Chenesis 13
13
1Mihma Eblam ʋt ilap, micha tekchi, micha nana im a̱sha tuk moma aiena kʋt Echip a̱ kohchʋt mintit, micha Lot ʋt ibafohka ho̱ oka mahli ka̱ ai ʋla tok.
2Micha Eblam ʋt nanʋlhpoa, micha tʋli hʋta, micha tʋli lakna aiena kʋt in laua fehna hatok.
3Atuk osh oka mahli ya̱ ʋttʋt falamʋt mintit Behlel, yʋmmʋt Behlel micha Hai iti takla yakni talaia ho̱ ʋmmona ka̱ im ʋlhtipo ʋt a hikia tok atok;
4Ʋmmona ka̱ alta ai ikbi tok yakni talaia yo̱ ʋla tok: micha yʋmmak o̱ Eblam ʋt Chihowah ya̱ hochifot ai i̱ pa̱ha̱ya tok.
5Mihma Eblam a̱ awant ia tuk ʋt Lot ak kia nanʋlhpoa chipinta, micha nan ʋlhpoa hochito, micha ʋlhtipo puta aiena kʋt im a̱sha hatok.
6Mihma yakni ʋt ik im ono hatuk osh, itʋpehʋt a̱ha̱shwa he keyu tok: imila̱yak chinto hatuk okʋt, itʋpehʋt a̱ha̱shwa he keyu tok.
7Atuk o̱ Eblam i̱ nan ʋlhpoa apistikeli ʋhleha, micha Lot i̱ nanʋlhpoa apistikeli ʋhleha aiena kʋt itachowa tok: micha mihmʋno Kenanait okla, micha Pelissait okla aiena kʋt yakni yʋmma a̱sha hatok.
8Mihma Eblam ʋt Lot a̱ Ʋno, micha chishno piti takla, micha a̱ nan ʋlhpoa apesʋchi ʋhleha, micha chi̱ nan ʋlhpoa apesʋchi ʋhleha aiena iti takla ya̱ itachowa kʋt iksho kashke; chim asilhha lishke, itibapishi ʋhleha pia hokʋt.
9Yakni ʋt moma hosh chi tikba itoyula keyu cho? Is sa̱ filʋmmashke, chim asilhha lishke: ʋlhfʋbek imma hak o̱ ish ia hokma, ishtimpak imma hak o̱ ia lashke; keyukmʋt ishtimpak imma hak o̱ ish ia hokma, ʋlhfʋbek imma hak o̱ ia lashke, im achi tok.
10Mihma Lot ʋt akachakali mʋt, Chatan yakni patali moma kʋt kanima moma kia oka laua achukma kʋt a̱sha; Chihowah yʋt Sotom, micha Komollah ya̱ okpʋnit ik tahlo ki̱sha ma, Chihowah im osapushi ak o̱ chohmi cha, Soa ish chukowa Echip yakni ak o̱ chiyuhmi tok a̱ pi̱hi̱sa tok.
11Yohmi mʋt Lot ʋt Chatan yakni patali moma ilap immi achi̱ hosh atokoli mʋt, Lot ʋt hʋshi akochaka pilla ho̱ ia tok: yohmi ma iti̱ filʋmmit okla tok.
12Eblam ʋt Kenan yakni ak o̱ ai ahanta tok; mikma Lot ʋt yakni patali tʋmaha holihta taloha kak o̱ ai ʋtta cha, Sotom pilla hak o̱ im ʋlhtipo ya̱ hilechi tok.
13Yohmi kia Sotom hatak ʋhleha hʋt haksi fehna cha, Chihowah itikba ya̱ nanashʋchi atampa fehna tok.
14Atuk o̱ Chihowah yʋt Eblam a̱ Lot ʋt i̱ filimmi ha ya̱, Himak a̱ akachakali cha, ish aiʋtta ka̱ hikiʋt falʋmmi imma, micha oka mahli imma, micha hʋshi akochaka imma, micha hʋshi ai okatula imma aiena ka̱ pit ish hopo̱koyashke:
15Yakni ish pi̱sa ka̱ mominchit chishno, micha chim isht aiunchololi aiena ka̱ immi bilia he mak o̱ ima la chi̱ hoke.
16Mikma chim isht aiunchololi ya̱ lukfi pushi yakni paknaka aiasha kak o̱ chiyuhmichi la hi oke: yohmikma hatak nana hosh lukfi pushi yakni paknaka aiasha ka̱ hotihnʋt tahla hinla hok mak o̱, chim isht aiunchololi ak kia holhtina hi oke.
17Wakaya cha yakni afalaiaka, micha apʋthaka nowʋt hlopulli, chima la chi̱ hoka, im achi tok.
18Yohmi ma Eblam ʋt im ʋlhtipo ya̱ kanʋllichit Mamli i̱ baiyi Heblon yakni talaia hieli ka̱ ont ai ʋtta tok: micha yʋmma Chihowah ya̱ alta im ikbi tok.
Currently Selected:
Chenesis 13: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913