If you would like a copy of this version please contact info@davaraudiobibles.org

Nahali New Testament, CC-BY-SA-4.0, The Love Fellowship. Nahali New Testament, CC-BY-SA-4.0, Davar Partners International, The Love Fellowship, 2023.

Nahali New Testament

Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.

एवी हेरोदेस राजान दिहामाय जेवी यहूदीयान बेथलेहेमाय यीशुन जेल्मो एनो, तेवी देखू पूर्व दिशामायरीन ज्ञानी माणहे यरूशलेम आवीन फुसणे बाज गीया, “का यहूदीयान राजा काही, एने तान जेल्मो काहरी एनोह? काहाकाय आमु पुर्वेमायदिशामा तान तारू देखील हेते एने ताह वोंदिन ताह नमन केरणे केरता आमु आवील हेते.” ज्यो होम्लीन हेरोदेस राजो एने ताहेऱ्यो आखो यरूशलेम बिय गीयो. तेवी राजा तान माणहा आखा मुख्य याजकाह एने शास्त्रीह एखठा केरीन ताह फुशो का, “मसीहान जेल्मो का एने जुवी” ता ताह केदा, यहूदीयान बेथलेहेमाय, काहाकाय भविष्यवक्तायाद्वारे इही लेखील हि,
“हे बेथलेहेमा, तू जो यहूदान देशांम हि, तू यहूदान अधिकार्यांरीन कुणीरीन भी आत्यू नाहं सोतू, काहाकाय तारेमायरीन एक अधिकारी निकली, जो मारी प्रजा इस्राएलान कालजी लेणार रेंय.”
तेवी हेरोदेसाने ज्ञानी माणहाह गुपचुप हादयो एने ताफायरीन ज्यो जाण लेदो का तारू कानला टायमा देखाईल एतो, एने ताहज्यो केयीन बेथलेहेम माय मोकलील का, “जावो, ता सोरान विषय माय हास केरीन तापास केरू एने, तो तुमूह जुळी ते माहु भी आवीन किज्यू का मी भी जाइन ताह वोंदिन नमन केरूह.”
राजान केणेन होम्लीन ता तारीन निकली गीया, एने देखू जो तारू ता पेलूच देखील एता तो तारू तान ओगाण ताहउर चाल्यो, जाहवोर ता ता जागापूर जाइन पोच गीया, जा जागापूर सोरो एतो. ता ताराह देखीन ताजुलूम आनंद एय गीयो. एने ज्ञानी माणहा घेरामाय पोच गीया एने ता सोराह तान आहाक मरियम हेरी देख्या, एने तान पाय वोंदिन ताह नमन केऱ्या, एने जीव-जीवान थैयलो उगाळ्या एने होनो, ऊद एने गंधरस ताह भेट आप्या. ओवतो हेरोदेसाकोफाय पोशा जाहू मा, ओहलो होपनाम सुचना ताह जुडी, केरीन ता दिहीरा वाटीन से आपणा देशाम निकलीन गीया.

तान तारीन निकलने बादमा देखू, प्रभुन दूत होपनाम योसेफहा दर्शन आपिन कियील, “उठ, सोरो एने तान आईकिह लीन मिस्र देशाम जा, एने जेवीवोर मी केत नाहं, ताहउर ताच रिजी, काहाकाय सोराह मारनणेन केरता हेरोदेस राजा तान होदणे पोर हि.”
तेवी रातीच तो सोरो एने आईक लीन मिस्र देशाम निकलीन गीयो, एने हेरोदेसान मोरणेउर तो ताच रेणू, ज्यो ज्यानकेरता एनो का प्रभुने भविष्यवक्ता द्वारे कियील वचन पुरो एने जुवी का, “मी मारह सोराह मिस्रमायरीन हादील.”
जेवी हेरोदेस देख्यो का, ज्ञानी माणहे ताह ठेगाड देयीलहि, हेते तो जुलुम राग से बोर गीयो, आज्ञा आप्यो का ज्ञानी माणहा टाइम कियील एता तिहीच बेथलेहेम एने तान आहानेपाने वाला आखा सोराह जा दुय वर्ष रीन आत्या एती, ताह मार टाकज्यो. एने जो वचन यिर्मया भविष्यवक्ता द्वारे कियील एता तो पुरो एय गीयो, “रामान्यामा एक किरिनालीह आवाज होमलानी, रेडनो एने मोठलो दुख, राहेल आपणा सोरान केरता रेडने बाज रेनीह, एने हाटवाणे केरताली, काहाकाय ता आखा ऐवी नाह रेणा मोर गीया.”

जेवी हेरोदेस मोरनो तेवी, देखू मिस्र माय प्रभुने दूत योसेफाहा दर्शन आपिन किदो, “उठ, एने सोरा एने सोरान आईक लीन इस्राएल देशाम जा, कारण जो तान जीव लेणेन होदतालो तो मोर जाईल हि.” योसेफ उठ्यो, एने सोराह एने तान आईक लीन इस्राएल देशाम आवलागू.
पुण ज्यो अरखिलास होमलीन का हेरोदेसान जागे तान सोरू राज्य केरीह, तो ताहारी जाणेन भितालो. पोशा होपनाम ताह सुचना जुडी एने तो गलील देशांम गीयो. एने नासरेथ नावान एक नगर माय रेणे बाजगियो, ज्यी ज्यानकेरता एनो का भविष्यवक्ता द्वारे कियील तो पुरो एने जुवी का, “तो नासरी केरीन नावलाय.”

Ouvir मत्ती 2