ᒐᓂᓯᔅ 7
7
ᑲ ᐃᔅᒋᐸᒡ
1ᐊᑯ ᑎᐸᔨᒋᒐᓱᐤ ᐊᑕᑦ ᓄᐛᔨᒋ, “ᐳᓯᒃ ᒋᔾ ᑭᔭ ᐊ ᐸᐃᑯᔅᑲᓇᓯᔨᓐ ᐊᓐᑕ ᐅᐤᑎᒡ, ᒋᔾ ᒥᒄ ᒋ ᐸᐃᑯᓯᓐ ᐊ ᑯᐃᔅᑯᑕᑎᓯᓐ ᐅᑕ ᐊᔅᒋᒡ᙮ 2ᒐ ᐅᑎᓂᑥᐤ ᓇᓂᔄᐅᑕᒡ ᑕᑐᐎᒡ ᒥᓯᐛ ᐊ ᐃᓯᓇᑯᓯᒡ ᐊᐛᓯᓯᒡ, ᒐᒋ ᒧᐛᑭᓄᐅᒡ ᑭᔭ ᒐᒋ ᒥᑐᔅᑕᐊᒪᒐᓄᐅᒡ ᑭᔭ ᓇᓂᓱ ᐊᓐᒡ ᑯᑎᑭᒡ, ᐸᐃᒄ ᓇᐸ ᐊᐛᓯᔅ ᑭᔭ ᐸᐃᒄ ᓄᓴ ᐊᐛᓯᔅ, 3ᑭᔭ ᒐ ᐅᑎᓂᑥᐤ ᓇᓂᔄᐅᑕᒡ ᑕᑐᐎᒡ ᒥᓯᐛ ᐊ ᐃᓯᓇᑯᓯᒡ ᐱᔭᓱᐅᒡ, ᐱᔅᒐ ᓇᐸᔭᓱᐅᒡ ᑭᔭ ᐃᔎᔭᓱᐅᒡ᙮ ᒐ ᐃᑐᑎᒥᓐ ᐅ ᒐᒋ ᓇᓂᑎᒻ ᐃᑕᒡ ᐊᐛᓯᓯᒡ ᑭᔭ ᐱᔭᓱᐅᒡ ᐊᔅᒋᒡ᙮ 4ᒋ ᓂᔄᐅᑕᒡ ᑕᑐᐤ ᒋᓯᑲᒐ ᓂᑭ ᐃᑎᓴᐊᓐ ᐊ ᒋᒺᒡ ᐃᔅᐱᔅ ᓇᐅᐎᔪᐛ ᒋᓯᑲᐛ ᑭᔭ ᓇᐅᐎᔪᐛ ᑎᐱᔅᑲᐛ, ᑭᔭ ᓂᑭ ᓂᓱᐅᓇᒋᑕᓐ ᒥᓯᐛ ᐊ ᐱᒪᑎᓯᒥᑲᒡ ᒐᒂᓐ ᐅᑕ ᐊᔅᒋᒡ᙮”
5ᑭᔭ ᓄᐛ ᒋ ᐃᑐᑎᒺᐤ ᒥᓯᐛ ᒐᒂᔪᐤ ᑲ ᐃᑎᑯᑦ ᒐ ᐃᑐᑕᐧᒃ᙮
6ᓄᐛ ᐊᓱᑕᒡ ᑕᑐᐤ ᒥᑕᓯᒥᑎᓄᐤ ᒋ ᐃᑕᑐᐳᓇᓱᐤ ᑲ ᒋᒋᐱᔨᒡ ᐊ ᐃᔅᒋᐸᔨᒡ᙮
7ᓄᐛ, ᐎᐛ, ᐅᑯᓴ, ᑭᔭ ᐅᓇᐊᑭᓂᔎᒪ ᒥᓯᐛ ᒋ ᐎᒋᐳᓯᒥᑯᐤ ᐅᐤᑎᒡ, ᒐᒋ ᒋᑎᓯᑕᒡ ᐊ ᐃᔅᒋᐸᔨᒡ᙮ 8ᒥᓯᐛ ᑕᑐᐎᒡ ᐊ ᐃᓯᓇᑯᓯᔨᒋ ᐊᐛᓯᓴ ᐊ ᒥᔪᓯᔨᒋ ᒐᒋ ᒧᐛᑭᓄᔨᒋ ᑭᔭ ᐊ ᒥᑐᔅᑕᐊᒪᒐᐅᓄᔨᒋ ᑭᔭ ᐊᑲ ᒥᔪᓯᔨᒋ ᒐᒋ ᒧᐛᑭᓄᔨᒋ ᑭᔭ ᐱᔭᓱᐅᒡ ᑭᔭ ᒥᓐᑐᓯᒡ, 9ᒥᓯᐛ ᐊᐛᓯᓯᒡ ᒋ ᓇᑕᐅᒡ ᓄᐛᔨᒋ ᑭᔭ ᒂ ᐳᓯᒡ ᐅᐤᑎᔪᐤ ᐊ ᓇᓂᓱᑕᒡ ᒧᔭᒻ ᒋᓴᒪᓂᑐᐤ ᑲ ᐃᑎᓱᒪᑦ ᓄᐛᔨᒋ᙮ 10ᑲᒋ ᓂᔄᐅᑕᒡ ᑕᑐᐤ ᒋᓯᑲᒡ ᒂ ᐸᐱᔨᒡ ᓂᐱᔾ ᒐᒋ ᐃᔅᒋᐸᒡ ᐊᔅᒋᔾ᙮
11ᓄᐛ ᒋ ᐊᓱᑕᒡ ᑕᑐᐤ ᒥᑕᓯᒥᑎᓄᐛᐳᓇᓱᐤ ᐊᓱ ᓂᓱᐱᓯᒺ ᐊᓱ ᓂᔄᐅᑕᒡ ᑕᑐᓴᑉ ᒋᓯᑲᐛ, ᒥᓯᐛ ᐅᑕᐃᐸᓇ ᑕᒥᔅᑭᒥᑲᒡ ᑲ ᔪᑕᐱᔨᒋ, ᒋᓯᑯᔭᓐ ᒋ ᑕᑐᐱᔪᐤ, 12ᑭᔭ ᒂ ᒋᒋᐱᔨᒡ ᐊ ᒋᒺᒡ ᐃᔅᐱᔅ ᓇᐎᔪᐛ ᒋᓯᑲᐛ ᑭᔭ ᓇᐎᔪᐛ ᑎᐱᔅᑲᐛ᙮
13ᐊᓂᔭ ᒋᓯᑯᔪᐤ, ᓄᐛ ᑭᔭ ᐎᐛ ᒋ ᐳᓱᐅᒡ ᐅᐤᑎᔪᐤ ᒋᒡ ᐊ ᓂᔅᑎᔨᒋ ᐅᑯᓱᐛᐛ ᓴᒻ, ᐊᒻ ᑭᔭ ᒐᐸᑦ, ᑭᔭ ᐎᐛᐛ᙮ 14ᒥᓯᐛ ᑕᑐᐤ ᐊ ᐃᓯᓇᑯᓯᔨᒋ ᐊᐛᓯᓴ, ᐊ ᒪᒥᓯᑎᔨᒋ ᑭᔭ ᐊᔭᐱᓯᓯᔨᒋ, ᐊ ᑭᓄᐛᔨᒪᑭᓄᐅᒡ ᐊᐛᓯᓯᒡ ᑭᔭ ᒥᓇᔎᒡ ᑲ ᑕᑦ, ᒋᒡ ᐱᔭᓱᐛ ᒋ ᐅᑎᓇᐅᒡ᙮ 15ᓄᐛ ᒋ ᐅᑎᓇᐤ ᐸᐃᑯ ᓇᐸ ᐊᐛᓯᓴ ᑭᔭ ᓄᓴ ᐊᐛᓯᓴ ᒥᓯᐛ ᑕᑐᐤ ᐊ ᐃᓯᓇᑯᓯᔨᒋ, 16ᒧᔭᒻ ᑲ ᐃᑎᓱᒥᑯᑦ ᒋᓴᒪᓂᑐᐛ ᒐ ᐃᑐᑕᐧᒃ᙮ ᑲᒋ ᒥᓯᐛ ᐳᓯᒡ ᐅᐤᑎᔪᐤ, ᒋᓴᒪᓂᑐᐤ ᒋ ᒋᐸᐛᐤ ᔅᑐᐧᑭᓇ᙮
17ᓇᐎᔪᐛ ᒋᓯᑲᐛ ᒋ ᐃᔅᐱᔅ ᒥᔅᑎ ᒋᒧᓐ ᐊᑲ ᓂᑕ ᒋᒺᑕᒡ᙮ ᒐᒃ ᒋ ᑎᒥᐤ ᑭᔭ ᒋ ᐅᐸᐸᐛᐤ ᐅᐤᑦ᙮ 18ᒋᒋᐛ ᒋ ᒥᓯᐸᔭᐤ ᑭᔭ ᒋ ᒋᔅᑲᑎᒥᐤ, ᒋ ᐱᐸᒪᐊᓐ ᐅᐤᑦ ᐃᔅᐱᒥᒡ ᐊᔅᒋᒡ᙮ 19ᐊᔭᔅᒃ ᒋ ᒥᓯᐸᔭᐤ ᓂᐱᔾ ᑭᔭ ᐱᔅᑯᑎᓇᐛ ᓯᐸ ᒋᓯᑯᒡ ᓇᒪ ᐅᒋ ᓄᑯᓇ᙮ 20ᐅᔅᑕ ᓂᓱᔪᐤ ᐊᓱ ᐱᑕᑕᒡ ᑕᑐᐤ ᒥᓯᑦ ᒋ ᐃᔅᐱᓯᐸᔭᐤ ᓂᐱᔾ ᑕᐧᑯᒡ ᐊ ᐃᔅᐱᑎᓇᒡ᙮ 21ᒥᓯᐛ ᑲ ᐱᒪᑎᓯᒥᑲᒡ ᒐᒂᓐ ᐊᔅᒋᒡ ᒋ ᓂᓱᐅᓇᑕᓐ, ᐱᔭᓱᐤ ᑭᔭ ᐊᐛᓯᔅ ᑲ ᑭᓄᐛᔨᒪᑭᓄᐅᑦ ᑭᔭ ᒥᓇᔎᒡ ᑲ ᑕᑦ ᐊᐛᓯᔅ ᑭᔭ ᒥᓯᐛ ᐃᔪᐤ᙮ 22ᒥᓯᐛ ᑲ ᐊᔭᑦ ᐱᒪᑎᓯᐤ ᔭᔭᐅᓂᔪᐤ ᑭᔭ ᑲ ᐎᒋᑦ ᐸᒂᔅᑭᒥᑲᒡ ᒋ ᓂᐱᒥᑭᓐ᙮ 23ᒋᓴᒪᓂᑐᐤ ᒋ ᓂᓱᐅᓇᒋᑕᐤ ᒥᓯᐛ ᑲ ᐱᒪᑎᓯᒥᑭᓂᔨᒡ ᒐᒂᔪᐤ ᐊᓐᑕ ᐊᔅᒋᒡ, ᐃᔪᐛ ᑭᔭ ᐊᐛᓯᓴ, ᑭᔭ ᐊ ᔭᔭᒋᒥᑭᓂᔨᒡ ᒐᒂᔪᐤ ᒧᔅᑎᔅᑭᒥᒡ, ᑭᔭ ᐱᔭᓱᐛ ᐃᔅᐱᒥᒡ, ᒥᓯᐛ ᒋ ᓂᓱᐅᓇᒋᐊᑭᓄᐎᒡ ᐅᑕ ᐊᔅᒋᒡ᙮ ᒥᒄ ᓄᐛ ᒋ ᑕᐤ ᑭᔭ ᐊᓐᒡ ᑲ ᑕᒡ ᐊᓐᑕ ᑲ ᒥᓴᔨᒡ ᐅᐤᑎᔪᐤ᙮
Genesis 6.9-22; 7.24; 8.14-19 (Proper-4 Year A)
24ᑭᔭ ᐸᐃᑯ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐛ ᒋᓯᑲᐛ ᒋ ᐃᔅᐱᔅ ᑎᑯᓐ ᓂᐱᔾ ᐊᑲ ᓄᒂᒡ ᐊᔅᒋᔾ᙮
Obecnie wybrane:
ᒐᓂᓯᔅ 7: ᓇᔅᑲᐱ
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
