Hidin Hopapna 5
5
Hay Tonton Di Tinanudan Adam
1Hiya datuwey tinanudan Adam. Hidin limmun Apu Dios di tagu ya impaddungna dida hi a'atna. 2Ta limmunay lala'i ya babai ot wagahana dida ot ngadanana didah tagu.
3Ta hidin hinggahut ta tulumpuluy (130) tawon Adam ya nuntanud i han nipaddung i hiya ot ngadanana ta hi Set. 4Ya hidin niyayyam hi Set ya ni'tagu damdamah Adam hi waluy gahut (800) di tawon ta nawadaday udum an imbabalena an linala'i ya binabai. 5Ta hay ngammut di tawonah din natayana ya hiyam di gahut ta han tulumpulu (930).
6Ya hi Set ya hinggahut ta limay (105) tawona ot ahi mawada nan imbabalena an hi Enos. 7Ot mi'tagu boh waluy gahut ta han pituy (807) tawon ta nawadada boy udum hi imbabalena. 8Ta nuntawon hi hiyam di gahut ta han himpulut duwa (912) ot ahi mate.
9Ya hi Enos ya nahiyam (90) di tawona ot ahi mawada nan imbabalena an hi Kenan. 10Ot mi'tagu bo hi waluy gahut ta han himpulut limay (815) tawon ta nawadaday udum hi imbabalena 11ot ahi mateh din hiyam di gahut ta limay (905) tawona.
12Hi Kenan e ya napituy (70) tawona hidin nawada nan imbabalena an hi Mahalalel. 13Ot mi'tagu boh waluy gahut ta han napat (840) di tawon ta nawadaday udum hi imbabalena. 14Ot ahi mateh din hiyam di gahut ta han himpuluy (910) tawona.
15Ya hi Mahalalel ya nanom ta limay (65) tawona ot ahi mawada nan imbabalena an hi Jared. 16Ot mi'tagu boh waluy gahut ta han tulumpuluy (830) tawon ta nawadaday udum hi imbabalena. 17Ta hay ngammut di tawona ot ahi mate ya waluy gahut ta han nahiyam ta lima (895).
18Hi Jared ya hinggahut ta han nanom ta duway (162) tawona ot ahi mawada nan imbabalenan hi Enok. 19Ot mi'tagu boh waluy gahut (800) di tawon ta nawadaday udum an imbabalena. 20Ta hay ngammut di tawona ot ahi mate ya hiyam di gahut ta han nanom ta duwa (962).
21Hi Enok e ya nanom ta limay (65) tawona hi nawadaan nan imbabalenan hi Metuselah. 22Ot mi'tagu boh tuluy gahut (300) di tawon an hi Apu Dios di inun'unudna ya nawadaday udum hi imbabalena. 23Ta hay ngammut di tawona ya tuluy gahut ta han nanom ta lima (365). 24Ya innaynayun Enok an inun'unud hi Apu Dios ta ingganaot pamaag ya nama"id. Te inawit Apu Dios hi awadana an ta'on on agge nate.#Hebrew 11:5
25Ya hi Metuselah ya hinggahut ta han nawalut pituy (187) tawona ot ahi mawada nan imbabalenan hi Lamek. 26Ot mi'tagu boh pituy gahut ta han nawalut duway (782) tawon ta nawadaday udum hi imbabalena. 27Ta hay ngammut di tawona ot ahi mate ya hiyam di gahut ta han nanom ta hiyam (969).
28Ya hi Lamek ya hinggahut ta han nawalut duway (182) tawona ot ahi mawada han lala'in imbabalena. 29Ot ngadanana ta hi Noah te alyonay, Maphod ta wadah tuwen unga an mangipa'am'amlong i dita'u an ta'on on ta'u ma'aliggatan hitun puntamuwan ta'uh tun lutan numbalinon Apu Dios hi adi maphod. 30Ot mi'itagu boh Lamek hi limay gahut ta han nahiyam ta limay (595) tawon ta nawadaday udum hi i'imbabalena. 31Ta hay ngammut di tawona ot ahi mate ya pituy gahut ta han napitut pitu (777).
32Hi Noah e ya nuntawon hi limay gahut (500) ot ahi mawada nan tulun linala'in imbabalena an hi Sem ya hi Ham ya hi Japet.
Atualmente selecionado:
Hidin Hopapna 5: ifa
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2014, Wycliffe Bible Translators, Inc. All rights reserved.