Halia - 2020 WBT (NT) Non Drama

A pöata te ranga hakapa naia e Iesu a manka teka, ba nonei e poeiena turu katunun tsitsilo i tanen, “Alimiou e atei miou, u huol u lan patu ba kannouna turu Paska turu Jiu te katoeier. Ba Lia tu butun Katunuma tena hala naroa turu katuun tena nila naria lia romana tara kuruse.” Ba u pris pan na pal kapan turu Jiu ena gono hoboto ria tara luma a kapan tere Kaiapas, a tsunono pan turu pris. Ba nori e korupakö ner tegi pile kap hamous menaien e Iesu bate atung hamatie ren. Ba nori e poeier, “Ara ema tatei katoe rien tara pöata tara kannou, taraha u katuun e namots hiagetagetar.”


E Iesu e kaia i Betani tara luma tere Saimon te ka mam mei a toba be niga poutsuna. Ba töa tahol e la uanama tere Iesu, nonei e kamei a botolo uapi a soksoka haniga koru na hihol i tanen e la sei koruna. Ba nonei e kis nena u uapi i bakuna e Iesu tara pöata te nouien. Pöata ti tareia u katunun tsitsilo i tanen a ka teka banori e raharaha korur me poeier, “A saha a ka te kato baba sileri u uapi? Sanena u uapi teka tegi haholin, bate lueri ta moni ta para bate hala rari u katuun ti möa ta moni!” E Iesu e atei sil a saha ka ti ranga naien ba nonei e poeiena i taren, “Aha te ngena sile milimiou a tahol teka? Nonei e katoe lala a ka a niga koru i tar. Alimiou e ka gonon töa mera mou u katuun te moar ta moni. Kaba lia ema tatei ka gonon töa mera goi limiou. Nonei e kis mam nelala u uapi i tuenreir, e kato mammam melaleien tegina kaho mei lia romana. Na lia e hatei hamana koru ragou limiou! Tara mamana han hoboto i puta tena hihatuts naria romana u Bulungana u Niga, nori ena hihatuts nariou a ka a niga te katoe lala a tahol teka, ba u katuun tena hakats kap nitöa narouen bate rarare ren romana.”


Ba töa i tamulam tara maloto na huol a katunun tsitsilo, ti ngöei e Judas Iskariot, e la uana turu pris pan ti korupaköni e Iesu mena poeiena, “Alimiou e hale moi lia aha ba lia te hatara ragoui limiou e Iesu?” Ba nori e hale rien u topisa u maloto tara moni a silva. Ba nonei tara pöata teka, e Judas e tanian sake hamanasena ta maroro tego haröto menaien e Iesu turu katuun teka.


Turu lan tutuun tara kannou te noue ria a beret te möa ta is, ba u katunun tsitsilo i laua rima tere Iesu memi rangate ren, “Alö e ngilem alam go la u ime batena kato hamatskö bemi lö a kannouna turu Paska?” Ba nonei e poeiena, “Alimiou go la uaiam tara töa tson e kana tara taun teka ba limiou tena hateie men, ‘A Tson Hihatuts e poe nama, A pöata i tar e sukusukuna. Alam na u katunun tsitsilo i tar ena noue moa a kannouna turu Paska i luma i tamölö.’” Ba u katunun tsitsilo ena markato has uer te ranga mera leien e Iesu, tegina kato hamatskö mam menaien a kannouna turu Paska.
A pöata te lahibong ma a ka e Iesu e gum gono mei a maloto na huol a katunun tsitsilo i tanen. Ba tara pöata ti nouien be Iesu e poeiena i taren, “Alia e hatei hamana koru ragou limiou, a töa i tamilimiou e haröto nanoa lia turu katuun ti korupakö neiou lia.” Ba u katunun tsitsilo e toku korur me rangate ren, “O Tsunono, esi nonei? Alia romana?”
Be Iesu e ranga palis ranen me poeiena, “A töa i tamilimiou te habu gono melalei lia a beret tara töa pelete, nonei tena haröto nanoa lia turu katuun ti korupakö naiou lia. Alia tu butun Katunuma e mar mate uagou temar ranga uana u Buku u Göagono. Kaba a niomi pan e butuna romana tara katuun te haröto nanou lia turu katuun ti korupakö naiou lia. E niga bala nena a katuun teka egima mala posei.” Be Judas nonei a katuun te haröto nanoien e poeiena, “O Tsunono, esi nonei? Alia romana?” Be Iesu e poeiena i tanen, “Alö peisa has te ranga namen.”


Tara pöata ti nouien be Iesu e luena a beret me haniga uana tere Sunahan ba nonei e posepose nen me hala raneien u katunun tsitsilo i tanen. Ba nonei e poeiena, “Lueiam ba limiou te nou miou. Nonei teka u tuenrei i tar.” Ba nonei e luena a kap uain me haniga uana tere Sunahan me hala ranen. Ba nonei e poeiena, “Alimiou hoboto go ua mia tara kap teka. Taraha, nonei u rahatsing i tar te kato hatagalenou u rangan kits tere Sunahan na te takis bera nou u katuun u parpara bate luba nanou a markato a omi i taren. Na lia e hatei ragou limiou, alia ema tatei ua lele goi romana u uain teka e antunana tara pöata tena ua gono mera goa lia limiou u uain u tsimus tara Nipepeito tere Tamar.” Ba i murina pöata ti kömeien u köman lotu, ba nori e la uar turu Pokus tara Ruein Olip.


Be Iesu e poeiena i taren, “Alimiou hoboto e matout mou bate laba namou lia i bong teka. Taraha, e Sunahan e mar ranga uu teka turu Buku u Göagono:
‘Alia e atung hamate gou romana a katunun taratarakap
ba heis sipsip te bus kalakalar romana.’
“Kaba i murina te hatakei poutse noa e Sunahan alia tara tou mate i tar, balia te mam ragou limiou i Galili.” Be Pita e rangana me poeiena i tanen, “U katuun hoboto teka e laba nariou lö romana, kaba lia ema antunan laba nagilö romana!” Be Iesu e poeiena tere Pita, “Alia e hatei hamana korue goulö, i mam te kekeretskö noa a keriou a tson i bong teka, balö te holis namou tego atei sil menai lö alia tara topisa a pöata.” Be Pita e poeiena i tanen, “Noahasina te mate gono megoa lia alö, alia ema antunan holis kap koru nagilö romana.” Ba u katunun tsitsilo hoboto e mar ranga has uer iesana.


Be Iesu e la gono mera nen tara töa makum te ngöeri i Getsemani, ba nonei e poeiena i taren, “Gum mia teka balia te la uagu ili bate na singo gia tere Sunahan.” Ba nonei e la meraiena ere Pita mera huol pien tson tere Sebedi, a torinen e tiama koru me taatagi koruna. Ba nonei e poeiena i taren, “A peisar e tiama koru mena a nitaatagi pan. Kaka mia teka ba limiou te kalkalata gono memou lia.”
Ba nonei e gamon lana me tuhalakopo nena turu tsiktsiki me singona, “O Tamar, tego antuna ialö, balö te hatongo kap bane milia a kamits teka te katsin butuna i tar. Kaba alö goma kato uai turu ngil i tar. Alö go markato uu turu ngil i tamölö.” Ba nonei e la pouts uana tara topisa katunun tsitsilo i tanen mena sabe ranen ba nori te sohor. Ba nonei e poeiena i taren, “Pua! Alimiou ema antunan kalata gono koru las memi lia tara töa puku a aua? Alimiou go tara kap iam bate singo uamiou tere Sunahan. U hiamus u omi e namots buturia i tamilimiou. A man namnamei i tamilimiou e ngilin kato nena a ka teka, kaba a tuenrei milimiou ema tagala nei.”
Be Iesu e la hahuol lenina mena singo uana tere Sunahan me poeiena, “O Tamar, tema antunan hatongo kap nami lö a kamits teka na tego sagoho koru menaien lia, balö te kato uem turu ngil i tamölö.” Ba nonei e la pouts uana turu katunun tsitsilo i tanen me sabe ranen ba nori te sohor, taraha nori i topi koru.
Be Iesu e la lel ba ranen mena singo hatopisa uana tere Sunahan turu töa puku noahas u mar singo. Ba nonei e la pouts uana turu katunun tsitsilo i tanen me poeiena i taren, “Alimiou e soho noahas miou na e husa noahas miou? Hengoiam! A pöata e butu hakapa. Alia tu butun Katunuma e hala tala naria tara nitagala turu katuun u omi. Takei iam, ba ra te lara. Rötoiam, a katuun te haröto nanou lia turu katuun ti korupakö naiou lia e tuku hakapa.”


A pöata te ranga noaia e Iesu, be Judas, a töa tara maloto na huol a katunun tsitsilo i tanen, te tukuna. Nonei e peigi rema u katuun u parpara koru ti söatema a man lahoton hiatatung na man baru. U pris pan turu lotu na pal kapan turu Jiu ti hala ramen. Na katuun tena harötein e Iesu e hala hakapa raien a ka temi katoe noen. Nonei e hatei hakapa mamir u katuun te peigi ramen me poeiena, “A katuun tena mutsi nagoa lia i abuabunen, nonei a katuun tena pile kap namou limiou.” Ema pina töa ii be Judas te tukuna me la uana tere Iesu me poeiena, “A tsi bong, o Tson Hihatuts.” Be Judas e mutsi nanen i abuabunen.
Be Iesu e poeiena i tanen, “Hahikapien, alö go kato a ka temi katoe mula lö.” Ba nori emi pile kakap naren. Ba töa turu katuun ti ka gono mei e Iesu e lousena u lahoton hiatatung i tanen me katsin atungena a katunun kukui puku tara tsunono pan turu pris ba nonei e ngats harus banena a talinganen. Ba e Iesu e poeiena i tanen, “Haka poutsi u lahoton hiatatung i tamölö tara makum i tanen. Taraha, a katuun te luena u lahoton hiatatung e atung hamate roi u lahoton hiatatung. Tsi alö ma atei silemi alia e antunan rangategu e Tamar eni tuun ba nonei te hala nanama a maloto na huol tara man angelo te para bala rer u ami ba nori temi taguhe riou lia. Kaba tego markato u lia teka, ga ime temar mana uanou u raranga te kana turu Buku u Göagono? Taraha, u Buku u Göagono e poeiena nonei ega mar butu uu teka.”
Be Iesu e poeiena turu katuun u parpara koru, “Alimiou e la memuma a man lahoton hiatatung na man baru tegomi pile kap here memilia a katuun a hihiatung na kopkop. Ga taraha, ba limiou tema pile kap nami lia turu mamana u lan ti ron hihatuts ialia iahana a Luman Lotu Pan. Kaba mamanaka hoboto teka e butu silena tego kato hamana menaien u raranga ti koloto naia u propet turu Buku u Göagono.” Ba u katunun tsitsilo hoboto i tanen e laba naren me busur.


Ba u katuun ti pile kapiin e Iesu e la meren mena piou narien tere Kaiapas a tsunono pan turu pris ti gono hobotoia u tson ateira tara Lo na pal kapan. Kaba e Pita e kukutela e Iesu kaba nonei e tataala halehana ba raien me lan töa uana tara luma tara tsunono pan turu pris, ba nonei ena kana i pal matana a luma iahana ololo ti ololo hahisei a luma. Ba nonei e gum gono merena u tson pepeito kap tego tara kap menaien a saha ka tego butuia tere Iesu.
Ba u pris pan na u katuun hoboto ti kaia turu Kout Pan e sakier ta maroro na tu mar gamo tegi kout mei e Iesu bate atung hamateier. U katuun u parpara ti lama batemi sake rien a man raranga man gamo, kaba a pal kapan ima sabei ta töa ka tega omi ia i tanen. Ba huol a katuun e la uarima i mam memi poeier, “A katuun teka e pei, ‘Alia e antunan rura negu a luman singo tere Sunahan bate hatakei poutse gen turu topisa u lan.’”
Ba tsunono pan turu pris e tuoluna me poeiena tere Iesu, “Alö ema ranga palis memi aha? Gaha nonei te kout meri lö u katuun teka?” Kaba e Iesu e kakamoto ba nitöa raien. Ba tsunono e ranga lelna i tanen me poeiena, “Alia e rangate gia lö i matana e Sunahan, alö go hatei ramei lam, alö e Mesaia, a Pien Tson tere Sunahan?”
Be Iesu e poeiena i tanen, “Alö peisa has te ranga namen. Na lia e hatei ragou limiou, i murina a pöata teka ba limiou te tare mou Lia tu butun Katunuma e gum goa tara pal matou tere Sunahan te tagala koruna, ba lia te la sila guma romana turu köasi i kolö.”
Ba tsunono pan turu pris e raharaha koruna be kiise iena u hasobö i tanen me poeiena, “Nonei e katoe lala u rangan hahakus ba nonei e poeiena, nonei e kamena a nitsunono tere Sunahan. Ara ema tatei ngö lele rimei ta katuun tega kout gono meien. Alimiou e hengo hakape mula u rangan hahakus i tanen. Ga ha te poemi limiou?” Ba nori e ranga palisir me poeier, “Nonei egi atung hamati!” Ba nori e kahuseier a matanen me muke ren. Ba palai e tapale ren me poeier, “Bora! Tego Mesaia uu lö, balö te markato uem te kato uana a propet. Poa talei esi te muke lalou lö.”


E Pita e gum ia ielesala i pal matana luma. Ba töa taholun kui e la uanama i tanen memi poeiena, “Alö has i ka gono mei e Iesu a toun Galili.” Be Pita e holisna i matar u katuun hoboto me poeiena, “Alia ema atei silegi a ka te ranga nemölö.” Ba pöata te lakasaien bena kana tara ololo i rehina tamana, ba tana taholun kui e tare nen me poeiena turu katuun ti tuol ia i sukusuku, “A katuun teka e ka gono hasmei e Iesu a toun Nasaret.” Be Pita e holis lenina me poeiena, “U mana hamanan töa iasa, alia ema atei silegi a katuun teka.” Ema pinai ba u katuun ti tuol ia i sukusuku e la uarima tere Pita memi poeier, “Alö has a töa katuun tere Iesu, taraha u ranga i tamölö e haröto nena tu la malö.” Be Pita e ranga homi nena a peisanen me poeiena, “E Sunahan e tatei hahune noulia tegoma ranga hamana uai lia. Alia ema atei silegi a katuun teka!” Ba keriou e kekeretskö hamanasana. Be Pita e hakats pouts nena u raranga te hateien e Iesu, “I mamina te kekeretskö noa a keriou alö e holis topisa namou tego atei sil menai lö alia.” Ba nonei e lakasana mena tabe hohomi koru mena a nitaatagi pan koru.

Ouvir Matiu 26