uMataayi 7
7
Kuvhalonga avhanji
(uLuuka 6:37-38, 41-42)
1“Mutavhalongaje avhamwinyu, inga niimwe mutahinze mulongwe. 2Nkuvhavhuuzya isho, mwe pe vwe mukuvhalonga avhanji, vwe uMulungu alivhalonga niimwe. Havhili ishipimilo she mukuvhapimila avhanji, she niimwe mulipimilwa.
3“Shooni she ukwenya ahababazula he hali mwi lyinso ilya wamwinyu, ileelo utakwenya ulupaliho lwe luli mwi lyinso lyaho? 4Havhili, ungamuvhuuzya vhuli uwamwinyu kuuti, ‘Wamwitu, leha inkwefwe ahababazula he hali mwi lyinso lyaho,’ lwe mu lyaho muli ulupaliho? 5We washifumbo iwe! Uyeefwe suuti ulupaliho lwe luli mwi lyinso lyaho, pe kwe ulole ahinza nu kwefwa ahababazula he hali mwi lyinso ilya wamwinyu!
6“Mutazipanje imbwa ivintu ivifinjile, poosye kuzisumbila inguluvhe ivintu ivwa nsavho,#7:6 Kulandatana na maata aga Vhayuuda, imbwa ni nguluvhe vihanu vwe vihandamanu, te vifinjile. UYeesu akuziholanya imbwa ni nguluvhe, na vhantu avhahandamanu, vhe te vhazelu mu mooyo gaavho, mwe pe vhakulihaana izwi ilya Mulungu, havhili vhatakumwitiha. Havhili, uYeesu akuviholanya ivintu ivwa nsavho ni vintu ivwa Mulungu ni izwi ilya Mulungu. inga zitahinze zihanyanjile, nu kuvhagalushila kuvhaluma.”
Mulaavhaje nu kulondola nu kuhonyonsya
(uLuuka 11:9-13)
7“Mumulaavhaje uMulungu, pe woope kwe avhapanje, havhili mulondolaje, pe niimwe kwe muvwagaje, havhili muhonyonsyaje, pe niimwe kwe mwigulilwaje. 8Nkuvhavhuuzya vhwevhulo, mwe pe umuntu wonti we akulaavha, akuposheela, woope we akulondola, akuvwaga, woope we akuhonyonsya, akwigulilwa.
9“Vhuli, wu naanu muli imwe we inga umwana waakwe amulaavha ikaati, angaamupa ivhwe? 10Poosye inga amulaavha inswi, angaamupa injoha? 11Pe ishi, inga imwe mwe vhatalamalandu mumanyile kuuvhapa avhaana vhiinyu ivintu ivwinza, pe uTaata wiitu uwa ku mwanya aliivhapa ivintu ivwinza nkaani vhaala vhe vhakumulaavha!
12“Ishi muvhavhombelaje avhanji inza vwe niimwe mukwanza kuuti vhavhavhombelaje, mwe pe izyo zye ndajizyo izya Moose ni nsambiilizyo izya vhakuvhwi.”
Umulyango umufinyanu nu mubabazu
(uLuuka 13:24)
13“Mwinjile kutuushila umulyango umufinyanu, mwe pe umulyango umubabazu wukusogola kwi ilovwa, ni idala ilya kusogola ukwo libabazu nkaani. Havhili, avhantu vhe vhakwinjila kutuushila umulyango uwo, vhinji. 14Ileelo umulyango uwa kwinjiilila ku vhulanzi, mufinyanu, ni idala ilya kusogola ukwo lifinyanu, havhili avhantu vhe vhakulimanya, vhansi.”
Avhantu vhakumanyiha ku lujendo lwavho
(uLuuka 6:43-44)
15“Muvhanje minso na vhakuvhwi avha ilenga, mwe pe lwe vhakuvhinzila, vhakuyivhiiha ngati ngʼonzi. Ileelo mu mooyo gaavho vhali ngati mpumpi. 16Avhakuvhwi ivho mulivhamanya ku mbombo zyavho, mwe pe avhantu vhatakutonola imvilo mu lwangwa poosye insongwa mwi ijijimvwa. 17Ikwi ilyinza likuhoma amantonongwa aminza, lyope ikwi ivhiivhi likuhoma amantonongwa amavhiivhi. 18Litaliipo ikwi ilyinza lye likuhoma amantonongwa amavhiivhi, poosye ikwi ivhiivhi lye likuhoma amantonongwa aminza. 19Ikwi lyonti lye litakuhoma amantonongwa aminza, likudibwa nu kusumbwa mu mwoto. 20Pe ishi, avhakuvhwi ivho, mulivhamanya ku mbombo zyavho.”
UYeesu akuvhahaana avhasundikwa avha ilenga
(uLuuka 13:25-27)
21“Te vhonti vhe vhakuyanga kuuti, ‘We Mwene,’ vhaliyinjila mu vhumwene uvhwa Mulungu, nkandi umuntu we akuvhomba zye uTaata waane uwa ku mwanya akwanza, we aliyinjila. 22Isiku ilya vhulonzi inga lyafiha, avhantu avhinji vhaliyanga vhaliiti, ‘We Mwene! Vhuli, tutahakuvhwaga nu kufumwa impepo inkandamanu nu kuvhomba amafindango aminji kwi izina lyaho?’ 23Ileelo ine ndivhavhuuzya apazelu ndiiti, ‘Ntavhamanyile imwe inga hansi! Yeepi kuli ine, imwe mwe mukuvhomba imbiivhi!’”
Ishiholanyo isha vhazenzi vhavhili
(uLuuka 6:47-49)
24“Pe ishi, umuntu we akugatejeelezya amazwi gaane nu kugalema, aliivha ngati muntu uwa vhushindamu uvhwa njeele we ázenzile inyumba yaakwe pi iyalaawe. 25Imvula yihatima, amahavha gahiizula nkaani, nu musasankungu wuhinza, wuhayiyinzaanya inyumba iyo. Ileelo inyumba iyo yitahagwa, mwe pe ulwalo lwakwe lwázengwilwe pi iyalaawe. 26Ileelo umuntu we akutejeelezya amazwi gaane iga, ishisita kugalema, ali inza umuntu umupukupuuku we ázenzile inyumba yaakwe pa lusenga. 27Imvula yihatima, amahavha gahiizula nkaani, nu musasankungu wuhinza, wuhayiyinzaanya inyumba iyo. Yoope yihagwa pansi nu kubongonkana yonti.”
28Lwe uYeesu aamala kuyanga amazwi igo, ivhungaana ilya vhantu lihasukumila nkaani insambiilizyo zyakwe, 29mwe pe ahasambilizyaga ngati muntu we ali na maha, atahasambilizyaga ngati vhasambiilizi vhaavho avha ndajizyo izya Moose.
Obecnie wybrane:
uMataayi 7: nih
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2021 Wycliffe Bible Translators, Inc.
