Versículos bíblicos populares de SAN JUAN 15

Partilhar

’Ñi'ya̱ laca su̱u̱ yaca nu nda si'yu tyixi ji'i̱, jua'a̱ laca na' cuentya ji'i̱ ma̱, cha' na' laca̱ su̱u̱ cha' tso'o nu ntsu'u ji'i̱ ma̱ ―nacui̱ Jesús ji'i̱ ngu'―. Ñi'ya̱ laca sta̱' yaca bi', jua'a̱ laca cu'ma̱, si ngusñi ma̱ cha' 'na. Stu'ba ti caca tyiquee ma̱ lo'o na', li' caja quiña'a̱ la cha' tso'o nu tyu'u ne' cresiya ji'i̱ ma̱ su ndi'i̱ ma̱ chalyuu, si laca na' su̱u̱ cha' tso'o ji'i̱ ma̱. Ni sca cha' ná caca ji'i̱ ma̱ si ná stu'ba caca tyiquee ma̱ lo'o na' ―nacui̱ Jesús―.

Cua'ni stu'ba tyiquee ma̱ lo'o na', cha' stu'ba ti nchca tyiquee na' lo'o ma̱. Ndi'ya̱ laca ñi'ya̱ si laca na' sca su̱u̱ yaca, lo'o jua'a̱ cu'ma̱ laca ma̱ sta̱' yaca bi' ―nacui̱―. Pana sca sta̱' yaca si'yu ni, nga'aa ta sta̱' bi' si'yu si si'yu ngu' ji'i̱ ca quiya' sta̱' bi'; sca ti si stu'ba ti caluu sta̱' bi' ñi'ya̱ ntucua ti ji'i̱ su̱u̱ yaca, li' ta sta̱' bi' si'yu ―nacui̱―. Jua'a̱ lo'o cu'ma̱, ná taca tyu'u cha' tso'o ne' cresiya ji'i̱ ma̱ cha' xtyucua ma̱ ji'i̱ xa' ñati̱ si ná stu'ba caca tyiquee ma̱ lo'o na'.

’Nu lo'o stu'ba ti ntsu'u tyiquee ma̱ lo'o na' ―nacui̱ Jesús―, nu lo'o tyanu cha' nu nchcui' na' ne' cresiya ji'i̱ ma̱, li' taca jña ma̱ sca cha' ji'i̱ Sti na', lo'o jua'a̱ ta Ni cha' bi' ji'i̱ ma̱.

Si'i cu'ma̱ nu ngusubi ma̱ 'na cha' tya'a̱ ma̱ lo'o na' ―nacui̱ Jesús―, na' laca̱ nu cua nchcui' na' lo'o ma̱ clyo. Tya li' ngulo na' cña ji'i̱ ma̱ cha' xcui' cha' tso'o tyu'u ne' cresiya ji'i̱ ma̱, cha' jua'a̱ talo cña tso'o nu ndu'ni ma̱; li' cua'ni Sti na' lcaa cha' nu jña ma̱ ji'i̱ Ni chacuayá' 'na.

Si jua'a̱ ntsu'u tyiquee na ña'a̱ na ji'i̱ tya'a tso'o na, li' cua'ni lyaá na ji'i̱ ngu' bi', masi cajaa ycui' na; nga'aa ntsu'u xa' cña tlyu la nu caca cua'ni na cha' xtyucua na ji'i̱ tya'a tso'o na.

Tso'o tsa ña'a̱si̱i̱ Sti na' ji'i̱ lcaa sta̱' yaca bi', lo'o na' laca̱ yaca bi'. Ca quiya' sta̱' yaca nsi'yu Ni ji'i̱, nu lo'o ná nda si'yu lo tsiya' ti. Nsubii Ni xi lo yaca nu nda si'yu tso'o, cha' tya quiña'a̱ la si'yu tyu'u lo bi'

Nde laca cña nu ta na' ji'i̱ ma̱ ―nacui̱ Jesús―, cha' tso'o ti caca tyiquee ma̱ ña'a̱ ma̱ ji'i̱ tya'a ñati̱ ma̱, ñi'ya̱ ntsu'u tyiquee na' ña'a̱a̱ ji'i̱ ma̱.

Cua'ni tlyu ngu' ji'i̱ ycui' Ndyosi Sti na', si ña'a̱ ngu' cha' tso'o tsa ndu'ni ma̱ lo'o xa' ñati̱. Li' caca cuayá' ti' xa' ñati̱ cha' ñati̱ nu ndyaca tsa'a̱ 'na laca ma̱ ―nacui̱―.

’Na' laca̱ ñi'ya̱ laca sca su̱u̱ yaca nu nda si'yu tyixi, jua'a̱ laca na' ―nacui̱ Jesús ji'i̱ ngu'―. Lo'o ycui' Ndyosi Sti na' laca nu ca ji'i̱ yaca bi'.

Culaya' Sti na' ji'i̱ ñati̱ nu ná stu'ba nchca tyiquee ngu' lo'o na', ñi'ya̱ lo'o nchcua̱a̱ ngu' sta̱' yaca nu cua ndyanaa; nxuti'i̱ montón ngu' sta̱' yaca btyi bi', nsta ngu' ji'i̱ lo quii' cha' tye tyaqui̱ bi'.

’Nchcui' na' jua'a̱ lo'o cu'ma̱, cha' lo'o ña'a̱ ma̱ cha' chaa ti' na' ndu'ni na' cña ji'i̱ ycui' Ndyosi Sti na', la cui' jua'a̱ cu'ma̱, ná nga'a̱ cha' tye cha' caca chaa ti' ma̱.

Lcaa tsa̱ tyi'u ti' ma̱ su ndi'i̱ ma̱ cha' ntsu'u tsa tyiquee na' ña'a̱ na' ji'i̱ ma̱. Jua'a̱ tso'o tsa caca tyiquee na' ña'a̱ na' ji'i̱ ma̱ si taquiya' ma̱ ji'i̱ lcaa cha' nu nda na' lo'o ma̱. Lo'o jua'a̱ na' ―nacui̱ Jesús― cua ngua'ni na' lcaa cña nu ngulo Sti na' 'na. Jlo ti' na' cha' ntsu'u tsa tyiquee Ni ña'a̱ Ni jna' tyucui su ndi'i̱ na'.

Bi' cha' juani ndulo tsa cña re ji'i̱ ma̱ cha' cua'ni ma̱: cha' tso'o tsa caca tyiquee ma̱ ña'a̱ ma̱ ji'i̱ tya'a ñati̱ ma̱.

Si cua'ni ma̱ ñi'ya̱ nu ndu'ni ñati̱ cuxi nde chalyuu, li' chcui' tso'o ngu' lo'o ma̱, ñi'ya̱ si laca ma̱ tya'a ngu'. Pana juani nga'aa ntsu'u cha' ji'i̱ ma̱ lo'o cha' cuxi nu ntsu'u nde chalyuu, cha' cua ngusubi na' ji'i̱ ma̱ cha' caca ma̱ ñati̱ 'na; bi' cha' liye' tsa ti' ngu' ña'a̱ ngu' ji'i̱ ma̱ ―nacui̱―.