UTOM MME APOSTLE 13

Emek Saul ye Barnabas Enɔ Iso Utom Ndikwɔrɔ Ikɔ Abasi

1MME prophet ye mme anditeme edu ke ufɔk Abasi ke Antioch, Barnabas, ye Simeon emi ekerede Niger, ye Lucius owo Cyrene, ye Manaen emi ekebɔkde ye Herod tetrarch, ye Saul. 2Edi nte mmɔ enamde ŋkpɔ enɔ Ɔbɔŋ, enyuŋ etrede udia, Edisana Spirit ɔdɔhɔ mmɔ ete, Edianare Barnabas ye Saul enɔ Mi, man mmɔ enam utom oro ŋkokotde mmɔ nnɔ. 3Ekem ke mmɔ ema eketre udia enyuŋ ebɔŋ akam, enyuŋ edori mmɔ ubɔk, eyak mmɔ eka.

4Ntre ke ini Edisana Spirit osiode mmɔ ɔdɔŋ, mmɔ esuhɔre eka Seleucia, enyuŋ eto do ewat eka ke Cyprus. 5Ndien ke ini mmɔ edude ke Salamis, mmɔ ekwɔrɔ ikɔ Abasi ke mme synagogue mme Jew: mmɔ enyuŋ enyene John nte asaŋutom mmɔ. 6Ke mmɔ ema ekesaŋa ke ofuri isuo esim Paphos, mmɔ ekut abia-idiɔŋ kiet, prophet abiaŋa, owo Jew emi enyiŋ esie ekerede Bar-Jesus; 7ndien enye odu ye Sergius Paulus andikara, enyene-ibuot owo. Andikara emi okot Barnabas ye Saul edi, ete iyom ndikop ikɔ Abasi. 8Edi Elymas abia-idiɔŋ oro (koro enyiŋ esie ɔwɔrɔ ntre) ɔbiɔŋɔ mmɔ, aŋwana ndinam andikara ɔwɔŋɔre ɔkpɔŋ akpanikɔ. 9Edi Saul, emi onyuŋ ekerede Paul, ɔyɔhɔ ye Edisana Spirit, owuk enyin ese Elymas, onyuŋ ɔdɔhɔ ete, 10O afo, emi kpukpru abiaŋa ye idiɔk-ŋkpɔ ɔyɔhɔde fi ke idem, afo eyen Satan, afo usua kpukpru nti ido, nte afo udutreke ndikwaŋa edinen usuŋ Ɔbɔŋ? 11Ndien ke emi, sese, ubɔk Ɔbɔŋ odoro fi ke idem, afo eyenyuŋ edi nnan, udunyuŋ ukwe utin kaŋa. Idaha oro ekim ofuk enye; enye onyuŋ asaŋa oyo, oyom owo eke omumde enye ubɔk asaŋa. 12Ke ini andikara okutde se itibede, enye onim ke akpanikɔ, idem onyuŋ akpa enye ke ukpep-ŋkpɔ Ɔbɔŋ.

13Ekem Paul ye mme nsaŋa esie esio ekpɔŋ Paphos, edi ke Perga emi odude ke Pamphylia: edi John ɔkpɔŋ mmɔ afiak ɔnyɔŋ ke Jerusalem. 14Edi mmɔ eto ke Perga esaŋa ebe, edi ke Antioch ke Pisidia; ndien ke sabbath mmɔ eduk ke synagogue esuhɔre etetie. 15Edi ke ema ekekot mbet ye mme prophet ema, mme etubom synagogue edɔŋ edidɔhɔ mmɔ ete, Nditɔ-ete, edieke mbufo enyenede item eke enɔde mbio-obio, etiŋ. 16Ndien paul adaha ke enyɔŋ enyeŋe ubɔk ete,

17Mbio Israel, ye mbufo emi ebakde Abasi, ekop. Abasi mbio Israel emi ekemek mme ete nnyin, onyuŋ ofori mbio emi ke ini mmɔ edide nte isen ke isɔŋ Egypt, onyuŋ ada edimenere ubɔk emen mmɔ ɔwɔrɔ ke esit. 18Enye onyuŋ eme ime ye ido mmɔ ke desert ke adaŋa isua aba. 19Ndien ke Enye ama okosobo mme idut itiaba ke isɔŋ Canaan, Enye ɔnɔ mmɔ isɔŋ mme idut oro, ete eda enyene, ke adaŋa isua ikie inaŋ ye aba ye duop: 20ndien ke ini emi ama ekebe, Enye ɔnɔ mmɔ mme ebierikpe, tutu osim Samuel prophet. 21Ekem mmɔ ebeŋe edidem: ndien Abasi ɔnɔ mmɔ Saul eyen Kish, owo esien Benjamin, ke isua aba. 22Edi ke Enye ama ekemen enye efep, anam David adaha ada, ete edi edidem mmɔ: onyuŋ ɔdɔhɔ abaŋa enye ete, Mmokut David eyen Jesse, owo emi ekemde esit ye Ami, emi edinamde ofuri uduak Mi. 23Oto ke ubon owo emi ke Abasi akada Andinyaŋa ɔnɔ Israel, nte uŋwɔŋɔ Esie edide, kpa Jesus; 24ke John ama ekebem eridi Esie iso ɔkwɔrɔ baptism erikabare esit ɔnɔ kpukpru mbio Israel. 25Ndien nte John anamde utom esie ama, enye obup mme owo ete, Mbufo ebat ete ndi anie? Ndige Enye. Edi sese, owo, eke mmendotke nditat uruk ikpa-ukot Esie, ke etiene mi ke edem. 26Nditɔ-ete, mbufo nditɔ emi etode ke ubon Abraham, ye mmɔ emi ebakde Abasi ke otu mbufo, ema enɔ ikɔ erinyaŋa emi esɔk nnyin. 27Koro mmɔ emi eduŋde ke Jerusalem, ye mme andikara mmɔ, sia mmɔ mifiɔkke Enye, minyuŋ ifiɔkke mme uyo mme prophet, emi ekotde ke sabbath ke sabbath, enam uyo mmɔ esu ke edibiom Enye. 28Ndien okposuk edi nte mmɔ mikwe ntak eke ekpowotde Enye, mmɔ ekpe ye Pilate ete ewot Enye. 29Edi ke ini mmɔ ema ekenam kpukpru se ekewetde ebaŋa enye osu, mmɔ ekɔŋɔre Enye ke eto enim ke udi. 30Edi Abasi anam enye eset ke mkpa: 31mmɔ emi eketode ke Galilee esaŋa ye Enye edɔk edi ke Jerusalem enyuŋ ekut Enye ke ediwak usen; mmɔ enyuŋ edi ntiense Esie enɔ mbio-obio ke emi 32Ndien nnyin ida eti etop uŋwɔŋɔ oro ekeŋwɔŋɔde enɔ mme ete isɔk mbufo, ite, 33Abasi ama anam uŋwɔŋɔ oro osu ɔnɔ nditɔ nnyin, ke emi Enye anamde Jesus eset; nte emi enyuŋ ewetde ke udiana psalm, ete,

Afo edi Eyen mi; mmobon Fi mfin emi.

34Ndien kabaŋa erinam emi Abasi anamde Enye eset ke mkpa, okunyuŋ afiak aba okut mbiara, Enye etiŋ ntem ete,

Nyenɔ mbufo ndisana ŋkpɔ David eke midikpuhu mbufo.

35Sia Enye ɔdɔhɔde ke psalm eŋwen ete,

Afo uduyakke Edisana Owo Fo okut mbiara.

36Koro ke adaŋemi David akanamde uduak Abasi ke eyo esie ama, enye ede, ndien ebuk enye ye mme ete esie, enye onyuŋ okut mbiara. 37Edi Enye emi Abasi anamde eset ke mkpa ikwe mbiara. 38Efiɔk ndien, nditɔ-ete, ete oto ke Owo emi ke ekwɔrɔ erifen mme idiɔk-ŋkpɔ enɔ mbufo: 39ndien edi Enye anam kpukpru mmɔ emi enimde ke akpanikɔ enyene utebe-ikpe ke kpukpru ŋkpɔ eke ibet Moses mikemeke nditebe owo ikpe. 40Ekpeme ndien, mbak se ewetde ke mme prophet edisim mbufo, nte emi edɔhɔde ete,

41Mbufo emi esuenede Jehovah, ese, enyuŋ eyik, enyuŋ etak;

Koro mmanam erinam ke eyo mbufo,

Kpa erinam eke mbufo midinimke ke akpanikɔ, owo ekpetetiŋ ɔnɔ mbufo.

42Nte mmɔ ewɔŋɔde, mmɔ ebeŋe ete etiŋ ikɔ emi ɔnɔ mme imɔ ke sabbath eŋwen. 43Edi ke ini synagogue asuanade, ediwak mme Jew ye nti Gentile emi etuakde ibuot enɔ Abasi ke ido mme Jew etiene Paul ye Barnabas: mmɔ oro enyuŋ etiŋ enɔ mmɔ, enyuŋ ekpe mmɔ ete mmɔ esuk etie ke mfɔn Abasi.

44Ndien ke udiana sabbath, ekpere ndidi ofuri obio ebono ɔtɔ kiet ndikop ikɔ Abasi. 45Edi ke ini mme Jew ekutde otu owo, ufup ɔyɔhɔ mmɔ ke esit, mmɔ enyuŋ eneni mme ŋkpɔ eke Paul etiŋde, enyuŋ esuŋi. 46Ndien Paul ye Barnabas edɔhɔ mmɔ uko-uko ete, Ana nte ebem iso etiŋ ikɔ Abasi enɔ mbufo. Sia mbufo esinde ikɔ oro, enyuŋ ebatde ete mmimɔ idotke nsinsi uwem, sese, nnyin ikabare itiene mme Gentile. 47Koro Ɔbɔŋ eteme nnyin ntre ete,

Mmonim Fi ke uŋwana mme idut,

Man afo akpada erinyaŋa edi tutu osim ke utit ererimbot.

48Ke ini mme Gentile ekopde emi mmɔ edat esit, enyuŋ ekpono ikɔ Ɔbɔŋ: ndien kpukpru mmɔ emi ekenimde enɔ nsinsi uwem ebuɔt idem. 49Ikɔ Ɔbɔŋ onyuŋ asuana ke ofuri edem oro. 50Edi mme Jew ekpak ikpɔ iban eke ebakde Abasi, ye mbɔŋ obio, enyuŋ esin mmɔ oro ekɔbɔ Paul ye Barnabas, enyuŋ ebin mmɔ esio ke mme adaŋa mmɔ. 51Edi mmɔ ekeŋ ntan ikpat mmɔ efep ndibiom mmɔ ikpe, enyuŋ edi ke Iconium. 52Ndien mbet eyɔhɔ ye idaresit ye Edisana Spirit.

Obecnie wybrane:

UTOM MME APOSTLE 13: ENA

Podkreślenie

Udostępnij

Kopiuj