Versículos bíblicos populares de Dànì Kèhoį̀wo 6

Partilhar

Gots'ǫ̀ K'àowo dıı nèk'e dǫ whehtsı̨ı̨ sìı yek'eelı̨. Eyı ghǫ wedzeè nànııtì.

Gots'ǫ̀ K'àowo dıı nèk'e dǫ sıì hołı̨ı̨ k'ę̀ę̀ geedaà agejàa, gok'èezǫ. Ekìı t'aats'ǫǫ̀ dedzeè t'à hołı̨ı̨ zǫ ghǫ nànıgedè agejà.

Hanìkò gots'ǫ̀ K'àowo Noah ghǫ sǫnıwǫ.

Dıı Noah wegodıì hǫt'e: Ekìıyeè k'e Noah dǫ ehkw'ı eda ı̨lè. Dǫ gota nàı̨dèe sìı goxèht'eè ı̨ı̨dà-le, Nǫ̀htsı̨ k'ę̀ę̀ ı̨ı̨dà ı̨lè.

Eyıt'à gots'ǫ̀ K'àowo hadı, “Dǫ hazǫǫ̀ whıhtsı̨ı̨ sìı wek'eehłı̨ t'à dıı nèk'e dǫ hazǫǫ̀ gıdıhohtsı̨ ha. T'asìı hazǫǫ̀ dıı nèk'e edaa, tıts'aàdìı dèè k'e k'edèe, dèè k'e k'eɂàa lanıı, eyıts'ǫ yat'a k'edèe sìı hazǫǫ̀ gıdıhohtsı̨ ha,” hadı.

Dıı nèk'e dǫ łǫǫ̀ agòjà, eyıts'ǫ gıtì łǫ gǫ̀hłı̨. Nǫ̀htsı̨ weza gı̨ı̨lı̨ı̨ sìı dǫ gıtì gıgha gìdaat'ı̨ t'à t'agı̨ı̨wǫǫ sìı edegha ts'èko gį̀į̀hchı. Eyıt'à gots'ǫ̀ K'àowo hadı, “Dǫ hołı̨ı̨ hogehtsı̨ı̨ agı̨ı̨t'e t'à, sets'ǫ Įnì welǫ whìle ts'ǫ̀ gıxè wheɂǫ ha-le. Įłèakw'eènǫ-daats'ǫ̀-naènǫ (120) xo ts'ǫ̀ geeda ha,” hadı. Ekìıyeè k'e, eyıts'ǫ ekò gots'ǫ whaà-le, dıı nèk'e godęę̀ gǫ̀hłı̨ ı̨lè. Ekò k'e Nǫ̀htsı̨ weza dǫ gıtì ts'ǫ̀ agejà, gıxè gıza gǫ̀hłı̨į̀ agòjà. Eyı gıza sìı ı̨nę̀ę gots'ǫ dǫ deè gı̨ı̨lè t'à gıgodıì gǫ̀hłı̨.

Noah, Nǫ̀htsı̨ t'ayèhdıı sìı hotıì yeyatıì k'ę̀ę̀ eghàlaı̨dà.

Eyıt'à Nǫ̀htsı̨ Noah ts'ǫ̀ hadı, “Dıı nèk'e dǫ gıxè hołı̨ı̨ nàowoò nàtsoò agòjà t'à dǫ hazǫǫ̀ gıdıhohtsı̨ ha eyıts'ǫ dıı dèè sı wedıhohtsı̨ ha.

Eyıt'à dechı̨ dezhìı t'à edegha elàcho nehtsı̨, weyìı łataèhtsò anele. Weyìı eyıts'ǫ wemǫǫ̀ dechı̨dzèh t'à wek'eèhdì anele.

Dıı nèk'e dǫ gıxè hołı̨ı̨ nàowoò nàtsoò agòjà t'à, Nǫ̀htsı̨ wegha dèè hǫt'ıì tsį̀goǫwo.

T'asìı edaa hazǫǫ̀ xàɂaa sìı wets'ǫ nàke edexè elàcho yìı goyagı̨ı̨wa ha, tıts'aàdìı werezhıì, eyıts'ǫ tıts'aàdìı dets'è, nexè xàgeeda ha t'à.