Versículos bíblicos populares de Lucas 3

Partilhar

Ti tỹ ver se kỹ jẽ tũ nĩn kỹ tóg ag kygpe kãn mũ. Kỹ tóg kejẽn Jesus kypég mũ gé. Kỹ Jesus tóg Topẽ mré vĩ mũ, ti tỹ ti kype kar kỹ. Kỹ vãhã kanhkã tóg nor' he mũ. Kỹ Topẽ kuprĩg vỹ kanhkã tá kãtére mũ, ti kri. Tỹ tóg sórãg ve nĩ. Kỹ kanhkã tá vẽnh vĩ tóg mẽ há tĩ. Kỹ tóg: “tỹ ã inh kósin pir jẽ, tỹ ã tóg inh fe pẽ jẽgtĩ,” he mũ.

Kỹ tóg ag mỹ: “inh pijé tỹ Cristo nĩ',” he mũ. “Goj hã tỹ sóg ãjag kygpég tĩ. Cristo vỹ Inh nón kãtĩg mũ, ha mẽ. Inh kãfór ti nĩ. Sỹ tỹ ti mỹ rãnhrãj tĩ nĩnh ke vẽ vẽ, sỹ ti pẽn né kunũnh jé. Hã ra sóg tỹ ti krẽm ke pẽ jẽ. Topẽ kuprĩg tỹ tóg ãjag jagrẽ han ke mũ, kỹ tóg pĩ ri ke nĩ,” he tóg.

Ãjag jykre pãno tugvãnh ra, ãjag tỹ ti jũ ve jãvãnh tĩn kỹ. Vẽjykre há han ra, ẽg tỹ ãjag jykre tãg ve jé. Hã ra ãjag tóg jagnẽ mỹ: “Abraão krẽ vỹ tỹ ẽg nỹtĩ, kỹ Topẽ hỹn ẽg to jũnh ke tũ nĩ,” he tĩ. Hã tũ vẽ hã ra. Ãjag jykre pãno ẽn to ãjag tóg jagtar ke mũ, ha vem nĩ. Topẽ vỹ pó tag tỹ Abraão krẽ'krẽ hynhan ki kanhró nĩ, ãjag jẽgja kã.

Ãjag tỹ tóg tũ' henh ke mũ, ãjag tỹ ãjag jykre pãno tovãnh tũ nĩn kỹ,” he tóg, “Ẽg tỹ ka gỹn ri ke tóg nĩ. Ti kanẽn vãnh jẽn kỹ ẽg tóg tỹ pĩ han tĩ. Tag ri ke han jé tóg ke mũ, ãjag tỹ vẽjykre há han tũ nĩn kỹ,” he tóg ag mỹ.

Vãsỹ tóg rán kỹ nĩ. Topẽ vĩ tó tĩ tỹ Isaías vỹ: “ẽmã tũ ja tá tóg jẽnh ke mũ, ga kórég tá,” he ja nĩ. “Tá tóg ag mỹ: “ẽg Senhor kãtĩg ke jo vẽnh jãnhkrikrig nĩ,” henh ke mũ. “Ẽpry kurég ãjag tóg tĩ, ãjag pã'i mág jun ken kỹ. Ti kãgnó tỹ ãjag tóg kyjer' he tĩ. Kar kỹ ãjag tóg ẽpry sór kar kũm tĩ gé. Ti jonjor kugrynh kãn ãjag tóg tĩ. Ti sunsór vãvãm kãn ãjag tóg tĩ gé, ãjag tỹ ẽmĩn han kỹ. Kỹ tag ri ke han nĩ, ãjag jykre kórég tỹ. Hã kỹ ẽprã ke kar vỹ Topẽ tỹ ẽg krenkren han ke ti venh ke mũ,” he ja tóg nĩ.