Matius 13
13
Pinoiradan do Iso Tulun Mongungumo
(Mar. 4:1-20; Luk. 8:4-15)
1Tadau nogi diri do linumabus i Yisus mantad si valai, om ongoino dii Isido ogom siri disan do Botung Tagajo do Golilia do monuduk di tongotulun. 2Om sonrikot-rikotno dii iri tongotulun do oguu dii marong do sinumoliput di Yisus gosob do sinumako Isido siri talud om ogom nogi dii. Iri nopo i tongotulun diri nga miningkakat kasangkat siri timbing vaig. 3Om oguu ponudukan di Yisus inanuJo do poiradan do ituduk Disido diolo do ka, “Kivaro iso tulun do mongungumo do minongoi pasasad di linsou. 4Om pasasadono dii iri linsou disido, kivaroi nokotijas siri ralan, om rikotno dii i tongotombolog do mongoi monutuk diri linsou gosob do naavi. 5Om kivaro nogi i nakasasad siri kovotuvan iri tana tonipis, om oruai sinumobul do oribau gia i tana. 6Nga kosidangai nopo dii iri do tadau om nolonoti dii gosob do norujou i nisasadjo sabap do au aralom kinoongoio di gamutjo. 7Om kivaro nogi i nakasasad siri pantok do korugijan, om iri nga sinumobul i linsou nga tinolidan i korugijan, irino dii do rinumujou iri nisasad do nokoluputan. 8Om kivaro nogi dii iri nakasasad siri tana di aandai, do sinumobul om irino dii do minonguva asapou. Kivarono tolu nopulu, kivaro onom nopulu om kivaro nogi aatus i tuvajo. 9Nga isaai nopo iri kitolingo, rumongouno marong diti tinangaranKu,” kadi Yisus.
Tujuan do Poiradan di Yisus
(Mar. 4:10-20)
10Om rikot ikoino dii iri tongotulun di Yisus siri Disido do mongoduat Disido nong nokuro do poiradan noopo tangaronJo do monuduk di tongotulun toguu diri.
11Nga jawapno dii i Yisus dagai, “Ikovu nopo om onuan kovi do toilaan supaya koilo kou diri aupo nivantang si di tongotulun di pogulu pasal nong potingkuro i Kinoringan momorinta di tongotulunJo. Nga iolo nopo tulun tasapou nga aui poiloon diri. 12Do iri nopo tulun di kivaro nunu nopo om onuan kavagu do oguu. Nga iri nopo tulun di auso, nga insan kivaropo okuyak si disido nga solodon kasangkat. 13Om irino do poiradan noopo tangaronKu nong monuduk Okuno diolo do mongontong daa iolo nga aui koontong, om mongkinongou daa iolo nga aui iolo korongou om au kaarati di komoionKu. 14Om iri nopo gaagaya diolo dii nga poporikot di tinangaran di Kinoringan iri nipoilo laaid di nabi Yasaya, i popolombus di tinangaran do Kinoringan di pogulu, do irad diti,
‘ “Sonrongou-rongou kovi nga au kovi kaarati.
Songontong-ontong kovi nga au kovi koontong,
kanto nono di tongotulun Israil.
15Do ongokodou i ginavo di tongotulun diti,
om somponon diolo i tolingo doisido kondiri,
supaya do au korongou i tolingo diolo,
om poingkodomon diolo i mato
supaya do au koontong i mato diolo
om au kaarati iolo
gosob do aui kopuriman iolo do rumorogo di dusojo,
om ompunanKui daa iolo,”
kadi Kinoringan,’ kadi Yasaya.#Antangai Yasaya 6:9-10.
16Nga ososogit kouno marong do koontong om korongou kovi. 17PatangaronKu marong dikovu iti do oguuno i tongonabi, i popolombus di tinangaran do Kinoringan di pogulu, om i tongotulun do abanar di pogulupo do siontong marong daa inong diti naantangan muju maino, nga aui dii nokoontong iolo; om sirorongou daa iolo inong diti ponudukan i norongou muju, nga aui nokorongou iolo,” kadi Yisus.
Komoion diri Poiradan di Tulun Mongungumo
18Om kadi Yisus kavagu, “Rongoono om rotiono marong do itino komoion di poiradanKu diri iso tulun i mongungumo. 19Iri nopo linsou do nokotijas siri ralan nga irad di tinangaran do Kinoringan i nakasasad siri ginavo do tulun, do nokorongou isido di ponudukan do potingkuro i Kinoringan momorinta di tongotulunJo nga au kaarati. Nga rikotno dii i kotua do rogon mongoi monolod diri nakasasad siri ginavojo. 20Om irad nogi dino iri linsou di nakasasad siri kovotuvan do irino irad di tinangaran di Kinoringan di nakasasad siri ginavo do tulun, do korongou nopo dii isido om asanang dii i ginavojo om turus do aparsaya. 21Nga au dii momugamut i tinangaran si ginavojo om irino dii au atatap i kaparsayaanjo. Jadi rikoto dii isido do kosusaan om i pokorualan do tulun sabap do aparsaya isido di tinangaran do Kinoringan, om irino dii turus do nokoluoi i kaparsayaanjo. 22Om iri nopo i nakasasad siri korugijan nga irino irad di tinangaran do Kinoringan i norongou di tulun do au dii minonguva si ginavojo, sabap sumurau i ginavojo diti kosusaan maso maino, om aandaian nogi isido kumaya om irino dii nokoluputan iri tinangaran di Kinoringan si ginavojo. 23Nga iri nopo dii i nakasasad siri tana do aandai, om irino dii minonguva tolu nopulu, onom nopulu ko aatuspo, nga irino irad di tinangaran do Kinoringan i nakasasad siri ginavo di tulun do minongkinongou om mangaarati marong, om muang-ruang dii i gaagayajo do aandai om irino tuvajo,” kadi Yisus.
Poiradan do Iso Musu Manasad do Kutad
24Iti nga poiradan nogi do pinotuduk di Yisus di tongotulun, do kaDisido, “Potingkuro naku i Kinoringan momorinta di tongotulunJo? I Kinoringan nopo nga irad diri iso tulun minangasok do parai. 25Nga ontok di nokopingoodop i tongotulun, om rikotno dii i musu di mongungumo siri dumo do papasasad diri linsou do kutad, do pinalamud diri parai pinaasok, om pogidu nogi dii i musu. 26Kosobul nopo dii i parai, om nokoponguva ampa nogi dii do otutunan marong iri kutad.
27Nga rikotno dii i tongoturiponjo do mangaabar di tuanjo, sanganu di dumo, om kadiolo, ‘Tuan, parai iri niasoknu siri dumonu diri, om nokuro bala do kikutadi dii?’ ka.
28Nga kadi tuan, ‘Irino musu pasasad dino,’ ka.
Om kadi turipon kavagu, ‘Mookoi naku do ongoionja vutuso iri?’ ka.
29Nga kadi tuan, ‘Adai vutuso muju do kaanggum nopo i parai nong momutus kou. 30Pivojoon sumobul gosob do orikot i kapangamatan, ampa ipovutusku dikovu iri kutad, om poiongkos-ongkoson muju do tutudan. Om iposimponku nogi dikovu i parai siri poijananku do parai,’ kadi tuan diri sanganu di dumo,” kadi Yisus.
Poiradan do Sayat do Sansam
(Mar. 4:30-32; Luk. 13:18-29)
31Iti nga poiradan nogi do pinotuduk di Yisus, kaDisido, “Potingkuro naku i Kinoringan momorinta di tongotulunJo? Nga iri nopo om miirad diri iso sayat do sansam i pinasasad do tulun siri dumojo. 32Sayat nopo diri om opooyok mantad di sayat vokon. Nga sombia nopo iri do kosobul om lumanggau marong nga agajo nogi mantad diri sayur vokon om olombon i guvasjo, gosob do obuli i tombolog rumikot do momurumun siri tongoraanjo,” kadi Yisus.
Poiradan di Poudor Pangambang do Tapung
(Luk. 13:20-21)
33Iti nga poiradan nogi di Yisus, kaDisido diolo, “Potingkuro naku i Kinoringan momorinta di tongotulunJo? Nga iri nopo om miirad nogi di poudor inongoi di tongondu pagavul do intolu koponu iri sukuban diri tapung gosobi do kinumambang kasangkat i tapung,” kadi Yisus.
Pakajon di Yisus do Poiradan do Monuduk di Tulun
(Mar. 4:33-34)
34Om poiradan kasangkat i ponudukan di Yisus do monuduk di tulun toguu; om au minonuduk Isido diolo nong okonko kivaro poiradan. 35Om iri nopo kinotudukan di Yisus dii nga porikot diri tinangaran di Kinoringan iri tinulis di nabi, i popolombus di tinangaran do Kinoringan pogulu, do irad diti,
“ ‘PatangaronKu noopo diolo do poiradan,
om popoilo Oku diri aupo nivantang mantad di voruno iti vonuvo,’
kadi Kinoringan,”
kadi nabi.#Antangai Buuk Sinding 78:2.
Komoion diri Poiradan do Kutad
36Nga iduaino dii di Yisus iri tongotulun toguu do minuli si valai ijononJo. Om ongoipo dii ikoi i tongotulunJo do mongoduat Disido do, “Guru, onu komoion diri poiradanNu pasal do kutad siri dumo?” ka.
37Om tudukai ikoino dii di Yisus, kaDisido, “Iokuno i Sinumiliu do Tulun irad diri tulun minangasok do parai. 38Om iri nopo dumo om itino vonuvo. Om parai nopo om kasangkat tulun i porintawon di Kinoringan. Om iri nopo kutad om irino tulun maja di kotua do rogon. 39Om iri nopo musu i pasasad do kutad om irino kotua do rogon. Om komoion nopo do pangamatan nga irino pongukuman diti vonuvo ontok do tadau kiamat. Om iri nopo i mongomot om irino i moloikat. 40Om iri nopo kutad do untunon om potunuvon siri tapui nga irino pongukuman diti vonuvo ontok do tadau kiamat. 41-42Iokuno, i Sinumiliu do Tulun, monuu di moloikatKu do monguntun kasangkat diri tulun do mamamalid do vokon, om i tulun vokon diri araat gaagayajo mantad siri KopomorintaanKu. Kasangkat diolo nga poropugon siri pinuang do tapui, i pantok do songiadan om sangarit-ngarit i nipon diolo do oolian kasansara. 43Om ontok diri, iri nopo tongotulun do abanar nga irad di tadau do tumitiu siri Kopomorintaan di Tama tokou. Isaai nopo iri kitolingo, rumongouno marong diti tinangaranKu,” kadi Yisus.
Poiradan do Arata Saralom Tana
44Iti nga poiradan nogi di Yisus, kaDisido, “Potingkuro naku i Kinoringan momorinta di tulunJo? Irino irad diri tulun nokoontong di arata pinolosok siri dumo. Om kaantangai nopo dii di tulun i arata diri om losokono dii kavagu. Om ongoino dii isido do aandaian marong do padagang kasangkat di tongobarangjo vokon do maganu di siin, om pomoli nogi dii isido di dumo di kivaro arata,” kadi Yisus.
I Poiradan do Iso Touki Mogium do Barang diri Vaalon do Kalung
45Om kadi Yisus kavagu, “Potingkuro naku i Kinoringan momorinta di tongotulunJo? Irino nga irad do touki di mogium do muntiara.#13:45 muntiara: guliga ko bulawan, irino barang diri vaalon do kalung di oorogo marong 46Om nakaayang nopo dii isido diri iso muntiara, ulino dii isido do padagang kasangkat diri barangjo laid supaya mogium do siin do pomolijo diri barang i vaalon do kalung di oorogo marong,” kadi Yisus.
I Poiradan do Pukot
47-48Isopo vagu poiradan di Yisus di pinotuduk diolo, kaDisido, “Potingkuro naku i Kinoringan momorinta di tongotulunJo? Isido nopo om irad di tongotulun pataan di pukot. Om kungkumo nopo dii i pukot diri nga oguu dii marong moisosondiang sada do nokosulung. Om gajatono dii diolo i pukot do pakaa siri tindal, om ogomno dii iolo do momili, om monguntun diri sada taandai siri poijanan, om ombo i taraat pataamon diolo. 49Om irad nono diri ontok do pongukuman diti vonuvo ontok do tadau kiamat do rumikot i tongomoloikat do popirijang di tulun taraat om i tulun abanar. 50Om poropugon nogi dino iolo tulun taraat siri pinuang do tapui, i pantok do songiadan om sangarit-ngarit i nipon diolo do oolian kasansara,” kadi Yisus.
Ponudukan di Laid om i Vagu
51Pongoduatno dii i Yisus dagai di tongotulunJo, “Kaarati kovi kasangkat diri komoionKu?” ka.
“Oo, kaarati bo,” kanja.
52Nga kadi Yisus dagai, “Irad nogi diri pointikid-tikid do tulun monunuduk do Undang-undang Ugama, iri koilo nong potingkuro i Kinoringan momorinta di tongotulunJo, om moilo monuduk diri ponudukan di laid om iri vagu. Om isido nopo nga irad di iso sanganu do valai do popoimbulai di barangjo laid om iri vagu mantad siri pinataauanjo,”#13:52 pinataau: pinotoo kadi Yisus.
Auso Tulun Aparsaya di Yisus siri Bandar Nasarit
(Mar. 6:1-6; Luk. 4:16-30)
53Om koompus nopo dii i Yisus monuduk diolo diri piro-piro poiradan, om pampanauno dii Isido mantad siri 54do muli siri Nasarit, i kampungJo kondiri. Korikot nopo dii Isido siri kampungJo, om ponudukno dii Isido di tongotulun siri valai sasambayangan. Nga osumboijan dii marong iolo do nokorongou diri ponudukan di Yisus, om moiduuduat dii iolo do, “Inombo naku nontodon di kopintaran om kosunduvan Disido do inong diti toilaanJo? 55Isido bo iti i tanak di tukang kaju. Om okoniko i Moria iinoJo? Om okoniko i Yakub, i Jusip, i Simun om i Yudas oiadiJo, 56om kasangkat oiadiJo tongondu nga siti daton?”#13:56 daton: ditokou kadiolo. 57Nga aasaban dii mamarong iolo di Yisus om au aparsaya.
Nga kadii di Yisus diolo, “I nabi nopo, i popolombus di tinangaran do Kinoringan, nga au urumaton di tongotulun siri kampungjo om siri valaijo kondiri, nga siri pantok di vokon om ampa urumaton isido,” ka.
58Om auno dii oguu kosunduvan pinopoontong di Yisus siri do auso kaparsayaan di tongotulun.
Currently Selected:
Matius 13: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.