán anhà-kɔ́n-bɔ̀ kɛ̀ gbrɛ̀nkɛ́n Zherüzalɛmɛ̀n anmàn ɔmùan nɔn, kɩ nyɛ́n le nyrì le, hɩ vra lɔ de yɛ lɛ gbɔ̀ngbɔ́ nɛ̀n ɛnvra bruemɛ̀n nɔn. 21Zɛtɛn, yɔ hɔ̀n léyi dú Zhüde kpɔsɔ wú nɔn, ke ji le yɔ srɛ́ hɔ́n ɛnkpò wú; yɔ hɔ̀n léyi dú Zherüzalɛmɛ̀n anmàn dùku nɔn, yɔ cɔhɔ́ anmàn, kɩ anwrɔn hɔ̀n léyi dú nanbuenu anmàn nɔn, yɔ bɩ́ vá ɛbemɛ̀n. 22Ɔmuhi, hɩ vra lɔ de dú ɛmrɛ̀n-ci bì kɩ ankà lɔ fɛn léyi ye merɛ́n Ɔwrú Prɔnprɔn lɔ mɛ̀n nɔn, de kɛ lɛ sá nmù. 23Ɛnbì ndɔ hɔ̀n lɔ, muzhie ke le dù tán ɛmɛ̀nsî-wúyɔ̀ mán yɔ léyi yɔ lɛ tán ɛẅì hɔ̀n ɛnyàn nɔn! Ɔmuhi ejüedì vri ke le dú ɛnhi-wú-anmàn ndɔ lɔ mɛ̀n, kɩ Ɔwɔ mɛ̀nhyì ke le yé n'edomɛ̀n kɛ tán fɛcüè ndɔ lɔ kɛ̀ kàn. 24Ye le wri yɔ anhà-kɔ́n-nyan mɛ̀n, yɛ lɛ srɔ anwɔn-mɛ̀n-wá-bɔ̀ yɔ dú ɛnhi-wú-anmà lɔ fɛn wú, kɩ anwrɔn hɔ̀n léyi ke sɩ̀ nyrì Ɔwɔ nɔn, kɛ lɛ kàsrɛ Zherüzalɛmɛ̀n hàn mán kɛ lɛ cɔ́ ɛnvra léyi yɛ tán yɔ nɔn.”
Ɔwrɔnẅì Ẅì vá vra
(Nyɛ́n nyan Matie 24:29-31; mán Markɛ̀n 13:24-27 wrú lɔ mɛ̀n)
25“Eci-woroan-ci ke le dú ɛnbri mɛ̀n, okù mɛ̀n mán okùcankro mɛ̀n. Ɛnhibù wú anmàn hɔ̀n ke le dú ɛnkrɛ̀ta mɛ̀n mán gbɔ̀gbɔ̀ mɛ̀n, ecüe mán ecüe-afù bobo vri léyi yɔ lɛ yá nɔn kruhú. 26Anwrɔnẅì ke le wú ɛnkrɛ̀ta mɛ̀n, ankà trɔ léyi yɔ lɛ ẅɛ́n ɛci hɔ̀n léyi kɛ lɛ wɔɛn ɛnhibù mumù lɔ fɛn wú nɔn, hɩ kruhú, ɔmuhi anhobɩ́ kɔrɛ̀srɔn hɔ̀n lɔ fɛn kɛ lɛ jɔ̀kɔ̀ nɔn. 27Zɛtɛn, yɛ lɛ kán ɔwrɔnẅì Ẅì ke le dú ɛnwì-gbú mɛ̀n kɛ̀ và nɛ́n mán ɛkɔrɛ̀-srɔn vri mán eci-zrɔ mɛhi. 28Ɛnvra léyi ɛci ndɔ hɔ̀n lɔ kɛ lɛ bukru nɔn, nyɛ́n nyrɔn-yɛ́, ô nyɛ́n sɩ́ ɛnkru ɛwú, ɔmuhi ny'ebɩ̀die vra kɛ lɛ kɛ́n eburi nɔn.”
Ankà-yé léyi eẅrù-tɛ̀ kɛ tán nɔn
(Nyɛ́n nyan Matie 24:32-35; mán Markɛ̀n 13:28-31 wrú lɔ mɛ̀n)
29Zɛtɛn, Zhezü kɛ dɔ́ yɔ nyandrɛn ndɔ lɔ mɛ̀n ankà: “Nyɛ́n nyan eẅrù-tɛ̀ mán antɛ̀ ndɔ hɔ̀n lɔ fɛn: 30ɛnvra léyi nyɛ kán yɔ ye di ɛẅi wrù nɔn, nye nyri ɔmu le ɛnvra ankrànkràn kɛ́n eburiɛ. 31Hɩ zri lɔ, ke dú kɛ nyɛ kán ɛci hɔ̀n lɔ kɛ và hô, nyɛ́n nyrì le Anhobɩ́ Nɛ̀ncüì-dúyri kɛ́n eburiɛ. 32Mɛ dɔ́ nyɛ̀n annànwɔrɛ mɛ̀n le: ɛnvra ndɔ lɔ mɛ̀n-bɔ̀ lɔ, yɔ lɔ fɛn yɔ sɩ̀ wù kɩ ɛci hɔ̀n lɔ kɛ lɛ wɔɛ̀n. 33Anhobɩ́ mán ɛnhi kɛ lɛ vàcì, tɛ́n m'ɔmùan ankà-dɔ̀ ke sɩ̀ vàcí mrìmrì.”
Ɛvɛ̀-kprì dú ecí krugbɔ
34“Nyɛ́n wá esùva! Nyɛ́n bɩ́ teze nyɛ́n hɛ́n lɔ kɛ srɔ́n ɛkoran mɛ̀n mán ɛntàn-kɔ́n mɛ̀n mán ɛnhibù wúvà ankà-trɔ lɔ mɛ̀n, ke dú ɔmu lɔ hô, ɛmrɛ̀n-ci bì lɔ kɛ lɛ ẅɛn nyɛ̀n nmù kprú 35kɛ lɛ hán antanwrɔn hɔ́; ɔmuhi nɛ lɛ ẅɛn anwrɔnẅì lɔ fɛn léyi dú ɛnhibú mùmù lɔ fɛn wú nɔn. 36Nyɛ́n bɩ́ di ndà, nyɛ́n sɛ́n ɛnvra lɔ fɛn, ô nyɛ́n cɔ́ ecüì nyɛ́n di ɛci hɔ̀n lɔ kɛ và nɔn anta, ô nyɛ́n tɔhú nyɛ́n nyɔn ɔwrɔnẅì Ẅì zìwúɛ.”
37Ɛcɛ̀n, Zhezü ke yé yɔ ankà ɔwɔ-sɛ́n-wɔn mɛ̀n; kɩ ɔwɔɛ nɛ hɔ́n ɛẅì-shi-tɛ̀ tɔ̀n léyi ye bi olivie nɔn, hɩ dú ɛnkpò cɛ wú nɔn, mɛ̀n nɛ dɛ́. 38Kɩ fɛcüè lɔ fɛn kɛ vá ɛsɔwrɔ̀ fùtan Ɔwɔ-sɛ́n-wɔn lɔ mɛ̀n, ô kè die nɛ̀n nukùɛ.
Atualmente selecionado:
Lükɛ̀n 21: ƐAA03
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.