This translation was published by the Bangladesh Bible Society in 2022. If you are interested in obtaining a printed copy, please contact the Bangladesh Bible Society at shop.biblesociety.org.bd or info@biblesociety.org.bd

Marma Bible New Testament (BBS)

যীশুচা যিরীহো ম্রু আথিগা ওয়ং লাঃলিইরি। য়াংদেমা সক্কেয় নামিনা লুঃউ তয়ক হিকলিরি। য়াংসুউচা হিকলিরি ফেংদা ককসামা আগ্রি অর কামাস্যাং। যীশু যাসুলি, য়াংচাগো ক্রিফু কিজু য়াংসুউ ক্রেংলিরি য়িগিলি য়াংসুউ আঃতু কিজু লুঃউ আথেঃমা যীশুগো মাম্রাংরা। য়জংকিজু য়াংসুউ যীশুগো ক্রিফু কিজু ব্রি লাঃরো, সুবুওয়ে পাং তাবাংমা তাকলিরি আক্রংগা যীশুচা য়াং লেংগা লাঃরি।
যীশু য়াং সুবুওয়ে পাং আরাংমা রকখা আথাকতু মঃ ক্রিলিরি অর সক্কেয়গো প্রলিরি, “সক্কেয়, আয়াং সাক লাঃ আক্রংগা নাংরো ইংমা ঙা নিংফু ক্যাফু।”
সক্কেয়চা আয়াং সাক লাঃলিইরি অর প্যরো যীশুগো লাক খেংলিরি। দিঃচাগো ম্রাংরো আলুংসুউ পুব্রুক পুব্রুক প্রগেলিচাগা, “আপ্রই স্যাং তয়কমা যীশু আগেংদুক ফ্রইরিয়াং।”
সক্কেয় য়াংদেমা রেঃরো ফুরাস্যাংগো প্রলিরি, “ফুরাস্যাং, ঙা ঙাকমা হিচা উচা-পচি আহ্রিই ফুঃরো তুফু ছাংরিসারোগো পিলৈমি অর তয়কমুসুগো লিংরো হিরিছুগি, য়াংসুউগো য়ুচাথাক লিব্রেইং প্রেংরো পিফু।”
য়াংখা যীশু প্রলিরি, “দিঃ ইংমা গিনি আপ্রইইকা ক্যুয়েফু আখিং লাঃরি আক্রংগা দিঃসুলি তয়ক অব্রাহামরো আচৈং। যাসুরো প্যক লাঃখারি, য়াংসুউরোগো হ্রাফু অর আপ্রইইকা কিতাংফু কিজু মনুসাওয়া সাঃ লাঃরি।”


যীশু য়াংখা যাদেমা হিকলিরি, য়াংচাগা যিরুশালেং আম্যা আওয়ি মুহু অর যাসুরো যীশু চাঃগা নাথংগেতি, য়াংসুউরো তুওয়ককেলিচাগা, থাওরা ফুরা ঈ নেংঙেংদচা কংগং আয়াং লেফুব্যা। য়জংকিজু যীশু য়াংসুউরোগো সুয়েংসাং পিফু কিজু দিঃ চাঃগাগো প্রলিরি, “আচৈংগ্রি লুঃউ তয়ক, মাং আঃরাগো য়ুউরো প্রেংফু প্ররো, আওয়িই নেংঙেংখ্রাদুঃ লাঃলিইরি। লাঃফু হ্রিইগা য়াংসুউ কোমা হিচা ক্যুয়েং ছিয়ককো খঃলিইরি অর তয়ক মুক্যুয়েংগো সাব্রা তাঃরাজি পিঃরো প্রলিরি, ‘ঙা মন্হরাক তয়ং প্রেং মাঃলালি, য়হ্লক রাক তৈঅং দিঃ সাব্রানা কোং প্রুক্কেলি।’
“য়াং প্রিমা য়াং লুঃউগো লুঃউরোচা মুংগেতি য়জংকিজু য়াংসুউরো থুঃউ আচৈংগ্রি লুঃউ নক্কা তেমেংদগো ‍দিঃ চাঃগা প্ররো রুওয়েলৈতি, ‘ঙারো মুলু দিঃ লুঃউচা মাং তাকপেচি।’
“য়িগিলি য়াংসুউচা মাং আঃরাগো রাঃরো প্রেং লাঃলিইরি অর যা ছিয়ক ক্যুয়েংরোগো সাব্রা পিঃলিরি, য়াংসুউরোগো খঃয়ুউফু আঃনা পিলিরি। মাংচা য়াংসুউরো কোং প্রুরো মন্হকচি ম্রেক্কেলি, য়াংচাগো মিংলিরি। পাথামা সুঃচা লাঃ প্রলিরি, ‘মাংগ্রি, কোবাং টেংগা পিইচানা ঙা ছিঃদুংনা আম্রে রাঃরি।’
“মাং য়াংসুউগো প্রলিরি, ‘কংগং কংরি। নাং ঙামা আকং ক্যুয়েং। নাং তিফিগো য়ুউরো, চিই সায়ারি কিজু, নাককো ঙা ছিঃ রাওয়াগো ক্রিফু কিজু তাওয়েং পিরি।’
“তুদিয়া ক্যুয়েংচা লাঃরো প্রলিইরি, ‘মাংগ্রি, কোবাং টেংগা পিঃচানা ঙা ঙাঃদুংনা আম্রে রাঃরি।’
“মাংচা য়াং ক্যুয়েংগো প্রলিরি, ‘নাং ঙাঃ রুওয়াগো ক্রিফু তাওয়েং রাঃমি।’
“য়াংনক অর তয়ক ক্যুয়েং লাঃরো প্রলিইরি, ‘মাংগ্রি, ঙা কোবাং টেংগাগো, আওয়েশ্যিমা খ্যুয়েংরো থাঃলিরি। কোবাংগো য়ুউরো ঙামা আক্রক হিকলিরি আক্রংগা কোবাং কংগং পাঃছা লুঃউ, কোবাংচা যাচা মিহিঃলি, য়াংচাগো য়ুরি অর যাচা মুপ্যুয়িলি, য়াংচাগো রুইতি।’
“য়াংখা মাংচা প্রলিরি, ‘অ, আপ্যাক ক্যুয়েং! নাং চাঃগা আতৈং ঙা, নাককো তাঃরা চইফু। নাং সিইরিচাগা, ঙা কংগং পাঃছা লুঃউ, যাচা মিহিকলি-য়াংচাগো য়ুরি অর যাচা মুপ্যুলি-য়াংচাগো রুইঃতি। য়জংছুগি ঙা টেংগাগো নাং যাফু, কামাস্যাং তয়কমা মাঃথালিইলি? য়জং থাঃলিইরিছুগি ঙা লাঃখা টেংগাগোলি প্রেং রাঃলিইফু অর আম্রেলি তেঃকে রাঃলিইফু।’
“যাসুরো মাংবামা রেঃ হিকলিরি, মাংচা য়াংসুউরোগো প্রলিরি, ‘য়াংসুউগা য়াং সাব্রা তাঃরাগো য়ুউলঃকে অর যাসুউমা সাব্রা তঃথং হিকরি য়াংসুউগো পিইলৈই।’
“য়াংখা থুউ লুঃউরোচা মাংগো প্রগেলিরি, ‘মাংগ্রি, যাসুউ পিঃলৈই প্ররিলি, য়াংসুউমাগা সাব্রা তঃথং হিকরি।’
“মাংগ্রিচা প্রলিইরি, ‘ঙা নাংরোগো প্ররি, যাসুমা হিরি-য়াংসুউগো অর আম্যা পিইফু, ছুগি যাসুউমা মিহিকলি, য়াংসুউমা যা হিকরি, য়াং হিকচাগোতয়ং য়ুফু। ঙা মাং ফ্রইপেচিলো যাসুরো মিক্রিলিগে, য়াং রেংসুরোগো দুঃ য়ুউখা অর ঙা হ্রিক থাকমা সেঃবলৈই।’”


দিঃ চাঃগা প্রব্রিনক যীশুচা, তিবিরো হ্রিইগা হ্রিইগা যিরুশালেংদুঃ লাঃলিইরি। যীশু যাখা জৈতুন তংবামা বৈৎফগীনা বৈথনিয়া রুওয়াবামা রকলিরি, য়াংখা কো তিবি নৈয়ককো ‍দিঃ চাঃগা প্ররো রুওয়েলৈতি, “নাংরো হ্রিইগা রুওয়াদুঃ লাঃগেলি। য়াংদেমা ওয়ংখা আম্রাং রাঃলিইমি, ওয়েং রুওয়ক(গাধা) ম্রাংশ্যি তগং খ্যুয়েং ম্রাংলিমি। য়াং ম্রাং আথাকমা তাখালি তয়ক মিচিইসিঃ। য়াংচাগো ফ্রিইরো দুঃ য়ুউখা। তুজুং তয়ক মিংরিছুগি, ‘যাফু, য়াং ম্রাংগো রুওয়েকেতিলি?’ য়াংখা প্রগেলি, ‘আস্যাংমা অলু হিকরি।’”
যা তিবিরোগো রুওয়েলৈতি, য়াংসুউরো লাঃরো যীশু চাঃগা আতৈং, আলুংচা আম্রাং রাঃগেলিরি। যাখা তিবিরোচা থুউ ম্রাংশ্যিগো ফ্রিইগেতি, য়াংখা ইংস্যাংচা মিংলিরি, “নাংরো ম্র্রাংশ্যিগো যাফু ফ্রিঃগেতিলি?”
তিবিরোচা প্রগেলিরি, “আস্যাংমা অলু হিকরি।”
য়াংনক তিবিরোচা য়াং ম্রাংশ্যিগো যীশুবাদুঃ য়ুউ লাঃগেলিরি অর য়াং ম্রাংশ্যি আথাকমা কোরো কোরুংগো খাং পিইরো, যীশুগো থইংজিগেলিরি। যীশু যাখা লাঃলিইরি, য়াংখা লুঃউরোচা কো কোরুং আওয়েকো লেংমা খাং পিইগেলিইরি।
দিঃ পুয়েং প্যাংলো যিরুশালেন বামা যা লেংচা জৈতুন তংগা লাঃখারি য়াং লেংমা রকলিইরি। যীশুনা আম্যাগ্রিই তিবিরো হিকলিইরি। য়াং তিবিরোচা যীশু যা এংঅফুয়ি অলুককো ম্রাংগেলিইরি-য়াংচারো আতুওয় চিই প্যলো আসেইং আগ্রিইনা অলো থাওরা ফোরোগো প্রগেলিইরি,
“আস্যাং নামিনা যা মাং লাঃরি
য়াং মাংচা গোনস্যাং ফ্রইপাজি!
গংখাংফুংমা ঙ্রিংখ্যাইংলি,
অর থুঃউ আরামা থাওরা ফোরাঃস্যাং রংখ্রেদ প্রালিইরি।”
লুঃউ আথিকা লৈংগায়ক ফরীশীরো যীশুগো প্রগেলিরি, “ছারা, কোবাং তিবিরোগো চিছিকনিং প্রলৈই।”
যীশু য়াংসুউরোগো প্রলিরি, “ঙা কুবাংরোগো প্ররি, দিঃসুরো চিছিক নিংরিছুগি, ক্যকলুংরো অঃরো থাঃমি।”
য়াংসুউরো যাখা যিরুশালেংবামা রককেলিরি, য়াংখা যীশু ম্রুগো ম্রাংরো ঙুলিরি। যীশু প্রলিরি, “বাঃ, আখেংসা রাঃফু কিজু যা লুকরাফুলিঃ, নাং, হকতি নাংরা গিনি নাঃলিরিছুগি! য়িগিলি আগো য়াংচা নাক ম্যাকচি কুয়িরো হিকরি। জং তারাক লেঃমি যাখা রেংসুরো নাককো ছেংগ্যাংফাক লুকরো নাককো রেং থাঃমি অর লিফাকলাকচি নাককো ফ্যইকেমি। য়াংসুউরো নাককো অর নাক আঃথিমা হিকচা আলুং লুঃউরোগো তিঃরো কাবামা বুওয়েমি অর ক্যক তুলুং আথাকমা তুলুং মাঃথামুহুক, আক্রংগা থাওরা ফুরাস্যাং যাখা নাককো চিই খ্যারি, য়াং আখিংগো নাং মিঃসিকলি।”
য়াংনক যীশু ওয়িইপাসানা ক্যংদুঃ ওয়ংরো কোং প্রুকসারোগো লৈই রুওয়েলৈতি। যীশু য়াং কোংসিরোগো প্রলিরি, “সেংস্যাংস কেইং চাউমা রুইরো হিরি, ‘ঙাক ইংচা ছুকতং ইং ফ্রইফু,’ য়িগিলি নাংরো য়াংচাগো দাম্রা নিংরা লুককেরি।”
যীশু নিংদৈং ওয়িপাসানা ক্যংমা লাঃরো সুয়েংসাং পিইলিরি। পুরোহিত আগ্রিইরো, কেইং ছারারো অর লুঃউ গংখ্যুকরো যীশুগো সেঃ বৈফু ক্রেংগেলিরি, ছুগি যাপুয়েং প্যাংরো য়াংচাগো লুকফুলিঃ, য়াং আলিগো হ্রা মাঃরালিই, আক্রংগা লুঃউম্যারোচা য়াংসুউ চাঃগাগো চিইখ্যারো নাথংগেতি।

Ouvir লূক 19