Va'Atəŋ 35
35
Yakob azarək sə Sikem a Betel
1 #
VAA 28:11-17
Maŋgəlva anah sən Yakob na: «Asili, dok a Betel asok də gəla adaka. Arkə təki nawzaɓ-Maŋgəlva adak sən Maŋgəlva dərban zən azok pay kədanzok səba məlmuk Esaw.»
2Yakob anah sitik ɗiy nani, gəm ɗiy en məzəddoŋ dəndən pak na: «Məndol meŋgilveɗ net ɗiy-ɗar na walaŋkumiŋki. Məbbur zukum, məddəɗet lukutɗe nokumu. 3Misilgən məlgən a Betel nərkəgən təki nawzaɓ-Maŋgəlva adak sən Maŋgəlva məs dəzlan su gala nəsaw addəv wəɗəka nawa. Asanək də in aka tive də təki nəmbat pakə.» 4Apsininik meŋgilveɗ net ɗiy-ɗar nek pak sən Yakob, en naveti dit metendeŋɗe na sləmeti; Yakob andik ammba wəlaŋga metiŋgin adawyaŋ na Ela, go'o də Sikem. 5Azaraŋgək sədaka, Maŋgəlva agbo'uk geslne aket walaŋgəleɗe dəsuləkini: ɗəf tay dəzbet kirtin Yakob ɓa.
6Yakob agapək a Luz, aka dələv na Kana'an va wənəh na a Betel, ndən dit ɗiy namban pakə. 7Arkək təki nawzaɓ-Maŋgəlva adaka, alvan na, «El-Betel» vi sədaki Maŋgəlva arban zən azan, gala adanzan sən məlməni.
8Debora, məs təzgələt Rebeka təmtəka, məndəkti dohoŋ ki Betel ammba wəlaŋga metiŋgin adawyaŋ na Elon məs Yakob alvan na: «Alon nawhəma.»
9Maŋgəlva arbanək zən aza Yakob əmpa, gala adamndan sə Paddan-Aram, yaŋ aɗi əzaɓ nan akani. 10#VAA 32:29Maŋgəlva aɓsən na:
«Iya nok Yakob iyi.
Kawyuki Yakob əmpa ɓa,
iya nok na Israyel adawsani.»
Yaŋ aya na Israyel. 11#VAA 17:4-8Maŋgəlva aɓsən na:
«Maŋgəlva Məzuɓappak nani.
Awan kiyuk kuɗiskuɗisi:
gebbet ɗiy temtem səzok adawgilyoŋgu,
milyeŋge səddəvuk adawgilyoŋgu.
12Dələv nəpsən Abraham gəm sən Isak, nəpsukuko;
wanəpsit dələv nan sit kirtuk dərɓogoko.»
13Maŋgəlva azlahək səzan sə təki məs apel dəndəni. 14#VAA 28:18,19Yakob ampək serek a təki məs Maŋgəlva apel dəndəni, serek na gərəm məs apesl də mbazla gəm aman mẽl akani. 15Yakob alvan təki məs Maŋgəlva apel dəndənəŋ na Betel.
Uwa na Benyamin gəm əmta nat Rakel
16Asilyoŋguk sə Betel. Ɓuhhoy səza Efrat gala Rakel tuwə; də tatwãh tuwə. 17Aka tədawwa də tatwãha, muwə-gil təpsət na: «Kəgeslne' ɓa, vi aŋkəŋ wiyni əmpa.» 18Adan əmpəs nat adawgilyen dəmta nata, yaŋ təlvan na, Ben-Oni va wənəh na wətən əhəma, na afən na Benyamin va wənəh na wətən dəzəŋ. 19Rakel təmtəka, məndəkət aka tive na Efrat, ndəni Bet-Lehem. 20Yakob ampək serek aka magamas nata: serek na magamas nat Rakel, adawyanən dəpaŋka'e.
21Israyel azarək sə təki nan, alək əmpa gizlirke balsən Migdal-Eder. 22#VAA 49:4Gala Yakob asan aka va nani, Ruben tek ɗufgət Bilha, gəra afəni, Israyel aprəmək wən nani.
Kirtin Yakob tahəŋ kəlaw kiyit sula: 23Kirtət Le'a: Ruben, daya na Yakob, Simeyon, Levi, Yuda, Isakar gəm Zabulon. 24Kirtət Rakel: Yosef, də Benyamin. 25Kirtət Bilha, balamək nat Rakel: Dan, Neftali. 26Kirtət Zilpa, balamək nat Le'a: Gad də Aser. Ndəɗaŋgə kirtin Yakob awə a təki məpəlayya na Paddan-Aram.
27 #
VAA 13:18
Yakob agapək ana Isak afənda, a Mamre na Kiryat-Arba, va wənəh na Hebron, adaki may Abraham də Isak assoŋgu. 28Wəzva na Isak agəɗək səkat də kaklaw dodopoɗo; 29Isak amtəka, asapək azet migilni, abək wəzva. May Esaw də Yakob kirtin andəkənka.
Currently Selected:
Va'Atəŋ 35: GB
Highlight
Share
ਕਾਪੀ।
Want to have your highlights saved across all your devices? Sign up or sign in
All right reserved