Va'Atəŋ 34
34
Simeyon də Levi tay əmpəlnən kiyət məlmit məraygəta
1Dina, wətət Le'a tuwə sən Yakob, təgilik kawle kirin muguluŋgit naka dəlvəska. 2Sikem, wətən Hamor mə Hitti, ɗəf metiŋ naka dələv vani, awlət arməta, avoŋgət aŋgarta. 3Appanək megenegenen pak akat Dina, wətən Yakob, aŋglutək waŋ gorukəŋ diyɗa, an sə makran adawpel səta. 4Sikem anah sən Hamor, afən na: «Agəm suwət waŋkəŋ ka gulku.» 5Yakob aprəmək na arga'atək Dina wətəni; ya adan kirtin awraŋ dit gazlaŋɗe, ndən ɓat hã gap pay azzoŋgu. 6Hamor, afən Sikem, agilik kawpel də Yakob. 7Kirtin Yakob amndoŋguk sura. Səza aprəməni, awlanən na wəra məreti, adaŋgək gədəv diyɗa sawɓa, vi Sikem agəɗək zəga nawla gəbay a Israyel də wəvoŋgət wətən Yakob; ya aɗɗa vas ɓa. 8Yaŋ an Hamor apel dənɗaŋ: amna: «Wətu Sikem aŋglutək wutukum kiyən boŋgu, məpsənət ka gulku. 9Məslãh də mənam addəv wəkaya: kəpsimingən kirtukum, mipsukumgən en nam tamə. 10Kəssoŋgən də gəla a walaŋmə, dələv tay abokum pəliyə: məssoŋ akan, məgəɗ va kəŋglaŋgə, dəsan ka nokumu.»
11Sikem anah sən afət goruk nak dit milmiŋgiɗit na: «Nərah mbəlembəle ama horokum, wanəpsukum an kəŋglaŋ pakə. 12Mətaw su arya gədak va nədawfaɗ pak də wəvəla, wanəpsukum va kədawnahaŋ suwəni, məpsuwət waŋ ka ɗak naw kaka'ə.» 13Kirtin Yakob, azlan sənən Sikem də Hamor afən də wən tər addəvən. Anahaŋ vasna vi arga'at Dina, milmiti. 14Aɓsitin na: «Məɓap na kaɗɗa zəgas kapsənət məlməm sən ɗəf məs dəskəlawra ɓa ɓa, vi vasna zəga narba wili azamə. 15Mədawsler də munokum na, ɗəf mizilin nokum pak dəskəl səkəlsa awra. 16Wamipsukum kirtim muguluŋgiti, wamikey en nokum, waməsam də mənokum, waməkkpaŋ ɗiy taka. 17An kətafnən na əskəlawra ɓa, waməgəmət wətəm waməmbatə.»
18Wən net lewi a mahara Hamor, də Sikem wətəni. 19Məza wəzan pay mbo'sa ɓa, gawla nak atafək wən nani, vi man tay akat wətən Yakob. Kiyən anan adawɗiyaŋ day ana afənda. 20Hamor, də Sikem wətəni, azzoŋ a mahara walaŋgəla-metiŋ net də wənah sit na: 21«Ɗiyiŋ wən tay a walaŋgəm dənɗaŋ ɓa, dəssoŋ də gəla a walaŋmə, dəɗɗaŋ va aŋglaŋgə, dələv dəsan abet pəliyə; məkey sim kirtiti, dəkeynin namə. 22Də as pak an ɗiyiŋ waslereŋ də mənam na, ɗiy mezeŋgleket nam pak dəskəlaŋ awra va neti. 23Gazlaŋɗe net də aryeɗ net pak akkpaŋ na ka nam laha, an məslerik dənɗaŋ assoŋgək də mənam faɗ ɓa sa?» 24Ɗiy en dəgilyoŋ a mahara walaŋgəla-metiŋ pak aprəmənək məs Hamor də Sikem wətən apeleŋgi; ɗiy mezeŋgleket dəgilyoŋ a mahara walaŋgəla-metiŋ pak askəlaŋgək awra.
25Aka pay mohoko'o agəɗə, huwwa agəɗək mondo'õslõ tay əsseti may Simeyon də Levi, kirtin Yakob, milmiŋgiɗit Dina, atoŋgoŋ də masalam avet a walaŋgəla-metiŋ məza də geslne ɓa, abeyninik zel pak dəwən neti. 26Abeyninik may Hamor də Sikem wətəni, agəmtənək Dina səna Sikem da, ndəɗaŋ viti. 27Kirtin Yakob atoŋgoŋguk aket ɗiy aɗiyaŋ sitin vaŋvĩ naka, andetinik zəgeɗ na walaŋgəla-metiŋ, vi arga'atən milmiti. 28Andetinik gilew net dit wasliɗe neti, korɗe neti, zəgeɗ na walaŋgəla-metiŋ dit en na poho. 29Andetinik aryeɗ neti, kirtiti, gil neti, akkporinik zəgeɗ səŋgil pakə.
30Yakob aɓsit may Simeyon də Levi na: «Kəkiyaŋ səwənək əray abet ɗiy naka dəlvəŋka, mə Kana'anɗe dit mə Perziɗe pakə. Ŋgbəra'a mənan aret ɗarə, wakkalaŋ akaw kawbaywəni, kawzawiy in də gəla naw pakə.» 31Azlan sənən na: «Adahək kakkpaŋgat məlməm ka məpolkoyok kan sa?»
Currently Selected:
Va'Atəŋ 34: GB
Highlight
Share
ਕਾਪੀ।
Want to have your highlights saved across all your devices? Sign up or sign in
All right reserved