གོ༌ཟུག༌ 8
8
ཆུ༌ལོག༌གི༌ཆུ༌ ཉུ༌ངུན༌ ཆེན༌ སོང༌།
8:1-22
1ཨིན༌ནའང༌ དཀོན༌མཆོག༌གི༌ ནོ༌ཨ༌ དང༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ སྲལ༌ཁན༌ དང༌ ནག༌ཚོགས༌སི༌ སེམས༌ཅན༌ ཚང༌མའ༌ རྗེད༌ད༌ མ༌ཛདས༌། ཁོང༌ངི༌ ཇིག༌རྟེན༌ནི༌ཀ༌ ལུངས༌པོ༌ ཀལ༌ལ༌ ཛད༌པ༌, ཆུ༌ལོག༌གི༌ ཆུ༌ ཉུ༌ངུན༌ ཆ༌ཅེས༌ གོ༌ཟུགས༌། 2ཁོང༌ངི༌ སའེ༌ ཐིལ༌ནེ༌ བིང༌སའེ༌ ཆུའི༌ ནས༌ས༌གུན༌ ཀག༌ག༌ ཛདས༌, ཡང༌ ནམ༌ཁའ༌ནེ༌ ཆུ༌ལོག༌ ཙོགས༌སི༌ ཆར༌པ༌ ཆད༌ ཅུག༌ག༌ ཛདས༌། 3ཇིག༌རྟེན༌ནི༌ ནང༌ང༌ གངས༌ཁན༌ནི༌ ཆུ༌ལོག༌གི༌ ཆུ༌ ཚང༌མ༌ ཐིམས༌ཨིན༌ ཉུ༌ངུན༌ ཆེན༌ སོང༌། ཞག༌མ༌ 150 སྟིང༌ནེ༌, 4ཆུ༌ལོག༌ གོ༌ཟུགས༌ཏེ༌, ཟླ༌ཝ༌ 7 པའེ༌ ཞག༌མ༌ 17 ནི༌ ཞག༌ག༌ གྲུ༌ཟིང༌བོ༌ ཨ༌ར༌རད༌ ཟེར༌ཁན༌ནི༌ རི༌གྱུད༌གུན༌ནི༌ཀ༌ ཁད༌ཏེ༌ ལུས༌། 5ཡང༌ ཆུ༌གུན༌ ཆད༌མེད༌ལ༌, ཟླ༌ཝ༌ 10 ཚོག༌པ༌ ཉུ༌ངུན༌ ཆེན༌ སོང༌། ཏེ༌ནེ༌ ཏེན༌ན༌ ཟླ༌ཝའེ༌ གོ༌མའེ༌ ཞག༌ག༌, རིའི༌ གོ༌གུན༌ ཆུ༌ནེ༌ ཕི༌ལོག༌ག༌ བིང༌ཏེ༌ ཐོང༌།
6རི༌ གོ༌གུན༌ ཐོང༌ཏེ༌ ཞག༌མ༌ 40 སྟིང༌ནེ༌, ནོ༌ཨའེ༌ ཁོ༌རང༌ངི༌ ཅོས༌ཁན༌ནི༌ གྲུ༌ཟིང༌ངི༌ ཀར༌ཁུང༌བོ༌ ཕེས༌ཏེ༌, 7ཕོ༌རོག༌ཞིག༌ ཕུདས༌། ཁོ༌ ཆུ༌ སྐམས༌ཏེ༌ ས༌ཀྱད༌ བིང༌བིང༌ འུར༌ཨིན༌ དུགས༌ཏེ༌, གྲུ༌ཟིང༌ངི༌ཀ༌ ལོགས༌ཏེ༌ མ༌ནེ༌ མ༌ཡོངས༌།#8:7 རེ༌ཝེན༌ ནི༌ རོའེ༌ ཤ༌ ཟའ༌ཁན༌ནི༌ ཅི༌པ༌ ཨིན༌པ༌ ཁོ༌ ཁར༌ཇིའི༌ ཕིའ༌ གྲུ༌ཟིང༌ངི༌ཀ༌ ལོགས༌ཏེ༌ ཡོང༌ མ༌གོས༌། 8ཏེ༌ནེ༌ ནོ༌ཨའེ༌ ཆུ༌ སྐམས༌ཏེ༌ ས༌ཀྱད༌ སྐམ༌པོ༌ བིངས༌ཏེ༌ དུག༌ག༌ ལྟ༌ཅེས༌ལ༌ ཕུར༌གོན༌ཞིག༌ ཕུདས༌། 9ཨིན༌ནའང༌ ཕུར༌གོན༌ལ༌ རང༌ངི༌ རྐང༌པ༌ བོར༌ཅེས༌ལ༌ ནས༌ས༌ མ༌ཐོབ༌, ཅིའ༌ཟེར༌ན༌ ཇིག༌རྟེན༌ ཏ༌རུང༌ངའང༌ ཆུའི༌ ནང༌ང༌ ནུབས༌ཏེ༌ ཡོད༌པིན༌། ཕུར༌གོན༌བོ༌ ནོ༌ཨ༌ ཡོད༌ས༌ གྲུ༌ཟིང༌ངི༌ ནང༌ང༌ ལོགས༌ཏེ༌ ཡོངས༌པ༌, ནོ༌ཨའེ༌ ཁོ༌རང༌ངི༌ ལག༌པ༌ ཕི༌ལོག༌ག༌ ཕིངས༌ཏེ༌, ཕུར༌གོན༌བོ༌ གྲུ༌ཟིང༌ངི༌ ནང༌ང༌ ཁྱོངས༌། 10ཞག༌པོ༌ རྡུན༌ སྲིངས༌ཏེ༌ སྟིང༌ནེ༌, ནོ༌ཨའེ༌ ཕུར༌གོན༌བོ༌ ཡང༌སྐྱར༌ ཕུདས༌། 11ཕི༌ཏོག༌ ཕུར༌གོན༌བོ༌ ལོགས༌ཏེ༌ ཡོང༌ ཟ༌ནེ༌, ཁོའེ༌ ཁམ༌ཅུའི༌ ནང༌ང༌ ཨོ༌ལིཝ༌ཝི༌ ལྕང༌མའེ༌ ལོ༌མ༌ སྔོན༌པོ༌ཞིག༌ ཁུར༌ཏེ༌ ཐོང༌པ༌, ནོ༌ཨའ༌, ཇིག༌རྟེན༌ནི༌ ཀ༌ནེ༌ ཆུ༌ ཧ༌ལམ༌ ཚར༌ཏེ༌ ཨིན༌ཅེས༌པོ༌ ཧ༌གོ༌། 12ཏེ༌ནེ༌ ཡང༌ཞག༌པོ༌ རྡུན༌ སྲིངས༌ཏེ༌, ཁོའེ༌ ཕུར༌གོན༌བོ༌ ཡང༌ ལམ༌ཅུགས༌, ཨིན༌ནའང༌ འི༌ ལན༌ ཁོ༌ ནོ༌ཨའེ༌ཀ༌ ལོགས༌ཏེ༌ མ༌ནེ༌ མ༌ཡོངས༌།
13ཏ༌ ནོ༌ཨ༌ ལོ༌ 601 སོང༌ཏེ༌, ཟླ༌ཝ༌ ཀྲང༌པོའེ༌ གོ༌མའེ༌ ཞག༌ག༌, ས༌ཀྱད༌དི༌ ཀ༌ནེ༌ ཆུ༌ ཚང༌མ༌ ཧ༌ལམ༌ སྐམས༌ཏེ༌ ཡོད༌པིན༌། ནོ༌ཨའེ༌ གྲུ༌ཟིང༌ངི༌ཀ༌ ཀབས༌ཏེ༌ ཡོད༌ཁན༌བོ༌ ཐེན༌ཏེ༌ ལྟས༌པ༌, ས༌ཀྱད༌ ཚང༌མ༌ སྐམས༌ཨིན༌ ཐོང༌། 14ཏེ༌བོའེ༌ སྟིང༌ནེ༌ ཧ༌ལམ༌ ཟླ༌ཝ༌ 2 ནེ༌, ས༌ཀྱད༌ གང༌པོ༌ སྐམ༌པོ༌ སོང༌།
15ཏེ༌ནེ༌ དཀོན༌མཆོག༌གི༌ ནོ༌ཨའ༌ མོལ༌ལ༌ ཛདས༌, 16“ཁྱོ༌རང༌, ཁྱོ༌རང༌ངི༌ ན༌མ༌, བུ༌ཚ༌གུན༌ དང༌ ཁོང༌གུན༌ནི༌ ན༌མ༌གུན༌ གྲུ༌ཟིང༌ནེ༌ བིངས༌ཏེ༌ ཡོང༌། 17ཡང༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ སྲོག༌ ཡོད༌ཁན༌: ཅ༌ཅིའུ༌, སེམས༌ཅན༌ ཆེན༌མོ༌ དང༌ ཆུ༌ངུན༌ སའེ༌ཀ༌ གྲུལ༌ཁན༌ ཚང༌མ༌ ཕི༌ལོག༌ག༌ ཕིང༌། ཁོང༌གུན༌ གྱས༌ཏེ༌ ཇིག༌རྟེན༌ གང༌པོའེ༌ ནང༌ང༌ ཕེལ༌ཅེས༌སི༌ ཕིའ༌ ཏེ༌ཟུག༌ ཅོས༌།”
18ཏེ༌ནེ༌ ནོ༌ཨ༌, ཁོ༌རང༌ངི༌ ནང༌ཚངས༌ ཉམ༌པོ༌ གྲུ༌ཟིང༌ངི༌ ནང༌ནེ༌ བིངས༌ཏེ༌ ཡོངས༌། 19ཡང༌ ཏེ༌ནང༌ང༌ ཡོད༌ཁན༌ནི༌ ཆེན༌མོ༌ དང༌ ཆུ༌ངུན༌ སེམས༌ཅན༌ དང༌ ཅ༌ཅིའུ༌ ཚང༌མ༌ ཉིས༌ཉིས༌སི༌ ཆ༌ ཅོས༌ཏེ༌ བིང༌ཏེ༌ ཡོངས༌།
20ཏེ༌ནེ༌ ནོ༌ཨའེ༌ ཡ༌ཝའ༌ ཆོད༌པ༌ ཕུལ༌ཅེས༌སི༌ ཕིའ༌ ནས༌ས༌ཞིག༌ རྩིགས༌། ཁོའེ༌ རྩང༌མ༌ སེམས༌ཅན༌ དང༌ ཅ༌ཅིའུ༌ གུན༌ནི༌ ནང༌ནེ༌ སྣ༌རེ༌རེ༌ ཁྱོངས༌ཏེ༌ སདས༌ ཡང༌ མེའ༌ སྲགས༌ཏེ༌ ཆོད༌པ༌ ཕུལས༌། 21ཡ༌ཝའ༌ ཏེ༌ ཆོད༌པའེ༌ ཏྲི༌ཞིམ༌བོ༌ ཚོར༌ར༌ཅིག༌, ཡ༌ཝའེ༌ ཁོང༌རང༌ངི༌ སེམས༌སི༌ ནང༌ང༌ མོལ༌ལ༌ ཛད༌, “མི༌གུན༌ནི༌ ཞས༌ཏེ༌ ངའེ༌ འི༌ ཇིག༌རྟེན༌བོ༌ ཡང༌ ཆུ༌ ཉམ༌པོ༌ མ༌ནེ༌ མེད༌ཁན༌ མི༌ཅོ༌། ཆུ༌ངུན༌ནི༌ ཏུས༌ནེ༌ ཕར༌ལ༌, མི༌གུན༌ནི༌ སྙིང༌པོ༌ ངན༌པའེ༌ ཆོགས༌ལ༌ ཡོད༌ནའང༌, ངའེ༌ སྲོག༌ ཡོད༌ཁན༌ ཚང༌མ༌ མེད༌ཁན༌ མ༌ནེ༌ མི༌ཅོ༌། 22ཇིག༌རྟེན༌བོ༌ ལུས༌ལུས༌ ཚོག༌པ༌, ཞིང༌ ཏབ༌ཅེས༌ དང༌ རྔོ༌ཅེས༌, ཚད༌ དང༌ གྲང༌མོ༌, ཡར༌ དང༌ དགུན༌, ཡང༌ ཉི༌མ༌ དང༌ ཚན༌ནི༌ ཏུས༌ གུན༌ ཡོང༌ཨིན༌།”
Atualmente selecionado:
གོ༌ཟུག༌ 8: lbj
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Wycliffe Bible Translators, Inc. All rights reserved.