UTOM MME APOSTLE 12
12
Ŋkpɔkɔbi Peter Ye Ŋkpa James
1KE adaŋa ini oro Herod edidem esin ubɔk ndituk ndusuk mbon ufɔk Abasi. 2Ndien enye owot James eyen-eka John ke ofut. 3Edi ke ini enye okutde ete enem mme Jew esit, enye afiak aka iso omum Peter. Ekedi ke mme usen usɔrɔ uyo eke leaven miduhe. 4Ndien ke ama okomum enye, esin enye ke ufɔk-ŋkpɔkɔbi, onyuŋ ayak ɔnɔ mbon-ekɔŋ efurekiet, eke ebaharede ke itie inaŋ, ete ekpeme enye: onyuŋ aduak ete, Passover ama ebe, iyeda enye iwɔrɔ ikayak inɔ mbio-obio. 5Mmɔdo ekpeme Peter ke ufɔk-ŋkpɔkɔbi: edi ufɔk Abasi esɔŋɔ ebɔŋ akam enɔ Abasi ebaŋa enye. 6Ke adaŋemi Herod oyomde ndida enye ŋwɔrɔ, ke idem okoneyo oro Peter ede idap ke ufɔt mbon-ekɔŋ iba, ekɔbi enye ke ŋkpɔkɔbi iba: mbon-ukpeme enyuŋ eda ke usuŋ ekpeme ufɔk-ŋkpɔkɔbi. 7Ndien sese, angel Ɔbɔŋ ada enye ke ŋkaŋ, uŋwana onyuŋ ayama ke ubet oro; enye oro onyuŋ atuak Peter ke ŋkaŋ, edemere enye, ete, Daha ke enyɔŋ iwiwa. Ndien ŋkpɔkɔbi efɔrɔre enye ke ubɔk eduɔ. 8Angel onyuŋ ɔdɔhɔ enye ete, Bɔbɔ ŋkpɔ ke idem, nyuŋ sine ikpa-ukot fo ke ukot. Enye anam ntre. Angel ɔdɔhɔ enye ete, Sine akwa ɔfɔŋ fo nyuŋ tiene mi. 9Ndien enye ɔwɔrɔ etiene angel; inyuŋ ifiɔkke ete se angel anamde edi akpanikɔ, edi abat ete imɔ ikut ŋkukut. 10Edi ke mmɔ ema ekebe akpa ye udiana mbon-ukpeme, mmɔ edisim itim ukwak emi esaŋade ke esit ewɔrɔ eduk obio; mmɔ enyuŋ ewɔrɔ esaŋa ke efak kiet ebe; ndien idaha oro angel ɔkpɔŋ enye. 11Ke adaŋemi enyin eŋwaŋade Peter, enye ɔdɔhɔ ete, Ke emi mmobure mfiɔk nte Ɔbɔŋ ama ɔdɔŋ angel Esie, onyuŋ anyaŋa mi osio ke ubɔk Herod ye ke ofuri idori-enyin mme Jew. 12Ke enye ama ekekere ŋkpɔ emi, enye edi ke ufɔk Mary eka John, emi ekotde ekedian Mark; ke ebiet emi ediwak owo ebonode ebɔŋ akam. 13Edi ke ini enye atuakde ke itim inua-otop, eyen -aŋwan emi ekerede Rhoda edi ediyere. 14Ndien ke adaŋemi enye ɔfiɔkde uyo Peter, idaresit inyimeke enye osio usuŋ; ntre ke enye efehe afiak oduk ufɔk akasian mmɔ oro ete Peter ke ada ke inua-otop. 15Mmɔ ete enye, Ibuot ifɔnke fi. Edi enye ɔsɔŋɔ uyo ɔdɔhɔ ete, edi kpa nte isiande. Edi mmɔ ete, Edi angel esie ke edi. 16Edi Peter afiak atuak: ndien ke ini mmɔ ebererede usuŋ, mmɔ ekut enye, idem onyuŋ akpa mmɔ. 17Edi enye anyanare ubɔk ɔnɔ mmɔ ete, edop uyo, onyuŋ asian mmɔ ido nte Ɔbɔŋ akadade osio enye ke ufɔk-ŋkpɔkɔbi. Enye onyuŋ ɔdɔhɔ mmɔ ete, Esian James ye nditɔ-ete ŋkpɔ emi. Ndien enye adaha aka ke ebiet eŋwen.
18Eyo ekesesiere, akamba ndutime odu ke otu mbon-ekɔŋ, ete, mme Peter odu mmɔŋ? 19Edi ke ini Herod oyomde enye edi mikwe, obup mbon-ukpeme mbume eti-eti abaŋa enye, onyuŋ ɔnɔ uyo ete ewot mmɔ. Ndien enye oto ke Judaea ɔsuhɔre ɔnyɔŋ ke Caesarea okodu do.
20Ekem Herod ayat esit eti-eti ye mbon Tyre ye Sidon: edi mmɔ esaŋa ye esit kiet etiene enye, ndien, ke ema ekenam ufan ye Blastus ekpeme-ubet edidem, ebeŋe emem odu, koro edide obio edidem ɔbɔk edem mmɔ. 21Edi ke usen eke enimde, Herod esine ɔfɔŋidem itie-edidem, ɔsuhɔre etie ke ebekpo, etiŋ ikɔ ɔnɔ mmɔ. 22Ndien mbio-obio efiori ete, Uyo Abasi, idige uyo owo. 23Edi idaha oro angel Ɔbɔŋ ɔtɔ enye, koro enye minɔŋɔ Abasi ubɔŋ: ndien ndɔŋ eta enye, enye onyuŋ akpa.
24Edi ikɔ Abasi ɔkɔri, onyuŋ ɔdɔdiɔŋ asuana.
25Ekem ke Barnabas ye Saul ema ekanam utom mmɔ ema, mmɔ eda John, emi ekotde ekedian Mark, edaha ke Jerusalem eŋyɔŋɔ.
Obecnie wybrane:
UTOM MME APOSTLE 12: ENA
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Efik Old Bible With Sectional Headings © Bible Society of Nigeria, 2013, 2019.
