VPOM 6
6
Dius dah Lhung cho
1Nyeisjvng thoq mas dius jebais zoh loh uhlyis, nyamoq gas nyelo jens nyoshoq khoeu los.#Yob 1.6, 2.1 2Gywes so loloeu jens gas hau cangsoeu lonyi jens yungh yvlyis nyvng lyis nyamoq gas hauh bang lyis o khyvlyis khyen lha nyi tsain hwank. 3Hauh uhlyis Yhensain taiq zis gas, Dius gas suih shoh nghuot yvmvyah ngah dyos gas seq shei bang yah vcaiq vto ma yoh nyeis das. Housoeh las nyamoq dah buisnyeis gas dvxo aiqci zvn dvnghuot das, ge. 4Hauh buisnyeis lyis nyeisjvng thoq mas dam dius tsain nyeis. Hauh thang lhyi gywes so loloeu jens gas cangsoeu lonyi jens jyank mas los las nyamoq masyah loshang tsain bos. Nyamoq gas gohlhain nyings hoeuh dah thoeuqzoe jens nghuot.#Gyu 13.33
5 Yhensain ka nyeisjvng thoq mas cangsoeu dius lhung thank zis tsain kuot los yvlyis nyvng. Nyamoq ehnyet khau mha vjangh ma gis zis nghamh thuq nyeis.#Mat 24.37; Luk 17.26; 1Pt 3.20 6Yhensain ka nyang nyeisjvng thoq mas cangsoeu dius lyis kuot toh yvlyis auhuiq las nyah nhaiqlom mas kuk nyeis. 7Housoeh las Yhensain taiq zis gas, Ngos gvnkhanh toh dah dius, gaunyhauq gaudu yahge dang dah nghoq lyis nyeisjvng thoq masyah lhyang nyang mhont das: khasoeh ge lyis nyamoq lyis gvnkhanh gvng mas ngos auhuiq, ge. 8Nghuot laus eq Noa gas Yhensain dah xikkhonh mas nyoqzons doeus.
Noa Cho
9Heika Noa dah diusjangh caiq cho nghuot. Noa gas nyah vcaiq bang mas dan, dyinghjet soeu nghuot. Noa gas Mangso yah dvgeh suh e.
10Noa mas Shem, Ham, Yaphet ge dah loloeu somh yuk bos.#2Pt 2.5 11Gvshih nyeisjvng dius dvnganh gas Mangso xikkhonh mas dyoqbis loh. Nyeisjvng gas lhuot zo, bat goh sat goh zis yah kyingh dyingh joq. 12Mangso ka nyeisjvng thoq mas yoeuh kat lyis, hauh zis gas dyoqbis goeus: khasoeh ge lyis suihshoh dvnganh gas nyeisjvng thoq mas nyamoq cho pheh dyoqbis loh.
13Hauh uhlyis Mangso Noa lyis taiq zis gas, Suihshoh dvnganh lyis mhont das zis ngos nghamh thyet goeus. Khasoeh ge lyis hauh bang gvng mas nyeisjvng gas lhuot zo zis yah dyingh joq. Housoeh las, nyeisjvng yah dvgeh ngos nyamoq lyis mhont das. 14Nah xiklyis Gofa saiq yah sangpho dvlom tsuk aq; houmha yvp tsain kat las vkhau yahge vthoq pheh eq saiqgyei yah juot aq. 15Nvng kuot das vzwvng gas, sangpho xing choeu loqbon somhxo, lvm choeu loqbon oengci, nyhang choeu loqbon somhci nghuot. 16Nvng hauh sangpho lhyi mau chah. Tyoyvm yahge yhenkhung jo mas loq dvbon toh aq. Tyoyvm dvshot mas sangpho khomh dvkoeuq kat aq. Nyhen tsank, vlvt tsank, nyhang tsank, somh tsank nghuot chah. 17Yoeuh aq, Maukhung o mha kang bos las dwis ya dwis yvlyis mhont das xiklyis ngos nyeisjvng mas dvjeis lhyi nhang das. Nyeisjvng mas zis dvnganh shei das. 18Nghuot laus eq ngos gas nvng yah thanghchvp toh das. Nvng yahge nah loloeu jens, nah yhensain nyhiq yahge nah doeusmuh jens eq nvng yah dvgeh sangpho mha wvng das. 19Nvng yah dvgeh kang luiq das xiklyis dwis ya dwis dah gaunyhauq gaudu vja ja, vlus vzains dvzomh zomh sangpho mha yoeus kat aq. 20Nghoq eq, gaunyhauq eq, nyeisjvng mas du shweh loh ja dvnganh, kang dwis das xiklyis nyang nyau nyang mas dvzomh zomh nah jyank mas tsain los das. 21Zo gis dah zonoms vja ja yoeus yung toh aq: houka nah xiklyis eq, nyamoq xiklyis eq wom duot das. 22Noa gas Mangso nyang lyis tying toh zis yah dvyhangteh dvnganh kuot.#Heb 11.7
Currently Selected:
VPOM 6: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.