‪This work is made available under the Creative Commons Attribution-ShareAlike 4‪.0 International License (CC BY-SA). To view a copy of this license, visit http://creativecommons.org/licenses/by-sa/4‪.0 or send a letter to Creative Commons, PO Box 1866, Mountain View, CA 94042, USA. ‪If this work is desired as a source text for modification, alternative dialect translation or other derivative work, permission must be sought from Strategic Resource Group. All such derivative work must indicate what changes have been made and attribute the work as follows: “The original work by Strategic Resource Group is available for free on YouVersion and www.Bible.com." ‪You must also make your derivative work available under the same license (CC BY-SA). Strategic Resource Group may be contacted at info@srginc.org.

کِتابِ مُقدّس سرائیکی ترجمہ

Modern Central Saraiki Bible © 2024 Strategic Resource Group

اُوں ویلے کُجھ لوک اُتھاں موجود ہَن جِنہاں یسُوع کُوں اُنہاں گلیلیاں دے بارے ءچ ڈسایا، جِنہاں کُوں پِیلاطُس اُوں ویلے قتل کیتا ہا جڈاں او قُربانیاں پیش کریندے پئے ہَن۔ یسُوع جواب ءچ اُنہاں کُوں آکھیا جو ”کیا تُساں ایہ سمجھدے ہیوے جو اِنہاں گلیلیاں دا ایجھا بُرا انجام اِیں واسطے تھئے جو او باقی سارے گلیلیاں کنُوں زیادہ گُنہگار ہَن؟ مَیں تُہاکُوں آدھا ہاں جو نئیں! بلکہ جے تُساں توبہ نہ کریسو تاں سارے اِینویں ای ہلاک تھیسو۔ یا کیا ایہ سمجھدے ہیوے جو او اٹھارہاں بندے جِنہاں اُتے شیلوخ دا بُرج ڈھٹھا تے او تلے آ تے مر گئے، یروشلیم دے باقی لوکاں کنُوں زیادہ قصُوروار ہَن؟ مَیں تُہاکُوں آدھا ہاں جو نئیں! بلکہ جے تُساں توبہ نہ کریسو تاں سارے اِینویں ای ہلاک تھیسو۔“

وَل اُوں ایہ مثال سُنڑائی جو ”کہیں بندے آپنڑے انگُوراں دے باغ ءچ ہنجیر دا درخت لایا تے جڈاں او اُوندے ءچ پھل گولھنڑ گِیا تاں نہ مِلیا۔ اِیں اُتے اُوں مالی کُوں آکھیا، ’ڈیکھ مَیں ترے سالہاں کنُوں اِیں ہنجیر دے درخت ءچ پھل گولھنڑ آندا پِیا ہاں پر میکُوں کُجھ نئیں مِلدا۔ اِینکُوں کپ سَٹ، ایہ زمین کُوں وی کیوں روکی کھڑے؟‘ مالی جواب ءچ اُونکُوں آکھیا، ’ مالک! اِینکُوں اِیں سال بِیا وی راہنڑ ڈیؤ۔ مَیں اِیندے چودھارُوں گوڈی کر تے کھاد سٹیساں۔ جے ایہ اگلے سال پھلیا تاں ٹھیک، نہ تاں اِینکُوں کپ سَٹائے‘۔“

وَل یسُوع سبت دے ڈینہہ کہیں عبادت خانہ ءچ تعلیم ڈیندا پِیا ہا، تے ڈیکھو ہِک عورت ہئی جِینکُوں اٹھارہاں سالہاں کنُوں ہِک بدرُوح دی وجہ تُوں کمزوری ہئی۔ او کُبڑی تھی گئی ہئی تے کہیں طرحاں وی سِدھی نہ تھی سگدی ہئی۔ یسُوع اُونکُوں ڈیکھ تے کولھ سڈیا تے آکھیا، ”عورت! تُوں آپنڑی کمزوری کنُوں ازاد تھی گئی ہیں۔“ اُوں آپنڑے ہتھ اُوندے اُتے رکھے تاں او اُونہئی ویلے سِدھی تھی گئی تے خُدا دی حمد کرݨ لگ پئی۔
عبادت خانہ دا سردار ناراض تھیّا جو یسُوع سبت دے ڈینہہ اُوں عورت کُوں شِفا ڈِتی ہے تے لوکاں کُوں آکھنڑ لگا، ”چِھی ڈینہہ ہِن جِنہاں ءچ کم کرݨ چاہیدے، بس اُنہاں ءچ آ تے شِفا گِھنو نہ جو سبت دے ڈینہہ۔“
خُداوند اُوندے جواب ءچ آکھیا، ”منافقو! کیا تُہاڈے ءچوں ہر ہِک سبت دے ڈینہہ آپنڑے ڈاند یا گڈھاں کُوں تھان کنُوں کھول تے پانڑی پِلاوݨ کیتے نئیں گِھن ویندا؟ بس کیا ایہ مناسب نہ ہا جو ایہ عورت جیہڑی ابرہام دی دِھی ہے، جِینکُوں شیطان اٹھارہاں سالہاں کنُوں بدھی پِیا ہا، سبت دے ڈینہہ اِیں قید کنُوں ازاد کیتی ویندی؟“
جِیں ویلے اُوں ایہ گالھیں آکھیاں تاں اُوندے سارے مخالف شرمندہ تھئے تے ساری بِھیڑ اُنہاں عظیم کماں تُوں جیہڑے اُوندے ہتُھوں تھیندے ہَن، خوش تھئی۔

بس او آکھنڑ لگا جو ”خُدا دی بادشاہی کیہڑی چیز وانگُوں ہے؟ مَیں اُونکُوں کیندے نال تشبیہ ڈیواں؟ او رائی دے دانڑے وانگُوں ہے جِینکُوں ہِک بندے گِھن تے آپنڑے باغ ءچ رَہا ڈِتا۔ او ودھدے ودھدے درخت بنڑ گِیا تے ہوا دے پکھیں اُوندیاں لڑیاں اُتے بسیرا کیتا۔“

اُوں وَل آکھیا، ”مَیں خُدا دی بادشاہی کُوں کیندے نال تشبیہ ڈیواں؟ او اُوں خمیر وانگُوں ہے جِینکُوں ہِک عورت گِھن تے ترے مُٹھیاں اٹّے ءچ رَلایا تے ہولے ہولے سارا اٹّا خمیر تھی گِیا۔“

وَل یسُوع شہراں تے وستیاں ءچ تعلیم ڈیندا ہویا یروشلیم دا سفر کریندا پِیا ہا، تے کہیں بندے اُوں کنُوں پُچھیا جو ”مالک! کیا نجات پاوݨ آلے تھوڑے ہِن؟“
اُوں جواب ءچ آکھیا، ”تنگ دروازے کنُوں داخل تھیوݨ دی پُوری کوشش کرو کیوں جو مَیں تُہاکُوں آدھا ہاں جو بہُوں سارے داخل تھیوݨ دی کوشش کریسن پر نہ تھی سگسن۔ جِیں ویلے گھر دا مالک اُٹھی تے دروازہ بند کر ڈیسی تاں تُساں باہر کھڑے دروازہ کھڑکا تے ایہ اکھیسو جو ’مالک! ساڈے کیتے دَر کھول ڈیؤ۔‘
پر او جواب ڈیسی، ’مَیں تُہاکُوں نئیں جانڑدا جو کِتھوں دے ہیوے۔‘
وَل تُساں اکھیسو جو ’اساں تاں تُہاڈے سامنڑے کھادا پِیتا تے تُساں ساڈیاں گلیاں ءچ تعلیم ڈِتی۔‘
پر او جواب ڈیسی، ’مَیں تُہاکُوں آدھا ہاں جو مَیں نئیں جانڑدا جو تُساں کِتھوں دے ہیوے۔ بدکارو! تُساں سارے مَیں کنُوں دُور تھی ونجو۔‘
اُتھاں رووݨ تے ڈنداں دا پِیہوݨ ہوسی۔ کیوں جو تُساں ڈیکھسو جو ابرہام، اِضحاق، یعقُوب تے سارے نبی خُدا دی بادشاہی ءچ موجود ہِن جڈاں جو تُہاکُوں کڈھ ڈِتا گئے۔ لوک مشرق، مغرب، شمال تے جنُوب کنُوں آ تے خُدا دی بادشاہی دی دعوت ءچ شریک تھیسن۔ تے ڈیکھو کُجھ چھیکڑ ایجھے ہِن جیہڑے اوّل تھی ویسن تے کُجھ اوّل ایجھے ہِن جیہڑے چھیکڑ تھی ویسن۔“

اُونہئی ویلے کُجھ فریسیاں آ تے یسُوع کُوں آکھیا جو ”اِتُھوں کنُوں نِکل تے کہیں بئے پاسے چلیا وَنج کیوں جو ہیرودیس تیکُوں قتل کرݨ چاہندے۔“
اُوں جواب ڈِتا، ”اُوں لومبڑی کُوں وَنج تے ایہ آکھ ڈیؤ جو ’ڈیکھ مَیں اَج تے کل بدرُوحاں کُوں کڈھنڑ تے بیماراں کُوں شِفا ڈیوݨ دا کم کریندا راہساں تے تریجھے ڈینہہ آپنڑا کم مکمل کر گِھنساں۔‘ پر میکُوں اَج تے کل تے پرسُوں آپنڑا سفر جاری رکھنڑا ہے کیوں جو ممکن نئیں جو نبی یروشلیم کنُوں باہر قتل تھیوے۔
یروشلیم! یروشلیم! تُوں جیہڑا نبیاں کُوں قتل کریندیں تے جیہڑے تیڈے کولھ بھیجے گئے اُنہاں کُوں سنگسار کریندیں۔ مَیں کِتی پھیری ایہ چاہیا جو تیڈے بالاں کُوں اِینویں جمع کر گِھناں جِینویں مُرغی آپنڑے چُوچیاں کُوں آپنڑے پراں تلے جمع کر گِھندی ہے، پر تُوں راضی نہ تھیّا۔ ڈیکھو، تُہاڈا گھر تُہاڈے کیتے ویران چھوڑیا ویندے تے مَیں تُہاکُوں آدھا ہاں جو تُساں میکُوں اُوں ویلے تئیں وَل نہ ڈیکھسو جئیں تئیں ایہ نہ اکھیسو جو ’مُبارک ہے او جیہڑا رب العالمین دے ناں تُوں آندے‘۔“

Ouvir لُوقا 13