Lc 3:4-6

'Ixta x'aj yel'ch tas tz'ib'b'il can yuj jun schecb' Dios Isaías sb'i, yuj yab'xil Juan cha, yic yaln can Isaías chi 'ixtic: 'Ay jun 'aw tz'och 'a cusltac lu'um, tzyaln 'ixtic: B'oc sb'e Cajlil, caw tojl tzeyutj sb'e cha. 'A'c lan̈xoc smasnil lum ch'olctac, 'a'c pan̈nb'oc smasnil lum witz. Ax jun tzo'n̈ b'e cumctac, tojl xoj tzeyutej. Ax jun tzo'n̈ b'e amquixtac, caw lab'ntac tzeyutej. Ax yiln eb' 'anma smasnil, to 'ay jun colnb'il tzyac' Dios, xchi jun 'aw cha, xchi 'a Ch'an̈ Un̈ cha.