Text: © The Bible Society of Nigeria, 2008 Audio: ℗ 2008 Hosanna

Rubassa - 2008 Edition (NT)

Rubassa Bible © Bible Society of Nigeria, 2008

Ti iyi heri ji ta bu ulade nu uvwungwa dididi, ibɛ eyikwo ata imanjɛ iyi nɛ 'yajɛ ụhiụŋ ubiye, ee zhe nu u'uye ata. Aa kwụbɛ maa utayɛ ata ushigwowo nu u'uye ata, ama aka na te e teni nu bwa, a kwụbɛ shɛ ru'wo ra Agwangwama Jisus o. Gana na ti iwɛ ɛtɛ dama aŋ, eshigiri, aa kwụbɛ ta atwa eyebi a na uregeni tugwuno tu na ta ta paawụụ, shikekeni to dongonu aŋ. Ibɛ po inyɛsɛ shɛ aŋ, oo to bizhiri. Nazhɛ atwa ata hiɛŋ aŋ, Iwembe po ahia jalakaka bụtụ na shɛ buumwa na ashashɛ atwa na 'wii? Bu zaba ya epe o, bi hiwa. Teyinje ma gana na bee hi mbishi la tu baa ta namɛ ne hiŋ nu Galili, maa: I shɛ tilɛɛ maa e shepi Yɛu Bụtụ e peni atwa-iwɛwɛ, maa o to bu nu ubatanɛ, nazhɛ bɛɛ zhɛ bɛ hiɛ nụ ụjita ụtatụ.
Nazhɛ ee teyinje ga maa bɛ jɛmɛ la iwɛ ɛtɛ. Nazhɛ ee genji u'uye ata, ee gwuri ee mbishi eseshi-iyi ubwa umpwa-nu-boo-ko, keeni atwa vwɛ iwɛ ɛtɛ kpaaŋ. Eyikwo ata shɛ ge Meri Magdala, no Joana, ne Meri bino Jemis, na anya eyikwo a na vwɛ, aba mbishi atumwa iwɛ ɛtɛ. Ama n-ndumwa ma aba mu shanɛ atumwa ata gana iwɛ tisashɛ, a tɛtanɛ shɛ mu rishe o. Ama ga Pita gezhiji bee zhe nu u'uye ata. Bee hikeni, baa kwụbɛ maa tugwuno ta ata ti ilinɛn kiri ti tileni, bee hwuri ujiyo ni ihwɛ ibwɛ, iwɛ ɛtɛ kaa dama bụ.


Jita ata gbaa ibɛ eseshi-iyi Jisus eyebi zhɛ nu ụshɛpwụ uko na ɛɛ hiɛŋ, Ɛmɛus na ụdụlụ ubwa nu Jɛrusalɛm namɛ gana imɛle icenje na ashashɛ. Aa dumanga iwɛ ijɛ teni kpaaŋ. Ta a dumanga n-ndumwa, aa nda ushaura ata, ge Jisus kaanɛ izhɛ baa zhagajɛ na aba. Ama iyi ike urigeni shishe sha aba maa kede e mepi bu o.
Ge Jisus heŋteni aŋ, bɛɛ hiɛŋ, N-ndumwa mi imbe nu kwuŋ ahia dumanga ta hia zha tahaŋnụ tu gaa?
Ee shikeni, ee kwuji shishe sha aba, oo to usumbu. Nazhɛ bụtụ bu ko na ashashɛ aba na ɛɛ hiɛŋ izeci ibwɛ ge Kilopas, heŋteni bu, bɛɛ hiɛŋ, Gobuko kiri suu bɛ shɛ bugaiŋ nu Jɛrusalɛm ga, na te mepi shi iwɛ gɛ teni apata ijitɛ imbɛ nɛ hwayɛ?
Ge Jisus heŋteni aŋ, bɛɛ hiɛŋ, n-ndumwa mi imbe nuu? Ɛɛ jishijɛ bụ, ɛɛ hiɛŋ, n-ndumwa mi Jisus bụtụ ata bu Nazarɛt, na shɛ bigesere ata njɛ ugondu ukpahiŋ tu n-ndumwa mu bwa ne eshe Agwatana, keeni eshe atwa kpaaŋ. Gana na ehiu onongbo tu, ne ehwurembe tu, peni bu n-ndumwa-tụwụma maa ga kwụnɛ bụ, ibɛ po oo to bu nu ubatanɛ. Tu ga ngbaracɛ uhwaŋna maa ubwa zhɛ be gwube atwa Isrɛl. Inɛɛ nɛ hwuri inɛ ɛtɛ hwɛɛ, i shɛ taa jitaala ti ijɛ teni ya. Sasana eyikwo oko na namɛ na ashashɛ tu zhe nu u'uye ata nu uvwungwa go dididi, aa njɛ maa igɛhi iti 'imɛ. Aka na ta a kwụbɛ shɛ ru'wo ru bwa, aa zhajɛ ɛɛ hiɛŋ maa ɛ kwụbɛ atumwa-azuba no ozobu a na mbishi aŋ maa, bi hiwa. Ibɛ po atwa tu oko zhe ga nu u'uye ata, ɛɛ kwubɛ ga iyi gana na te eyikwo ata ga jɛmɛ, ama a kwụbɛ shɛ bu kaa ni ikɛnyi ibwɛ o.
Nazhɛ ge Jisus jishijɛ aŋ, bɛɛ hiɛŋ, Ahiɛba atwa ga eshiciji shi iyi, a na kaa lemi ne rishe-tɛtɛtana ni iwɛ nɛ egesere jɛmɛ! I shɛ shɛ suu tilɛɛ maa ga Krast njɛ ụbaụta tugwo nazhɛ bo tono nụ ụjɛrụma ubwa? Nazhɛ bee eshicigeni aŋ iyi elele nɛ 'nywotwo nu Utakada Iwɛ ya Agwatana iwɛ ikɛnyi ibwɛ, bee kwune ni iyi nɛ 'nywotwo la nu Undwa Moses tutu iyi nɛ egesere 'nywotwo du.
To o gwumwongonu nu ụshɛpwụ ata ɛɛ gɛ zhɛ, ge Jisus njɛ gana maa ba jala maa kashɛka geri-be-eshe. Ama a uranjɛ bụ, ɛɛ hiɛŋ bụ, Nama no tu, iwɛnɛ tu ụrụmɛ shɛ ya, uwaŋna kaa du zhɛ utwonuo. Ibɛ po bee teni na aba ni ihwɛ.
Aka na tu baa jɛjɛ maa ya iyimɛyɛ na aba, bee shepi ibrɛd baa njɛ ugwoje na Agwatana, boo dwonu iŋ, nazhɛ bee peni aŋ. Nazhɛ shishe sha aba shi ushigwo, ee mepi bu, nazhɛ baa inanjɛ aŋ. Ibɛ po oo momo hoŋtongonu, ɛɛ hiɛŋ, Shihaŋsa shi tu shɛ ga tu zuga sụ nu uhwaŋna hŋ na aka na baa dumanga n-ndumwa no tu, boo mo tu eshicigono Iwɛ ya Agwatana?
Ɛɛ ishijɛ gunu ata, ee gwuri nu Jɛrusalɛm. Aa kwụbɛ eseshi-iyi umpwa-nu-boo-ko keeni atwa vwɛ ta a ụlwatagwụ apata, ɛɛ hiɛŋ aŋ, Iwɛ-tɛkana Agwangwama hiɛ ga gom! Ga Saimon du kwụbwa bụ.
Nazhɛ ee swegeni aŋ unabarɛ tahaŋnụ ta aba, keeni gana na te e mepi bu na aka na tu boo dwonu ibrɛd ɛtɛ.


Aka na ta atwa ata eyebi te swegeni atwa vwɛ iwɛ ɛtɛ, mashaka ge Jisus ta shikeni na ashashɛ aba. Bɛɛ hiɛŋ aŋ, Ga amɛ-olom nama ne hiŋ.
Aa zhɛgɛdanɛ, iwɛnɛ ti inyɛsɛ shɛ aŋ duwa, ɛɛ hiɛŋ kwo mpiala mu ko aa kwụbɛ. Ge Jisus hiɛŋ aŋ, Iwembe po ahiɛ zhɛgɛdanɛ gana gaa? Iwembe po oruwo teni na shihaŋsa shi hiiŋ? Gamba ni ikɛnyi mi na kaa, kwụba ma i'ɛlɛ mi, nɛ ɛvwɛvwɛjɛ mi. N timengeni ma hiɛ kwụbɛ, iwɛnɛ tu mpiala mu zasa tu'waba keeni o'umpwo gana na ehi eri hia kwụba tu Ngaa 'yajɛ.
Aka na tu baa jɛmɛ iwɛ ɛtɛ, bee mbiseni aŋ i'ɛlɛ ibwɛ keeni ɛvwɛvwɛjɛ ubwa. Ama gana na ta a ta tɛtanɛ shɛ rishe iwɛ unyasa na shini na shɛmɛ sha aba keeni tudama tu na yaa dama aŋ. Ge Jisus heŋteni aŋ, bɛɛ hiɛŋ, Hi 'yajɛ suu iyi tiya ye elele epe? Ee peni bu usunda ijɛnɛ nɛ ee ge shiteji. Bee shepi uŋ baa yɛ ne eshe aba.
Ge Jisus hiɛŋ aŋ, N hi mbiswo la iwɛ gɛ na aka na Ngaa ta namɛ ne hiŋ, maa iwe mi elele nɛ oo 'nywotwo la nu Undwa Moses, keeni Atakada Egesere keeni Shɛzunga shɛ na aa zunganganɛ Agwangwama zhɛ yɛ sɛ.
Nazhɛ bee kepishinji shihaŋsa sha aba maa e eshiciji Utakada Iwɛ ya Agwatana. Bɛɛ hiɛŋ aŋ, Gana yoo 'nywotwo ta maa, ga Krast zhɛ ba nda ụbaụta tilɛɛ, nazhɛ bɛɛ zhɛ bɛ hiɛ nụ ụjita ụtatụ, maa ɛ zhɛ a anangana edenji elele iwɛ ahaŋsa-tɛjɛshɛrɛga keeni iwɛwɛ tugangana ni izeci ibwɛ, te kwuni nu Jɛrusalɛm. Ahiɛba kaa hiɛ shɛ eseyida ijɛ kpaaŋ. Nama ma nu ụshɛpwụ ga uuwa i ci aka na Ngaa hi tumwananɛ unu na Bishi mi shiri la, maa e hi urigeni ukpahiŋ na zhɛ wa banɛ na azuba.


Nazhɛ ge Jisus zeriji aŋ tutu oo gwumwongonu ni Bɛtani, bee suji i'ɛlɛ ibwɛ na azuba, bee peni aŋ uwebiye. Ti bee peni aŋ uwebiye ata, boo bogwu na aba, ee shepi bu na azuba. Ibɛ po aa zhɛbɛ bu apata, nazhɛ ee gwure nu Jɛrusalɛm nu unyasa ụ'wụtụ. Ibɛ po aa nama nu Umwono wa Agwatana, aa shɛtana Agwatana aka elele.

Ouvir LUK 24